मत्ती 2
2
पुर्बंनिसें दर्शन याःवःपिं ज्योतिषीत
1हेरोद जुजुया इलय् यहूदियाया बेथलेहेम धाःगु गामय् येशू बूगु खः। येशू बुइधुंकाः पुर्बपाखें ज्योतिषीत वय्कःयात यरूशलेमय् स्वः वल। 2अले इमिसं मनूतय्के थथे धकाः न्यन – “यहूदीतय् जुजु जुयाः बूम्ह गन दु? वय्कः बूगु खँ सीकेगु छगः नगु पुर्बय् खनागुलिं वय्कःयात दर्शन यायेत जिपिं थन वयागु खः।”
3थ्व खँ न्यनाः हेरोद जुजुया तसकं नुगः भाराभारा मिन। यरूशलेमय् च्वंपिं फुक्क मनूत नं ग्यात। 4उकिं हेरोद जुजुं फुक्क तःधंपिं पुजाहारीतय्त व शास्त्रीतय्त सःताः थथे न्यन – “मुक्ति बीम्ह ख्रीष्ट गन बुइगु?”
5अले इमिसं थथे धकाः लिसः बिल – “यहूदियायागु बेथलेहेमय् दु, छाय्धाःसा थ्व खँ छम्ह अगमवक्तां नं थथे च्वया थकूगु दु –
6“‘हे यहूदियाया बेथलेहेम,
छ यहूदियाया जुजुपिनिगु न्ह्यःने
छुं कथं नं चिधं मजू,
छाय्धाःसा छंगुपाखें
छम्ह तःधंम्ह जुजु पिहां वइतिनि।
व जिमि मनू इस्राएलीतय् जवाः जुइतिनि।’”#मीका ५:२
7अले हेरोदं पुर्बं वःपिं ज्योतिषीतय्त सुनानं मसीक सःताः न्यनेकने यानाः नगु खनेदुगु ई सीकाकाल। 8अले इमित थथे धकाः बेथलेहेमय् छ्वल – “छिकपिं वनाः मचायागु खँ बांलाक सीकाः जितः कं झासँ, अले जि नं वनाः दर्शनया वने।”
9जुजुयागु खँ न्यनाः इपिं अनं वन। इमिसं पुर्बय् खंगु नगु हानं खनेदय्कः वल। व नगु न्ह्यज्यां ज्यां वनाः मचा दुगु थासय् थ्यंकाः दित। 10व नगु खनाः इपिं तसकं लय्ताल। 11अन थ्यंकाः इपिं छेँय् दुहां वनाः मचायात वया मां मरियमनापं खन। अले इमिसं क्वछुनाः वय्कःयात भागि यात। अले थथःगु कन्तुर चाय्काः लुँ, नस्वाःगु गुँगू व मूर्र लिकयाः छाल।
12म्हगसय् इमित हेरोदयाथाय् वने मते धकाः परमेश्वरं उजं बियादिल। अय्जूगुलिं इपिं मेगु हे लँपु जुयाः थथःगु देशय् लिहां वन।
मिश्र देशय् बिसिके यंकूगु
13ज्योतिषीत वने धुंकाः योसेफयात म्हगसय् प्रभुया छम्ह स्वर्गदूतं थथे धाल – “दँ, मचा व वया मांयात ब्वनाः याकनं हे मिश्र देशय् बिस्युं हुँ। लिहां वयेत मधातले छिपिं अन हे च्वँ, छाय्धाःसा हेरोदं मचायात स्यायेत स्वयाच्वंगु दु।”
14अले योसेफ मचा व मांम्हय्सित ब्वनाः चां चां हे मिश्र देशय् बिस्युं वन। 15हेरोद जुजु मसीतले इपिं अन हे च्वनाच्वन। “जिं थःकाय्यात मिश्र देशं सःता” धकाः परमप्रभुं अगमवक्तायात धाय्कादीगु खँ थुकथं पूवन। #होशे ११:१
हेरोद जुजुं मस्तय्त स्याकूगु
16ज्योतिषीतय्सं थथे झंगःलाःगु सीकाः हेरोद तमं मि जुल। अले ज्योतिषीतय्पाखें नगु खनेदुगु ई सीकातःगु दुगुलिं व हे स्वयाः हेरोदं बेथलेहेमय् व वया जःखः च्वंगु थासय् च्वंपिं निदँ व निदं क्वय्यापिं मिजंमस्तय्त स्याकेबिल। 17थुकथं यर्मिया अगमवक्तां धयाथकूगु खँ पूवन –
18“रामाय् नुगः हे तज्याइ थें च्वंक
ख्वःसः ताये दत।
राहेल थः मस्तय्त लुमंकाः ख्वयाच्वन।
वयात सुनानं दिके मफुत,
छाय्धाःसा वया मस्त स्याये धुंकल।”#यर ३१:१५
मिश्र देशं लिहां वःगु
19हेरोद जुजु सीधुंकाः मिश्र देशय् च्वनाच्वंम्ह योसेफयात म्हगसय् प्रभुयाम्ह छम्ह स्वर्गदूतं 20थथे धाल – “दँ, मचा व मांम्हय्सित ब्वनाः इस्राएल देशय् लिहां हुँ। मचायात स्यायेत स्वःपिं मनूत सी धुंकल।”
21अले योसेफ मचा व मांम्हय्सित ब्वनाः इस्राएल देशय् तुं लिहां वन। 22हेरोद सिनाः वया काय् अर्खिलाउसं यहूदियाय् राज्य यानाच्वंगु दु धकाः न्यनाः योसेफ अन वने ग्यात। अय्जूगुलिं परमेश्वरं हानं म्हगसय् वयात अन वने मते धकाः धयादीगुलिं योसेफ गालील प्रदेशय् वन। 23अगमवक्तातय्सं वय्कःयात “नासरी” धाइ धाःगु खँ पूवंकेत योसेफ नासरत धाःगु शहरय् वनाः च्वंवन। #मर्क १:२४; लूक २:३९; यूह १:४५
Currently Selected:
मत्ती 2: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
