लूका 13
13
पापं लिचिलेगु ला कि सीगु?
1अबलय् हे छथ्वः मनूतय्सं वयाः येशूयात थथे धाल – “परमेश्वरयात बलि बियाच्वंबलय् पिलातसं गालीलीतय्त स्याकल। अले इमिगु हि व बांयागु हि नाप ल्वाकछ्याना बिल।” 2वय्कलं इमित लिसः बियादिल – “थुपिं मेपिं गालीलीत स्वयाः तसकं पापी जूगुलिं अथे यानाः स्याःगु धकाः मतिइ तया ला कि छु छिकपिन्सं? 3जिं छिकपिन्त धाये – अथे मखु, छिकपिन्सं पश्चाताप मयाःसा छिकपिं नं इपिं थें सी माली। 4सिलोआमय् च्वंगु धरहरा क्वःदलाः ल्हानाः सीपिं झिंच्याम्ह मनूत यरूशलेमय् च्वंपिं मनूत स्वयाः पापीत धकाः मतिइ तया ला कि छु छिकपिन्सं? 5जिं छिकपिन्त धाये – अथे मखु, छिकपिन्सं पश्चाताप मयाःसा छिकपिं नं इपिं थें सी माली।”
यःमरि मसःगु सिमायागु उखान
6अले येशूं इमित उखान छगू छुनादिल – “छम्ह मनुखं थःगु दाखया क्यबय् यःमरिमा पिनातःगु दु। छन्हु वं सिमाय् यःमरि सयाच्वंगु दु ला धकाः माः वन, तर यःमरि छगः हे सयाच्वंगु मखन। 7अले वं क्यबय् ज्या याइम्हय्सित धाल – ‘स्वदँ मछि दये धुंकल थ्व यःमरि सइ ला धकाः पियाच्वनागु, सःगु हे मखुनि। आः ला सिमायात पाला छ्वःसां जिल। थाय् जक पंक, छाय् तया तयेगु?’
8 “अले क्यबय् ज्या याइम्हय्सिनं धाल – ‘आः हानं दच्छि तक स्वये का हजुर। जिं हानं छकः जःखः बांलाक म्हुयाः गाक्क साः तयाः स्वये। 9थथे यानाः यःमरि सल धाःसा बां हे लात, मखुसा पाला छ्वयाबी।’”
धुसि लूम्ह मिसायात लाय्कादीगु
10छन्हु विश्रामबार खुन्हु येशू धर्मशास्त्र स्यनीगु छेँय् झायाः स्यनेकने यानादिल। 11अबलय् भूत दुब्यूम्ह छम्ह धुसि लूम्ह मिसा नं अन वयाच्वन। थ्व मिसा धस्वाये मफु। वयात थथे जुयाच्वंगु झिंच्यादँ मछि दये धुंकल। 12वयात खनाः वय्कलं सःताः थथे धयादिल – “छिगु ल्वय् लन।” 13अले वय्कलं थःगु ल्हाः वयागु छेनय् तयादिल। उघ्रिमय् हे व धस्वाये फत। अले वं परमेश्वरयात जयजय यात।
14अथे वय्कलं विश्रामबार खुन्हु हे ल्वय् लाय्कादिल धकाः धर्मशास्त्र स्यनीगु छेँयाम्ह कजी तसकं तंम्वय्कल। अले वं मनूतय्त धाल – “ज्या याये ज्यूगु दिं ला खुन्हु मछि द हे दु नि। सुयां ल्वय् लाय्के माःसा उबलय् वःसां ज्यूनि। विश्रामबार खुन्हु हे लाय्केमाः धयागु छु दु?”#प्रस २०:९-१०; व्य ५:१३-१४
15अले प्रभुं वयात लिसः बियादिल – “छिकपिं गज्याःपिं निपाः ख्वाःपाः दुपिं? छिकपिन्सं द्वहंतय्त, गधातय्त विश्रामबार खुन्हु गलं त्वःताः लः त्वंके मयंका ला? 16अले छु, अब्राहामया म्ह्याय् थ्व मिसायात झिंच्यादँ तक शैतानं चिनातल। छु थ्वयात विश्रामबार जुल धायेवं त्वःताबी म्वाः ला?”
