उत्पत्ति 30
30
बिल्हा व जिल्पापाखें मस्त दुगु
1राहेलं याकूबयात मचा बुइकाबी मफुगुलिं वया थः ततालिसे नुगः मुल। अले वं याकूबयात धाल, “जितः नं मस्त दय्काब्यु। मखुसा जि सिनावने।”
2याकूब व खनाः तंम्वल, अले धाल, “जि परमेश्वर खः ला छन्त मचा दय्काबीत?”
3“जिम्ह दासी बिल्हा थन हे दु। वयापाखें मचा दय्कादिसँ। अले जि वयापाखें मां जुइ दइ।” 4उकिं राहेलं याकूबलिसे थः दासी बिल्हायागु ब्याहा यानाबिल। 5बिल्हाया प्वाथय् दयाः काय् बुल। 6अले राहेलं धाल, “परमेश्वरं जिगु पँ लिनादिल। वय्कलं जिगु प्रार्थना न्यनाः जितः काय् बियादिल।” उकिं वं वयागु नां दान तल। 7राहेलया दासी बिल्हाया हाकनं प्वाथय् दयाः मेम्ह काय् बुल। 8अले राहेलं धाल, “जिं जिमि ततालिसे तसकं थाकुक ल्वानाः त्याकागु दु।” उकिं वं वयागु नां नप्ताली तल।
9थःपाखें मचाबुइगु द्यूगुलिं लेआं थः दासी जिल्पायात याकूबलिसे ब्याहा यानाबिल। 10लेआया दासी जिल्पाया पाखें काय् छम्ह बुल। 11लेआं धाल, “जि गुलि भाग्यमानी।” अले वं वयागु नां गाद तल। 12लेआया दासी जिल्पां याकूबयापाखें हाकनं मेम्ह काय् बुइकल। 13अले लेआं धाल, “जि गुलि सुखी। मिसातय्सं जितः सुखीम्ह धकाः धाइ।” उकिं वं वयागु नां आशेर तल।
14छ्व लयेगु इलय् छन्हु रूबेन बुँइ वन। वं अन विशाखमूल लुइकाः थः मां लेआयाथाय् हल। राहेलं लेआयात धाल, “जितः नं छिमि काय्नं हःगु विशाखमूल भचा ब्यु लय्?”
15लेआं वयात धाल, “जिमि भाःतयात जक कयां मगाः ला? जिमि काय्या विशाखमूल नं कायेमाल ला?”
राहेलं धाल, “अय्सा छिमि काय्या विशाखमूलया पलेसा थौं वय्कः छलिसे द्यनी।”
16उखुन्हु याकूब सन्ध्याकाः इलय् बुं लिहां वःबलय् लेआं वनाः वयात धाल, “छि थौं जिलिसें द्यनेमाः। जिं छितः जिमि काय्या विशाखमूलमालिसे त्याय्कयागु दु।” उकिं याकूब उखुन्हु वलिसे हे द्यन। 17परमेश्वरं लेआयागु प्रार्थना न्यनादिल। अले वया प्वाथय् दयाः न्याम्हम्ह काय् बुल। 18लेआं धाल, “जिं जिमि भाःतयात थः दासी लःल्हाना बियागुलिं परमेश्वरं जितः सिरपाः बियादिल।” उकिं वं वयागु नां इस्साखार तल।
19लेआया हानं प्वाथय् दयाः खुम्हम्ह काय् बुल। 20अले लेआं धाल, “परमेश्वरं जितः तःधंगु सिरपाः बियादीगु दु। आः जितः जिमि भाःतं हनाबना तइ, छाय्धाःसा जिं वय्कःयात खुम्ह काय् बुइकाबियागु दु।” उकिं वं वयागु नां जबूलून तल। 21छुं ई लिपा वं छम्ह म्ह्याय् बुइकल। वं वयागु नां दीना तल।
22अले परमेश्वरं राहेलयात लुमंकादिल। वयागु प्रार्थना न्यनाः वय्कलं वयात प्वाथय् दय्काबिल। 23वं काय् बुइकल। अले वं धाल, “परमेश्वरं जिगु बदनामी चीकादिल।” 24वं वयागु नां योसेफ तल। अले वं हाकनं, परमप्रभुं जितः मेम्ह काय् नं बियादीमा धकाः प्रार्थना यात।
याकूबया सम्पत्ति अप्वः दयावःगु
