यूहन्ना 4
4
येशू व सामरी मिसा
1यूहन्नां स्वयाः येशूं यक्व मनूतय्त चेला दय्काः बप्तिस्मा बियाच्वन धकाः फरिसीतय्सं नं सिल धयागु खँ 2-3प्रभुं सीकादीगुलिं वय्कः हानं यहूदियां गालीलय् झाल। वय्कः थःम्हय्सिनं हे बप्तिस्मा बियादीगु ला मखु, बरु वय्कःया चेलातय्सं ब्यूगु खः।
4गालीलय् वनेत सामरिया जुयाः वनेमाः। 5वय्कः याकूबं थःकाय् योसेफयात ब्यूगु जगायागु लिक्क लाःगु सामरियायागु सुखार धाःगु शहरय् थ्यंकः झाल।#उत ३३:१९; यहो २४:३२ 6अन याकूबं दय्कातःगु तुं छगः दु। त्यानुसे च्वंगुलिं येशू तुंया क्वय् फ्यतुनादिल। थुबलय् बान्हि जाल।
7अबलय् लाक्क हे छम्ह सामरी मिसा लः काःवल। वय्कलं वयात धयादिल – “जितः लः त्वनेत बियादिसँ।” 8अबलय् वय्कःया चेलात नयेगु नसा न्यायेत शहरय् वनाच्वंगु खः।
9सामरी मिसां वय्कःयात धाल – “छि छम्ह यहूदी जुयाः नं सामरी मिसाया ल्हातं लः त्वने ज्यू ला?” यहूदीतय्सं सामरीतय्गु ल्हातं नयेत्वनेगु मयाः।#एज्र ४:१-५; नहे ४:१-२
10येशूं वयात धयादिल – “छं परमेश्वरं बियादीगु दान स्यूगु जूसा, अले छंके लः फ्वंम्हय्सित म्हस्यूगु जूसा, छं वयाके हे लः त्वनेत फ्वनीगु जुइ। अले वं हे छन्त जीवन दइगु लः बीगु जुइ।”
11अले व मिसां धाल – “हजुर, तुं तसकं हे तःजाः, लः सालेत छिके छुं हे मदु। छिं जीवन दइगु लः गनं कयादी? 12जिमित तुं दय्काब्यूम्ह जिमि तापाःबाज्या याकूब खः। छु छि वय्कः स्वयाः नं तःधं ला? जिमि तापाःबाज्यां, वया काय्पिन्सं, अले वया सा, द्वहंतय्संनापं थ्व हे तुंयागु लः त्वना वन।”
13वय्कलं वयात धयादिल – “थ्व लः त्वनीपिं मनूतय्त हानं हानं प्याः चाइ। 14तर जिं बियागु लः त्वनीपिं मनूतय्त गुबलें हे प्याः चाइ मखु। जिं बियागु लः हे व मनूयाके बुंगाःचा थें जुयाः अनन्त जीवन तक बुयावया च्वनी।”
15व मिसां धाल – “हजुर, जितः नं थ्व लः बियादिसँ। अले जितः गुबलें हे लः त्वने प्याः चाइ मखु। अले हानं लः कायेत थन वये माली नं मखु।”
16वय्कलं वयात धयादिल – “वा, छं थः भाःतयात थन सःता हिँ।”
17वं लिसः बिल – “जिमि भाःत मदु।”
वय्कलं धयादिल – “जिमि भाःत मदु धकाः छं खःगु हे खँ धाल। 18आः तकं छं न्याम्ह भाःत दये धुंकल, अले आः छनापं दुम्ह मिजं नं छं थः भाःत मखु। छं खःगु हे धाल।”
19व मिसां धाल – “प्रभु, छि अगमवक्ता खः धकाः जिं सिल। 20जिमि तापाःबाज्यापिन्सं थ्व पहाडय् पुजा याना वन, छिकपिन्सं धाःसा यरूशलेमय् मनूतय्सं परमेश्वरयात आराधना यायेमाः धकाः धयादिल।”
21वय्कलं वयात धयादिल – “मय्जु, विश्वास यानाः बांलाक न्यना का। ई वयाच्वंगु दु, गुबलय् छिमिसं परमेश्वर बाःयात आराधना यायेत न यरूशलेमय् न थ्व पहाडय् हे वनेमाली। 22छिपिं सामरियाय् च्वंपिन्सं म्हमस्यूम्हय्सित आराधना याइ। तर जिमिसं सुयागु आराधना यानाच्वना वय्कःयात जिमिसं बांलाक हे म्हस्यू, छाय्धाःसा मुक्ति ला यहूदीतय्पाखें वइ। 23अय्नं ई वयाच्वंगु दु, व आः हे खः, बाःयात आराधना याइपिन्सं आत्मां व सत्यं याइ। वय्कःयात नं थुकथं आराधना याइपिं जक यः। 24परमेश्वर आत्मा जुयादीगुलिं वय्कःयात आराधना याइपिन्सं सत्य व आत्मां आराधना यायेमाः।”
25व मिसां वय्कःयात धाल – “मुक्ति बीम्ह ख्रीष्ट धाःम्ह मसीह झायादी तिनि धकाः जिं स्यू। वय्कः झाल कि वय्कलं हे झीत फुक्कं खँ कनादी।”
26वय्कलं धयादिल – “छनापं नवाना च्वनाम्ह जि, व हे खः।”
27उबलय् हे चेलात थ्यंकः वल। वय्कः अथे छम्ह मिसानाप खँ ल्हानाच्वंगु खनाः इपिं छक्क जुल। अय्नं सुनानं – “छिं छु मालादियागु” अले “व नाप छिं छाय् खँ ल्हानादियागु?” धकाः मन्यं। 28उबलय् हे लःघः त्वःताः व मिसां शहरय् वनाः मनूतय्त थथे धाल – 29“वा, छम्ह मनूयात स्वः वा। वय्कलं जिं यानागु फुक्क खँ धयाबिल। व मनू मुक्ति बीम्ह ख्रीष्ट ला, मखु ला?” 30थ्व न्यनाः अनच्वंपिं मनूत वय्कःयाथाय् वल।
31अबलय् हे चेलातय्सं वय्कःयात थथे धाल – “गुरुजु, भपियादिसँ।”
32वय्कलं धयादिल – “जिके नयेत छिमिसं सि हे मस्यूगु नसा दु।”
33थ्व न्यनाः इमि दथुइ थथे खँ जुल – “सुनानं वय्कःयात नसा हयाबिल ला कि छु?”
