२ शमूएल 19
19
योआबं दाऊदयात ह्यय्कूगु
1अब्शालोमया निंतिं जुजु ख्वख्वं विलाप यानाच्वंगु दु धयागु खँ योआबं न्यन। 2अले व दिंखुन्हुया त्याःगुया लसताया पलेसा फुक्क सिपाइँतय्सं दुखं च्वनेमाल। छाय्धाःसा जुजुं थः काय्या निंतिं विलाप यानाच्वंगु दु धयागु खँ इमिसं न्यन। 3इपिं लडाइँलय् बुनाः बिस्युं वनाः ख्वाः क्यने मछाःपिं थें न्वमवासे शहरय् दुने दुहां वन। 4जुजुं थःगु ख्वाः त्वपुयाः ततसलं थथे धाल, “हे जिकाय् अब्शालोम! हे अब्शालोम, जि पुताः, जिकाय्!”
5अनंलि योआब जुजुया छेँय् वयाः वयात थथे धाल, “छिगु प्राण, छिकपिनि काय्पिं, म्ह्याय्पिं, कलाःपिं व मथ्याःपिं कलाःपिनिगु प्राण बचय् याःपिं फुक्क मनूतय्गु निंतिं छिसं थौं मछालापुइकादीगु दु। 6छिसं थः शत्रुतय्त माया यानादी, अले छितः माया याइपिन्त घृणा यानादी। छसपोलं जिपिं सेनापतित व झी थः मनूत छिगु न्ह्यःने छुं नं मखु धकाः थौं बांलाक क्यनादिल। छुं जुयाः थौं अब्शालोम म्वानाः जिपिं फुक्क सीगु जूसा छि लय्तायादी धकाः जिं सिल। 7आः याकनं झासँ थः मनूतय्त हपाः बियादिसँ। छुं जुयाः छिसं थथे मयात धाःसा जिं परमप्रभुया नामं पाफयाः धाये, थौं बहनि तक छम्ह नं छिनापं दइ मखु। अले थ्व छिगु जीवनय् वइगु दक्वसिबय् तःधंगु विपत्ति जुइ।”
8अनंलि जुजु दनाः वनाः शहरया ध्वाखा लिक्क च्वंवन। अले फुक्क मनूतय्सं “जुजु ध्वाखा लिक्क च्वनाच्वंगु दु” धकाः न्यन अले इपिं सकलें जुजुया न्ह्यःने वल।
दाऊद यरूशलेमय् लिहां वःगु
अबलय् अब्शालोमयात ग्वाहालि याःपिं फुक्क इस्राएलीत थथःगु छेँय् बिस्युं वने धुंकूगु खः। 9अले इस्राएलया फुक्क कुलत थथे धयाः जवाःसवाः यानाच्वन, “जुजुं झीत थः शत्रुतपाखें छुत्कारा यानादिल, अले पलिश्तीतय्गु शक्तिं बचय् यानादिल, आः अब्शालोमं यानाः जुजु देशं बिस्युं वंगु दु। 10तर झीसं झी जुजु अभिषेक यानाम्ह अब्शालोम लडाइँलय् सी धुंकल। अथे जुयाः जुजुयात लित हयेगु उपाय छाय् मयायेगु?”
