प्रस्थान 7
7
हारूनं मोशायागु निंतिं न्ववाःगु
1अले परमप्रभुं मोशायात धयादिल, “स्व, जिं छन्त फारोया निंतिं परमेश्वर थें यानागु दु, अले छिमि दाजु हारून छंगुपाखें न्ववाइम्ह जुइ। 2जिं छन्त छु छु उजं बी व हे छं हारूनयात धा। अले छिमि दाजु हारूनं फारोयात इस्राएलीतय्त वयागु देशं वनेब्यु धकाः धाइ। 3मिश्र देशय् थःगु यक्व चिं व अजू चायापुगु ज्या यानाः क्यनेत जिं फारोया नुगः छाय्काबी।#प्रे ७:३६ 4फारोनं छिमिगु खँ न्यनी मखु। अले जिं मिश्र देशय् थःगु ल्हाः तयाः मिश्रीतय्त तःधंगु सजाँय बियाः थः मनू इस्राएलीतय्त मिश्रं पित हये। 5जिं मिश्र देशय् ल्हाः तयाः इस्राएलीतय्त अनं पित हयेबलय् मिश्रीतय्सं जि परमप्रभु खः धकाः सीका काइ।”
6अले मोशा व हारूनं परमप्रभुं उजं बियादी थें हे यात। 7फारोलिसे खँ ल्हाः वंबलय् मोशा चय्दँ अले हारून चय्स्वदँ दुम्ह जुयाच्वन।
हारूनया कथि सर्प जूगु
8परमप्रभुं मोशा व हारूनयात धयादिल, 9“फारोनं छिमित, ‘छुं अजू चायापुगु ज्या क्यँ,’ धकाः धाइबलय् छं हारूनयात धा, ‘छिं थःगु कथि फारोया न्ह्यःने वांछ्वयादिसँ,’ अले व सर्प जुइ।”
10मोशा व हारूनं फारोयाथाय् वनाः परमप्रभुं धयादी थें हे यात। हारूनं थःगु कथि फारो व वया भारदारतय् न्ह्यःने वांछ्वल। अले व सर्प जुल। 11अले फारोनं ग्यां दुपिं व जादु क्यनिपिं मनूतय्त सःतल। अले मिश्रया जादु क्यनिपिन्सं वयाः थथःगु जादुनं अथे हे यानाः क्यन। 12इमिसं थथःगु कथि वांछ्वल अले व सर्प जुल। अय्नं हारूनया कथिं इमिगु कथियात नुनाबिल। 13फारोया नुगः झन छानाः वल। अले परमप्रभुं धयादी थें हे वं इमिगु खँ मन्यं।
लः हि जूगु
न्हापांगु महामारी
14अले परमप्रभुं मोशायात धयादिल, “फारोया नुगः तसकं छाःगु दु। वं मनूतय्त वनेबी मखु। 15सुथय् न्हापां फारो खुसिपाखे वनीबलय् छ वयात नापलाः हुँ। वयात नापलायेत नील खुसिया सिथय् दनाच्वँ अले व सर्प जूगु कथि नं ज्वनाः हुँ। 16वयात थथे धा, ‘परमप्रभु हिब्रूतय् परमेश्वरं जितः थथे धकाः छिथाय् छ्वयाहयादीगु दु। जिमि मनूतय्त मरुभूमिइ जितः आराधना यायेत वनेब्यु। अय्नं छं आः तक नं जिं धयागु खँ मन्यं। 17परमप्रभुं थथे धयादी, जि परमप्रभु खः धकाः छं सी। स्व, जिं नील खुसिया लखय् थःगु कथिं दाये, अले व हि जुइ।#प्रका १६:४ 18खुसिइ च्वंपिं न्या सी, अले खुसि नवइ। मिश्रीतय्सं खुसिया लः त्वनेफइ मखु।’”
19परमप्रभुं मोशायात धयादिल, “थःगु कथि कयाः मिश्रय् च्वंगु फुक्क खुसि, पुखू, धलय् थःगु ल्हाः न्ह्यज्याकादिसँ धकाः हारूनयात धा। अले अन च्वंगु लः फुक्क हि जुइ। मिश्रय् फुक्क थासय् हिया हि जक जुइ। सिँ व ल्वहंया लःथलय् च्वंगु लः तकं हि जुइ।”
20अले मोशा व हारूनं परमप्रभुं धयादी थें हे यात। फारो व वया भारदारतय् न्ह्यःने वं थःगु कथि ल्ह्वनाः नील खुसिया लखय् दाल, अले फुक्क लः हि जुयावन। 21नील खुसियापिं न्या सित। खुसि तसकं नवयाः मिश्रीतय्सं उकिया लः त्वने मफुत। मिश्रया फुक्क थासय् च्वंगु लः हि जुल।
22मिश्रया जादु क्यनिपिन्सं नं थःगु जादुनं अथे हे यात। अले परमप्रभुं धयादी थें फारोया नुगः छाना वन। वं मोशा व हारूनया खँ मन्यन। 23फारोनं थुकिया च्यूताः तकं मतसे थःगु लाय्कूपाखे लिहां वन। 24मिश्रयापिं फुक्कसिनं त्वनेगु लःया निंतिं नील खुसिया जवंखवं गाः म्हुल, छाय्धाःसा इमिसं खुसिया लः त्वने मफुत।
25परमप्रभुं नील खुसिया लखय् दाःगु न्हय्न्हु दय् धुंकल।
Currently Selected:
प्रस्थान 7: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
