मत्ती 26
26
येशूयात स्यायेत ग्वसाः ग्वःगु
मर्क १४:१-२; लूक २२:१-२; यूह ११:४५-५३
1थथे स्यनेकने यानादी धुंकाः येशूं चेलातय्त धयादिल – 2“निन्हु लिपा छुत्काराया नखः वइ धकाः ला छिमिसं सि हे स्यू। उबलय् मनूया काय्यात ज्वनाः क्रूसय् यख्खायाः स्यायेत लःल्हानाबी।”#प्रस १२:१-२७
3उबलय् हे तःधंपिं पुजाहारीत व थकालिपिं कैयाफा धाःम्ह दकलय् तःधंम्ह पुजाहारीया छेँय् मुन। 4अले इमिसं वय्कःयात गथे यानाः ज्वनाः स्यायेगु धकाः ग्वसाः ग्वल। 5“नखःबलय् ज्वने धाःसा तसकं हल्लाखल्ला जुइ” धकाः इमिसं धाल।
बेथानियाय् येशूयात चिकनं लूगु
मर्क १४:३-९; यूह १२:१-८
6येशू बेथानियाय् सिमोन कोह्रियागु छेँय् दीबलय् 7छम्ह मिसा दुरूल्वहं थलय् तसकं थिकेगु व नस्वाःगु चिकं ज्वनाः वल। अले नयेत्यंबलय् व मिसां वय्कःयागु छेनय् फुक्कं लुनाबिल।#लूक ७:३७-३८
8थ्व खनाः चेलातय्सं तं पिकयाः वयात धाल – “थुलिमछि चिकं छाय् सितिं छ्वयागु? 9थ्व चिकं म्यूगु जूसा उकिं वःगु धिबा नये मखंपिन्त इनाब्यूगु जूसा ज्यूगु नि।”
10इमिसं थथे धाःगु न्यनाः वय्कलं धयादिल – “छिमिसं थ्व मिसायात छाय् दुःख बियाच्वनागु? वं जितः बांलाःगु हे यात। 11नये मखंपिं ला छिपिंनाप न्ह्याबलें दयाच्वनी। जि न्ह्याबलें दइ मखु।#व्य १५:११ 12थथे चिकनं लुनाः वं जिगु म्हयात थुनेत ठीक याःगु खः। 13जिं छिमित खःगु खँ धाये – गन गन भिंगु खँ न्यंकी, अन अन थ्व मिसां याःगु थ्व खँ नं लुमंकेत न्यंकी।”
यहूदां येशूयात ज्वंकेत स्वःगु
मर्क १४:१०-११; लूक २२:३-६
14झिंनिम्ह चेलात मध्ये यहूदा इस्करियोत धाःम्ह चेलां तःधंपिं पुजाहारीतय्थाय् वनाः 15थथे धाल – “येशूयात ज्वंका बिल धाःसा जितः छु बी?” अले इमिसं वयात स्विगः वहःयागु म्वहः बिल।#जक ११:१२ 16उबलय् निसें वं येशूयात ज्वंका छ्वयेत सनाच्वन।
चेलात नाप छुत्कारायागु नखः हनादीगु
मर्क १४:१२-२१; लूक २२:७-२३; यूह १३:२१-३०
17सोडा मतःगु मरि नयेगु नखःयागु न्हापां खुन्हु चेलातय्सं वयाः वय्कःयाके – “गन वनाः छुत्काराया नखःयात ज्वरय् याः वने?” धकाः न्यन।
18वय्कलं धयादिल – “शहरय् सुं छम्ह मनूयागु छेँय् वनाः थथे धा – ‘जिमि गुरुं वय्कःयागु ई त्यल हं। चेलातनापं वय्कलं छिगु छेँय् वयाः छुत्काराया नखः हनेगु हं।’” 19चेलातय्सं वनाः वय्कलं धयादी थें यात। अले अन हे छुत्काराया नखःया भ्वय् ज्वरय् यात।
20बहनी वय्कः झिंनिम्ह चेलात नाप नयेत फ्यतुनादिल। 21नयाच्वंबलय् वय्कलं धयादिल – “जिं छिमित खःगु खँ धाये – छिपिं मध्ये हे छम्हय्सिनं जितः धोखा बी।”
22थ्व न्यनाः इमिसं तसकं नुगः मछिंकल। अले छम्ह छम्हय्सिनं थथे धाल – “छिं जितः हे धयादियागु ला मखु ला प्रभु?”
