प्रेरित 11
11
पत्रुसं प्रेरिततय् न्ह्यःने नवाःगु
1यहूदीमखुपिन्सं नं परमेश्वरयागु वचन न्यनाः विश्वास यात धकाः यहूदियाय् च्वंपिं प्रेरितत व मेपिं विश्वासीतय्सं सीकल। 2पत्रुस यरूशलेमय् लिहां वंबलय् इमिसं वयात थथे धकाः ब्वःबिल – 3“यहूदीमखुपिन्थाय् वनाः छं नयेत्वने याना वयागु ला?”
4अले वं छगू छगू दतले जूगु खँ फुक्कं इमित थुकथं कन – 5“योप्पाय् छन्हु प्रार्थना यानाच्वनाबलय् जिं दर्शन खना। व दर्शनय् जिं छकू देलासा थें ज्याःगु प्यखें कुन्चाय् ज्वनाः स्वर्गं जिथाय् कुतुं वयाच्वंगु खना। 6जिं क्वथीक स्वयाबलय् उकी पशु, पक्षी, घिसय् जुया जुइपिं जन्तुत खना। 7अले जिं थथे धयाहःगु सः ताया – ‘दँ पत्रुस, थुमित स्यानाः न।’
8“जिं लिसः बिया – ‘मखु प्रभु, थौं तक जिं शुद्ध मजूगु व थीमज्यूगु मनयानि।’
9“स्वर्गं हानं जितः थथे धयाहल – ‘परमेश्वरं शुद्ध याःगुयात छं शुद्ध मजू धकाः धाये मते।’ 10थथे स्वकः तक जुइ धुंकाः व फुक्कं स्वर्गय् तुं थत यंकल।
11“अबलय् हे कैसरियां जितः सःतःवःपिं स्वम्ह मनूत जि च्वनाच्वनागु छेँय् थ्यंकः वल। 12पवित्र आत्मां जितः म्हां मधासे इपिं नाप सुमुक हुँ धकाः धयादिल। अले योप्पाय् च्वंपिं खुम्ह विश्वासीतनाप जि कर्नेलियसयाथाय् वना। 13छम्ह स्वर्गदूतं छेँय् वयाः वयात थथे धाःगु खँ वं जिमित कन – ‘योप्पाय् मनूत छ्वयाः सिमोन धाःम्ह पत्रुसयात सःतके छ्व। 14थ्व हे मनुखं छंगु व छिमि फुक्क जहानपिनिगु पाप क्षमा जुइगु खँ कनी।’
15“जि इपिं लिसे नवाना च्वनाबलय् झीत थें इमित नं पवित्र आत्मां जाय्कादिल। 16थथे जुसेंलि प्रभुं धयादीगु खँ जितः लुमंसे वल – ‘यूहन्नां ला लखं बप्तिस्मा बियाच्वन, अय्नं छिमित पवित्र आत्मां बप्तिस्मा बी।’#प्रे १:५ 17परमेश्वरं थथे येशू ख्रीष्टयात विश्वास यानाः झीत पवित्र आत्मा बियादी थें इमित नं पवित्र आत्मा बियादिल धाःसा जि सु खः धकाः परमेश्वरं बीत्यंगु पनेत, जिं परमेश्वरयात पने फु ला?”
18इमिसं फुक्क खँ न्यने धुंकाः पत्रुसयात ब्वःबीगु त्वःताः थथे धकाः परमेश्वरयात तःधंकल – “अय्सा परमेश्वरं यहूदीमखुपिन्त नं पश्चाताप याकाः म्वाकादिल खनी।”
एन्टिओखियाय् च्वंगु मण्डली
19स्तिफनसयात स्यायेधुंकाः सास्ती फये मफयाः विश्वासीतय्सं फोनिके, साइप्रस व एन्टिओखियाय् बिस्युं वनाः अन इमिसं यहूदीतय्त जक भिंगु खँ न्यंकाजुल।#प्रे ८:१-४ 20अय्नं साइप्रसय् व कुरेनीइ च्वंपिं विश्वासीत गुलिसिनं धाःसा एन्टिओखियाय् वयाः यहूदीमखुपिन्त नं प्रभु येशूयागु खँ न्यंकल। 21प्रभु इपिं लिसे दीगुलिं यक्व मनूतय्सं प्रभुयात विश्वास यात।
22थथे अन नं विश्वासीत दत धयागु खँ यरूशलेमया मण्डलीयापिन्सं सियाः बारनाबासयात एन्टिओखियाय् छ्वयाहल। 23थथे व अन वयाः परमेश्वरं अन च्वंपिं विश्वासीतय्त बियादीगु आशिष खनाः तसकं लय्ताल। अले वं इमित मग्यासे दुनुगलंनिसें प्रभु नाप जुयाच्वनेमाः धकाः स्यनेकने यात। 24थ्व बारनाबास धाःम्ह तसकं भिंम्ह तःधंगु विश्वास दुम्ह व पवित्र आत्मां जाःम्ह मनू खः। वं यानाः तःम्हय्सिनं हे प्रभुयात विश्वास यात।
25अले व टार्ससय् शाऊलयात माः वन। 26लुइके धुंकाः वयात एन्टिओखियाय् ब्वना हल। इपिं अन दच्छि तक च्वनाः मण्डलीइ च्वंपिं यक्वसित हे स्यनेकने यात। एन्टिओखियाय् हे दकलय् न्हापां विश्वासीतय्त ख्रीष्टियन धायेगु यात।
27छन्हु यरूशलेमं सुं अगमवक्तात एन्टिओखियाय् वल। 28इपिं मध्ये अगाबस धाःम्हय्सिनं संसारय् न्यंक हे अनिकाल जुइतिनि धकाः आत्मायागु शक्तिं अगमवाणी कन। थ्व अनिकाल कैसर क्लौडियसया पालय् जुल।#प्रे २१:१० 29अथे जूगुलिं अन च्वंपिं चेलातय्सं फक्व धिबा ल्हानाः यहूदियाय् च्वंपिं विश्वासीतय्त ग्वाहालि यायेगु क्वःछित। 30मुंगु भेटी शाऊल व बारनाबासयागु ल्हातं यरूशलेमया मण्डलीया थकालिपिन्त बीके छ्वल।
Currently Selected:
प्रेरित 11: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
