२ शमूएल 17
17
अब्शालोमयात हूशैया मिलय् मजूगु सल्लाह
1हाकनं अहीतोपेलं अब्शालोमयात धाल, “जितः थौं चान्हय् दाऊदयात लिनायंकेत झिंनिद्वःम्ह मनू ल्यय्के बियादिसँ। 2व त्यानुचायाः थाकुयाच्वंबलय् हे जिं वयात हमला याये। वयात जिं तसकं ख्याये, अले वया फुक्क मनूत छ्यालब्याल जुयाः बिस्युं वनी। जिं जुजुयात बाहेक मेपिं सुयातं स्याये मखु। 3छिसं माला च्वनादीम्ह दाऊदयाथाय् फुक्क मनूत लिहां वः थें#१७:३ सेप्टुजेन्ट हस्तलिपिइ भम्चा थः भाःतयाथाय् लिहां वः थें अय्नं छिं छम्ह हे जक मनूया प्राण माला च्वन।, जिं फुक्क मनूतय्त छिथाय् लित हये। अनंलि ल्यंदुपिं फुक्क मनूतय्त शान्ति दइ।” 4थ्व सल्लाह अब्शालोम व इस्राएली थकालितय्त बांलाः ताल।
5तर अब्शालोमं धाल, “अरकी हूशैयात सःतके छ्व, अले वं छु धाइ व झीसं न्यनेनु।” 6हूशै वल अले अहीतोपेलं धाःगु फुक्क खँ अब्शालोमं वयात धाल, “अहीतोपेलं जिमित थज्याःगु सल्लाह ब्यूगु दु। जिमिसं वं धाःथें याये कि मयाये? वं धाःथें मयायेगु खःसा छु यायेगु? छं हे जिमित धयाब्यु।”
7हूशैनं लिसः बिल, “थुपालय् अहीतोपेलं छितः ब्यूगु सल्लाह पाय्छि मजू। 8छिसं हे धयादिसँ, छपिनि अबु दाऊद व वया सिपाइँत तसकं बल्लाःपिं खः। इपिं ला थः मचा लाका यंकूम्ह मिसाम्ह भालू थें ग्यानापुसे च्वंगु दु। छिकपिनि अबु सःस्यूम्ह तसकं बल्लाःम्ह सिपाइँ खः। चान्हय् व थः मनूतनापं द्यनी मखु। 9थ्व इलय् व गुफा व मेमेथाय् सुचुला च्वंगु जुइमा। दाऊदं छिकपिनि सिपाइँतय्त न्हापा हमला यात धाःसा थ्व खँ न्यनिपिन्सं थथे धाइ ‘अब्शालोमया सिपाइँत फुक्कं नाश जुल।’ 10थुकथं जुइबलय् न्ह्याथें ज्याःम्ह बल्लाःम्ह व सिंहया थें ज्याःगु नुगः दुम्ह मनू जूसां नं ग्याइ छाय्धाःसा फुक्क इस्राएलं छिकपिनि अबु तसकं बल्लाःम्ह सिपाइँ खः धकाः स्यू। अले वया सिपाइँत नं तसकं बल्लाःपिं खः। 11अथे जुयाः जिगु थ्व सल्लाह दु, दानंनिसें दच्छिनया बेर्शेबाया सिथय् तक दुपिं फुक्क इस्राएलीतय्त छथाय् मुंकि। इपिं समुद्रया सिथय् च्वंगु फि थें अल्याख दइ, अले छि थः हे लडाइँलय् इमिगु न्ह्यलुवाः जुयाः यंकी। 12दाऊदयात लुइकेबलय् झीसं ख्यलय् सुतिलः क्वहां वः थें वयात हमला याये, अले वया म्वाःपिं मनूत छम्ह नं ल्यं दइ मखु। 13दाऊद छुं शहरय् शरण कयाच्वंगु जूसां फुक्क इस्राएलं व शहरयात खिपतं चिनाः जगय् छग्वः नं ल्वहं ल्यंमदय्कः लुयाः ब्यासिइ थ्यंकाबी।”
14अब्शालोम व फुक्क इस्राएलीतय्सं धाल, “अहीतोपेलया सल्लाह स्वयाः हूशैयागु सल्लाह हे बांलाः।” छाय्धाःसा परमप्रभुं अब्शालोमयात नाश यायेत अहीतोपेलया बांलाःगु सल्लाहयात मानय् मयाकेगु क्वछिनादी धुंकूगु खः।
हूशैया पाय्छिगु सल्लाह न्यनाः दाऊद बिस्युं वंगु
