उत्पत्ति 42
42
योसेफ व वया दाजुकिजापिं
1मिश्रय् अन्न दु धकाः सिसेंलि याकूबं थः काय्पिन्त धाल, “छिपिं छाय् छुं मयासें ल्हाः प्वःचिनाच्वनागु? 2मिश्र देशय् अन्न दु धकाः जिं न्यना। म्वानाच्वनेगु खःसा अन वनाः अन्न न्याना हजि।”
3उकिं योसेफया झिम्ह दाजुपिं अन्न न्यायेत मिश्रय् वन। 4याकूबं योसेफया किजा बेन्यामीनयात धाःसा वयात नं छुं जुइ ला धकाः ग्यानाः वया दाजुपिंलिसे मछ्वः। 5थुकथं इस्राएलया काय्पिं मेपिंलिसे अन्न न्यायेत मिश्रय् वन। छाय्धाःसा कनान देशय् नं अनिकाल जूगु खः।
6उबलय् योसेफ मिश्र देशया हामा जुयाच्वंगु व वं हे अन्न मियाच्वंगुलिं वया दाजुपिन्सं वयात बँय् भ्वपुयाः भागि यात। 7वं थः दाजुपिन्त खनेवं म्हसिल। अय्नं म्हमस्यू पहः यानाः वं इमित तस्सलं न्यन, “छिपिं गनं वयापिं?”
इमिसं धाल, “कनान देशं अन्न न्यायेत वयागु।”
8योसेफं इमित म्हसीकूसां इमिसं वयात म्हसीके मफुत। 9वं इमिगु बारे खंगु म्हगस लुमंकल, अले धाल, “छिपिं थन चेवा याःवःपिं खः। छिपिं जिमिगु देशया कमजोरी सीकःवःपिं खः।”
10इमिसं धाल, “मखु, प्रभु, अथे मखु। छिकपिनि दासत, जिपिं अन्न न्याः वयापिं खः। 11जिपिं सकले दाजुकिजापिं खः। जिपिं भिंपिं मनूत खः, चेवा याःवयापिं मखु।”
12योसेफं धाल, “मखु, छिपिं थ्व देशया कमजोरी सीकेत हे वःपिं खः।”
13इमिसं धाल, “जिपिं फुक्कं झिंनिम्ह दाजुकिजापिं दु। कनानय् च्वंपिं जिपिं छम्ह हे मनूया काय्पिं खः। दक्वसिबय् चिधीम्ह धाःसा जिमि बाःलिसे दु, छम्ह जक मदये धुंकल।”
14योसेफं इमित धाल, “जिं धया थें छिपिं चेवा याःवःपिं हे खः। 15आः जिं छिपिं धात्थें सु खः धकाः जाँचय् याये। जिं छिमित धाये, छिमि दक्वसिबय् चिधीम्ह किजा मवतले छिपिं थनं वने दइ मखु। 16छिपिं मध्ये छम्हसिनं वनाः वयात ब्वना हजि। मेपिं थन हे झ्यालखानाय् च्वँ। थुकथं छिमिसं धाःगु खँ खः कि मखु धकाः सी दइ। छिमिसं धाःगु मखुगु जुल धाःसा जिं धाये, छिपिं चेवा याःवःपिं हे खः।” 17योसेफं इपिं फुक्कसित स्वन्हु तक झ्यालखानाय् कुनातल।
18स्वन्हु दुखुन्हु वं इमित धाल, “जि परमेश्वरलिसे ग्याइम्ह मनू खः। छिमिसं थथे यात धाःसा छिपिं बचय् जुइ फइ। 19छिपिं धात्थें हे भिंपिं मनूत खःसा छिपिं मध्ये छम्ह थन हे झ्यालखानाय् च्वनाच्वँ, मेपिं फुक्क नये मखनाच्वंपिं थः मनूतय्त नकेत अन्न ज्वनाः थनं हुँ। 20छिमिसं छिमि दक्वसिबय् चिधीम्ह किजायात धाःसा महये मते। अले तिनि जिं छिमिसं धाःगु खँ खः कि मखु धकाः सीके फइ। अले छिपिं नं बचय् जुइ।” इमिसं “ज्यू” धाल।
21अले थःथवय् खँ ल्हात, “झीसं झी किजायात यानागु ज्यां झीसं थथे दुःख फये माल। वयात दुःख जूबलय् वं ग्वाहालि फ्वनं नं झीसं वास्ता मयाना। उकिं हे झीत आः थथे दुःख वःगु खः।”
22रूबेनं धाल, “जिं वयात छुं याये मते धयागु मखु ला? छिमिसं जिगु खँ न्यँ हे मन्यं। आः झीसं वयागु हिया मू पुलेमाल, मखु ला?”
