मर्कूस 14
14
बेथानियाय् येशूयात चिकनं लूगु
मत्ती २६:६-१३; लूक १२:१-८
1छुत्काराया नखः व सोडा मतःगु मरि नयेगु नखः निन्हु जक मानि। तःधंपिं पुजाहारीत व शास्त्रीतय्सं येशूयात गथे यानाः ज्वनाः स्यायेगु धकाः ग्वसाः ग्वयाच्वन।#प्रस १२:१-२७ 2इमिसं थथे मतिइ तल – “थ्व ज्या नखःबलय् याये मज्यू, मखुसा तसकं ल्वापु जुइ।”
3छन्हु येशू बेथानियाय् सिमोन कोह्रियागु छेँय् भ्वय् नयेत झाःबलय् छम्ह मिसा दुरुल्वहंयागु थलय् शुद्धगु तसकं थिकेगु व नस्वाःगु चिकं ज्वनाः वल। अले थलयाःगु पुसा चायेकाः वं चिकनं येशूया छेनय् लुनाबिल।#लूक ७:३७-३८
4थ्व खनाः अन दुपिं गुलिंसिनं तंम्वयेकाः थथे धाल – “छाय् अपाय्सकं थिकेगु चिकं सितिं छ्वःगु जुइ? 5थ्व चिकं म्यूगु जूसा स्वसः दिनार वइ। अले थ्व धिबा नये मखंपिन्त इनाब्यूगु जूसा ज्यूगु नि।” थुकथं इमिसं व मिसायात तसकं ब्वःबिल।
6अले वय्कलं धयादिल – “छिमिसं थ्व मिसायात छाय् हायेका च्वनागु? वं जितः छु यात बां हे लाःगु यात। 7नये मखंपिं ला छिपिंनाप न्ह्याबलें दयाच्वनी, अले छिमिसं यःबलय् इमित भिंगु याये फु। तर जि न्ह्याबलें दइ मखु।#व्य १५:११ 8थ्व मिसां जिगु निंतिं थःम्हं याये फुगु यात। जिगु म्हयात थुनेत वं न्ह्यः हे चिकनं लुनाबिल। 9जिं छिमित धात्थें धाये – गन गन भिंगु खँ न्यंकी, अन अन थ्व मिसां याःगु थ्व खँ नं लुमंकेत न्ह्यथनी।”
यहूदां येशूयात ज्वंकेत स्वःगु
मत्ती २६:१४-१६; लूक २२:३-६
10झिंनिम्ह चेलात मध्ये छम्ह यहूदा इस्करियोत तःधंपिं पुजाहारीतय्थाय् वनाः येशूयात गथे यानाः ज्वंकाछ्वयेगु धकाः सल्लाह याः वन। 11थ्व खँ न्यनाः इमिसं तसकं हे लय्लय्तायाः वयात धिबा बी धकाः धयाहल। अनंनिसें वं वय्कःयात ज्वंका छ्वयेत सनाच्वन।
चेलात नाप छुत्कारायागु नखः हनादीगु
मत्ती २६:१७-२५; लूक २२:७-१३
12सोडा मतःगु मरि नयेगु नखःया न्हापां खुन्हु, चीधिकःम्ह भ्याःचा स्याइ खुन्हु हे चेलातय्सं वय्कःयाके थथे धकाः न्यन – “छिगु निंतिं गन वनाः छुत्काराया नखःया भ्वय् ज्वरय् याये?”
13वय्कलं निम्ह चेलातय्त थथे धयाः छ्वयादिल – “छिपिं शहरय् हुँ, अन छिमिसं घलय् लः कयावयाच्वंम्ह छम्ह मनूयात नापलाइ। छिपिं व हे मनूया ल्यूल्यू हुँ। 14व दुहां वंगु छेँया थुवाःयात थथे धा – ‘छितः गुरुं थथे धया हयादीगु, “जि जिमि चेलात नाप च्वनाः छुत्काराया नखःया भ्वय् न्याय्केगु क्वथा गुगु खः?”’ 15अले वं छिमित भ्वय् ज्वरय् यायेत माःगु फुक्कं दुगु तलय् च्वंगु तःधंगु क्वथाय् यंकाः क्यनी, छिमिसं अन हे भ्वय् ज्वरय् या।” 16चेलात निम्ह शहरय् वन, अन इमिसं वय्कलं धाःथें फुक्कं लुइकल। अले इमिसं अन हे छुत्काराया नखःया भ्वय् ज्वरय् यात।
17बहनी जूबलय् येशू झिंनिम्हं चेलात ब्वनाः झाल। 18नयाच्वंबलय् वय्कलं थथे धयादिल – “जिं छिमित धात्थें धाये, छिपिं मध्ये हे जि नाप नयाच्वंम्ह छम्हय्सिनं जितः धोखा बी।”#भज ४१:९
19थ्व न्यनाः इमिसं तसकं नुगः मछिंकल। अले छम्ह छम्हय्सिनं थथे धाल – “छिं जितः हे धयादियागु ला मखु प्रभु?”
