Litoonl 5

Ananiɛsi ni Safira a bɔr

1Uja uba mu nan be le u yinl ye Ananiɛsi, le u poo mu a yinl mu ye Safira, le bi nan kɔɔr bi paam ki gaa mi ligi. 2Le ki nyan ilig iba ki woon, ke u poo nyi i bu, amaa le ki ta yan gurin dan ki nan sei itoon nin.

3Le Piita baan u ke, “Ananiɛsi, ba ŋa wee a che Sintani kɔɔ a sufu ni, wee a por tibɔkar ki sei Kasi a Naaŋ ki nyan ilig yan wee a kɔɔr a paamin ki woon naa? 4Ŋaah nan kɔɔr npaan nin ni, maa nan ye a yaan lee? Ŋaah ji kɔɔr ki gaa ilig yan nin, yaa be a nɔɔn lee? Ke ba ŋa wee a tiɛr man a sufu ni naa? Naa ye uninfo le a por tibɔkar nmɔn ki sei, amaa ni ye Uwonbɔr le.”

5Ananiɛsi kaah gbir man n-yonn man ni, le u nyiɛr lu tum ki kpo. Le bijawaam choo ban biɛn nan gbir nan tun nmɔn. 6Le binaachipɔm yuur u ki pɔbin likinkenlin ki ta u nyan ki tan pii u.

7Le ni kpiɛ wama, le u poo mu kɔɔn, kaa la nyi nan ŋa. 8Le Piita baan u ke, “Beim ni, fin nin a chal a paam man wee ni nan kɔɔrin a ligi a biɛn sɔɔ?”

Le u jiin ke, “Nn i biɛn le yen.”

9Le Piita baan u ke, “Ba ŋa wee ni kpaag bimɔb, ki mag Uyudaan a Naaŋ aa? Lig! Ban ta a chal ki tan pii-n a taai li dɔ ntimansanmɔnn nan, bi ji li yuur a mu.” 10Libol nmɔn, le u mu nyiɛr lu u tum ki kpo. Le binaachipɔmin kɔɔn ki nan kan waah kpo dɔ, le bi ji yuur u mu nyan ki tan pii u bagin u chal. 11Le bijawaam nan mann choo biwonjiɛm a laguŋin nin ban biɛn nan gbir nan tun nmɔn takpem.

Ligaril nin lijinjeel a toon

12Itoon nin nan tun ligaril a siɛra nin lijinjeel a toon le takpem bininfobin a sisiigin. Biwonjiɛm biɛn nan ti lagin tab Solomɔnn a dɔŋin le. 13Hali nin bininfobin kaa nan jɔɔ li nungbeel bi ni-n, baa nan fir lagin bi ban ni, amaa le ki sin nan pag ki don Yisa a bɔɔnɔɔbin takpem. 14Nin nima biɛn ni, le bijab nin bipiib takpem nan ŋa Uyudaan yada le nin kpiɛ bi kanlin. 15Mambu le bininfob nan nyan nin bibaarib, ki paan bi gadum nin tiwandɔɔn wann bu, nsan gbaan ke Piita nan chaa jo n-yonn man ke, u jinjiim li lu bibam bu. 16Le bininfob ban be Jerusalam a tinbumin mu tu bibaarib, nin ban wee nnaanbiim mugir bin ki dan, le bi biɛn nan kan kutebug.

Baah nan mugir Itoon man

17Le biminmanib a yudaau nin u tab biɛn ban ye Sadusi yaab nan jɔɔ lipiiponl nin itoon nin. 18Le bi choo itoon nin ki kɔɔn bi kuloondiig kan bi loog bininfob biɛn. 19Amaa lidaal a nyiɛg le Uyudaan a malaka jiirin ki nan loor kuloondiigin a naanganl, ki nyan itoon nmɔn niin. 20Le ki bei bi ke, “Ni li chaa iwonjiɛn niin nan yaan, ki tan sir, ki bei bininfobin limiɛfol pɔnl nan a bɔr biɛn na.”

21Baah gbir u bɔr nmɔn, le bi jon ki tan kɔɔ iwonjiɛn niin nmɔn yaan, njakpanyiɛn ki piin ki wɔɔn bininfob.

Biminmanib a yudaau nin u tabin kaah nan dan ni, le bi yin Iziral yaab a yudamin biɛn, le ki tun ke bin tan nyan Yisa a toon yin kuloondiigin ni ki ta bi dan. 22Amaa baah nan tan fo kuloondiig nmɔn yaan ki tan lig, kaa nan kan bi, le ki jir bisanliibin ban ki tan bei bi ke, 23“Ti foo kuloondiigin ki miin inaangan nin kpal le; le ban guun si ki guu, amaa le ti loor kaa kan uba kuloondiigin a poolin ni.” 24Ban guu iwonjiɛn niin a ninkpelu nin biminmanib a yudamin kaah gbir man nin, le ni ŋa bi kuŋmaruŋ nin lijinjeel, nan na li ŋa.