25योसेफ बुइधुंकाः याकूबं लाबानयात धाल, “जितः वनेबियादिसँ। जि थःगु हे देशय् वने। 26जिं छिथाय् ज्या यानाः दुपिं जिमि कलाःपिं व मस्त जितः यंके बियादिसँ। जिं छिथाय् गुलि बांलाक ज्या यानाः छिं सि हे स्यू।”
27लाबानं वयात धाल, “छं जितः माया वं धयागु खःसा थन हे च्वँ। परमप्रभुं जितः छंगुपाखें आशिष बियादीगु दु धकाः जिं सीके धुन। 28छन्त गुलि ज्याला माः धा। जिं उलि हे बी।”
29याकूबं वयात धाल, “जिं थन गुकथं ज्या याना धकाः छिं सि हे स्यू, अले जिगु सुसाःकुसाः दयाः छिगु सा द्वहं व फै-च्वलय् नं गुलि यक्व दये धुंकल छिं सि हे स्यू। 30जि वये न्ह्यः छिके यक्व मदु। आः छिके यक्व दये धुंकल। जिं ल्हाः तःथाय् तक्क परमप्रभुं छितः आशिष बियादीगु दु। आः धाःसा जिं थःगु हे परिवारया लागि छुं व्यवस्था यायेमाः।”
31लाबानं धाल, “जिं छन्त छु बी लय्?”
याकूबं धाल, “छिं जितः छुं नं बियादीम्वाः। छिं जितः छिगु पशुया बथांया सुसाःकुसाः यानाः ज्वय्केबियादिसँ।
32“थौं जितः छिगु पशुया बथां मध्ये च्याःथाःपिं च्वलय्चात व हाकुपिं भ्याःचात ल्यय्के बियादिसँ। व हे जिगु ज्याला जुइ। 33जि गुलि इमानजमान दुम्ह धकाः छिं लिपा नं सीकाकाये फइ। छिं जितः ज्याला ब्यूगु फैचात व च्वलय्चात स्वः झासँ, उकी छम्ह हे जक च्याःमथाःम्ह च्वलय् व हाकु मजूम्ह फैचा लुल धाःसा जिं खुयाहःगु जुइ।”
34लाबानं धाल, “ज्यू। छं धाःथें हे जुइ।” 35तर लाबानं धाःसा उखुन्हु हे च्याःथाःपिं दुगु व च्वलय्चात अले हाकुपिं भ्याःचात धाक्व थःम्हं हे ल्ययाः थः काय्पिन्त बियाछ्वत। 36अले लाबानया काय्पिं याकूब च्वनाच्वंगु थासं स्वन्हु तापाःगु थासय् वन। लाबानया ल्यंदुपिं फैच्वलय्या बथां स्वयेगु ज्या याकूबं यात।
37याकूबं लहरे पीपल, मर्स्याबरां व स्यांगुलिमाया कचा ध्यनाः उकियात तुइक बाला चिंक फायाः 38फै व च्वलय्तय्सं लः त्वंवइबलय् खने दइकथं लः त्वनीगु थलय् तयाबीगु यात। छाय्धाःसा फैच्वलय्या बथां अन वयाः पासा थ्वःवइगु वं स्यू। 39कचाबालाया न्ह्यःने वयाः पासा थ्वःवःपिनि मचात च्याःथाःपिं जुयाः बुल। 40याकूबं फैचातय्त च्वलय्चात पाखें अलग तयाः इमित हाकुपिं व च्याःथाःपिं फै-च्वलय् चूलाइकथं तयाबिल। थुकथं वं थः फै-च्वलय् लाबानया फैच्वलय्लिसे ल्वाकमछ्यासे अलग्ग तयाः लहिनाः यक्व दय्कायंकल।
41स्वयेज्यूपिं व बल्लाःपिं फैच्वलय्या बथां पासा थ्वःवइबलय् वं कचा बालात इमिगु न्ह्यःने लः त्वनेगु थलया लिक्क तयाबीगु। 42बमलाःपिनिगु न्ह्यःने धाःसा अथे कचा बाला तया मब्यू। थुकथं बल्लाःपिं फै-च्वलय् धाक्व याकूबयागु जुल, अले बमलाःपिं फै-च्वलय् धाक्व लाबानया जुल। 43थथे याकूब तसकं तःमि जुल। वया यक्व फै-च्वलय्, दास-दासीत, ऊँट व गधा दत।
Currently Selected:
उत्पत्ति 30: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