23वय्कलं धयादिल – “जि नाप ख्वलाय् मरि थुनीम्हय्सिनं जितः धोखा बी।#भज ४१:९ 24धर्मशास्त्रय् च्वया तः थें मनूया काय् ला सिनावने हे माः। अय्नं वयात ज्वंका छ्वइम्ह मनूयात तसकं तसकं हे धिक्कार दु। व बु हे मबूगु जूसा तसकं बांलाइगु खः।”
25वय्कःयात ज्वंकीम्ह यहूदां नं न्यन – “छिं जितः हे धयादियागु ला मखु ला प्रभु?”
अले वय्कलं धयादिल – “खः, छं थःम्हं हे धाल।”
प्रभु भ्वय्
मर्क १४:२२-२६; लूक २२:१४-२३; १ कोर ११:२३-३०
26नयाच्वंबलय् येशूं मरि कयाः परमेश्वरयात सुभाय् बियाः कुचा कुचा थलादिल। अले चेलातय्त इनाः थथे धयादिल – “थ्व मरि कयाः न। थ्व जिगु म्ह खः।”
27अथे हे ख्वला नं कयाः परमेश्वरयात सुभाय् बियाः वय्कलं थथे धयाः ख्वला बियादिल – 28“थ्व न्हूगु बाचायागु जिगु हि खः। थ्व हे हिं यक्वसिगु पाप क्षमा जुइ।#प्रस २४:८; यर ३१:३१-३४ 29जिं छिमित धाये – जिमि बाःयागु राज्यय् न्हूपिं जूपिं छिपिंनाप दाखमद्य मत्वंतले जिं आवंनिसें थ्व दाखमद्य त्वने मखुत।”
30अले छपु भजन हाले धुंकाः वय्कःपिं जैतून डाँडाय् झाल।
पत्रुसं येशूयात म्हमस्यू धकाः धाइ
मर्क १४:२७-३१; लूक २२:३१-३४; यूह १३:३६-३८
31अले येशूं इमित धयादिल – “थौं चान्हय् छिपिं फुक्कं जितः त्वःताः बिस्युं वनी। धर्मशास्त्रय् नं थथे च्वयातःगु दु –
“‘जिं फैजवाःयात स्यानाबी,
अले फैचात
उखेलाः थुखेलाः जुइ।’ #
जक १३:७
32 “अय्नं जि हानं म्वाना वयाः छिपिं स्वयाः न्हापा हे गालीलय् थ्यंकः वने।” #
मत्ती २८:१६
33पत्रुसं वय्कःयात धाल – “फुक्कसिनं त्वःता वंसां जिं ला छितः गुब्सं हे त्वःते मखु।”
34वय्कलं धयादिल – “जिं छन्त खःगु खँ धाये – थौं चान्हय् खा हाले न्ह्यः छं जितः स्वकः तक म्हमस्यू धकाः धाइ।”
35अय्नं “छिनाप सी हे माःसां जिं छितः म्हमस्यू धकाः धाये मखु” धकाः पत्रुसं धाल। फुक्क चेलातय्सं नं अथे हे धाल।
गेतसमनिइ प्रार्थना यानादीगु
मर्क १४:३२-४२; लूक २२:३९-४६
36वय्कः चेलात नाप गेतसमनी धाःथाय् झाल। वय्कलं इमित धयादिल – “छिपिं थन हे च्वनाच्वँ। जि उखे वनाः प्रार्थना याये।” 37वय्कलं पत्रुस व जब्दिया निम्ह काय्पिन्त धाःसानापं ब्वना यंकादिल। उबलय् वय्कलं तसकं हे नुगः मछिंकाः दिक्क जुयादिल। 38वय्कलं इमित धयादिल – “नुगः मछिनाः जिगु छाति हे तज्याइ थें च्वनाच्वन। छिपिं मद्यंसे थन हे च्वनाच्वँ।”
