यूहन्ना 18
18
येशूयात ज्वंगु
मत्ती २६:४७-५६; मर्क १४:४३-५०; लूक २२:४७-५३
1थुलि धयाः येशू चेलात नाप किद्रोन खुसि पारिइ झाल। अले वय्कः छगू बगैँचाय् थः चेलातनापं दुहां झाल। 2थ्व थाय् वय्कःयात धोखा बीम्ह यहूदां नं स्यू, छाय्धाःसा येशू थः चेलातनापं थ्व थासय् बरोबर झायादीगु याः। 3उकिं यहूदा तःधंपिं पुजाहारीतय्थाय् व फरिसीतय्थाय् वनाः छथ्वः सिपाइँत व हाकिमतय्त ब्वनाः मिप्वाः, लालतिन, व हतियार ज्वनाः अन वल।
4वय्कलं जुइत्यंगु फुक्क खँ सीकाः पिहां झायाः इमित धयादिल – “छिमिसं सुयात माला च्वनागु?”
5इमिसं वय्कःयात लिसः बिल – “नासरतयाम्ह येशूयात।”
अले वय्कलं इमित – “व जि हे खः” धकाः धयादिल। वय्कःयात ज्वंकीम्ह यहूदा नं इपिं नाप दनाच्वंगु दु। 6“व जि हे खः” धकाः धयादीगुलिं इपिं लिज्यां वनाः बँय् ग्वारातू वन। 7वय्कलं इमिके हानं न्यनादिल – “छिमिसं सुयात माः वयागु?”
अले इमिसं धाल – “नासरतयाम्ह येशूयात।”
8वय्कलं लिसः बियादिल – “व जि हे खः धकाः जिं छिमित धाये हे धुन नि। छिमिसं जितः माला च्वनागु खःसा थुमित वनेब्यु।” 9वय्कलं थथे धयादीगु खँ पूवनेमा धकाः थथे जूगु खः – “छिं जितः बियादीपिं सुयातं जिं तंकागु मदु।”
10सिमोन पत्रुसयाके तरवार दुगुलिं तरवार लिकयाः वं दकलय् तःधंम्ह पुजाहारीया छम्ह दासयागु जव न्हाय्पं च्वात्त ध्यनाबिल। वयागु नां माल्खस खः। 11वय्कलं पत्रुसयात धयादिल – “तरवार दापय् स्वथँ। बाःनं जितः त्वनेत बियादीगु दुःखयागु ख्वला छु जिं मत्वनेगु ला?”#मत्ती २६:३९; मर्क १४:३६; लूक २२:४२
हन्नासया न्ह्यःने येशू
12अले सिपाइँत, इमि हाकिम व यहूदीतय् सिपाइँत जानाः येशूयात ज्वनाः चित। 13उगु दँयाम्ह दकलय् तःधंम्ह पुजाहारी कैयाफा जूगुलिं इमिसं वय्कःयात वया ससःअबु हन्नासया थाय् निं यंकल। 14झी मनूतय्गु निंतिं छम्ह मनू सीगु हे बांलाः धकाः यहूदीतय् नायःतय्त सल्लाह ब्यूम्ह कैयाफा हे खः।#यूह ११:४९-५०
पत्रुसं येशूयात म्हमस्यू धाःगु
मत्ती २६:६९-७५; मर्क १४:६६-६८; लूक २२:५५-५७
15सिमोन पत्रुस व मेम्ह छम्ह चेला नं येशूयागु ल्यूल्यू वन। मेम्ह चेलां दकलय् तःधंम्ह पुजाहारीयात म्हस्यूगुलिं व नं वय्कः लिसे लिसे दकलय् तःधंम्ह पुजाहारीयागु चुकय् दुहां वन। 16पत्रुस धाःसा लुखा पिनेसं तुं दनाच्वन। दकलय् तःधंम्ह पुजाहारीयात म्हस्यूम्ह मेम्ह चेला पिने वनाः मिसाम्ह ध्वाखा पिवाः नाप खँ ल्हानाः पत्रुसयात नं चुकय् दुने ब्वना हल। 17मिसाम्ह ध्वाखा पिवालं पत्रुसयात धाल – “थ्व मनूया चेलात मध्ये छ नं छम्ह मखु ला?”
वं धाल “जि मखु।”
18तसकं चिकुसे च्वंगुलिं दासत व सिपाइँत ह्यंग्वाः च्याकाः मि पनाच्वन। पत्रुस नं इपिं नाप तुं दनाः मि पनाच्वंगु खः।
दकलय् तःधंम्ह पुजाहारीया न्ह्यःने येशू
19दकलय् तःधंम्ह पुजाहारीं वय्कःया चेलातय्गु व वय्कलं स्यनादीगु खँय् न्ह्यसः यात। 20वय्कलं लिसः बियादिल – “संसारया न्ह्यःने जिं धयागु दु, जिं न्ह्याबलें धर्मशास्त्र स्यनीगु थाय् थासय् व देगलय् च्वनाः स्यनेकने यानागु दु। जिं सुयातं गुप्त खँ ल्हाः मजुया। 21जिके हानं न्यनादी माःगु हे मदु। जिं स्यनागु व नवानागु खँ न्यंपिन्के न्यनादिसँ। जिं छु धाल धयागु खँ इमिसं सि हे स्यू।”
22वय्कलं थथे धयादीगुलिं लिक्कसं दनाच्वंपिं मध्ये छम्ह देगलय् पिवाः च्वनीम्हय्सिनं थथे धाधां वय्कःयात दाल – “दकलय् तःधंम्ह पुजाहारी थें ज्याःम्हय्सित लिसः बीगु थथे खः ला?”
