मत्ती 14
14
बप्तिस्मा बीम्ह यूहन्नायात स्याःगु
मर्क ६:१४-२९; लूक ९:७-९
1थुबलय् हे गालीलया जुजु हेरोदं येशूयागु खँ न्यनाः 2थः भारदारतय्त धाल – “थ्व मनू ला बप्तिस्मा बीम्ह यूहन्ना हे जुइमाः। व सिनाः हानं म्वानावःगु जुइमाः, उकिं ला वं ततःधंगु अजू चायापुगु ज्या याये फत।”
3न्हापा हेरोदं थःकिजा फिलिपया कलाः हेरोदियासं यानाः बप्तिस्मा बीम्ह यूहन्नायात ज्वनाः झ्यालखानाय् कुंगु खः।#लूक ३:१९-२० 4छाय्धाःसा यूहन्नां वयात “थः किजाभौयात कलाः तये मत्यः” धकाः धाःगु खः।#लेवी १८:१६; २०:२१ 5वं यूहन्नायात स्यायेगु नं मतिइ तःगु खः। अय्नं मनूत खनाः ग्यानाः वं अथे याये मफुत, छाय्धाःसा इमिसं यूहन्नायात अगमवक्ता धकाः मानय् यानातःगु खः।
6हेरोदयागु बुदिंया लसताय् हेरोदियासया म्ह्याय्नं सकसिया न्ह्यःने तसकं बांलाक प्याखं ल्हुयाक्यंगुलिं हेरोद तसकं लय्ताल। 7अले वं न्ह्यागु फ्वंसां बी धकाः पाफल। 8व मचां थः मांम्हय्सिनं स्यनातःथें धाल – “जितः आः हे बप्तिस्मा बीम्ह यूहन्नायागु छ्यं भुइ तयाः बियादिसँ।” 9थ्व न्यनाः वं तसकं नुगः मछिंकल, अय्नं न्ह्यागु फ्वंसां बी धकाः फुक्कसिगु न्ह्यःने पाफये धुंकूगुलिं यूहन्नायागु छ्यं ध्यनाः हजि धकाः उजं बिल। 10अले वं सिपाइँत छ्वयाः झ्यालखानाय् यूहन्नायागु छ्यं धेंके बिल। 11अले छ्यं भुइ तयाः व मचायात बी हल। मचां व थः मांयात बी यंकल। 12अले यूहन्नाया चेलातय्सं वयाः वयागु सीम्ह यंकाः थुनाबिल। अले इमिसं वनाः थ्व खँ येशूयात न्यंकल।
न्याद्वः मनूतय्त नकादीगु
मर्क ६:३०-४४; लूक ९:१०-१७; यूह ६:१-१५
13थ्व न्यनाः येशू नांचाय् च्वनाः सुं मदुगु थासय् झाल। वय्कः झाल धयागु खँ न्यनाः मनूत शहरंनिसें वय्कःया ल्यूल्यू न्यासि वन। 14नांचां क्वहां झाःबलय् ग्वाः ग्वाः मनूतय्त खनाः वय्कःयात तसकं माया वन, अले उसाँय् मदुपिन्त लाय्कादिल।
15खिउँ खिउँ धाःबलय् चेलातय्सं वयाः वय्कःयात धाल – “खिउँया वये धुंकल, थन छुं हे मदु। थुमित गामय् छ्वयादिसँ। अले अन न्यानाः नइ।”
16वय्कलं इमित धयादिल – “इमित छ्वये म्वाः, इमित छिमिसं हे नकि।”
17इमिसं धाल – “जिमिके ला न्यापा मरि व निम्ह न्या जक दु।”
18वय्कलं धयादिल – “छिमिके दुगु मरि व न्या जिथाय् हिँ।” 19वय्कलं फुक्कसित ख्यलय् फ्यतुकादिल। न्यापा मरि व निम्ह न्या कयाः स्वर्गय् थस्वयाः परमेश्वरयात सुभाय् बियादिल। अले मरि कुचा थलाः वय्कलं चेलातय्त बियादिल। इमिसं मनूतय्त इनाबिल। 20अले इमिसं यतले नल। इनाः ल्यं दुगु झिंनिगः दाला जाय्क दु। 21मस्त व मिसात ल्याः मतसे अन मिजंत जक हे न्याद्वः ति दु।
येशू लखय् न्यासि झाःगु
मर्क ६:४५-५२; यूह ६:१६-२१
22येशूं चेलातय्त थः स्वयाः न्हापा हे नांचाय् च्वनाः समुद्र पारि वनेगु उजं बियादिल। अनं लिपा मनूतय्त छेँय् छ्वयादिल। 23मनूतय्त छेँय् छ्वयादी धुंकाः वय्कः याकःचा पहाडय् प्रार्थना यायेत थाहां झाल। बहनी तकं वय्कः याकःचा हे च्वनादिल।
24थुबलय् तक नांचा समुद्र सिथं यक्व हे तापाक्क थ्यने धुंकल। फय् अःखतं वयाच्वंगुलिं लःद्वम्बलं यानाः नांचा फातापुली थें च्वनाच्वन। 25सुथ न्हापां हे वय्कः समुद्रय् न्यासि झायाः इमिथाय् थ्यंकः झाल। 26वय्कःयात थथे समुद्रय् न्यासि झायाच्वंगु खनाः चेलात ग्यानाः “भूत भूत” धकाः चिल्लाय् दनाः हाल।
27वय्कलं इमित धयादिल – “साहस या, जि हे खः, ग्याये मते।”
28अले पत्रुसं वय्कःयात धाल – “प्रभु, धात्थें छि हे खः धयागु जूसा जितः नं समुद्रय् न्यासि वयेगु उजं बियादिसँ।”
29वय्कलं वयात “वा” धकाः धयादिल। पत्रुस नांचां कुहां वनाः वय्कःयाथाय् वनेत लखं लखं न्यासि वन। 30फय् वःगु खनाः व ग्यात, दुनी थें च्वंबलय् व चिल्लाय् दनाः हाल – “प्रभु, जितः बचय् यानादिसँ।”
31अले वय्कलं वयात ज्वनाः धयादिल – “ग्व, छंगु विश्वास, छाय् संका यानागु?”
32वय्कःपिं निम्हं नांचाय् च्वने धुंकाः फय् नं दित। 33नांचाय् च्वंपिं चेलातय्सं वय्कःया तुतिइ भ्वपुलाः धाल – “छि धात्थें परमेश्वरया काय् खः।”
34पारिइ थ्यंकाः इमिसं गनेसरेत धाःगु थासय् नांचा दिकल। 35अन च्वंपिं मनूतय्सं वय्कःयात म्हसीकाः जवंखवं च्वंगु गामय् थ्व खँ धाय्के छ्वत। अले मनूतय्सं वय्कःयाथाय् उसाँय् मदुपिन्त हल। 36इमिसं वय्कःयागु लंयागु च्वः जक थीत बिन्ति यात। थुकथं लं थ्यूपिं फुक्कं लाया वन।
Currently Selected:
मत्ती 14: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.