१ राजा 7
7
सोलोमनं थःगु दरबार दय्कूगु
1सोलोमनं थःगु दरबार नं दय्कल। व सिधय्केत झिंस्वदँ (१३ दँ) बित। 2वं पिइप्यंगू (४४) मिटर ताहाकःगु, निइनिगू (२२) मिटर तब्यागु, झिंस्वंगू व बागू (१३.५) मिटर तःजाःगु, प्यझ्वः देवदारुया थां दुगु, उकिया च्वय् देवदारुया हे धलिं दुगु “लेबनानया गुँ” धाःगु दरबार दय्कल। 3थामय् दिनाच्वंगु उपिं धलिंया च्वय् देवदारुया पौ तयाबिल। छगू छगू झ्वलय् झिंन्यापु (१५) धलिं यानाः मुक्कं पिइन्यापु (४५) धलिं दु। 4उकिया झ्याःत थवंथः स्वकातःगु स्वंगू झ्वः तज्जाः यानाः दय्कूगु दु। 5फुक्क लुखाया चौकोसत प्यकूं लाः। उपिं थवंथः स्वकातःगु स्वंगू झ्वलय् न्ह्यःनेपाखे दु।
6वं निइनिगू (२२) मिटर ताहाकःगु व झिंस्वगू व बागू (१३.५) मिटर तब्यागु थामं घेरय् यानातःगु चुक दय्कल। उकिया न्ह्यःने छगू दलान दु, अले उकिया न्ह्यःने थांत व छगू पिने पिहां वयाच्वंगु पौ दु।
7वं सिंहासनया तधंगु क्वथा अर्थात न्याय याइगु तःधंगु क्वथा दय्कल, अन हे वं न्याय याइगु। वं उकियात बंनिसें कयाः धलिं तक हे स्वसिमां त्वपुयाबिल। 8वं थः च्वनीगु दरबार न्याय याइगु क्वथा थें हे च्वंक उकिया ल्युने मेगु चुकय् वं ब्याहा यानाहःम्ह फारोया म्ह्याय्या निंतिं नं व थें च्वंगु तःधंगु क्वथा दय्कल।#१ राज ३:१
9थुपिं फुक्क महल पिनेंनिसें तःधंगु चुक तक व जगंनिसें पौ तक करौंतीं पाय्छिगु नापकथं दुने व पिनेपाखे चानातःगु मू वंगु ल्वहँतं दय्कूगु दु। 10जग ततःग्वःगु व भिंगु भिंगु ल्वहँतं दय्कूगु दु। गुलिं ल्वहं प्यंगू प्वाइन्ट प्यंगू (४.४) मिटर ताहाकः अले गुलिं धाःसा स्वंगू व बागू (३.५) मिटर ताहाकः। 11उकिया च्वय् बांबांलाःगु ल्वहं पाय्छिकथंया नापय् चानाः मिलय् यानातःगु व देवदारुया धलिं दु। 12तःधंगु चुकया छचाःखेरं चानातःगु स्वझ्वः स्वझ्वः ल्वहंया दथुइ छझ्वः देवदारुया धलिंत दु। परमप्रभुया देगःया दुनेया चुक व उकिया दलान नं अथे हे च्वं।
हुरामया ज्या
13सोलोमन जुजुं टुरोसय् च्वंम्ह हुरामयात सःतके छ्वल। 14वया मां नप्ताली कुलयाम्ह छम्ह विधवा खः। वया बौ टुरोसय् च्वंम्ह कँय्या कारिगर खः। हुराम कँय्या फुक्क कथंया ज्या बांलाक यायेसःम्ह व अनुभवी मनू खः। वं जुजु सोलोमनयाथाय् वयाः वयात ब्यूगु फुक्क ज्या यात।
कँय्या निपु थां
२ इति ३:१५-१७