34वय्कलं धयादिल – “जितः छ्वयाहया दीम्हय्सिगु ज्या सिधय्केगु, अले वय्कलं धाःथें यानाजुइगु हे जिगु नसा खः। 35‘प्यला लिपातिनि बाली लये त्यइ’ धकाः छिमिसं धयाजुल। जिं छिमित धाये – ‘छकः बुँइ वनाः बांलाक स्व, अन्न सयाः नं लयेगु ई जुइ धुंकल।’ 36सुनां बाली लइ, वयात ज्याला दइ, अले अनन्त जीवनया निंतिं फल मुंके खनी। थुकथं पुसा ह्वःम्ह नं, बाली लःम्ह नं लय्ताय् दइ। 37छम्हय्सिनं पुसा ह्वली, अले मेम्हय्सिनं बाली लइ धकाः धयातःगु खँ थुकिं हे सत्य जुल। 38छिमिसं बाली पिना मतःथाय् जिं छिमित लय्के छ्वया। बाली पिना तःपिं मेपिं खः, अय्नं इमिसं पिनातःगु बाली छिमिसं लये खन।”
39“जिं यानागु फुक्क खँ वय्कलं धयादिल” धकाः व मिसां धाःगुलिं व शहरय् च्वंपिं यक्व हे सामरीतय्सं वय्कःयात विश्वास यात। 40अय्जूगुलिं वय्कःयाथाय् वःबलय् इमिसं इमिथाय् हे च्वनादिसँ धकाः बिन्ति याःगुलिं वय्कः निन्हु तक अन च्वनादिल। 41वय्कःयागु वचन न्यनाः यक्वसिनं हे वय्कःयात विश्वास यात। 42इमिसं व मिसायात धाल – “आः छं धाःगुलिं जक जिमिसं विश्वास यानागु मखु, बरु जिमिसं हे वय्कःयागु खँ न्यनाः विश्वास यानागु खः। जिमिसं वय्कः हे संसारयाम्ह मुक्तिदाता खः धकाः सीके धुन।”
भारदारया काय्यात लाय्कादीगु
43निन्हु लिपा येशू गालीलय् झाल। 44अगमवक्तायात थःगु थासय् सुनानं मानय् याइ मखु धकाः वय्कलं थःम्हं हे धयादीगु खः।#मत्ती १३:५७; मर्क ४:२४; लूक ४:२४ 45अय्नं वय्कः गालीलय् झायादीबलय् अन च्वंपिं मनूतय्सं वय्कःयात लसकुस यात, छाय्धाःसा थुमिसं यरूशलेमय् वंबलय् वय्कलं अन नखःबलय् यानादीगु अजू चायापुगु ज्या खंगु खः।#यूह २:२३
46वय्कः हानं गालीलय् च्वंगु काना शहरय् झाल। अन हे वय्कलं लःयात दाखमद्य दय्कादीगु खः। कफर्नहुमय् च्वंम्ह छम्ह भारदारया काय् म्हंमफया च्वन।#यूह २:१-११ 47येशू यहूदियां गालीलय् झायाच्वन धकाः धाःगु न्यनाः वं वनाः सी थें च्वंम्ह थःकाय्यात लाय्का बियादिसँ धकाः वय्कःयात बिन्ति यात।
48अले वय्कलं वयात धयादिल – “अजू चायापुगु ज्या व चिं मखंकं छिकपिन्सं विश्वास यानादी मखु।”
49अले वं वय्कःयात धाल – “प्रभु, जिमि काय् सी न्ह्यः हे झासँ।”
50वय्कलं लिसः बियादिल – “हुँ, छिमि काय् मसीनि।” अले व वय्कलं धयादीगु खँय् विश्वास यानाः वन।
51छेँय् वनाच्वंबलय् वया दासतय्सं वयात नाप लानाः “छिकपिनि काय् लाये धुंकल” धकाः धाल। 52गुबलय् निसें वयात ज्यूगु धकाः वं न्यन। अले “म्हिगः न्हिनय् एक बजेनिसें ज्वर क्वलात” धकाः वया दासतय्सं धाल। 53“छिकपिनि काय् म्वाइ” धकाः धयादीगु इलय् हे ज्यूगु धकाः वं सीकल। अले वं व वया छेँयापिं फुक्कसिनं विश्वास यात। 54येशू यहूदियां गालीलय् झायाः यानादीगु अजू चायापुगु चिं थ्वनापं निकः जुल।
Currently Selected:
यूहन्ना 4: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