20वय्कलं धयादिल – “छिपिं झिंनिम्ह मध्ये छम्ह, जि लिसे भुइ मरि थुनाः नयाच्वम्ह। 21धर्मशास्त्रय् च्वया तः थें मनूया काय् ला सिना हे वनेमाः। अय्नं वयात ज्वंका छ्वइम्ह मनूयात ला तसकं तसकं हे धिक्कार दु। व बु हे मबूगु जूसा तसकं बांलाइगु खः।”
प्रभु भ्वय्
मत्ती २६:२६-३०; लूक २२:१४-२३
१ कोर ११:२३-२५
22नयाच्वंबलय् येशूं मरि कयाः परमेश्वरयात सुभाय् बियाः कुचा थलादिल। अले चेलातय्त इनाः थथे धयादिल – “थ्व मरि कयाः न, थ्व जिगु म्ह खः।”
23अथे हे वय्कलं ख्वला नं कयाः परमेश्वरयात सुभाय् बियाः इमित बियादिल, अले इपिं फुक्कसिनं थुकिं हे त्वन। 24अले वय्कलं इमित धयादिल – “थ्व जिगु न्हूगु बाचायागु हि खः। थ्व हे हिं यक्वसिगु पाप क्षमा जुइ।#प्रस २४:८; यर ३१:३१-३४ 25जिं छिमित धात्थें धाये – परमेश्वरयागु राज्यय् न्हूकथं दाखरस मत्वंतले जिं आवंनिसें दाखरस त्वने मखुत।”
26अले छपु भजन हालाः वय्कःपिं जैतून डाँडाय् झाल।
पत्रुसं येशूयात म्हमस्यू धकाः धाइ
मत्ती २६:३१-३५; लूक २२:३१-३४; यूह १३:३६-३८
27येशूं इमित धयादिल – “छिपिं फुक्कं जितः त्वःताः बिस्युं वनी। धर्मशास्त्रय् नं थथे च्वयातःगु दु –
“‘जिगु ज्या याइम्ह फैजवाःयात हमला या, वयात स्या।
अले फैत उखेलाः थुखेलाः जुइ।’ #
जक १३:७
28 “अय्नं जि हानं म्वाना वयाः छिपिं स्वयाः न्हापा हे गालीलय् थ्यंकः वने।” #
मत्ती २८:१६
29पत्रुसं वय्कःयात धाल – “फुक्कसिनं त्वःता वंसां जिं ला छितः गुब्सं हे त्वःते मखु।”
30अले वय्कलं धयादिल – “जिं छन्त धात्थें धाये – थौं चान्हय् हे छं जितः खा हाले न्ह्यः स्वकः तक म्हमस्यू धकाः धाइ।”
31अय्नं वं पाफयाः धाल – “छिनाप सी हे माःसां जिं छितः म्हमस्यू धकाः धाये मखु।” फुक्क चेलातय्सं नं अथे हे धाल।
गेतसमनिइ प्रार्थना यानादीगु
मत्ती २६:३६-४६; लूक २२:३९-४६
32वय्कःपिं गेतसमनिइ थ्यने धुंकाः येशूं इमित धयादिल – “जि प्रार्थना यानाच्वंतले छिपिं थन हे च्वनाच्वँ।” 33वय्कलं पत्रुस, याकूब व यूहन्नायात जक ब्वना यंकादिल। उबलय् वय्कलं तसकं हे नुगः मछिंकाः दिक्क जुयादिल। 34वय्कलं इमित धयादिल – “नुगः हीसे च्वनाः जिगु छाति हे तज्याइ थें च्वनाच्वन। छिपिं मद्यंसे थन हे च्वनाच्वँ।”
35भचा उखे झायाः बँय् क्वपुसां पुयाः वय्कलं थथे धकाः प्रार्थना यानादिल – 36“अब्बा, बाः, छिं याये मफुगु छुं नं मदु। थ्व दुःखयागु ख्वला जिथासं चीकादिसँ। अय्नं जितः यःथें यानादी मते, छितः यःथें हे यानादिसँ।”