15वं च्यागू (८) मिटर तज्जाःगु व न्यागू प्वाइन्ट स्वंगू (५.३) मिटर ग्वलाःगु निपु कँय्यागु थां दय्कल। 16वं उपिं थांया च्वय्या ब्वतिइ तयेत कँय्यागु निगू प्वाइन्ट निगू (२.२) मिटर तज्जाःगु छ्यं नं दय्कल। 17वं छगः छगः थामय् दुगु छ्यंया निंतिं जालिकथं न्हय्पु यख्खाना च्वंगु सिखः दय्कल। 18थांया छ्यंयात बांलाकेत वं थात दय्कूबलय् जालीया प्यखेरं निझ्वः कँय्या धालेग्वः दु। गुकिं छगू छगू थांया छ्यंयात त्वपुयातःगु फुक्क छेनय् नं अथे हे यात। 19दलानया थांया छ्यंत लिली स्वां बांलूगु छगू प्वाइन्ट च्यागू (१.८) मिटर तज्जाः। 20निगलं थांया छेनय् जालि लिक्कया ख्वला बांलूगु ब्वतिइ, तपुलिया जःखः झ्वःझ्वः यानाः निसगः (२००) कँय्या धालेग्वः दय्कातःगु दु। 21वं थांत देगःया दलानया न्ह्यःने थन। वं दच्छिन पाखेया थांया नां याकीन#७:२१याकीन थुकिया अर्थ वं बल्लाकी तल अले उत्तर पाखेया थांया नां बोअज#७:२१बोअज थुकिया अर्थ वयाके तागत दु तल। 22उकिया छ्यं लिली स्वां बांलू। थुकथं थांया ज्या सिधय्कल।
कँय्यागु त्यांकि
२ इति ४:२-५
23हुरामं नाय्काः कँय्यागु छगः ग्वःलाःगु त्यांकि दय्कल। व निगू प्वाइन्ट निगू (२.२) मिटर तज्जाः अले उकिया ब्या प्यंगू प्वाइन्ट प्यंगू (४.४) मिटर व उकिया छचाःखेरंया नापय् यायेत झिंस्वंगू प्वाइन्ट निगू (१३.२) मिटर दुगु खिपः मा। 24त्यांकिया पिनेया बालाया घेराया क्वय् छचाःखेरं कँय्या निझ्वः लौकाया बुत्ता दय्कातःगु दु। उपिं बुत्तात त्यांकिनापं धातुया छकु हे कुचां दय्कूगु दु।
25व त्यांकि कँय्या झिंनिम्ह द्वहंया म्हया च्वय् तयातःगु दु, फुक्क द्वहंत पिनेपाखे स्वयाच्वंगु दु। स्वम्ह उत्तरपाखे, स्वम्ह पच्छिमपाखे स्वम्ह दच्छिनपाखे व स्वम्ह पुर्बपाखे स्वयाच्वंपिं खः। 26त्यांकिया अंगः न्हयेन्यागू (७५) मिलिमिटर ख्वातु। उकिया बाला ख्वलाया बाला थें हे लिली स्वांयागु हः थें च्वं। उगु त्यांकिइ ४४,००० लिटर न्ह्यं।
कँय्या गाडात
27हुरामं कँय्या झिगः गाडा नं दय्कल। छगः छगः गाडा छगू प्वाइन्ट च्यागू (१.८) मिटर ताहाः छगू प्वाइन्ट च्यागू (१.८) मिटर हे तब्या व छगू प्वाइन्ट स्वंगू १.३ मिटर तःजाः। 28उपिं थुकथं दय्कूगु दु। उपिं गाडातय्गु सिँपौत दु, सिँपौत फ्रेमय् तयातःगु दु। 29फ्रेमय् तयातःगु सिँपौलय् सिंह, द्वहं व करूबया किपा कियातःगु दु। फ्रेमय् नं कँय्या सिंह, द्वहं व करूबया किपा क्वय् व च्वय् बुत्ताया माला दु। 30छगः छगः गाडाया प्यपु कँय्या त्याः नापंया कँय्या प्यचा घःचाः दु। अले लः तइगु त्यांकि धंका तयेत प्यंगू कुन्चाय् कँय्या लिधंसात दय्कूगु दु। उपिं लिधंसाय् कँय्या स्वांमाः हनातःगु बुत्ता कियाः छाय्पिया तःगु दु। 31गाडाया च्वय् त्याःचाचिंगु फ्रेम दु, गुगु गाडाया च्वय्नं पिइन्यागू सेन्टिमिटर पिहावःगु दु अले उकिया चाकः खुइच्यागू सेन्टिमिटर दु। उकिया छचाःखेरं बुत्ता कियातःगु दु। गाडाया सिँपौत प्यकुं लाः, ग्वः मलाः। 32उपिं घःचाःत सिँपौया क्वय् दु, अले घःचाःया त्याः गाडानापं स्वाःगु दु। छगू छगू घःचाःया चाकः ब्या खुइखुगू (६६) सेन्टिमिटर दु। 33उपिं घःचाःत रथया घःचाःत थें दय्कातःगु दु। अले त्याः, सिथ, चुकू व दथु फुक्क नाय्कातःगु धातुयागु खः।
