उत्पत्ति 19
19
पापया शहर सदोम
1उखुन्हु हे बहनिइ लोत सदोम शहरया ध्वाखाय् फ्यतुनाच्वंबलय् उपिं हे निम्ह स्वर्गदूतत सदोमय् वल। इमित खनाः लोतं दना वनाः बँय् थ्यंक क्वछुनाः धाल – 2“दया यानाः छिकपिनि दासया छेँय् झासँ। अन हे तुति सिलादिसँ। अले चा च्वनादिसँ। अले कन्हय् सुथय् दनाः झासँ।”
इमिसं वयात धाल, “मखु, थौं चच्छि जिपिं सतलय् हे च्वने।”
3लोतं इमिसं ज्यू मधातले कर यानां च्वन। अले इपिं व नापं छेँय् वन। वं मरि व भ्वय् ज्वरय् यात। अले इमिसं नल। 4इपिं द्यों वने न्ह्यः सदोमया फुक्क मनूत, ल्याय्म्ह व बुरा, फुक्क मिजंत वयाः लोतया छेँ घेरय् यात। 5अले लोतया नां कयाः ततःसलं हाल, “बहनिइ छन्थाय् वःपिं मनूत ग्व? इमित पिने हजि। जिमित इपिं नाप द्यनेब्यु।”
6लोत पिने वन, अले खापा तित। 7अले वं धाल, “पासापिं, थज्याःगु मभिंगु ज्या याये मते। 8जि ब्याहा मजूनिपिं निम्ह म्ह्याय्पिं दु। जिं इमित पिने हयाबी, अले छिमि यत्थे या। थुपिं मनूतय्त छता छुं याये मते। इपिं जिगु छेँय् वःपिं पाहांत खः।”
9इमिसं धाल, “जिमिगु लँ त्वःति। पिनें वःम्ह मनू जुयाः नं जिमित उजं बीम्ह का थ्व! आः जिमिसं इमित स्वयाः छन्त बांमलाःगु ज्या यानाबी।” थथे धयाः हुलं लोतयात घ्वानाः खापा तछ्याः वन।
10दुने च्वंपिं निम्ह मनूतय्सं ल्हाः पित हयाः लोतयात दुने सालाः काल। अले खापा तिनाबिल। 11इमिसं लुखा पिने च्वंपिं ल्याय्म्ह, बुरा, फुक्कसित कां यानाबिल। थुकिं यानाः इमिसं लुखा लुइके मफुत।
सदोम व गमोरा नाश जूगु
12उपिं निम्ह मनूतय्सं लोतयात धाल, “थन छिमि सुं नं थः मनू काय्म्ह्याय्, जिलाजं व मेपिं दुसा इमित ब्वनाः थ्व शहरं बिस्युं हुँ। 13छाय्धाःसा जिमिसं थ्व शहरयात नाश यायेत्यनागु दु। थनच्वंपिं मनूतय्गु बारे परमप्रभुं यक्व हे मभिंगु खँ न्यने धुंकल। उकिं वय्कलं जिमित थ्व शहरयात नाश यायेत छ्वयाहयादीगु खः।”
14अले लोतं पिने वनाः थः म्ह्याय्पिंलिसे ब्याहा याइपिं मनूतय्त धाल, “याकनं थ्व थाय् त्वःताः पिहां हुँ। परमप्रभुं थ्व शहरयात नाश यानादीत्यंगु दु।” वया जिलाजं जुइपिन्सं धाःसा वं ख्याः याःगु जुइ धकाः च्वन।
15कन्हय् खुन्हु सुथ न्हापां निम्ह दूतं वयाः लोतयात थथे धयाः हथाय् चाय्कल, “थः कलाः व निम्ह म्ह्याय्पिं ज्वनाः याकनं पिहां हुँ। मखुसा परमप्रभुं थ्व शहर नाश यानादीबलय् छिपिं नं सी।”
16लोत धाःसा अथें च्वनाच्वन। उकिं निम्ह मनुखं लोत, वया कलाः व निम्ह म्ह्याय्पिनिगु ल्हाः ज्वनाः शहर पिने ब्वनाहल। छाय्धाःसा परमप्रभुं इमित दया यानादीगु दु। 17शहरं पिने थ्यंकाः दूतं धाल, “थःगु ज्यान बचय् यायेत थनं बिस्युं हुँ, लिफः स्वये मते, थन गनं नं दी मते। पहाडपाखे बिस्युं हुँ। अले छिपिं बचय् जुइ।”