37अले वय्कः स्वम्ह चेलात च्वनाच्वंथाय् लिहां झाल। इपिं ला द्यना च्वने धुंकल। अय्जूगुलिं वय्कलं पत्रुसयात धयादिल – “सिमोन, छ द्यने धुनागु ला? घौछि हे मद्यंसे च्वने मफु ला छिपिं? 38मद्यंसे प्रार्थना याना च्वँ, मखुसा छिपिं जाँचय् लाइ। आत्मा ला तयार दु, म्ह धाःसा बमलाः।”
39अनं वनाः वय्कलं हानं न्हापा थें तुं प्रार्थना यानादिल। 40वय्कः लिहां झाःबलय् इपिं हानं न्ह्यः वय्काच्वन। इमिगु मिखा न्ह्यः वःगुलिं झ्यातुसे च्वनाच्वन। इमि वय्कःयात छु धाये छु धाये जुल।
41स्वकःया पालय् झायाः वय्कलं इमित थथे धयादिल – “छिपिं आः तकं द्यना च्वनातिनि ला? मनूया काय्यात पापीतय्सं ज्वनेगु ई वये धुंकल। 42दँ, नु! स्व, जितः ज्वंकीम्ह मनू थ्यंकः वये धुंकल।”
येशूयात ज्वंगु
मत्ती २६:४७-५६; लूक २२:४७-५३; यूह १८:१-११
43वय्कलं थथे धयाच्वनादीबलय् हे झिंनिम्ह मध्ये छम्ह चेला यहूदा अन थ्यंकः वल। व नाप तःधंपिं पुजाहारीत, शास्त्रीत व थकालितय्सं छ्वयाहःपिं नं दु। इमिसं तरवार व कथि ज्वनातःगु दु। 44“जिं चुप्पा नयाम्ह मनू हे येशू खः, छिमिसं वयात ज्वँ” धकाः यहूदां इमित खँ स्यना हःगु दु। 45उकिं वं वय्वं हे येशूयाथाय् वनाः – “गुरुजु” धयाः वय्कःयात चुप्पा नल।
46अले ज्वं वःपिन्सं वय्कःयात ज्वन। 47वय्कःया लिक्क दनाच्वंम्ह छम्ह मनुखं थःगु तरवार लिकयाः दकलय् तःधंम्ह पुजाहारीया छम्ह दासयागु न्हाय्पं हे ध्यनाबिल।
48अले येशूं ज्वंवःपिं मनूतय्त धयादिल – “जि छम्हय्सित ज्वनेत थथे तरवार व कथि ज्वनावये माःगु छाय्? छु जि दाखुँ खः ला? 49देगलय् च्वनाः न्हियान्हिथं स्यनेकने याना जुयाबलय् छिमिसं जितः छाय् मज्वनागु? धर्मशास्त्रय् च्वयातःगु पूवनेमा धकाः हे थथे जूगु खः।”#लूक १९:४७; २१:३७
50अले चेलात फुक्क उखेलाः थुखेलाः मदय्क बिस्युं वन। 51गा छपुं जक न्ययातःम्ह छम्ह ल्याय्म्हम्ह मनू येशूया ल्यूल्यू वन। इमिसं वयात नं ज्वने त्यंबलय् 52गा हे त्वःताः व नांगां बिस्युं वन।
महासभाया न्ह्यःने येशू
मत्ती २६:५७-६८; लूक २२:६६-७१; यूह १८:१३-१४,१९-२४
53इमिसं येशूयात दकलय् तःधंम्ह पुजाहारीयाथाय् यंकल। तःधंपिं पुजाहारीत, थकालित व शास्त्रीत फुक्कं अन मुनाच्वंगु दु। 54पत्रुस नं तातापाकं हे ल्यूल्यू वनाः दकलय् तःधंम्ह पुजाहारीयागु चुकय् थ्यंक हे वन। पत्रुस अन वनाः पालेत नाप मि पनाच्वन।