34छगः गाडाया प्यंगू चु दु, गुगु कुन्चाय् कुन्चाय् गाडां पिहां वःगु दु। 35गाडाया च्वकाय् छपु निइस्वंगू सेन्टिमिटर तःजाःगु बाला दु। तिब बीगु सिँपौत गाडाया च्वकाय् दु। 36वं तिब बीगु सिँपौतय् कँय्या करूबत, सिंहत व खजूरया सिमां छाय्पिये यात। अले प्यखेरं हनातःगु स्वां दय्कल। 37थुकथं वं झिगः गाडा दय्कल। उपिं फुक्क छगू हे कथं धालय् यानातःगु दु। उमिगु नाप व आकार उत्थें च्वं।
38अनं लिपा वं कँय्या झिगः बाता दय्कल, छगः छगः गाडाया लागि छगः छगः बाता। हाकनं छगः बाताय् च्यासः व चयगू (८८०) लिटर न्ह्यं। छगः छगः बाताया ब्या छगू प्वाइन्ट च्यागू १.८ मिटर दु।#प्रस ३०:१७-२१ 39वं न्यागः गाडा देगःया दच्छिनपाखे अले उत्तरपाखे न्यागः गाडा तल। तग्वःगु त्यांकि धाःसा दच्छिन पुर्बया कुन्चाय् तल।
देगःया सामानया धलः
२ इति ४:११–५:१
40हुरामं थलबल, बेल्चा व छ्वाकिगु बातात नं दय्कल।
थुकथं हुरामं जुजु सोलोमनया लागि परमप्रभया देगलय् यानाच्वंगु ज्या सिधय्कल। वं थुपिं ज्वलं दय्कल –
41निगः थां, थांया च्वकाय् बाता बांलूगु निगू थांया च्वय्या ब्व, थांया च्वय्या ब्वयात स्वाइगु निज्वः जालि,
42निज्वः जालीया लागि प्यसःगः (४००) धालेग्वः (निगः थांया ब्वयात त्वपुइगु छज्वः छज्वः जालीया निंतिं निझ्वः धालेग्वः),
43झिगः गाडा, उकिया झिगः बातानापं,
44छगः तग्वःगु त्यांकि व उकिया क्वय् झिंनिम्ह द्वहंत।
45थलबल, बेल्चा व छ्वाकिगु बातात।
हुरामं जुजु सोलोमनया लागि परमप्रभुया देगःया निंतिं दय्कूगु फुक्क ज्वलं प्वालाप्वाला थीकातःगु कँय्यागु खः। 46जुजुं उपिं फुक्क ज्वलंयात सुक्कोत व सार्तानया दथुइच्वंगु यर्दनया ख्यलय् साँचाय् धालय् याकाः दय्के ब्यूगु खः। 47सोलोमनं फुक्क थलबल मलंसे तया तल छाय्धाःसा उपिं थलबल यक्व दु। कँय्या तौल थुलि दु धकाः धाये थाकु।
48सोलोमनं परमप्रभुया देगःयात माःगु थुपिं सामान नं दय्कल –
लुँया वेदी, परमप्रभुयात छायेहःगु मरि तयेगु तेबिल,#प्रस २५:२३-३०
49भिंगु लुँया त्वाःदेवा, दुनेया महा-पवित्रगु थाय्या न्ह्यःने
जवपाखे न्याप्वाः व खवपाखे न्याप्वाः,
लुँया स्वांत, मत व चिम्ता,
50भिंगु लुँया थलबल, मत स्यायेगु ज्वलं,
छ्वाकेगु बातात व गुँगू मकः।
दकलय् दुने महा-पवित्रगु थाय्या खापाया लागि
व पवित्र थाय्या खापाया लागि लुँया कब्जा।
51परमप्रभुया देगःया फुक्क ज्या सिधये धुंकाः सोलोमन जुजुं थः अबु दाऊदं परमप्रभुयात छाःगु फुक्क वहः, लुँ व मेमेगु ज्वलं देगःया धुकुतिइ तल।
Currently Selected:
१ राजा 7: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
