Jɔnn 10

Upeekpaar a Bɔŋal

1“N bei ni ibamɔn le, uja wan kaa nɔɔ ntimansanmɔnn ki kɔɔ ipee a kpinkpenlin ni, amaa ki yug lagir niba paam ki kɔɔ ke, u ye unaayig le nin wan feen. 2Uja wan nɔɔ ntimansanmɔnn ki kɔɔ-n le ye u pee yin a kpaaru. 3Wan dɔ guu-n li loor ntimansanmɔnn ki sei u, le ipee-n pelig u kukɔl. U yi u pee yin a yin le ki ta i nya. 4U nan ta u tɔɔl yaai nmɔn biɛn nyan ke, u liin bi sam le bi paa u bɔɔn, nan bu wee u pee yin nɔɔ win ye baah gbir u kukɔlin le. 5Amaa baa li nɔɔ uchaan ni; ibamɔn buu, bi li guun jiɛn u, nan bu-n baa biɛr uchaan nin a kukɔli.”

6Yisa nan pag nin ibɔŋal le, amaa baa nan biɛ waah nan bei bi man ni.

Yisa Le Ye Upeekpaar Wan Ŋan

7Man bu le Yisa ji nan ke, “N bei ni ibamɔn le, min le ye ipee-n a diig a timansanmɔnn. 8Ban nan chinn dan nin min nin nan ye binaayigib le nin ban feen, amaa ipee-n kaa nan pelig bi bɔri. 9Min le ye ntimansanmɔnn; wan biɛn nɔɔm ki kɔɔ li kan feegab. U li nɔɔm kɔɔ ki nɔɔm nya, ki tan kan timɔɔr sɔɔn. 10Unaayigin dan le u nan su ki ku ki bii; min dan le ke bin kan limiɛfol, ki kan li nin linungbeel.

11Min le ye upeekpaar ŋan nin. Upeekpaar ŋan nin le taa u miɛfol ki kpenn ipee. 12Wan kpaa ipee nmɔn ki gaan tiyɔr kaa ye upee daan ni. Mambu u nan kan ligbingbel chaan ke, u jaar ipee-n le ki guun. Le ligbingbelin nan leg ipee-n ki worin. 13Nan bu wee u guun nin, u ye wan kpaa ki gaan tiyɔr le mambu u poobil kaa wii ipee-n bu. 14“Min li ye upeekpaar ŋan nin; n nyi n pee le n pee yin mu nyim, 15a li ke Baa-n kaah nyim man nin wee n mu nyi Baa-n, le n ta n miɛfol kpenn ipee-n. 16N jɔɔ ipee iba yaa ye likpinkpenl nan a peei. Ni kpaa le n taan itɔɔl ni. I mu li pel n kukɔl, wee i nlabir ipee iba yan nɔɔ tab ki jɔɔ upeekpaar uba.

17Nan bu wee n Baa-n jiɛm ye maah ta n miɛfol ki kpenn, wee ki jin nan gaa li-n. 18Uba kaa fee n miɛfolin nmɔn n ban ni, amaa n tɔɔl a wiib le n ta bil bi. N jɔɔ tininkper a pɔɔm ki li fir taa ki bil nin tininkper a pɔɔm ki ji li fir gaa li. N nan gaa nsiim nan n Baa-n ban le.”

19Imɔbon nmɔn nan che Juu yaabin ji nan bɔgira. 20Bi pam nan ke, “Kinaanbiig li jɔɔ u le u waar. Ba ŋa ni pelig u bɔraa?”

21Amaa le biba ke, “Ileen nan kaa ye kinaanbiig kaah jɔɔ wan a leen yi. Kinaanbiig li fir ligir ujɔɔn a numaa?”

Bi Nan Yii Yisa u

22Le Kuchiig kan tiɛr Jerusalam a wonjiɛn niin a yonn nan nan foo. Ni nan ye tiwar a yonn le, 23le Yisa nan chonn ki jin iwonjiɛn niin a nan paam bi nan yi ki ke Solomɔnn a dɔŋin. 24Le Juu yaab nan lagin ki jin u, ki bei u ke, “A ban ti li biɛnn ti potiɛlin ki tan kpaa ibayoo? Ni ye fin li ye Masiya-n ke, bei ti npaan ni na.”

25Le Yisa jiin ke, “N nan bei na, amaa le naa ban ni ŋa yada. Ligaril a siɛram yan wee n ŋa n Baa a yinl bu-n li pag seim, 26amaa naah kaa ye n pee yin bu le naa ŋa yada. 27N yaa pee pelig n kukɔl le; n nyi i, le i nɔɔm. 28N sei i limiɛfol lan kaa jɔɔ diɛm le, le yaa jɔɔ yin buri; uba kaa li fir fee i n nɔɔn ni. 29N Baa, wan ta i sei mi, yab jon ni biɛn na; uba kaa li fir fee i n Baa a nɔɔn ni. 30Min nin n Baa ye nba le.”

31Le Juu yaabin ji pii itangbag ke bin gabir u ki ku, 32amaa le Yisa bei bi ke, “N ta ligaril a siɛram takpem yan nyan Baa-n ban ki wɔɔn na. Ke i la baa bu wee ni gabir itangbag ni ku maa?”

33Le Juu yaabin jiin ke, “Taa gabiriŋ itangbag i ma bu, ŋaah sugir Uwonbɔr nbu, nan bu-n fin, usaal mu, nan ke fin ye Uwonbɔr.”

34 # Ilan 82:6 Le Yisa jiin bei bi ke, “Naah sɔb dɔ ni siimin naa? ‘N nan len ke ni ye iween le.’ 35Ni ye ke Uwonbɔr yin bima ban wee U mɔboi foon nin iween ke, le Uwonbɔr a sɔbim mu kaa kpenn ke, 36ke wan wee Baa-n nan gann wee u ye u yaa win ki tunn u dulinya nan yaan nin? Ba ŋa wee ni galim ke n sugir Uwonbɔr maah ke ‘N ye Uwonbɔr a Bija-n’ buu? 37Ni laa ŋa min yada see ke n nan tun n Baa kaah tun man nin. 38Amaa ni ye ke n ŋa ni ke, naah kaa le ŋa min yada nan, ni ŋa ligarilin yadau, wee ni mann biɛ ke Baa-n be n ni, le n be Baa-n ni.”

39Le bi ji nan ban bin choo u, amaa le u nan ŋmar bi nɔɔn.

40Tɔ le Yisa nan jir don Jɔdann a kpem ki jon nan yaan wee Jɔnn pii nan chinn fun Uwonbɔr a nyunfulin. Niin le u nan be 41le bininfob takpem nan dan u ban ki nan ke, “Nin Jɔnn kaah kaa le nan ŋa ligaril a siɛra liba-n gbaa, waah nan len man uja nan bu-n nan ye ibamɔn le.” 42Nin yaan le bininfob takpem nan ŋa Yisa yada.

Currently Selected:

Jɔnn 10: KUGL

Highlight

Copy