Jɔnn 13
13
Yisa kaah ŋunn u bɔɔnɔɔb a taafar ke uyom man
1Ni nan yin wonn kutaag Yuglagir a Chiigin le. Le Yisa nan nyi ke iyoo foo nin u nya dulinya nan yaan ki jo Baa-n ban. Waah pii nan jiɛ u yaab ban be dulinya nan yaan nin, le u nin nan ta u jiɛm man gbee-n kaah kpaa man ki wɔɔn bi.
2Baah nan nan be ji kunyiɛg a jiirin, ki miin ulinlaril pii nan kɔɔ Judasi Isikariya, wan ye Simɔnn a bija-n, ke un kɔɔr Yisa. 3Yisa kaah nan nyi ke Baa-n ta niwann biɛn ki ŋa u nɔɔn nin, le ki ke u nan nyann Uwonbɔr ban le ki ji yin jir Uwonbɔr ban; 4le u nan fii sir paab tijiir a ji bol nmɔn yaan, le ki nan pir u daali kan wee u yee paan ni, le ki ta kunaapoog ki gbin u chaŋ. 5Ni bɔɔn, le u minn nnyum ki ŋa kusɔŋin le ki ŋunn ŋunn u bɔɔnɔɔb a taafar, le ki ta kunaapoog kan gbin u chaŋin ki ŋmir i koor.
6U nan dan Simɔnn Piita ban, le u bei u ke, “Uyudaan, a yin ŋunn n taafar lee?”
7Le Yisa jiin ke, “Ŋaa la biɛ maah ŋaan nan nin ni, amaa a na li biɛ ni bɔɔn bu.”
8Le Piita ke, “Aai, ŋaa jɔɔ a ŋunn n taafari.”
Le Yisa jiin ke, “Ni ye maa ŋunniŋ ke, ŋaa kpiɛ n ban ni.”
9Le Simɔnn Piita jiin ke, “Tɔ man ke, laa ŋunn n taafar a binba, amaa ŋunn n nɔɔi nin n yul ki kpiɛu!”
10Le Yisa jiin ke, “Uninfo wan fun nin kpaan u ŋunn u taai le; u gbanann biɛn kaa jɔɔ tijaginn ni. Le nim kaa jɔɔ tijaginn ni, amaa naa ye nim biɛn ni.” 11Nan bu-n u nan nyi wan na yin kɔɔr u, mambu le u nan ke naa ye bininfob biɛn le kaa jɔɔ tijaginn ni.
12Waah nan ŋunn bi taafar ki diɛ-n, le u nan yee u wann yeewaŋ le ki jir u binbe bol. Le ki baan bi ke, “Ni biɛ maah ŋa nan ki sei ni nan waa? 13Ni yim ‘Wan wɔɔn’ le nin ‘Uyudaan’, le ni ye ibamɔn, nan bu-n maah ye wan le yen. 14Daandaan nan maah ye ni yudaau nin wan wɔɔnn wee ki ŋunn ni taafar nan, ni baantɔɔl li ŋunn tab a taafara. 15N wɔɔn ni limagil le wee ni li ŋaan ke maah ŋa nan sei ni-n. 16N bei ni ibamɔn le, utoontunn kaa be ki jon u daan wi, le ntoon mu kaa jon wan tun wi. 17Daandaan nan naah biɛ ni niɛ nan, ni ye ke ni ŋa man ke ni li kan tikaar.
18“Maa pag nan ki tenn ni biɛn ni; n nyi ban wee n nan gann. Amaa ni nan le yin che nan sɔb dɔ Uwonbɔr a gbɔŋin nin ŋa ibamɔn: ‘Min nin wan por n jiirin le nan lig ziɛnim.’
19“N bei ni le daandaan nan wee ni nin ŋa, ni nan ŋa ke ni ŋa yada ke min le yen.#13:19 Min le ye wɔɔn ke min le ye wan be kaa jɔɔ ndiɛmi. 20N bei ni ibamɔn le, wan chee maah tunn wan biɛn a bɔr ke u chee n bɔr le; le wan chee n bɔr ke u chee wan nan tunimin a bɔr le.”
