उत्पत्ति 25
25
अब्राहामया कतूरा पाखें दुपिं सन्तान
१ इति २५:१-६
1अब्राहामं मेम्ह छम्ह मिसालिसे ब्याहा यात। वयागु नां कतूरा खः। 2वयापाखें जिम्रान, योक्षान, मदान, मिद्यान, यिशबाक व शूह बुल। 3योक्षान शेबा व ददानया अबु खः। ददानया सन्तान अश्शूरी, लतूशी व लऊम्मीत खः। 4मिद्यानया काय्पिं एपा, एपेर, हानोक, अबीदा व एल्दा खः। थुपिं फुक्कं कतूराया सन्तान खः।
5अब्राहामं थःके दुगु फुक्कं इसहाकयात त्वःताथकल। 6थः मसिवं हे अब्राहामं मेपिं कलाःपिनि पाखें दुपिं काय्पिन्त कोसेलि बियाः थःकाय् इसहाकया पाखें अलग यानाः पुर्बपाखे छ्वयाब्यूगु खः।
अब्राहाम सीगु
7अब्राहाम मुक्कं १७५ दँ तक म्वात। 8व ताः आयु म्वानाः यक्व बुरा जुयाः सित। अले थः पुर्खापिंलिसे मिलय् जूवन। 9वया काय्पिं इसहाक व इश्माएलं वयात सोहोर धाःम्ह हित्तीया काय् एप्रोनयागु बुँइ च्वंगु मम्रेया लिक्कसं च्वंगु मक्पेलाया गुफाय् थुनाबिल। 10थ्व बुँ अब्राहामं हित्तीतय्के न्यानाकाःगु खः। अब्राहाम व वया कलाः सारा निम्हय्सितं थन हे थुंगु खः। 11अब्राहाम सी धुंकाः परमेश्वरं वया काय् इसहाकयात आशिष बियादिल। उबलय् इसहाक बेअर-लहै-रोइ लिक्कसं च्वनाच्वंगु खः।
इश्माएलया सन्तान
12साराया मिश्र देशयाम्ह दासी हागारया पाखें दुम्ह अब्राहामया काय् इश्माएलया सन्तानया खँ थथे दु – 13न्हापां बूकथं इमिगु नां थथे दु, नबायोत, केदार, अदबेल, मिब्साम, 14मिश्मा, दुमा, मस्सा, 15हदद, तेमा, यतूर, नापीश व केदमा। 16इश्माएलया काय्पिं थुपिं हे खः। थुपिं हे झिंनिगू कुलया नायः जुल। इमिगु हे नामं गांया नां च्वन। 17इश्माएल १३७ दँ दुबलय् सित। 18इश्माएलया काय्पिं मिश्रया पुर्बपाखे अश्शूर वनेगु लँय्, हबीलांनिसें शूर तक च्वनाच्वंगु खः। इपिं अब्राहामया मेपिं सन्तानलिसे मिले मजुसे अलग्ग च्वनाच्वंगु खः।
इसहाक व वया परिवार
19अब्राहामया काय् इसहाकया खँ थथे दु, अब्राहामया काय् इसहाक बुल। 20इसहाकं पिइदँ दुबलय् अरामी बतूएलया म्ह्याय् व लाबानया केहें रिबेकालिसे ब्याहा यात। इपिं पद्दन-आरामयापिं खः।
21रिबेका थारिम्ह मिसा जूगुलिं इसहाकं परमप्रभुयात वयापाखें मचा दय्काबीत प्रार्थना यात। परमप्रभुं वयागु प्रार्थना न्यनादिल। अले रिबेकाया प्वाथय् दत। 22रिबेकाया प्वाथय् निम्ह मचा दुगु जुयाच्वन। अले इपिं प्वाथय् दुने हे थवंथवय् ल्वायेगु यानाच्वन। उकिं वं थथे मतिइ तल, “जितः थथे छाय् जुल?” अले वं परमप्रभुयाके न्यन।
23परमप्रभुं वयात लिसः बियादिल,
“छंगु प्वाथय् निगू जाति दु।
इपिं बूसांनिसें हे अलग जुयाः बुइ।
चीधीम्ह तःधीम्ह स्वयाः बल्लाइ।
तःधीम्हय्स्यां चीधीम्हय्सिगु सेवा याइ।”
24मचाबुइगु ई जुल। रिबेकाया प्वाथय् धात्थें हे निम्ह मचा दयाच्वन। 25न्हापांम्ह मचा ह्याउँसे च्वंम्ह बुल। वयागु म्ह छम्हं सँया सं भुनातःगु दु। उकिं वयागु नां एसाव तल। 26वयां लिपा बूम्ह मचा थः दाजु एसावयागु ग्वालि ज्वनाः बुल। उकिं इमिसं वयागु नां याकूब#२५:२६ याकूब थुकिया अर्थ खः ग्वालि ज्वनीम्ह तल। इपिं बूबलय् इसहाक खुइदँ दये धुंकल।
27इपिं तःधि जुसेंलिं एसाव छम्ह बांलाःम्ह शिकारी व पिने जुयाः जुइम्ह जुल। याकूब धाःसा सोझाम्ह व छेँज्या जक याइम्ह जुल। 28एसावं शिकार यानाः ला हयाबीगुलिं इसहाकं वयात अप्वः माया याः। रिबेकां धाःसा याकूबयात अप्वः माया याः।
एसावं थःगु अधिकार म्यूगु
29छन्हु याकूबं मुसूति दाय्का च्वंबलय् एसाव नयेपित्याकाः पिनें लिहां वल। 30वं धाल, “जि नये पित्यानाः सीन, उकिं जितः व ह्याउँगु सूप भचा ति।” (अय्जूगुलिं वयात एदोम नं धायेगु याः)।
31याकूबं धाल, “न्हापां जितः छिगु तःधीम्ह काय्या अधिकार निं बियादिसँ।”
32एसावं धाल, “जि नयेपित्यानाः सीन, उकिं जितः थ्व अधिकार छु यायेत?”
33याकूबं धाल, “दक्वसिबय् न्हापां पा निं फयादिसँ।” अले वं पाफल। थुकथं वं थःम्ह तःधीम्ह काय्या अधिकार मियाबिल।
34याकूबं एसावयात मरि व ह्याउँगु सूप बिल। नयेनी यानाः एसाव थःगु लँ लिनावन।
थुकथं एसाव थःगु तःधीम्ह काय्या अधिकारया च्यूताः मतसे वन।
Currently Selected:
उत्पत्ति 25: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