11अले दाऊद जुजुं पुजाहारीत सादोक व अबियाथारयात थथे धकाः खबर छ्वयाहल, “यहूदाया थकालितय्त न्यँ, ‘जुजुयात वय्कःया दरबारय् हयेत छाय् लिबाका च्वनागु? छाय्धाःसा फुक्क इस्राएलीतय्गु बिचाः जुजुया छेँय् थ्यने धुंकल। 12छिपिं सकलें जि थः हे दाजुकिजापिं खः, जिगु हे ला हि खः। जुजुयात लित ब्वनाहयेत छाय् तसकं लिबाका च्वनागु? 13अले अमासायात थथे धा, छु छ जिगु ला व हि मखु ला? छ योआबया पलेसा छंगु जिवंकाःछि हे जिम्ह सेनापति मजुल धाःसा परमेश्वरं जिनापं बांमलाःगु व्यवहार यानादीमा।’”
14दाऊदया थ्व खबरं यानाः यहूदाया फुक्क मनूतय्गु मन छम्ह हे मनू थें यानाः त्याका काल। अले इमिसं जुजुयात थः फुक्क मनूतनापं लिहांझासँ धकाः बिन्ति यानाछ्वल। 15अथे जुयाः जुजु यर्दनय् लिहां वल।
अले यहूदायापिं मनूत जुजुयात नापलायेत व यर्दन खुसि उखेपाखे जुजुयात यंकेत गिलगालय् वल। 16थुबलय् हे बहूरीमय् च्वंम्ह बेन्यामीनी गेराया काय् शिमी दाऊद जुजुयात नापलायेत हथाय् चाचां यहूदाया मनूतनापं यर्दनय् वन। 17वनापं शाऊलया घरानाया मू च्यः सीबा, थः झिंन्याम्ह काय्पिं व निइम्ह च्यःत अले द्वःछि बेन्यामीनीतय्त ज्वनाः वन। इपिं यर्दनय् ब्वाँय् ब्वाँय् वन। अन जुजु च्वनाच्वंगु खः। 18अले इमिसं जुजुया घरानायात खुसि छिनाः उखेपाखे यंकल अले इपिं सकसिनं जुजुया आज्ञा कथं यायेत सकलें मानय् जुल।
अले गेराया काय् शिमी खुसि छिनावनाः जुजुया न्ह्यःने भ्वसुल, 19अले जुजुयात थथे धाल, “छसपोलं जितः दोष बियादिल जुइमा। छिसं यरूशलेम त्वःतादीगु दिनय् जिं यानागु अपराधयात ल्वमंकादिसँ। थ्व खँ छिगु मनय् नं तयादी मते। 20छाय्धाःसा जिं पाप यानागु दु, तर स्व, थौं फुक्क योसेफया घराना मध्ये छितः न्हापालाक नापलानाम्ह मनू जि हे खः।”
21अनंलि सरूयाहया काय् अबीशैनं धाल, “परमप्रभुं अभिषेक यानातःम्ह जुजुयात सराः ब्यूगु कारणं शिमी सीमाःगु मखु ला?”
22दाऊदं लिसः बिल, “हे सरूयाहया काय्पिं, छिमिगु जिनापं छु स्वापु दु? छिपिं थौं जिगु विरोधी जूगु दु। आः जि इस्राएलया जुजु जूगु दु अथे जुयाः थौं सुं नं इस्राएलीत सी मखु।” 23अनंलि जुजुं शिमीयात धाल, “आः छ सी मखुत।” अनंलि जुजुं पाफयाः थ्व खँ क्वःछित।
दाऊदं मपीबोशेतयात माया याःगु
24अले शाऊलया छय् मपीबोशेत नं जुजुयात नापलायेत क्वय् क्वहां वल। जुजुं यरूशलेम त्वःता वंगु दिनंनिसें लिहां मवतले, मपीबोशेतं न तुति सिल, न दाह्री चाल, न थःम्हं फिनातःगु लं हे हिल।#२ शमू ९:१-१३; १६:१-४ 25मपीबोशेत जुजुयात नापलायेत यरूशलेमं वःबलय् दाऊदं वयात धाल, “मपीबोशेत, छ जिनापं छाय् मवयागु?”
26वं लिसः बिल, “छसपोल, स्वयादिसँ, जि च्यः सीबां जितः धोखा बिल। जि ला गधाया म्हय् काठी तयाः जुजुनापं वनेगु इच्छा यानाच्वनागु खः, तर जि छिकपिनि दास खुत्यांम्ह खः अले जिं मसीकं हे वं जितः त्वःतावन। 27वं जिगु विरोधय् छिनापं खँ ल्हाःगु दु। छसपोल परमेश्वरया दूत थें खः। आः छितः छु पाय्छि जु व हे यानादिसँ। 28जिमि बाज्याया फुक्क घराना छिगु ल्हातं सीमाःपिं खः तर छिकपिनि दास जितः छिसं थःनापं हे नयेत्वने बियादिल। थुलिं तःधंगु दया दयाः नं जिं मेगु अप्वः छु आशा याये माल?”