Yisa kaah nan chinn wɔɔn baah li kɔɔr u man
(Matiu 26:20-25; Mag 14:17-21; Lug 22:21-23)
21Waah nan len nan a bɔɔn, le Yisa a pool nan bii ki naaŋin le u len npaan ni ke, “N bei ni ibamɔn le, ni ni u ba le yin kɔɔrim.”
22Le u bɔɔnɔɔbin nan gbiɛ lig tab, ki nin biɛnn waah len wan. 23Ubɔɔnɔɔr wan wee Yisa nan jiɛ-n, li nan ka Yisa a logil. 24Le Simɔnn Piita nan gabin ubɔɔnɔɔr nmɔn ki ke, “Baan u waah len wan na.”
25Le u nan gbeen jir Yisa paam, le ki baan u ke, “Uyudaan, u ye ulaa?”
26Le Yisa jiin ke, “U ma ye maah yin ŋu lisaabɔl nan kisaŋin ki sei wan nin.” Le ki ŋu lisaabɔlin kisaŋin, le ki taa sei Judasi Isikariya, wan ye Simɔnn a bija-n.#13:26 Yisa ŋa man ki wɔɔn ubɔɔnɔɔrin wan yin kɔɔr win kaah ye wan. 27Libol lan wee Judasi nan gaa lisaabɔlin, le Sintani nan kɔɔ u poolin.
Le Yisa bei u ke, “Ŋaah yin ŋa nan nin, ŋa ni weema.” 28Amaa ban nan be tijiirin yaan nin uba kaa nan biɛ nan bu wee Yisa nan len man ki sei wi. 29Judasi kaah nan guu iligin, bibam nan tiɛr ke Yisa bei u waah li da nan le kuchiigin bu, bee ki ta niba ki sei bilanjiim. 30Libol lan wee Judasi nan gaa lisaabɔlin, le u nan nyan. Le kunyiɛg nan nan ŋmiɛ.
Nsiim pɔm
31Waah nan jon nin, le Yisa ke, “Daandaan nan le Usaal a Bija-n yin kan kupag le Uwonbɔr yin kan kupag u ni. 32Ni ye ke Uwonbɔr kan kupag u ni ke, Uwonbɔr li sei u Bija wan be u ni-n kupag, le ki li sei u kupag nba bu.
33“N buwaab, maa yin be ni ban nin yuuri. Ni na li bam, n yin bei ni le daandaan nan, ke maah nan bei Juu yaab man nin: Nan yaan wee n chaa-n, naa li fir dan niin ni. 34N sei ni nsiim pɔm le: Ni li jiɛ taba. Ni kpaa le ni li jiɛ tab ke maah jiɛ ni man nin. 35Ni ye ke ni jiɛ tab ke, ni ma le li che uninfo biɛn biɛ ke ni ye n bɔɔnɔɔb le.”
Yisa kaah nan pag Piita kaah na li niɛ ke waa nyi u man
(Matiu 26:31-35; Mag 14:27-31; Lug 22:31-34)
36Le Simɔnn Piita nan baan u ke, “Uyudaan, a chaa laa?”
Le Yisa jiin ke, “Nan yaan wee N chaa-n, ŋaa li fir nɔɔ daandaan nan ni, amaa ni ŋa wama ke a li nɔɔ.”
37Le Piita baan ke, “Uyudaan, ba ŋa wee maa li fir nɔɔŋ daandaan nan naa? Ni ye nkum ke n li kpo a bu.”
38Tɔ le Yisa jiin ke, “A sin li kpo n buu? N beiŋ ibamɔn le, a li niɛ ke ŋaa nyimi itaa itaa, le ukooja nni mɔɔ!
Currently Selected:
Jɔnn 13: KUGL
Highlight
Share
Copy
Want to have your highlights saved across all your devices? Sign up or sign in
Komba New Testament © Bible Society of Ghana, 2014.