55तःधंपिं पुजाहारीत व सभाय् च्वंपिं फुक्कसिनं जानाः येशूयात गथे यानाः स्यायेगु धकाः दोष माला च्वन, अय्नं छुं हे दोष लुइके मफु। 56यक्व हे मनूतय्सं वय्कःयात मखुगु मखुगु द्वपं बिल। अय्नं इमिगु खँ हे मिलय् मजू। 57गुलिसिनं ला अन दनाः थथे धकाः मखुगु खँ धायेत स्वल – 58“थ्व मनुखं थथे धाःगु ला जिमिसं ताया – ‘ल्हातिं दय्कातःगु थ्व देगःयात जिं थुनाः स्वन्हुं हे हानं ल्हातिं दय्किगु मखुगु देगः दना बी।’”#यूह २:१९ 59थुकी नं इमिगु खँ मिलय् मजुल।
60अले दकलय् तःधंम्ह पुजाहारीं फुक्कसिगु न्ह्यःने दनाः वय्कःयात थथे धकाः न्यन – “छ छाय् न्वःमवासे च्वनागु? थुमिसं धाःगु खँय् छं छुं धायेमाःगु दु ला?” 61वय्कलं छुं हे धयामदी। हानं दकलय् तःधंम्ह पुजाहारीं वय्कःयात न्यन – “छ दकलय् धन्यम्हय्सिया काय् मुक्ति बीम्ह ख्रीष्ट खः ला?”
62वय्कलं धयादिल – “खः, जि हे खः, छिकपिन्सं हे मनूया काय् परमेश्वरया जवय् च्वनाच्वंगु व आकाशय् च्वंगु सुपाँचय् वयाच्वंगु खनी।”#दान ७:१३
63थ्व न्यनाः दकलय् तःधंम्ह पुजाहारीं थःम्हं फिनातःगु लं हे खुनाः थथे धाल – “थ्वयां अप्वः मेगु दसि हे छु मानि? 64थ्वं परमेश्वरयात क्वह्यंकूगु छिमिसं ता हे ताल। छिमिगु छु बिचाः दु?”
इमिसं “वयात स्याना हे छ्वयेमाः” धकाः धाल।#लेवी २४:१६
65अले ला गुलिसिनं वय्कःयागु ख्वालय् थुकलं बिल। गुलिसिनं वय्कःयागु मिखा त्वपुयाः दायाः थथे धाल – “का धा, छन्त सुनां दाल?” अले सिपाइँतय्सं वय्कःयात दायाः यंकल।
पत्रुसं येशूयात म्हमस्यू धकाः धाःगु
मत्ती २६:६९-७५; लूक २२:५६-६२; यूह १८:१५-१८,२५-२७
66पत्रुस कुने चुकय् च्वनाच्वंबलय् दकलय् तःधंम्ह पुजाहारीया भ्वातिं छम्ह अन वल। 67मि पना च्वंम्ह पत्रुसयात खनाः बांलाक स्वयाः वयात थथे धाल – “छ नं नासरतय् च्वंम्ह येशू नाप जुइम्ह खः।”
68पत्रुसं ख हे मखु धकाः थथे धाल – “जिं ला वयात म्हमस्यू। छं धयाच्वंगु खँ नं मथू।” थुलि धयाः व लुखां पिने वन। अले खा हाल।
69भ्वातिंनं वयात खनाः लिक्क दनाच्वंपिन्त धाल – “थ्व नं इपिं नाप जुयाच्वंम्ह खः।” 70हानं वं मखु धकाः धाल।
भचा लिपा अन दना च्वंपिन्सं वयात धाल – “धात्थें छ नं इपिं नाप जुयाच्वंम्ह खः, छ नं छम्ह गालीली खः नि।”
71वं पाफयाः धाल – “छिमिसं धया च्वंम्ह मनूयात ला जिं म्ह हे मस्यू।” 72अबलय् हे खा हाल। थ्वनापं खा हाःगु निकः जुल।
अले येशूं वयात धयादीगु थ्व खँ लुमंकल – “निकः खा हाले न्ह्यः छं जितः स्वकः म्हमस्यू धकाः धाइ।” थ्व खँ लुममं हे व ह्वाँय्ह्वाँय् ख्वल।
Currently Selected:
मर्कूस 14: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.