प्रस्थान 12
12
छुत्काराया नखः गुकथं हनेगु
1मिश्र देशय् परमप्रभुं मोशा व हारूनयात धयादिल,#लेवी २३:५; गन्ती ९:१-५; २८:१६; व्य १६:१-२ 2“थ्व ला छिमिगु निंतिं दँया न्हापांगु ला जुइ। 3इस्राएलीतय् फुक्क खलःयात थथे धा, थ्व लाया झिन्हु दुखुन्हु छिपिं फुक्कसिनं थथःगु परिवारया निंतिं छम्ह छम्ह चिधिकःम्ह भ्याःचा हयेमाः। 4सुयागुं परिवारय् छम्ह चिधिकःम्ह भ्याःचा नयेत मनूत कम जूसा वं थः छेँया सतिक च्वंम्ह जःलाखःलालिसे मिलय् जुयाः मनूतय्गु ल्याःकथं चिधिकःम्ह भ्याःचा हयेमाः। सुनां गुलि नयेफु, व हे ल्याखं ग्वःम्ह चिधिकःम्ह भ्याःचा माः क्वःछ्यु। 5चिधिकःम्ह भ्याःचा ल्ययेबलय् छिमिसं खू मदुम्ह, दच्छि दुम्ह चिधिकःम्ह भ्याःचा ल्ययेमाः। च्वलेचा व फैया दथुं ल्ययेमाः।
6“लाया झिंप्यन्हु खुन्हु तक चिधिकःम्ह भ्याःचायात बांलाक बिचाः यानाः ति। थ्वखुन्हु हे इस्राएलया फुक्क मनूत जानाः सन्ध्याकाः इलय् चिधिकःम्ह भ्याःचायात स्यायेमाः। 7अले चिधिकःम्ह भ्याःचाया हि कयाः भ्वय् नइगु छेँया लुखाया जवंखवं व फुसय् इलाबीमाः। 8उखुन्हु हे चान्हय् छिमिसं चिधिकःम्ह भ्याःचाया ला मिइ छुयाः खायुगु वाउँचा व सोडा मतःगु मरिनापं नयेमाः। 9लायात कचिकं नये मते, अले लखय् दय्काः नं नये मते। छ्यं तुति, म्ह दुने च्वंगु ला फुक्कं मिइ छुयाः न। 10सुथय् जुइ न्ह्यः ला फुक्कं फुकेमाः, ला ल्यं दुसा व ला फुक्कं मिइ छ्वय्का छ्वयेमाः।
11“छिमिसं थ्व ला नयेबलय् छिमिगु जँय् जँनी, तुतिइ लाकां व ल्हातिइ कथि दयेमाः। अले व हथासं नयेमाः। थ्व हे परमप्रभुया छुत्काराया नखः खः।
12“उखुन्हु हे चान्हय् जि मिश्र जुयाः वने। अले मिश्रया न्हापां बूपिं मनूत व पशुत फुक्कं स्यानाबी। मिश्रया फुक्क द्यःतय्त सजाँय बी। जि परमप्रभु खः। 13हि इलातःगु छेँ छिपिं च्वनाच्वंगु छेँया चिं जुइ। व स्वयाः जिं छिमित त्वःताबी। जिं मिश्र देशयापिं मनूतय्त स्याइबलय् छिमित छुं जुइ मखु।”
सोडा मतःगु मरिया नखः गुकथं हनेगु
14“थ्व दिं छिमिगु निंतिं लुमन्तिया दिं जुइ। थ्वखुन्हु छिमिसं परमप्रभुया नखः हनेमाः। थ्व छिमित पुस्तां पुस्ता तकया निंतिं नियम जुल।#प्रस २३:१५; ३४:१८; लेवी २३:६-८; गन्ती २८:१७-२५; व्य १६:३-८ 15न्हय्न्हु तक छिमिसं सोडा मतःगु मरि नयेमाः। न्हापांगु दिंखुन्हु छिमिसं थथःगु छेँनं सोडा वांछ्वयेमाः। सुनानं थ्व न्हय्न्हुया दुने सोडा तयातःगु छुं नं नल धाःसा वयात इस्राएली मनूतपाखें पितिनाछ्वइगु जुइ। 16न्हापांगु दिंखुन्हु व न्हय्न्हु खुन्हु परमप्रभुया आराधना यायेत पवित्र मुंज्या या। उखुन्हु छिमिसं नसात्वँसा दय्केगु ज्या त्वःताः मेगु छुं हे ज्या याये मते।
