प्रेरित 13
13
बारनाबास व शाऊलयात ल्ययाः भिंगु खँ न्यंके छ्वःगु
1एन्टिओखियाय् च्वंगु मण्डलीइ अगमवक्ता व गुरुत नं दु। थुपिं बारनाबास, हाकु धाःम्ह शिमियोन, कुरेनीं वःम्ह लुकियस, दरबारय् हेरोद जुजु नाप ब्वलंम्ह मनेन व शाऊल खः। 2थुपिं अपसं च्वनाः प्रभुया आराधना यानाच्वंबलय् पवित्र आत्मां थथे धयादिल – “बारनाबास व शाऊलयात जिं सःतागु ज्याय् छ्व।” 3अले इमिसं अपसं च्वनाः प्रार्थना यानाः छेनय् ल्हाः तयाः इमित ज्याय् छ्वयाबिल।
बारनाबास व शाऊल साइप्रसय्
4थथे इपिं पवित्र आत्मां छ्वःगु ज्याय् वन। इपिं सिलुकिया जुयाः साइप्रस टापुपाखे लःजहाजं वन। 5सलामिसय् थ्यंकाः इमिसं अन यहूदीतय् धर्मशास्त्र स्यनीगु छेँय् वनाः वचन न्यंकल। इमित ग्वाहालि बीत मर्कूस धाःम्ह यूहन्नायात नं इपिं नाप ब्वनायंकल।
6इपिं सलामिसं पाफोस धाःगु शहरय् थ्यंकः वन। अन इमिसं छम्ह फताहा अगमवक्ता बार-येशू धाःम्ह यहूदी झाँक्री नापलात। 7व छम्ह बुद्धि दुम्ह सर्गियस पौलुस धाःम्ह तःधंम्ह हाकिमयागु छेँय् च्वनीम्ह खः। व तःधंम्ह हाकिमं परमेश्वरयागु भिंगु खँ न्यने मास्ति वय्काः बारनाबास व शाऊलयात सःतल। 8एलुमास धाःम्ह बार-येशूं धाःसा तःधंम्ह हाकिमयात परमेश्वरयागु खँ मन्यंकेगु कुतः यात।
9थथे याःगुलिं शाऊलं (वयात पावल नं धाः)#१३:९ पावल वयात ग्रीक भाषां “पौलस” पवित्र आत्मां जायाः वयात मिखा हे लिमकासे स्वयाः धाल – 10“छ शैतानया मचा, फुक्क भिंगु ज्याया शत्रु, लुच्चा, थगय् जक यानाः नया जुइम्ह, छु छं प्रभुयागु सत्य खँयात स्यंकेत स्वयेगु ज्या त्वःते मखु ला? 11प्रभुं छन्त सजाँय बियादी धुंकल। छुं ई तक छ कां जुइ। अले छंगु मिखां निभाः जः खनी मखु।” थुलि धायेवं एलुमासं छुं हे मखना वन। अले ल्हाः ज्वना यंकीम्ह सुं मनू दु ला धकाः पचिपचि याः जुल।
12थ्व खनाः तःधंम्ह हाकिमं अजू चायाः परमेश्वरयागु स्यना खँय् विश्वास यात।
पावल पिसिदियायागु एन्टिओखियाय् वंगु
13पावल व वया पासापिं पाफोसं लःजहाजय् च्वनाः पामफिलियाय् लाःगु पर्गा धाःगु शहरय् थ्यंकः वल। यूहन्ना धाःसा इमित अन हे त्वःताः यरूशलेमय् लिहां वन। 14इपिं पर्गां तुं पिसिदिया जिल्लाय् लाःगु एन्टिओखियाय् वन।
विश्रामबार#१३:१४ यहूदीतय् विश्रामबार खुन्हु खुन्हु धर्मशास्त्र स्यनीगु छेँय् वनाः अन न्यना च्वंपिं लिसे फ्यतूवन। 15व्यवस्थायागु सफू व अगमवक्तातय्गु सफू ब्वने धुंकाः थकालिपिन्सं इमित सःताः थथे धाल – “किजापिं, थ्व मनूतय्त छुं भिंगु खँ न्यंके मास्ति वःसा, धयादिसँ।”
16अले पावलं दनाः ल्हाःभाय् यानाः थथे धाल – “इस्राएली दाजुकिजापिं व परमेश्वरयात मानय् याइपिं, जिगु खँ न्यनादिसँ।