25Le uba kɔɔn, ki nan bei bi ke, “Ni lig! Bijab ban wee ni ta ŋa kuloondiigin nin, bi si iwonjiɛn niin ki wɔɔn bininfob Uwonbɔr a bɔr.” 26Iyaayoo nmɔn le ban guu iwonjiɛn niin nin a ninkpelu nin u tabin jon ki tan ta itoon nin ki jirin. Baa nan nyan bi nin npɔɔn ni, nan bu-n bi nan san bijawaam le ke bininfobin na li gabir bi itangbag.

27Baah nan ta itoon nin jirin n-yonn man nin, le bi che bi sir Juu yaab a yudam a nintogil, wee biminmanib a yudaan win baan bi ibinbaan, 28Le u len ke, “Ti nan sei ni bimɔb nin inunman, ke ni laa wɔɔn bininfob li yinl nan ni, ke lig naah ta nwɔɔnim nmɔn ki yar Jerusalam a gbanann biɛn, wee ki che Yisa a cham nan yin be ti nɔɔn.”

29Le Piita nin u tooi tabin jiin ke: “Ni kpaa le nin ti chee Uwonbɔr a mɔb le ki jiɛn uninfosaal a mɔb! 30Yisa wan wee ni pii nan kpa u lidapunpunl bu wee u kpe-n, Uwonbɔr wan ye ti Wonbɔru nan fiin u nkumin na. 31Le ki don u ki tan kaan U baan tɔɔl a nɔɔjiim paam, ki ŋa u ki Bɔrbig nin Ufeer, ke Iziral yaabin kpenn bi binbema, wee un jiɛn bi toonbir ki per bi. 32Tim nin Kasi a Naaŋin le ye ni nan a siɛradam, le Uwonbɔr ta U Kasi a Naaŋ nmɔn sei ban cheel U mɔb.”

33Juu yaab a yudamin kaah gbir man n-yonn man nin, le bi ŋuui fii, le bi ban bin ku bi. 34Amaa Farasiim a ninfou uba nan be niin, le u yinl ye Gamaliɛl, u nan ye wan wɔɔnn Uwonbɔr a siim le, le bininfob biɛn tenn u jilima, le u fii sir Juu yaab a yudam a laguŋ nmɔn yaan, ki len ke bin laan ta itoon nmɔn ki nyan nkaafiin wamau; 35le ki sin bei biyudam nmɔn ke, “Hei Iziral yaab, ni li nyi naah ke ni ŋa bininfob nan man nan fa. 36Iyoo yan nan jon nin, Tiudiɛ nan wɔɔn u ba le ke u ye lininfo takpenl le, le bijab kobina nan nɔɔ u bɔɔn, amaa baah nan nan ku win, u bɔɔnɔɔbin biɛn nan worin na, le ni biɛn ŋa yɔli. 37U kum a bɔɔn, le Judasi wan nan ye Galilii a ninfo win mu nyan ki sir lininfo kanl a yonn, ki wɔɔn u ba, ki kpenn bininfob takpem a lam le bi nɔɔ u. Le bininfob ji nan ku u, le u bɔɔnɔɔbin biɛn worin. 38Mambu, n kpaan ni le ke ni paan jaa bininfob nmɔn na! Ki che bi li chaau! Wee ni ye bi toon nmɔn ye bininfosaalib yaan le ke, naa yin tun ni. 39Amaa ni ye ni nyan Uwonbɔr ban ke, naa li fir gɔɔ bi. Ni li kan ke ni kɔnn Uwonbɔr le.”

40Le biyudam nmɔn nin chee Gamaliɛl a mɔb ki yin itoon nin ki kɔɔn, ki che bi boo bi ki ta bi jaa, ki sei bi bimɔb ke, bi li nyi ki laa mɔɔn Yisa a yinl nmɔn ni.

41Le itoon nin nan nyan Juu yaab a yudamin ban nin nmɔn, nin baah kpaan nin bin ji ifa Yisa a yinl bu-n. 42Lidaal biɛn ke bi chaa iwonjiɛn niin ni le, le ki jin mɔɔn Yisa a yinl bininfob a niin yin, ke Yisa le ye Masiya, ki ji mɔɔn u bɔŋann nin.

Currently Selected:

Litoonl 5: KUGL

Highlight

Copy