15अनंलि हूशैनं सादोक व अबियाथार पुजाहारीयात थःम्हं व अहीतोपेलं छु छु सल्लाह अब्शालोम व इस्राएली नायःतय्त ब्यूगु खः व न्यंकल। 16हूशैनं धाल, “आः याकनं यानादिसँ! छि मरुभूमिया सिथय् चा मछ्यासे याकनं खुसि पुलाहुँ, मखुसा जुजु व वय्कःया मनूत शत्रुतय्गु ल्हातय् लाइन वा इमिसं स्याइगु भय दु धकाः जुजुयाथाय् खबर छ्वयादिसँ।”
17अबियाथारया काय् जोनाथन व सादोकया काय् अहीमास एन-रोगेलय् च्वनाच्वंगु खः। शहरय् दुने छु छु जुयाः च्वंगु दु व खबर छम्ह मिसां धुवांधु वया बीगु, अले इमिसं दाऊदयात खबर बीगु। छाय्धाःसा मनूतय्सं खंक खंक इपिं शहरय् दुने दुहां वनेगु आँट मयात। 18तर थुपालय् छम्ह ल्याय्म्हय्सिनं इमित खन। अले वं वनाः अब्शालोमयात धयाबिल। अथे जुयाः इपिं निम्हं हथाय् चाचां बहूरीमय् छम्ह मनूया छेँय् वनाः च्वंवन। व छेँया न्ह्यःने छगू तुं दुगु जुयाच्वन अले इपिं व हे तुंथि दुने दुहां वन। 19वया कलातं त्वपुइगु छुं हयाः तुंयागु प्वाः तिनाबिल अले उकी द्यःने अन्न तयाः निभालय् पानातःगु थें याना तल। अले अन छु दु धयागु सुनानं मसिल।
20अले अब्शालोमया मनूत वयाः व मिसायाके न्यन, “अहीमास व जोनाथन गन दु?” व मिसां इमित लिसः बिल, “इपिं खुसि पुलावने धुंकल।” इमिसं इपिं निम्हय्सित नं मालाः लुइके मफुत अले इपिं यरूशलेमय् तुं लिहां वन।
21अनंलि इपिं वने धुंकाः अहीमास व जोनाथन तुंथिं पिहां वल अले दाऊद जुजुयाथाय् वनाः फुक्क खँ न्यंकल। इमिसं दाऊदयात धाल, “याकनं दनाः खुसि छिनाः झासँ!” अले इमिसं दाऊदयात अहीतोपेलं जुजुया विरोधय् दय्कूगु योजना फुक्क कनाबिल। 22अथे जुयाः दाऊद व वया फुक्क पुचःत हथाय् चाचां यर्दन खुसि छिनावन। अले सुथय् खिउँ खिउँ धाःबलय् तक खुसिया उखेपाखे मथ्यंपिं सुं नं मन्त।
23थःम्हं बियागु सल्लाह मानय् मयाःगु अहीतोपेलं थुइकल अले वं थःगु गधाया म्हय् सामान चिनाः थःगु शहरपाखे थःगु हे छेँ तुं लिहां वन। वं थःगु छेँय् फुक्क मिलय् यानाः थः यग्गानाः सित। थुकथं व सित अले वयात वया हे अबुया चिहानय् थुनाबिल।
24अब्शालोम व फुक्क इस्राएलीत यर्दन खुसि छिनावन तर दाऊद न्हापा हे महनोमय् थ्यंकः वने धुंकूगु खः। 25अब्शालोमं योआबया थासय् अमासायात सेनापति दय्कल। व इस्राएली येतेरया काय् व योआबया मां सरूयाहया क्यहेँ अले नाहाशया म्ह्याय् अबीगेलया काय् खः। 26अले इस्राएलीतय्सं व अब्शालोमं गिलादया जिल्लाय् छाउनी तल।
27दाऊद महनोमय् थ्यंकः वःबलय् अम्मोनितय् रब्बाय् च्वनीम्ह नाहाशया काय् शोबी, लो-देबारय् च्वनीम्ह अम्मीएलया काय् माकीर व रोगलीमय् च्वनीम्ह गिलादी बर्जिल्लैनं 28लासाफांगा, थलबल व ख्वलात हयाः वयात बिल। इमिसं छ्व, तछ्व, छुचुं, छुस्यामुस्या, सिमी, दाल 29कस्ति, धौ, फैत व सायागु दुरुं पिकयातःगु पनीर नं हयाः दाऊद व वनापं वःपिं मनूतय्त नयेगु निंतिं बिल, छाय्धाःसा मनूत मरुभूमिइ नयेपित्याकाः, लः प्याये चाय्काः व त्यानुचायाः वःगु खः धकाः इमिसं सीकल।
Currently Selected:
२ शमूएल 17: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
