उत्पत्ति 47
47
1योसेफं थः न्याम्ह दाजु-किजापिन्त नापं ब्वना यंकाः फारोयाथाय् वनाः धाल, “जिमि बाः व दाजुकिजापिं थःपिनिगु सा, फै व थःपिन्के दुगु फुक्क वस्तु ज्वनाः कनानं थन वःगु दु। आः इपिं गोशेनय् च्वनाच्वंगु दु।”
2अले वं थः न्याम्ह दाजुकिजापिन्त म्हसीका बिल। 3फारों इमिके न्यन, “छिपिं छु ज्या याइपिं?”
इमिसं धाल, “महाराज, जिपिं जिमिगु पुर्खानिसें हे फैजवाःत खः। 4कनान देशय् तसकं अनिकाल जुयाः फै ज्वयेत तकं थाय् मदयाः जिपिं थन च्वं वयागु खः। उकिं सरकारं जिमित थन गोशेनय् च्वनेबियादिसँ।”
5अले फारों योसेफयात धाल, “छिमि बाः व दाजुकिजापिं छन्थाय् वःगु दु। 6मिश्र देश छंगु न्ह्यःने दु। देशय् दुने दक्वसिबय् भिंगु थासय् छिमि बाः व दाजुकिजापिन्त ति। इमित गोशेनय् हे च्वनेब्यु। इपिं मध्ये सुं ल्वःपिं व सःपिं दुसा इमित जिगु वस्तुया जिम्मा बियाब्यूसां ज्यू।”
7अले योसेफं थः बौ याकूबयात फारोया न्ह्यःने हल। याकूबं फारोयात आशीर्वाद बिल।
8फारों याकूबयात न्यन, “छि ग्वःदँ दत?”
9याकूबं धाल, “जि आः उखेंथुखें जुयागु सच्छि व स्विदँ दत। जिगु थ्व उमेर आपाः मदुसां तसकं दुःखं जाः। जिमि बाः बाज्यापिं म्वानावंगु ति ला जिगु उमेर थ्यं हे मथ्यंनि।” 10याकूबं हाकनं छकः फारोयात आशीर्वाद बिल, अले फारोयाथासं पिहां वन।
11योसेफं फारों धाःथें थः बौ व दाजुकिजापिन्त रामसेस धाःथाय् च्वंगु मिश्रया दक्वसिबय् भिंगु व बांलाःगु थाय् बियाः तल। 12योसेफं थः बौ, दाजुकिजा व फुक्कसित नसाज्वलं नं हयाबिल।
तसकं अनिकाल जूगु
13तसकं अनिकाल जूगुलिं गनं हे अन्न मदु। मिश्र व कनान देशय् नं तसकं अनिकाल जूगुलिं अनयापिं मनूत नये मखनाः बमलात। 14मिश्र व कनान देशयापिं मनूतय्सं अन्न न्यानाः पूगु धिबा फुक्क मुंकाः योसेफं फारोया छेँय् तयेहयातल। 15मिश्र व कनान देशय् च्वंपिनि धिबा फुसेंलि मिश्रय् च्वंपिन्सं वयाः योसेफयात धाल, “जिमित अन्न बियादिसँ। मखुसा जिपिं छिगु न्ह्यःने हे सी। जिमिके दुगु धिबा फुक्कं फुइधुंकल।”
16योसेफं इमित धाल, “छिमिके दुगु धिबा फुइधुंकल सा वस्तु हिँ। छिमिगु वस्तुया पलेसा जिं छिमित अन्न बी।” 17उकिं इमिसं थःपिन्के दुगु छेँय् लहीपिं वस्तु हल। योसेफं अन्नया पलेसा इमिसं हःगु सल, फै, च्वलय्, सा व गधा काल। थुकथं उगु दँय् योसेफं अन्नया पलेसा इमिगु छेँय् लहीपिं वस्तु काल।
18मेगु दँय् इपिं हाकनं वयाः हाल, “जिमिसं थःपिनिगु खँ छिगु न्ह्यःने सुचुके मखु। जिमिगु फुक्क धिबा नं फुइधुंकल, वस्तु नं फुक्क छिगु जुइ धुंकल। आः जिमिके जिमिगु म्ह व बुँ बाहेक मेगु छुं हे मदये धुंकल। 19जिमित व जिमिगु बुँयात नाश यानादी मते। जिमित अन्न बियाः जिमित व जिमिगु बुँ कयादिसँ। थुकथं जिपिं जिमिगु बुँनापं फारोया दास दासी जुइ। जिमित पुसा बियादिसँ। अले जिपिं सी माली मखु, जिमिगु बुँ नं बाझः जुइ मखु।”
20थुकथं योसेफं मिश्रया फुक्क बुँ छकू छकू यानाः फारोया निंतिं न्यानाकाल। अन तसकं अनिकाल जूगुलिं फुक्क मिश्रीतय्सं थःपिनिगु बुँ मीमाल। थुकथं मिश्रया फुक्क बुँ फारोयागु जुल। 21अले मिश्रया फुक्क मनूत फारोया दास दासी जुल। 22अन च्वंपिं पुजाहारीतय्सं जक थःपिनिगु बुँ मीम्वाःल। छाय्धाःसा जुजुं हे इमित न्हियान्हिथं अन्न इनाबियातःगु दु।
23अले योसेफं फुक्कसित धाल, “आः छिपिं व छिमिगु बुँ फुक्क जुजुयागु जुइ धुंकल। जिं आः छिमित बुँइ पीत पुसा बी। 24लयेगु इलय् छिमिसं बुँइ सःगु न्याब्वय् छब्व जुजुयात बीहयेमाः, अले प्यब्व धाःसा छिमिसं पुसाया निंतिं व थथःगु परिवार व थः मस्तय्गु नसाया निंतिं तये फइ।”
25इमिसं धाल, “छिं जिमित बचय् यानादिल। जिमि प्रभुया दया जिमिके दयाच्वनेमा। जिपिं आः जुजुया दास जुयाच्वने।” 26उकिं मिश्र देशय् योसेफं बुँयागु छगू कानून हे दय्काबिल। मिश्रय् थ्व कानून आः तक नं दनि। थ्व कानूनकथं बुँयागु न्याब्वय् छब्व अन्न जुजुयागु जुइ। पुजाहारीतय्गु बुँ जक जुजुयागु मजुल।
27थुकथं मिश्रया गोशेनय् इस्राएलीतय्सं थःपिनिगु थाय्बाय् दय्कल। इमिसं अन यक्व सम्पत्ति दय्कल। इमि सन्तान नं यक्व दयावल। 28याकूब मिश्रय् झिंन्हय्दँ म्वात, मुक्कं सच्छि व पिइन्हय्दँय् क्यन।
29इस्राएलं थः सीत्यय्काः थःकाय् योसेफयात सःताः धाल, “छं जितः धात्थें हे माया यानागु खःसा जितः थन मिश्रय् थुने मखु धकाः बचं ब्यु। 30जि सी धुंकाः जितः थनं यंकाः जिमि बौ बाज्यापिं थुनातःथाय् हे थुनाब्यु।”
वं धाल, “जिं छिं धाःथें हे याये।”
31इस्राएलं हाकनं धाल, “अथे याये धकाः पाफ।” अले योसेफं पाफल। अले इस्राएल थःगु लासाया छ्यंफुसय् भ्वपुल।
Currently Selected:
उत्पत्ति 47: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