39अले भचा उखे झायाः बँय् क्वपुसां पुयाः थथे धकाः प्रार्थना यानादिल – “बाः, ज्यूसा थ्व दुःखयागु ख्वला जिथासं चीकादिसँ। अय्नं जितः यःथें यानादी मते, छितः यःथें हे यानादिसँ।”
40अले वय्कः स्वम्ह चेलात च्वनाच्वंथाय् झाल। इपिं न्ह्यलं ब्वानाच्वंगु खनाः वय्कलं पत्रुसयात धयादिल – “छिपिं जि नाप घौछि हे नं मद्यंसे च्वने मफु ला? 41मद्यंसे प्रार्थना याना च्वँ, मखुसा छिपिं जाँचय् लाइ। आत्मा ला न्ह्यचिलाच्वंगु दु, म्ह जक बमलाः।”
42अनं वनाः वय्कलं हानं प्रार्थना यानादिल – “बाः, जिं थ्व दुःखयागु ख्वलां मत्वंसे मगाः धयागु जूसा, छितः यःथें हे जुइमा।” 43वय्कः झाःबलय् इपिं हानं न्ह्यलं तुं ब्वानाच्वन। इमिसं न्ह्यः पी हे मफया च्वन।
44वय्कः हानं इमित त्वःताः झाल। अले अथे हे धयाः प्रार्थना यानादिल। थ्वनापं वय्कलं स्वकः प्रार्थना यानादी धुंकल। 45अले वय्कलं इमिथाय् झायाः धयादिल – “छिपिं आः तक द्यना च्वनातिनि ला? मनूया काय्यात पापीतय्सं ज्वनीगु ई वये धुंकल। 46दँ, वनेनु। स्व, जितः ज्वंकीम्ह मनू नं न्ह्यःने थ्यने धुंकल।”
येशूयात ज्वंगु
मर्क १४:४३-५०; लूक २२:४७-५३; यूह १८:३-१२
47वय्कलं थथे धयाच्वनादीबलय् हे झिंनिम्ह मध्ये छम्ह चेला यहूदा अन थ्यंकः वल। व नाप तःधंपिं पुजाहारीत व थकालिपिन्सं छ्वयाहःपिं नं वःगु दु। इमिसं तरवार व कथि ज्वनातःगु दु। 48“जिं वनाः चुप्पा नइम्ह मनू व हे खः, छिमिसं वयात ज्वँ” धकाः धोखा बीम्हय्सिनं इमित खँ स्यना हःगु दु। 49उकिं वं वयेवं हे येशूयाथाय् वनाः “गुरु, ज्वजलपा” धयाः वय्कःयात चुप्पा नल।
50वय्कलं वयात धयादिल – “पासा, छु यायेत वयागु खः याकनं याना छ्व।”
अले इमिसं वय्कःयात ज्वन। 51अबलय् हे वय्कःया छम्ह चेलां थःगु तरवार पिकयाः दकलय् तःधंम्ह पुजाहारीया छम्ह दासयागु न्हाय्पं हे ध्यनाबिल।
52वय्कलं वयात धयादिल – “तरवार दापय् स्वथँ। तरवार ज्वनाजुइम्ह तरवारं हे सी। 53जिं ग्वाहालि फ्वन धाःसा जिमि बाःनं झिंनिगू पल्टन स्वयाः अप्वः स्वर्गदूतत छ्वयाहया मदी ला? छिमिसं छु ताय्का? 54थथे यात धाःसा धर्मशास्त्रय् च्वयातःगु खँ गथे जुयाः पूवनी?”