17“छिमिसं सोडा मतःगु मरिया नखः हँ। छाय्धाःसा थ्वखुन्हु हे जिं छिमित पुचः पुचः यानाः मिश्रं पित हयागु खः। लिपा वइगु फुक्क पुस्ताय् सदांया नियमकथं थ्व दिंयात हनेगु या। 18न्हापांगु लाया झिंप्यन्हु खुन्हुया बहनिनिसें निइछन्हु खुन्हुया बहनि तक सोडा मतःगु मरि न। 19न्हय्न्हु तक छिमिगु छेँय् सोडा दुगु मरि मदयेमाः। सुनां नं सोडा दुगु छुं नल धाःसा इस्राएली जूसां विदेशी जूसां वयात इस्राएलया खलकं पितिनाछ्वइगु जुइ। 20छिमिसं सोडा तयातःगु छुं नं नये मते। छिमिसं न्ह्याथाय् च्वंसां सोडा मतःगु मरि नयेमाः।”
न्हापांगु छुत्काराया नखः
21अले मोशां इस्राएलया फुक्क थकालितय्त सःतके छ्वयाः धाल, “छिमिसं वनाः थः छेँजःपिनिगु निंतिं भ्याःचा ल्ययाः छुत्काराया नखःया निंतिं स्या।” 22हिसप घाँय्मायात प्वाँय् चिनाः उकियात हिइ थुनाः लुखाया जवंखवं व फुसय् इलाब्यु। छिपिं सुं नं थःपिनिगु छेँनं सुथय् मजुतले पिहां वने दइ मखु। 23परमप्रभु मिश्रीतय्त स्यायेत मिश्र जुया झाइबलय् गुगु लुखाया जवंखवं व फुसय् हि इलातःगु खनी वय्कलं उगु लुखायात त्वःताः न्ह्यज्यानादी। अले नाश यायेत छ्वया हःम्हय्सित छिमित स्यायेत छिमिगु छेँय् दुहां वनेबी मखु।#हिब ११:२८
24“छिमिसं थ्वयात थः व थः सन्तानया निंतिं न्ह्याबलेंया नियमकथं मानय् या। 25परमप्रभुं बी धयादीगु देशय् दुहां वने धुंकाः नं छिमिसं थ्व नखः हँ। 26छिमि काय् म्ह्याय्पिन्सं छिमित ‘थ्व नखःया मतलब छु’ धकाः न्यन धाःसा 27इमित धा, ‘थ्व परमप्रभुया छुत्काराया नखःया पशु बां बीगु खः। वय्कलं मिश्रय् न्हापां बूपिन्त स्याःबलय् इस्राएलीतय्गु छेँय् दुहां मवंसे झीत व झीगु छेँयात बचय् यानादीगु खः।’” अले मनूतय्सं छ्यं क्वछुकाः आराधना यात।
28अले इस्राएलीतय्सं परमप्रभुं मोशा व हारूनयात उजं बियादी थें हे यात।
न्हापां बूपिं सीगु
झिगूगु महामारी
29चान्हय्सिया बाचा इलय् सिंहासनय् च्वंम्ह फारोया न्हापां बूम्ह काय्निसें झ्यालखानाय् च्वंम्ह कैदीया न्हापां बूम्ह काय् तकं, अले पशुतय् न्हापां बूपिं फुक्कसित परमप्रभुं स्यानादिल।#प्रस ४:२२-२३ 30मिश्र न्यंक तसकं हाहाकार जुल। फारो, वया भारदारत व मिश्रीत सकलें चान्हय् दन, छाय्धाःसा अन मनू मसी धयागु छखा छेँ हे मदु।
31फारोनं चान्हय् हे मोशा व हारूनयात सःतके छ्वयाः धाल, “छिपिं व छिमि इस्राएलीत फुक्कं जिमिगु देशं पिहां हुँ। वनाः छिमिसं धाःकथं हे परमप्रभुया आराधना या। 32छिमिसं धाःकथं हे थःपिनि फैच्वलय्, सा द्वहं फुक्कं ज्वनाः हुँ। अले जितः नं आशिष ब्यु।”
