उत्पत्ति 45
45
योसेफं थः सु खः धकाः कंगु
1योसेफं थःगु मन चीमफुसेंलि वं ज्या याइपिं फुक्कसित अनं पितिनाछ्वत। थः दाजुपिं जक ल्यं दसेंलि वं थः सु खः धकाः थः दाजुपिन्त कन। 2अले व ह्वाँय्ह्वाँय् ख्वल। व ख्वःगु अन च्वंपिं मिश्रीतय्सं नं ताल, अले थ्व खँ फारोया छेँय् नं सिल।
3योसेफं थः दाजुपिन्त धाल, “जि योसेफ खः, जिमि बाः आः तकं म्वानाच्वंगु दनि ला?” वया दाजुपिन्सं धाःसा ग्यानाः छुं हे लिसः बी मफुत।
4वं थः दाजुपिन्त धाल, “जिगु लिक्क वा।” इपिं वयागु लिक्क वँसेंलि वं धाल, “जि छिमिसं मिश्र देशय् मियाछ्वःम्ह छिमि किजा योसेफ खः। 5जितः थन मियाहःगुलिइ आः छिमिसं दुःख ताये मते, थः खनाः तं नं म्वये मते। जितः थन फुक्क मनूतय्त बचय् यायेत परमेश्वरं हे छ्वयाहयादीगु खः। 6निदँ न्ह्यवंनिसें देशय् अनिकाल जुयाच्वंगु दु, अले न्यादँ तक छुं नं पीगु व लयेगु ज्या जुइमखुनि। 7परमेश्वरं थुकथं छिमित व छिमि सन्तानयात म्वाकातयेत जितः थन छिपिं स्वयाः न्ह्यः छ्वयाहयादिल। 8उकिं जितः थन छ्वयाहःगु छिमिसं मखु, परमेश्वरं खः। वय्कलं हे जितः फारोया दरबारय् तःधंम्ह मनू यानादिल, अले मिश्र देशया हामा यानादिल।
9“आः याकनं जिमि बाःयाथाय् वनाः वय्कःया काय् योसेफं धयाहःगु धकाः थथे धयाब्यु, परमेश्वरं जितः मिश्र देशया हामा यानादीगु दु। पलख हे लिमबाकुसे जिथाय् याकनं झासँ। 10छि थः मचाखाचा, छय्पिं व थःलिसे दुगु फुक्क वस्तु व सामान ज्वनाः गोशेनय् जिगु सत्तीक च्वं झासँ। 11अन जूसा जिं छिकपिन्त स्वये फइ। छाय्धाःसा अनिकालया न्यादँ अज्ज नं ल्यंदनि। मखुसा ला छिकपिं फुक्कं हाःनाः मदयावनी।
12“आः छिपिं फुक्कसिनं अले बेन्यामीनं नं जि योसेफ हे खः धकाः सी हे धुंकल। 13मिश्र देशय् जि तःधंम्ह मनू जूगु अले छिमिसं थन खंगु फुक्क खँ जिमि बाःयात कँ। अले वय्कःयात थन याकनं हजि।”
14थथे धयाः व थःकिजा बेन्यामीनयात घय्पुयाः ख्वल। बेन्यामीन नं वयात घय्पुयाः ख्वल। 15व थः दाजुपिं फुक्कसित चुप्पा नयाः ख्वल। अले तिनि वया दाजुपिन्सं नं वलिसे खँ ल्हाये फत।
16योसेफया दाजुकिजापिं वःगु दु धयागु खँ फारोया दरबारय् थ्यंसेंलि फारो व वया भारदारत फुक्क लय्ताल।
17फारों योसेफयात धाल, “थः दाजुकिजापिन्त थथःगु गधायात कु क्वबिकाः कनानय् लिहां हुँ धयाब्यु। 18अले थः बौ व परिवारयात ज्वनाः थन लिहां वा। जिं इमित मिश्रया दक्वसिबय् भिंगु बुँ बी। अले अन सःगु अन्न नयाः आनन्दं च्वने फइ।”
19इमित थथे नं धयाब्यु, “थः मस्तय्त व कलाःपिन्त तयाः हयेत थनं गाडा नं यंकि। अले थः बौयात नं ब्वनाः थन वा। 20थःपिनिगु सामानया छुं नं च्यूताः तये मते। छाय्धाःसा मिश्रय् छु छु भिंगु दु व छिमिगु हे खः।”
21इस्राएलया काय्पिन्सं फारों धाःथें हे यात। योसेफं इमित गाडा व लँय् नयेत नसात्वँसा नं बियाछ्वत। 22इपिं फुक्कसित वं न्हू न्हूगु लं बिल, बेन्यामीनयात धाःसा वहःया स्वसः शेकेल#४५:२२ स्वसः शेकेल धयागु ३.५ किलोग्राम ति व न्याजु वसः नं बिल। 23वं थः बौया लागि झिम्ह गधाया म्हय् मिश्रया भिंगु भिंगु सामान, झिम्ह गधाया म्हय् अन्न व मरि, अले लँय् नयेत मेमेगु नसात्वँसा नं तयाः छ्वत। 24थुकथं योसेफं थः दाजुकिजापिन्त अनं छ्वत। वने न्ह्यः वं इमित धाल, “लँय् ल्वाये मते।”
25थुकथं इपिं मिश्र देशं वनाः कनान देशय् थः बौ याकूबयाथाय् थ्यंकः वल।
26इमिसं वयात धाल, “योसेफ मसीनि। व ला मिश्र देशया हामा जुयाच्वन।” थ्व न्यनाः याकूबं छुं हे धाये मफुत। वं थ्व खँ पत्याः हे याये मफुत। 27योसेफं इमित धयाहःगु फुक्क खँ न्यनाः, अले थःत हयेत धकाः छ्वयाहःगु गाडा खँसेंलि याकूबया होश वल।
28अले वं धाल, “आः जि छिमिसं धाःगु खँय् पत्याः जुल, जिमि काय् योसेफ मसीनि। जिं वनाः वयात नाप लाये, अले सी न्ह्यः वयागु ख्वाः स्वये।”
Currently Selected:
उत्पत्ति 45: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