29जुजुं लिसः बिल, “फेतु, जिं पक्का याये धुन, छ व सीबां निम्हय्सिनं बुँ इनाका।”
30मपीबोशेतं धाल, “वं हे फुक्क कायेमा, छाय्धाःसा छि याउँक छेँय् थ्यंकः झाल।”
31गिलादी बर्जिल्लै नं रोगलीमं क्वय् क्वहां वल, अले जुजुयात यर्दन छिकेत ग्वाहालि यायेत जुजुयाथाय् वल। 32बर्जिल्लै धाःसा चयदँ दये धुंकूम्ह बुराम्ह मनू खः। जुजु महनोमय् च्वनाच्वंबलय् वं हे जुजुयात नयेगु नसा यंकीम्ह खः छाय्धाःसा व तसकं तःमिम्ह खः।#२ शमू १७:२७-२९ 33जुजुं बर्जिल्लैयात धाल, “छ जिनापं खुसि छिनाः वनेनु, यरूशलेमय् छ जिनापं च्वँ। जिं अन छंगु निंतिं नयेत्वनेगु मिलय् यानाबी।”
34बर्जिल्लैनं जुजुयात लिसः बिल, “छिकपिनि दास छिनापं यरूशलेमय् वनेत तसकं बुरा जुइ धुंकूगु दु। 35जि चयदँ दये धुंकल। भिं व मभिंया ज्ञान जिं सीके मफये धुंकल। जिं नयेत्वनेगु नं छुं सवाः मथुइ धुंकल। मिजं व मिसां म्ये हाःगु नं जिं मताये धुंकल। अथे जुयाः जि छिनापं वनाः छिगु निंतिं छाय् ब्वःझ जुइगु? 36बरु छसपोलया दास यर्दन छिनाः भतिचा जक छिनापं वने। तर जुजुं छाय् जितः थज्याःगु बांलाःगु सिरपाः बियादियागु? 37जितः लिहां वनेत उजं बियादिसँ, अले जि थः मां-बौया चिहान लिक्क जिमिगु हे शहरय् ल्यंदनिगु दिं बितय् याः वने। थन छिगु सेवा यायेत छिकपिनि दास किमहाम द हे दु नि। वयात छिनापं हे उखेपाखे यंकादिसँ, अले छसपोलयात छु पाय्छि जू वयात अथे हे यानादिसँ।”
38जुजुं लिसः बिल, “अथे खःसा किमहाम जिनापं उखेपाखे वयेमा, अले छन्त छु यः जिं वयागु निंतिं अथे हे याये। अले छं जिके छु फ्वन जिं छंगु निंतिं यानाबी।”
39अनंलि फुक्क मनूत यर्दन छिनावन, अले दकलय् लिपा जुजु छिनावन। अले जुजुं बर्जिल्लैयात चुप्पा नल, अले वयात आशिष बिल अले बर्जिल्लै थःगु छेँ तुं लिहां वन।
40अले जुजु खुसि छिनाः गिलगालय् वन, किमहाम नं व हे नापं दु। यहूदाया फुक्क मनूत व इस्राएलया बच्छि मनूतय्सं मिलय् जुयाः जुजुयात खुसि छिकाः उखेपाखे थ्यंकाबिल।
41अनंलि इस्राएलया फुक्क मनूत छथाय् मुनाः जुजुयाथाय् वल। अले इमिसं थथे धाल, “छाय् जिमि दाजुकिजा यहूदाया मनूतय्सं छितः यंकल? अले जुजु व वया घराना अले वया फुक्क मनूत मिलय् जुयाः जुजुयात यर्दन छिकाः उखेपाखे यंकल।”
42यहूदाया फुक्क मनूतय्सं लिसः बिल, “छाय्धाःसा महाराज जिमि थःलाःम्ह खः। छि छाय् तंम्वयादियागु? छु जिमिसं जुजुया धन नयागु दु ला? छु जिमिसं छुं कोसेलि थःपिनिगु निंतिं कयागु दु ला?”
43इस्राएलया मनूतय्सं यहूदाया मनूतय्त लिसः बिल, “जुजुयाके जिमिगु झिब्व दु अले व बाहेक दाऊदयाके छिमिगु स्वयाः जिमिगु अझ अप्वः हक दु। छिकपिन्सं छाय् जिमित क्वह्यंकागु? छु जुजुयात लित ब्वनाहयेगु खँ जिमिसं न्हापा हे धयागु मदु ला?”
तर यहूदाया मनूतय्सं इस्राएलया मनूत स्वयाः झन अप्वः कडा व्यवहार यात।
Currently Selected:
२ शमूएल 19: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