23वय्कलं वयात लिसः बियादिल – “जिं मखुगु खँ धयागु जूसा क्यनादिसँ। मखुसा जितः छाय् दाये माःगु?”
24अले हन्नासं वय्कःयात चीकाः दकलय् तःधंम्ह पुजाहारी कैयाफायाथाय् तुं छ्वयाबिल।
पत्रुसं निक्वः खुसि व स्वक्वः खुसि येशूयात म्हमस्यू धाःगु
मत्ती २६:७१-७५; मर्क १४:६९-७२; लूक २२:५८-६२
25अबलय् सिमोन पत्रुस दनाः मि पनाच्वन। इमिसं वयात धाल – “छ नं वय्कःया चेलात मध्ये छम्ह मखु ला?”
वं हानं थथे धाल – “जि मखु।”
26पत्रुसं न्हाय्पं चाना ब्यूम्ह मनूया छम्ह थःथिति नं अन दु। व नं दकलय् तःधंम्ह पुजाहारीया च्यः खः। वं थथे धाल – “जिं छन्त वय्कः नाप बगैँचाय् खनागु मखु ला?” 27पत्रुसं हानं “मखु” धकाः धाल। थुबलय् हे खा हाला हल।
रोमी बडा-हाकिम पिलातसया न्ह्यःने येशू
मत्ती २७:१-२,११-१४; मर्क १५:१-५; लूक २३:१-५
28सुथ न्हापां हे इमिसं येशूयात कैयाफायागु छेँनं रोमी बडा-हाकिम पिलातसयागु दरबारय् यंकल। छुत्काराया नखः स्वये खनी मखु धकाः ग्यानाः थःपिं अशुद्ध मजुइमा धकाः दरबारय् दुहां मवं। 29उकिं पिलातसं पिने वयाः इमित धाल – “थ्व मनूयात छिमिसं छु दोष बिया?”
30इमिसं वयात लिसः बिल – “थ्व मनुखं मखुगु ज्या मयाःगु जूसा जिमिसं थन हये हे मखुनि।”
31पिलातसं इमित धाल – “छिमिसं हे यंकाः थ्वयात छिमिगु व्यवस्थाकथं छु यायेमाःगु खः, या।”
अले यहूदीतय् नायःतय्सं वयात लिसः बिल – “जिमित सुयातं स्यायेगु अधिकार बियातःगु मदु।” 32थः गथे जुयाः सी मानि धकाः वय्कलं धयादीगु वचन पूवनेमा धकाः थथे जूगु खः।#यूह ३:१४; १२:३२
33पिलातसं लाय्कुलिइ दुहां वनाः वय्कःयात सःताः धाल – “छु छ यहूदीतय् जुजु खः ला?”
34वय्कलं लिसः बियादिल – “थ्व खँ छिं हे धयादियागु ला कि छितः सुनानं जिगु खँ कना ब्यूगु खः?”
35पिलातसं लिसः बिल – “छु जि यहूदी खः ला? छंगु हे जातयापिं मनूतय्सं व तःधंपिं पुजाहारीतय्सं ज्वनाः छन्त जिथाय् हःगु खः। छं छु याना?”
36वय्कलं लिसः बियादिल – “जिगु राज्य थ्व संसारयागु थें मखु। जिगु राज्य थ्व संसारयागु थें खःसा जिमि चेलातय्सं ल्वानाः जितः यहूदीतय् नायःतय्गु ल्हातं बचय् याइगु खः। जिगु राज्य थनयागु थें मखु।”
37पिलातसं वय्कःयात धाल – “अय्सा छ जुजु हे खः ला?” वय्कलं धयादिल – “जि जुजु खः धकाः ला छिं हे धयादिल। थुकियागु निंतिं हे जि बूगु खः, अले सत्य म्हसीका बीत जि संसारय् वयागु खः। सत्ययात म्हस्यूपिं फुक्कसिनं जिगु खँ न्यनी।”
38पिलातसं वय्कःयात न्यन – “सत्य धयागु छु?”
येशूयात स्यायेगु फैसला याःगु
मत्ती २७:१५-३१; मर्क १५:६-१५; लूक २३:१३-२५
अले पिलातसं हानं यहूदीतय् नायःतय्थाय् वनाः थथे धाल – “जिं ला वयाके छुं हे दोष लुइके मफुत। 39अय्नं छुत्काराया नखःबलय् छम्हय्सित त्वःताबीगु छिमिगु चलन दु, उकिं थुगुसी यहूदीतय् जुजुयात त्वःताबी ला?”
40इपिं थथे धकाः हाला हल “थ्व मनूयात मखु, बरु बारब्बायात त्वःताब्यु।” बारब्बा धाःम्ह मनू छम्ह दाखुँ खः।
Currently Selected:
यूहन्ना 18: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