55अले वय्कलं ज्वंवःपिं मनूतय्त धयादिल – “जि छम्हय्सित ज्वनेत थथे तरवार व कथि ज्वनावये माःगु छाय्? छु जि दाखुँ खः ला? जिं देगलय् च्वनाः न्हियान्हिथं स्यनेकने याना जुयाबलय् छिमिसं जितः छाय् मज्वनागु?#लूक १९:४७; २१:३७ 56अगमवक्तातय्सं धर्मशास्त्रय् च्वया थकूगु पूवनेमा धकाः हे थथे जूगु खः।” अले चेलात फुक्कं वय्कःयात त्वःताः उखेलाः थुखेलाः मदय्क बिस्युं वन।
महासभाया न्ह्यःने येशू
मर्क १४:५३-६५; लूक २२:६६-७१; यूह १८:१३-१४,१९-२४
57इमिसं येशूयात दकलय् तःधंम्ह पुजाहारीत कैयाफायाथाय् यंकल। शास्त्रीत व थकालिपिं नं अन मुनाच्वंगु दु। 58पत्रुस नं तातापाकं हे ल्यूल्यू वनाः दकलय् तःधंम्ह पुजाहारीया चुकय् थ्यंक हे वन। अले वय्कःयात छु छु याइ धकाः स्वयेत व पालेत नाप च्वंवन।
59तःधंपिं पुजाहारीतय्सं व अन वयाच्वंपिं फुक्कसिनं जानाः वय्कःयात स्यायेत मखुगु मखुगु द्वपं बीत स्वल। 60तःम्हय्सिनं हे वयाः वय्कःयात मखुगु मखुगु द्वपं बिल। अय्नं इमिसं छुं हे दसि क्यने मफुत। दकलय् लिपा निम्ह मनुखं वयाः 61धाल – “थ्व मनुखं ‘परमेश्वरयागु देगः थुनाः स्वन्हुं हे दने फु’ धकाः धाल।”#यूह २:१९
62अले दकलय् तःधंम्ह पुजाहारीं दनाः धाल – “थुमिसं धाःगु खँय् छं छुं धायेमाःगु दु ला?” 63वय्कलं छुं हे धयामदी। अले दकलय् तःधंम्ह पुजाहारीं हानं धाल – “म्वाःम्ह परमेश्वरयागु नामं जिं छन्त धयाच्वना – छ परमेश्वरया काय्, मुक्ति बीम्ह ख्रीष्ट खः ला?”
64वय्कलं लिसः बियादिल – “छिं थःम्हं हे धयादिल। अय्नं जिं छिकपिन्त धाये – आवंनिसें छिकपिन्सं मनूया काय्यात परमेश्वरया जव ल्हाःपाखे च्वनाच्वंगु व सुपाँचय् वयाच्वंगु खनी।”#दान ७:१३
65थ्व न्यनाः दकलय् तःधंम्ह पुजाहारीं थःम्हं फिनातःगु लं खुनाः थथे धाल – “थ्वं परमेश्वरयात क्वह्यंकाः खँ ल्हात। थ्वयां अप्वः मेगु दसि हे छु माल? थ्वं परमेश्वरयात क्वह्यंकूगु छिमिसं ता हे ताल। 66छिमिगु छु बिचाः दु?” इमिसं धाल –
“थ्व दोषी हे खः, थ्वयात स्याये हे माः।”#लेवी २४:१६
67इमिसं वय्कःयागु ख्वालय् थुकलं बिल, दाल। अले गुलिसिनं ला न्यतालय् दायाः#यशै ५०:६ 68थथे धाल – “हे मुक्ति बीम्ह ख्रीष्ट, छ अगमवक्ता खःसा छन्त सुनां दाल, धा।”
पत्रुसं येशूयात म्हमस्यू धकाः धाःगु
मर्क १४:६६-७२; लूक २२:५४-६२; यूह १८:१५-१८,२५-२७
69अबलय् तकं पत्रुस चुकय् हे च्वनाच्वन। छम्ह भ्वातिं नं वयाः वयात धाल – “छ नं गालीलय् च्वंम्ह येशूनापं जुयाच्वंम्ह मखु ला?”
70वं सकसिगुं न्ह्यःने “मखु” धकाः थथे धाल – “छं धाःगु खँ जिं मस्यू।”
71व अनं लुखापाखे वंबलय् वयात मेम्ह भ्वातिं नं खनाः थथे धाल – “थ्व मनू ला नासरतय् च्वंम्ह येशू नाप जुयाच्वंम्ह खः नि।”
72वं हानं पाफयाः “मखु” धकाः थथे धाल – “जिं वयात म्ह हे मस्यू।”
73भचा जाय्काः अन च्वंपिन्सं वयाः वयात थथे धाल – “छ नं व नाप जुयाच्वंम्ह खः नि। छंगु नवाइगु पहलं हे सी दु।”
74अले वं पाफयाः धाल – “जिं मखुगु खँ ल्हानागु खःसा परमेश्वरं जितः सजाँय बियादीमा। जिं वयात म्ह हे मस्यू।” अबलय् हे ग्वंगः हाला हल।
75अले वं येशूं धयादीगु खँ लुमंकल – “खा हाले न्ह्यः छं जितः स्वकः तक म्हमस्यू धकाः धाइ।” अले व पिने वनाः ह्वाँय्ह्वाँय् ख्वल।
Currently Selected:
मत्ती 26: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.