17“इस्राएलीतय् परमेश्वरं झी तापाःबाज्यापिन्त ल्ययादिल, अले मिश्र देशय् च्वनाच्वंबलय् इमित तःधंकादिल। अले थःगु शक्ति क्यनाः इमित अनं पित ब्वना हयादिल।#प्रस १:७; १२:५१ 18पिइदँ तक मरुभूमिइ च्वंबलय् इमिगु मभिंगु ज्याखँयात सह यानादिल।#गन्ती १४:३४; व्य १:३१ 19लिपा परमेश्वरं हे कनानय् च्वंपिं न्हय्गू जातियात नाश यानाः इमिगु देश थुमित लःल्हानादिल।#व्य ७:१; यहो १४:१ 20थथे जुइत प्यसः व नेय्दँ (४५०) बित।
“अनं लिपा इमित राज्य याकेत परमेश्वरं न्यायाधीशत छ्वयाहयादिल। थुमिसं शमूएल धाःम्ह अगमवक्तायागु पालय् तक ज्या यात।#न्याय २:१६; १ शमू ३:२० 21अले इमिसं छम्ह जुजु फ्वन। अले परमेश्वरं पिइदँ तक बेन्यामीन कुलयाम्ह कीशया काय् शाऊल धाःम्हय्सित जुजु दय्कादिल। 22लिपा थ्व जुजुयात लिकयाः परमेश्वरं दाऊद धाःम्हय्सित ल्ययादिल। थ्व हे दाऊदयात वय्कलं थथे धयादिल – ‘जिं जिगु मन नाप मिलय् जूम्ह यिशैया काय् दाऊदयात लुइके धुन। थ्वं हे जिं धयागु फुक्क याइ।’#१ शमू १३:१४; १६:१२; भज ८९:२०
23“थ्व हे मनूया कुलं परमेश्वरं इस्राएलयात मुक्ति बीम्ह येशूयात छ्वयाहयादिल। थथे छ्वयाहये धकाः वय्कलं न्हापा हे बचं बियादीगु खः। 24येशू झाये न्ह्यः बप्तिस्मा बीम्ह यूहन्नां वयाः फुक्क इस्राएलीतय्त पश्चाताप या अले बप्तिस्मा का धकाः न्यंकाजुल।#मर्क १:४; लूक ३:३ 25यूहन्नां थःगु ज्या सिधय्काः थथे धाःगु खः – ‘छिमिसं जि सु धकाः ताय्का च्वना? जि व हे मखु। जि लिपा छम्ह झायाच्वंगु दु। जि ला वय्कःयागु लाकां पुतु फ्यनेत नं मल्वः।’”#मत्ती ३:११; मर्क १:७; लूक ३:१६; यूह १:२०,२७
26“दाजुकिजापिं, अब्राहामया सन्तान जूसां वा परमेश्वरयात मानय् याइपिं यहूदीमखुपिं जूसां थ्व मुक्तियागु खँ परमेश्वरं झी फुक्कसितं छ्वयाहयादीगु खः। 27यरूशलेमय् च्वंपिन्सं व इमि शासकतय्सं वय्कःयात म्हसीके मफुत। विश्रामबार पतिकं ब्वना वयाच्वंगु अगमवक्तातय्गु सफुलिइ च्वयातःगु खँ न्यंसां नं इमिसं थुइके मफुत। अय्जूगुलिं इमिसं वय्कःयात स्यानाः अगमवक्तातय्सं धाःगु खँ पूवंकल। 28वय्कःयाके स्याना छ्वयेमाःगु छुं हे दोष लुइके मफुसां इमिसं पिलातसयाके ‘वयात स्यानाछ्व’ धकाः फ्वन।#मत्ती २७:२२-२३; मर्क १५:१३-१४; लूक २३:२१-२३; यूह १९:१५
29“थथे च्वया तः थें वय्कःयात जू वये माःगु फुक्क जुइ धुंकाः इमिसं वय्कःयात क्रूसं क्वकयाः चिहानय् तयाबिल।#मत्ती २७:५७-६१; मर्क १५:४२-४७; लूक २३:५०-५६; यूह १९:३८-४२ 30तर परमेश्वरं वय्कःयात सीम्हं म्वाकादिल। 31अले तःन्हु तक थःपिं नाप गालीलंनिसें यरूशलेमय् थ्यंक वःपिन्थाय् खनेदय्कः झाल। थुपिं आः तक थ्व खँया साक्षी दनि।#प्रे १:३
32“आः जिमिसं परमेश्वरं झी तापाःबाज्यापिन्त बी धकाः धयादीगु थ्व हे भिंगु खँ छिमित कं वयाच्वना। 33थ्व हे खँ वय्कलं सीम्ह येशूयात म्वाकाः झी इमि सन्तानयागु निंतिं पूवंकादिल। निगूगु भजनय् येशूया खँय् थथे च्वयातःगु दु –
“‘छ जिमि काय् खः।
थनिंनिसें जि छं बाः जुल।’#भज २:७
34“परमेश्वरं वय्कःयात गुबलें सीम्वाय्क म्वाकादीगु खँय् थथे धयादिल –
