१ शमूएल 7
7
शमूएल इस्राएलया न्यायकर्ता
1अथे जुयाः किर्यत-यारीमया मनूत वयाः परमप्रभुया सनू यंकल। इमिसं सनू डाँडाय् च्वनाच्वंम्ह अबीनादाबया छेँय् हल। वया काय् एलाजारयात सनू स्वयेगु ज्याया निंतिं लःल्हाना बिल।
शमूएलयापाखें पलिश्तीत बूगु
2थुकथं ताःई तक लगभग निइदँ तक सनू किर्यत-यारीमय् हे तया तल। व हे इलय् फुक्क इस्राएलीतय्सं दुखं च्वनाः परमप्रभुयाके ग्वाहालिया निंतिं बिन्ति यात। 3अले शमूएलं फुक्क इस्राएल जातियात थथे धाल, “छिपिं दुनुगलंनिसें परमप्रभुयाथाय् लिहां वयेगु खःसा, छिकपिनि दथुं मेपिं द्यःत व अश्तोरेत द्यःमय्जुया थां लिकयाः वांछ्व। अले थःगु फुक्क मन व दुनुगलंनिसें परमप्रभुपाखे लिहां वा, अले वय्कःया सेवा या। अले तिनि वय्कलं छिकपिन्त पलिश्तीतय्गु ल्हातं त्वःतकादी।” 4अथे जुयाः इस्राएलीतय्सं बाल द्यःत व अश्तोरेत द्यःमय्जुया थां लिकयाः वांछ्वयाबिल। अले परमप्रभुया जक आराधना यात।
5अले शमूएलं धाल, “फुक्क इस्राएलीतय्त मिस्पाय् मुंकि अले जिं छिकपिनिगु निंतिं परमप्रभुयाके प्रार्थना याये।” 6अथे जुयाः इपिं सकलें मिस्पाय् मुन, अले इमिसं लः जाय्काहयाः परमप्रभुया न्ह्यःने देछाकथं प्वंकाबिल। उखुन्हु “जिमिसं परमप्रभुया विरोधय् पाप यानागु दु” धकाः मानय् यानाः न्हिच्छि हे इपिं अपसं च्वन। अले शमूएल मिस्पाय् इस्राएलीतय् नायः जुल।
7पलिश्तीतय्सं इस्राएलीत मिस्पाय् मुनाच्वंगु दु धइगु खँ न्यनाः इमि शासकत व सिपाइँत इस्राएलीतलिसें लडाइँ यायेत वल। पलिश्तीत ल्वायेत न्ह्यज्यात धइगु खँ न्यनाः इस्राएलीत तसकं ग्यात। 8अले इस्राएलीतय्सं शमूएलयात धाल, “पलिश्तीतय्गु ल्हातं जिमित बचय् यायेत परमप्रभु झी परमेश्वरयात प्रार्थना यायेगु त्वःते मते।” 9अथे जुयाः शमूएलं नकतिनियाम्ह मचाम्ह भ्याःचायात हयाः होमबलि छाल, अले इस्राएलीतय्गु निंतिं परमप्रभुयात ततःसलं हालाः प्रार्थना यात। परमप्रभुं वं याःगु प्रार्थनाया लिसः बियादिल।
10शमूएलं बलि छायाच्वंगु इलय् पलिश्तीत लडाइँ यायेत इस्राएलीतय्थाय् लिक्क वल। उखुन्हु परमप्रभु पलिश्तीतय्गु विरोधय् नँन्याये थें ततःसलं हालादिल। अले पलिश्तीतय्गु दथुइ अलमल जुल अले इपिं इस्राएलीतपाखें बांमलाक बुत। 11इस्राएलीतय्सं मिस्पांनिसें पलिश्तीतय्त लिना यंकाः लँय् स्यास्यां बेथ-कर तक हे वन।
12अले शमूएलं मिस्पा व शेनया दथुइ लुमन्तिकथं छग्वः ल्वहं धस्वाकाः थथे धाल, “परमप्रभुं झीत थन तक ग्वाहालि यानादिल।” अथे जुयाः व थाय्या नां एबेन-एजेर#७:१२एबेन-एजेर थुकिया अर्थ ग्वाहालिया ल्वहं खः। धकाः तल। 13थुकथं पलिश्तीत बुत अले हाकनं छुं ई तक इस्राएलीतनापं लडाइँ याः वये मफुत।
शमूएलया जिवंकाछि हे परमप्रभुया ल्हाः पलिश्तीतय्गु विरोधय् लात। 14पलिश्तीतय्सं कब्जा यानातःगु एक्रोनंनिसें गात तकया शहरत हाकनं इस्राएलीतय्सं तुं लित काल। अले इस्राएलीतय्सं लिक्क लाःगु लागात पलिश्तीतपाखें त्वःतकल। अले इस्राएलीत व एमोरीतय् दथुइ नं शान्ति जुल।
15थःगु जिवंकाछि हे शमूएल इस्राएलीतय् न्यायकर्ता जुल। 16वं दँय्दसं बेथेल, गिलगाल व मिस्पाय् वनाः ल्वापुख्यापुया न्याय याइगु खः। 17तर व न्ह्याबलें रामाय् हे लिहां वइगु खः। छाय्धाःसा वयागु छेँ अन हे खः अले अनं नं वं इस्राएलीतय्गु न्याय याइगु खः। वं अन परमप्रभुया निंतिं छगू वेदी दय्कल।
Currently Selected:
१ शमूएल 7: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