23योसेफं इमि खँ ल्हानाच्वंगु थू। इमि दथुइ भाय् हिलीम्ह मनू तयातःगुलिं इमिसं थःपिनिगु खँ वं थुइ मखु धकाः च्वनाच्वन। 24योसेफ फहिलाः ख्वल। अले हाकनं लिफः स्वयाः इपिं लिसे खँ ल्हात। वं शिमियोनयात यंकाः इमिगु न्ह्यःने हे चिनाबिल।
योसेफया दाजुपिं कनानय् लिहां वंगु
25योसेफं इमिगु बोरा जाय्क अन्न तयाबीत व इमिगु वहःयागु धिबा इमिगु हे बोराय् तयाबीत उजं बिल। वं इमित लँय् नयेत नं नसात्वँसा तयाब्यु धकाः उजं बिल। अथे यानाबी धुंकाः 26इपिं थःपिनिगु गधाया म्हय् अन्न क्वबिकाः अनं वन।
27बहनी बाय् च्वंथाय् इपिं मध्ये छम्हसिनं गधायात अन्न नकेत धकाः थःगु बोरा चाय्कूबलय् द्यःनेसं वहःयागु धिबा नं खन। 28वं मेपिन्त धाल, “जिगु वहः धिबा ला जितः हे लित बियाहल। थन बोराय् हे तया तल।”
इमिगु नुगः भाराभारा मिन। इमिसं थवंथवय् ख्वाः स्वयाः धाल, “परमेश्वरं झीत थ्व छु यानादीगु?”
29कनान देशय् थः बौ याकूबयाथाय् थ्यने धुंकाः इमिसं वयात जूगु फुक्क खँ कन। इमिसं धाल, 30“मिश्रया हामां जिपिंलिसें ततःसलं नवात, अले जिमित चेवा याःवःपिं धकाः व्यवहार यात। 31जिमिसं वयात ‘जिपिं भिंपिं मनूत खः, चेवा याःवयापिं मखु।’ 32जिपिं छम्ह हे बौया झिंनिम्ह दाजुकिजा दु। छम्ह मदये धुंकल, दक्वसिबय् चिधीम्ह कनानय् हे जिमि बौलिसे दु” धकाः धया।
33अले मिश्रया हामां जिमित धाल, “छिपिं धात्थें भिंपिं खः कि मखु धकाः जिं जाँचय् याये। छिमिसं थःपिं मध्ये छम्हय्सित थन हे त्वःताथकि, अले मेपिं नये मखनाच्वंपिं थःमनूतय्गु लागि अन्न ज्वनाः हुँ। 34छिमिसं थःपिनि चिधीम्हकिजायात धाःसा थन महये मते। अले जक जिं छिपिं भिंपिं मनूत खः, चेवा याःवःपिं मखु धकाः पत्याः याये फइ। अले छिमि दाजुयात नं त्वःताबी, छिमिसं थन व्यापार नं याये फइ।”
35इमिसं थथःगु बोरा फ्यनाः चाय्काः स्वःबलय् इमिगु वहःयागु धिबाप्वः नं उकी तयातःगु लुल। थ्व खनाः इपिं फुक्क व इमि बौ याकूब नं ग्यात। 36इमि बौ याकूबं धाल, “छिमिसं जिमि काय्पिं योसेफ व शिमियोनयात ला फाया यंके हे धुंकल। आः हाकनं बेन्यामीन नं यंकेत्यनागु ला? थ्व फुक्क जितः हे जुइमाःगु ला?”
37रूबेनं धाल, “बाः, जिं बेन्यामीनयात लित हये मफुत धाःसा जिमि निम्हं काय्या प्राण कयादिसँ। जितः विश्वास यानादिसँ। जिं वयात लित हये।”
38याकूबं धाल, “जिं बेन्यामीनयात छिपिंलिसे मिश्रय् छ्वये मखु। थ्वया दाजु ला मदये हे धुंकल। आः थ्व हे छम्ह जक दनि। जि आः बुरा जुइ धुन। थ्वयात लँय् छुं जुल धाःसा ला जि पीरं हे सिनावनी।”
Currently Selected:
उत्पत्ति 42: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