18लोतं धाल, “अथे धयादी मते, प्रभु। 19छिकपिन्सं जिगु लागि तःधंगु ज्या यानादिल। जितः बचय् यानादिल। जि पहाडय् थ्यंक बिस्युं वने मफु। अन थ्यने न्ह्यः थ्व शहर नाश जुइ लाइ। अले जिपिं नं सी। 20थनं नापसं छगू शहर दु। व शहर चिधं। जि व जिगु परिवार अन बचय् जुइ फइ। जितः अन हे छ्वयादिसँ।”
21इमिसं धाल, “ज्यू हुँ। जिं व शहरयात नाश याये मखु। 22याकनं हुँ। छिपिं अन मथ्यंतले जिमिसं छुं याये मखु।” (लिपा थ्व शहरयागु नां सोअर च्वन।)
23लोत सोअरय् थ्यंबलय् निभाः त्वयेधुंकल। 24अले परमप्रभुं सदोम व गमोरा शहरय् मि व गन्धकयागु वा गाय्कादिल। 25वय्कलं उकिया जःखः च्वंगु गांतय्त व अन सःगु फुक्कं नाश यानादिल। 26लँय् वँवं लोतया कलातं लिफः स्वःगुलिं व चियागु थां जुल।
27कन्हय् खुन्हु सुथ न्हापां दनाः अब्राहाम थः परमप्रभुया न्ह्यःने दनाः खँ ल्हाथाय् वन। 28वं सदोम व गमोराया फुक्क थासय् स्वल। अले वं अगलं कुँत्याः पिहां वयाच्वं थें व थासं कुँ पिहां वयाच्वंगु खन।
29थुकथं परमेश्वरं लोत च्वनाच्वंगु ब्यासीइ च्वंगु शहरयात नाश यानादीबलय् अब्राहामयात लुमंकादिल। अले लोतयात अनं बचय् यानाः हयादिल।
मोआबी व अम्मोनीतय् पुर्खा
30सोअरय् च्वने ग्याःगुलिं लोत थः निम्हं म्ह्याय्पिं ब्वनाः पहाडय् वनाः छगू गुफाय् च्वन। 31छन्हु तःधीम्ह म्ह्याय्म्हं थः केहेंयात धाल, “झी बाः बुरा जुइ धुंकल। झीत ब्याहा याइपिं थ्व संसारय् सुं हे मिजंत मदु। 32झी बाःयात दाखमद्य त्वंकाः वय्कः नापं द्यने नु। अले थः हे बौया पाखें मचा दय्के।”
33उखुन्हु चान्हय् इमिसं थः बौयात दाखमद्य त्वंकल। अले तःधीम्ह म्ह्याय् व नापं द्यन। दाखमद्यं तसकं काःगुलिं लोतं व द्योंवःगु व दनावंगु छुं हे मचाः।
34कन्हय् खुन्हु तताम्हय्सिनं केहेंम्हय्सित धाल, “म्हिगः बहनी जि बाःलिसे द्यना। थौं हाकनं दाखमद्य त्वंके नु। अले छ वय्कः नापं द्यँ। अले झी निम्हस्यां बाःपाखें मचा दइ।” 35उखुन्हु चान्हय् नं इमिसं बौम्हय्सित दाखमद्य त्वंकल। अले चिधीम्ह म्ह्याय् वनाः बौम्हलिसे द्यन। दाखमद्य यक्व त्वंगुलिं लोतं व द्योंवःगु व दनावंगु छुं हे मचाः।
36थुकथं लोतया म्ह्याय्पिं निम्हस्यां थः हे बौया पाखें प्वाथय् दत। 37तःधीम्ह म्ह्याय्या काय् बुल। वं वयागु नां मोआब तल। व थौंकन्हय्यापिं मोआबीतय् पुर्खा खः। 38चिधीम्ह म्ह्याय्या नं काय् बुल। वं वयागु नां बेन-अमी तल। व थौंकन्हय्यापिं अम्मोनीतय् पुर्खा खः।
Currently Selected:
उत्पत्ति 19: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