33अले मिश्रीतय्सं इस्राएलीतय्त थत्थें देश त्वःताब्यु धकाः बिन्ति यात। इमिसं धाल, “मखुसा जिपिं फुक्कं सी।” 34उकिं इस्राएलीतय्सं थःपिन्सं न्हायाच्वंगु छ्वचुं सोडा तये न्ह्यः हे थल नापं कापतय् प्वःचिनाः ब्वहलय् पाछाल। 35इस्राएलीतय्सं मोशां धाःथें यात। इमिसं मिश्रीतय्के लुँ, वहः, तिसा व वसः फ्वन।#प्रस ३:२१-२२ 36अले परमप्रभुं मिश्रीतय्त इस्राएलीतप्रति बांलाःगु व्यवहार याइपिं यानादिल। इमिसं छु छु फ्वन, मिश्रीतय्सं दक्वं बिल। थुकथं इस्राएलीतय्सं मिश्रीतय्गु धन ज्वनाः वइ।
37इस्राएलीत रामसेसंनिसें सुक्कोत तक न्यासि वन, मिस्त व मस्त त्वःताः खुगू लाख ति मनूत दु। 38इपिं नापं मेपिं मनूत नं यक्व हे वन, अले यक्व सा द्वहं, फैच्वलय् नं वन। 39इमिसं सोडा मतसे हे मिश्रं ज्वनावःगु न्हायातःगु छ्वचुंया मरि छुल। मिश्रं हथासं पितछ्वयाहःगुलिं इमिसं न्हायातःगु छ्वचुंया मरि दय्के मलाःगु खः।
40इस्राएलीत मिश्रय् च्वनाच्वंगु प्यसः व स्विदँ दये धुंकल।#उत १५:१३; गला ३:१७ 41प्यसः व स्विदँ लिपा उखुन्हु हे परमप्रभुया फुक्क मनूतय्सं मिश्र देश त्वःतल। 42उखुन्हु चान्हय् हे परमप्रभुं इस्राएलीतय्त मिश्र देशं पित हया थःगु बचं पूवंकादिल। उकिं व चा वय्कःया निंतिं हनेमाः। थ्व परमप्रभुयागु चा खः। थुकियात पुस्तां पुस्ता तक इस्राएलीतय्सं हनेमाः।
छुत्काराया नखःया मेगु विधि
43परमप्रभुं मोशा व हारूनयात धयादिल, “छुत्काराया नखःया विधि थुकथं दु, सुं विदेशीं थ्व नखःया भ्वय् नये मज्यू। 44न्यानाहःम्ह दासं धाःसा म्हय् चिं तये धुंकाः नयेफु। 45अय्नं विदेशीं व ज्यामितय्सं थ्व भ्वय् नयेदइ मखु।
46“भ्वय् ज्वरय् याःगु थासय् हे व फुक्क नयाः सिधय्केमाः। व छेँनं ला छकू नं पित हये मज्यू। व भ्वय्या निंतिं स्याःम्ह पशुया क्वँय् छकू नं त्वःथुले मज्यू।#गन्ती ९:१२; यूह १९:३६ 47इस्राएलया फुक्क मनूतय्सं थ्व नखः हनेमाः।
48“छिपिंनापं च्वनाच्वंपिं पिनेयापिं मनूतय्सं परमप्रभुया छुत्काराया नखः हनेगु मनंतुन धाःसा इमि फुक्क मिजं मनूतय्सं म्हय् चिं तयेमाः। अले इमिसं नं अन हे बूपिन्सं थें नखः हने फइ। म्हय् चिं मतःपिन्सं थ्व भ्वय् नयेदइ मखु। 49नियम धाःसा अन हे च्वंपिं व पिनें वयाच्वंपिं निखलःयात नं छगू हे जुइ।”
50परमप्रभुं मोशा व हारूनयात उजं बियादी थें इस्राएलीतय्सं यात। 51परमप्रभुं उखुन्हु हे इस्राएलीतय्त इमिगु पुचः पुचः यानाः मिश्र देशं पितहयादिल।
Currently Selected:
प्रस्थान 12: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
