उत्पत्ति 34
34
दीनायात स्यंकाब्यूगु
1छन्हु याकूब व लेआया म्ह्याय् दीना अन च्वंपिं मिसातय्त नापलाः वन। 2व थाय्या जुजु हिव्वी हमोरया काय् शकेमं वयात खन। अले वं वयात ज्वनायनाः स्यंकाबिल। 3याकूबया म्ह्याय् दीनायात वं तसकं यय्कल। उकिं वं वयागु नुगः साला कायेत कुतः यात। 4वं थः बौयात वलिसे ब्याहा यानाब्यु धकाः धाल।
5याकूबं थः म्ह्याय् दीनायात शकेमं स्यंकाब्यूगु खँ सिल। उबलय् वया काय्पिं फुक्कं फै ज्वःवनाच्वंगुलिं व सुम्क च्वन। 6उबलय् हे शकेमया बौ हमोर खँ ल्हायेत याकूबयाथाय् थ्यंकः वल। 7याकूबया काय्पिं नं जूगु खँ न्यनाः नुगः मछिंकाः तमं मि जुयाः छेँय् लिहां वल। छाय्धाःसा याकूबया म्ह्याय्यात स्यंकाः शकेमं याये मज्यूगु ज्या याःगु व इस्राएलयात हे बेइज्जत याःगु खः।
8हमोरं इमित थथे धकाः धाल, “जिमि काय् शकेमया नुगः छिकपिनि म्ह्याय्पाखे क्वसाःगुलिं वलिसे दीनायागु ब्याहा यानाबियादिसँ। 9झी आः थवंथवय् ब्याहाया कालबिल याये। छिकपिनि म्ह्याय्मस्त जिमित बियादिसँ, जिमि म्ह्याय्मस्त छिकपिन्सं यंकादिसँ। 10छिकपिं जिपिंलिसें हे च्वनादिसँ। थ्व थासय् छिकपिं च्वनादीफु, अले न्ह्याथाय् नं वनेफु। थन हे बनेज्या यानादिसँ, अले सम्पत्ति मुंकादिसँ।”
11अले शकेमं दीनाया बौ व दाजुपिन्त धाल, “छिकपिन्सं जितः दया यानादिसँ, छिकपिन्सं धाःगु जिं बी। 12भम्चाया मू व कोसेलि गुलि माः धयादिसँ, जिं छिकपिन्सं धाक्व बी। जितः छिकपिनि म्ह्याय्मचालिसे जक ब्याहा यानाबियादिसँ।”
13शकेमं थः क्यहेँ दीनायात स्यंका ब्यूगुलिं याकूबया काय्पिन्सं शकेम व हमोरयात जाः ग्वयाः लिसः बिल। 14इमिसं इमित धाल, “म्हय् चिं मतःम्ह मनूयात जिमिसं थः क्यहेँ बी फइ मखु। थथे यात कि जिमिगु इज्जत वनी। 15उकिं छिकपिनि मिजंत फुक्कसिनं जिमिसं थें म्हय् चिं तयेगु ज्या यात धाःसा जक जिमिसं छिकपिन्सं धाःथे याये फइ। 16अले तिनि जक जिमि म्ह्याय्मस्त छिकपिन्सं यंके फइ, छिकपिनि म्ह्याय्मस्त जिमिसं काये फइ। अले जिमिसं छिकपिं नापं च्वनाः छगू हे जातियापिं थें जुयाः च्वने फइ। 17छिकपिन्सं म्हय् चिं तयेत माने जुयामदिल धाःसा जिपिं थः क्यहेँ ज्वनाः थनं वने।”
18हमोर व वया काय् शकेमयात इमिगु खँ यल। 19शकेम छेँजःपिं मध्ये दक्वसिबय् अप्वः हनातःम्ह मनू खः। व याकूबया म्ह्याय्या मतिनाय् लायेधुंकूगुलिं वं थ्व ज्या यायेत लिबाका मच्वन। 20उकिं हमोर व वया काय् शकेमं शहरया मू ध्वाखाय् वनाः शहरय् च्वंपिन्त धाल,
21“थुपिं भिंपिं मनूत खः। थुमित थन हे तयाः बनेज्या याकेबी। थुमित च्वनेत झीथाय् थाय् नं यक्व दु। अले झीसं थुमि म्ह्याय्मस्त ब्याहा याये नं फइ, झी म्ह्याय्मस्त नं थुमित बी फइ। 22झीथाय् च्वंपिं फुक्क मिजंतय्सं इमि मिजंतय्सं थें म्हय् चिं तयेगु ज्या यात धाःसा जक इपिं झीपिंलिसे च्वनाः छगू हे जातियापिं थें जुयाः च्वने फइ हं। 23थथे जुल धाःसा इमिगु फुक्क सा, फै, सम्पत्ति झीगु मजुइ ला? उकिं झीसं इमिसं धाःगु खँ न्यने, अले इमित थन हे तये।”
24शहरय् च्वंपिं फुक्कसिनं हमोर व वया काय् शकेमं धाःगु खँ न्यन। अले मिजंत धाक्वसिनं म्हय् चिं तय्कल। 25स्वन्हु लिपा, म्हय् चिं तःगु स्याःगु हे मतंनिबलय् याकूबया निम्ह काय्पिं दीनाया दाजुपिं शिमियोन व लेवी थथःगु तरवार ज्वनाः सुनानं मसीक शहरय् दुहां वनाः फुक्क मिजंतय्त स्यानाबिल। 26इमिसं हमोर व वया काय् शकेमयात नं तरवारं पालाः स्यानाबिल। अले दीनायात शकेमया छेँनं लिगनाः यंकल।
27याकूबया मेपिं काय्पिन्सं वयाः शहरय् लुटे यात। थुकथं इमिसं थः केहेँयात बेइज्जत याःगुया बदला काल। 28इमिसं इमिगु फुक्क फै, सा, गधा, अले शहरय् दुने व पिने च्वंगु फुक्क वस्तु नं यंकल। 29इमिसं इमिगु फुक्क सम्पत्ति, मस्त, मिस्त व छेँय् च्वंगु फुक्क ज्वनाः वन।
30याकूबं शिमियोन व लेवीयात धाल, “छिमिसं जितः आपतय् लाकाबिल। आः जितः कनानी, परिज्जी व थनच्वंपिं फुक्कसिनं मही। झी ल्याखं आपाः मदु। इपिं फुक्क जानाः झीपिंलिसे ल्वाः वल धाःसा झीपिं फुक्कं सी।”
31इमिसं लिसलय् धाल, “वं जिमि केहेँयात वेश्यायात थें याये ज्यू ला लय्?”
Currently Selected:
उत्पत्ति 34: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
