रूथ 3
3
रूथ व बोअज
1छन्हु रुथया माजु नाओमीं वयात धाल, “हे जिमि म्ह्याय्, छु छंगु भिं जुइगु थाय् ममालेगु ला? 2बोअज ला झी थःलाःम्ह मनू खः। छं वया भ्वातिंतलिसें ज्या याना वयाच्वंगु दु। आः जिगु खँ बांलाक न्यँ, थौं बहनी व थःगु खलय् तछ्व हायाच्वंगु जुइ। 3उकिं म्वःल्हुयाः चिकं बु, अले छंगु दकले बांलाःगु वसः फिनाः खलय् हुँ। अय्नं वं नये सी मधूंकुतले छ वने मते। 4व द्यँ वनीबलय् छं व द्यनिगु थाय् सीकाति। अनं लिपा वनाः वयागु तुतिपाखेया फांगा चीकाः अन हे द्यँ। अले छं छु यायेमाः वं हे धाइ।”
5रुथं लिसः बिल, “छिं धयादीगु फुक्क जिं याये।” 6अले व क्वय् खलय् वनाः वं थः माजुं धाःथें हे यात।
7नयेत्वने धुंकाः बोअज लय्ताल। अले अन्न द्वँ मुनातःगु थाय्या लिक्क द्येनेत वन। अले रूथ तीजक वनाः बोअजया तुतियागु फांगा छखे चीकाः व अन हे ग्वारातुल। 8बाचा इलय् बोअजया आकाझाकां न्ह्यलं चाल। वं छम्ह मिसायात थःगु तुतिइ ग्वारा तुलाच्वंगु खंकल।
9वं न्यन, “छ सु खः?”
रुथं लिसः बिल, “जि छि भ्वातिं रूथ खः। छि जिमि सतीम्ह थः खः। उकिं छिगु फांगा जितः फाय्कादिसँ।”
10वं धाल, “हे जिमि मइं, परमप्रभुं छन्त सुवाः बियादीमा, छाय्धाःसा छ तःमिम्ह वा गरीबम्ह सुं ल्याय्म्हया ल्यू मवंसें थःगु लिपांगु मायायात न्हापांगु स्वयाः तःधंकूगु दु। 11उकिं, हे मइं, छ ग्याये मते। छं छु धाल व जिं याये, छाय्धाःसा शहरयापिं जिमि फुक्क मनूतय्सं छ भिंम्ह मिसा खः धकाः स्यू। 12जि छिमि सतीम्ह थः खःसां जि स्वयाः सतीम्ह मेम्ह छम्ह थः दु। 13थौं चच्छि थन हे च्वँ, कन्हय् सुथय् वं छिमि सतीम्ह थःथितिं यायेमाःगु ज्या याःसा जि हे जिल, तर व मानय् मजूसा जिं याये। म्वाःम्ह परमप्रभुया नामय् पाफयाः जिं थ्व धाये, सुथय् तक थन ग्वारातुला च्वँ।”
14अले रूथ वयागु तुतिया लिक्क ग्वारातुलाच्वन। मनू म्हसीके मफइगु इलय् हे व दन अले बोअजं धाल, “छम्ह मिसाम्ह थन खलय् वःगु दु धकाः सुनानं मसीमाः।” 15अले बोअजं धाल, “छं न्ययातःगु गा फ।” रुथं अथे हे यात, बोअजं खुफा ति तछ्व उकी तयाबिल। अले व कु ल्ह्वनाः वयागु ब्वहलय् तयाबिल। व ज्वनाः रूथ शहरय् लिहां वल।
16छेँय् थ्यंबलय् वया माजुं न्यन, “हे म्ह्याय् छु जुल?” अले व मनुखं थःत याःगु फुक्क रुथं कनाबिल।
17वं धाल, “वय्कलं जितः थः माजुयाथाय् खालि ल्हातिं वने मते धकाः धयाः थ्व खुफा तछ्व बियाहल।”
18अले वं धाल, “हे जिमि म्ह्याय्, अज्ज मेगु छु जुइ व छं मस्युतले पियाच्वँ। छाय्धाःसा थ्व ज्या सिमधःलते बोअजयात न्ह्यः वइ मखु।”
Currently Selected:
रूथ 3: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.