“‘जिं दाऊदयात बी धकाः
धयागु पवित्र आशिष छिमित बी।’#यशै ५५:३
35“मेगु भजनय् नं दाऊदं थथे धयातःगु दु –
“‘अले छिं थःम्ह पवित्रम्ह मनूयात
ध्वगिकेबी मखु।’#भज १६:१०
36“थ्व खँ दाऊदं थःगु बारे च्वयातःगु मखु, छाय्धाःसा परमेश्वरया इच्छा कथं सेवा यानाः सीधुंकाः वयात वया तापाःबाज्यापिंनापं थुनाबिल। अले वयागु सीम्ह ध्वगिना वन। 37अय्नं गुम्हय्सित थ्व खँ धाःगु खः व ला ध्वगिना मवं, बरु परमेश्वरं वय्कःयात सीम्हं हानं म्वाकादिल।
38“अय्जूगुलिं दाजुकिजापिं, छिकपिन्सं थ्व खँ थुइकादिसँ। थ्व हे मनूयागु नामं छिमिगु पाप क्षमा जुइ धकाः जिमिसं धयाच्वनागु खः। 39वय्कःयात विश्वास याःपिनिगु न्ह्याथें ज्याःगु पाप नं क्षमा यानाबी। थ्व ज्या मोशां ब्यूगु व्यवस्थां याये मफुत। 40उकिं होश यानादिसँ। अगमवक्तातय्सं च्वयातःगु थ्व खँ छिकपिन्त लाः मवयेमा –
41“‘अय् मूर्खत,
हेबाय्चबाय् जक यानाजुइपिं,
थुइके मफयाः
छिपिं अथें सिनावनी।
छिपिं दुबलय् हे
जिं छगू थज्याःगु ज्या याये।
जिं यानागु थ्व ज्या
छिमित सुनानं कन धाःसां
छिमिसं गुबलें नं पत्याः याइ मखु।’”#हब १:५
42पावल व बारनाबास धर्मशास्त्र स्यनीगु छेँनं पिहां वयाच्वंबलय् मनूतय्सं वइगु विश्रामबार खुन्हु नं कं झासँ धकाः बिन्ति यात। 43सभा क्वचाय् धुंकाः यक्व हे यहूदीत व यहूदी जूपिं मनूत इपिं नाप वन। पावल व बारनाबासं परमेश्वरं धयादी थें याना च्वँ धकाः इमित बःबियाः धाल।
44मेगु विश्रामबार खुन्हु परमेश्वरयागु वचन न्यनेत शहरय् च्वंपिं अप्वः थें मनूत वल। 45थथे यक्व मनूत न्यं वःगु खनाः यहूदीतय् नायःतय्गु नुगः मुल। अले इमिसं पावलं धाःगु खँ ख हे मखु धकाः हेस्यानाः वयात मभिंकाः खँ ल्हात।
46अय्नं पावल व बारनाबासं मग्यासे थथे धाल – “परमेश्वरयागु भिंगु खँ छिकपिन्त निं न्हापालाक न्यंके माःगु खः। छिकपिन्सं हे न्यने मयः धाल धाःसा, अले थःपिन्त अनन्त जीवन कायेत मल्वःपिं ताय्कल धाःसा आः जिपिं यहूदीमखुपिन्थाय् वनाः कं वने। 47छाय्धाःसा थथे या धकाः प्रभुं हे जिमित धयादीगु दु –
“‘जिं छिमित यहूदीमखुपिन्थाय्
जः ह्वलेत,
अले संसारयात मुक्तियागु लँ
क्यनेत छ्वयाच्वना।’”#यशै ४२:६; ४९:६
48थ्व न्यनाः यहूदीमखुपिं तसकं लय्लय्ताल। इमिसं परमेश्वरयागु वचनयात तःधंकल। अले अनन्त जीवन बीत ल्ययातःपिं मनूतय्सं विश्वास यात। 49थथे प्रभुयागु वचन उगु इलाकाय् फुक्क थासय् न्यनावन।
50अय्नं यहूदीतय्सं नांजाःपिं धर्मीपिं मिसातय्त व शहरय् च्वंपिं नायःतय्त ग्वाकाः पावल व बारनाबासयात ख्यानाः इमिगु इलाकां पितिनाछ्वल। 51अले इपिं थःगु लाकामय् च्वंगु धू थाथा यानाः आइकोनियनय् वन।#मत्ती १०:१४; मर्क ६:११; लूक ९:५; १०:११ 52एन्टिओखियाय् च्वंपिं चेलात पवित्र आत्मां जायाः लय्तायाच्वन।
Currently Selected:
प्रेरित 13: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