17थथे धयादीगुलिं वय्कःया विरोधीत मछालाः सुम्क च्वन। अले अजू चायापुगु ततःधंगु ज्या यानादीगुलिं ग्वाः ग्वाः मनूत वय्कः खनाः लय्लय्ताल।
दक्वसिबय् चिग्वःगु पुसा व सोडायागु उखान
मत्ती १३:३१-३३; मर्क ४:३०-३२
18येशूं धयादिल – “परमेश्वरयागु राज्य गथे च्वं धकाः गय् यानाः धायेगु? छु नाप दाँजय् यानाः क्यनेगु? 19परमेश्वरयागु राज्य थथे च्वं। छम्ह मनुखं तुग्वःया पुसा थःगु बुँइ ह्वल। थ्व बुया वयाः तःमागु सिमा जुइ, अले झंगःपंक्षीतय्सं थुकियागु कचामचाय् थःगु स्वँ दय्की।”
20वय्कलं हानं धयादिल – “परमेश्वरयागु राज्ययात छु नाप दाँजय् यानाः क्यनेगु? 21परमेश्वरयागु राज्य थथे च्वं। छम्ह मिसां सोडा कयाः सोफा छ्वचुंलय् ल्वाकछ्यानाः फुक्क थासय् मथ्यंतले न्हायाच्वन। अले छ्वचुं फुक्कं फ्वंगाना वल।”
चिब्यागु लुखा
22येशू शहर शहर व गां गां जुयाः स्यनेकने यायां यरूशलेमपाखे झाया च्वंबलय् 23वय्कःयात छम्ह मनुखं न्ह्यसः यात – “प्रभु, कम मनूतय्त जक मुक्ति दइ ला?”
अले वय्कलं वयात धयादिल – 24“चिब्यागु लुखां दुहां वनेगु कुतः या, छाय्धाःसा यक्व मनूतय्सं अनं दुहां वनेत ला स्वइ, अय्नं फइ मखु। 25छेँ थुवालं खापा ति धुंकाः हानं चाय्काबी मखु। अले छिपिं पिने च्वनाः थथे धयाः खापा संका च्वनेमाली – ‘प्रभु, खापा चाय्कादिसँ।’ वय्कलं थथे लिसः बिया हइ – ‘छिपिं गनं वयापिं खः? जिं छिमित म्हमस्यू।’ 26अले छिमिसं थथे धाइ – ‘जिपिं छिनाप हे नयेत्वने याये धुंपिं खः। अले जिमिगु हे त्वालय् झायाः छिं जिमित स्यनादीगु खः।’ 27छिमिसं वय्कःयात अथे धाःसां वय्कलं छिमित थथे धया हइ – ‘धात्थें हे छिपिं गनं वःपिं खः धकाः जिं मस्यू। अले गज्याःपिं खः धकाः नं जिं मस्यू। मभिंगु जक ज्या यानाजुइपिं, हालाच्वने मते, हुँ।’#भज ६:८
28 “अले छिमिसं अब्राहाम, इसहाक, याकूब व फुक्क अगमवक्तात स्वर्गय् परमेश्वरया राज्यय् च्वनाच्वंगु, छिमित जक दुमकाःगु खनाः नुगः हीसे च्वंकाः ख्व जक ख्वयाः, वा न्ह्ययाच्वनी। #
मत्ती २२:१३; २५:३० 29यहूदीमखुपिं मनूत पुर्ब, पच्छिम, उत्तर, दच्छिन फुक्क थासं वयाः स्वर्गय् परमेश्वरया राज्यय् भ्वय् नयेत फ्यतुइ खनी।#मत्ती ८:११-१२ 30थुइकि, आः न्हापा लाःपिं लिपालाइ, अले लिपा लाःपिं न्हापा लाइ।”#मत्ती १९:३०; २०:१६; मर्क १०:३१
यरूशलेम खनाः नुगः मछिंकादीगु
मत्ती २३:३७-३९
31अबलय् हे सुं फरिसीतय्सं वयाः येशूयात थथे धाल – “हेरोदं छितः स्यायेत स्वयाच्वंगु दु, याकनं हे थनं बिस्युं झासँ।”
32वय्कलं इमित लिसः बियादिल – “झासँ व ध्वंयात थथे धयादिसँ – जिं थौं व कन्हय् तक भूततय्त पितिनाछ्वयेगु, ल्वगितय्त लाय्काबीगु याये मानि, कंस ला जिं थःगु ज्या सिधय्के। 33न्ह्यागु हे जूसां थौं, कन्हय् व कंस जि थःगु लँय् वना हे च्वनेमाः छाय्धाःसा यरूशलेमं पिने ला अगमवक्ता सी जि हे मज्यू।”
34 “हे यरूशलेमय् च्वंपिं मनूत, छिमिसं अगमवक्तातय्त स्याना छ्वत, अले परमेश्वरं छ्वयाहयादीपिं दूततय्त ल्वहँतं कय्काः स्याना छ्वत। जिं छिमित माखां थः खाचातय्त त्वपुया तः थें गुलि बचय् यायेत स्वये धुन। अय्नं छिपिं मानय् मजू। 35आवंनिसें छिमिगु छेँनं छिमित हे त्वःताथके। जिं छिमित धाये – आवंलि छिमिसं प्रभुया नामं झायादीम्हय्सित तःमधंकुतले जितः खनी मखु।”#भज ११८:२६; यर २२:५
Currently Selected:
लूका 13: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
