१ राजा 4
4
सोलोमनया ततःधंपिं हाकिमत
1थुकथं सोलोमन जुजुं इस्राएल न्यंक शासन यात। 2वया मू मू हाकिमत थुपिं खः –
सादोकया काय् अजर्याह – पुजाहारी
3शीशाया काय्पिं एलीहोरेफ व अहियाह – छ्यान्जेत।
अहीलूदया काय् यहोशापात – इतिहास च्वइम्ह।
4यहोयादाया काय् बनायाह – सेनापति।
सादोक व अबियाथार – पुजाहारीत।
5नातानया काय् अजर्याह – जिल्लायापिं बडा-हाकिमतय् हाकिम।
नातानया काय् जाबूद – पुजाहारी व जुजुयात सल्लाह बीम्ह।
6अहीशार – दरबारया सम्पत्ति स्वइम्ह।
अब्दाया काय् अदोनीराम – दास थें ज्या याइपिनि नायः।
7इस्राएल फुक्कभनं सोलोमनया झिंनिम्ह जिल्लाया बडा-हाकिमत दु, इमिसं जुजु व जुजुया परिवारया लागि नयेगु नसा बन्दोबस्त याइगु खः। इपिं छम्ह छम्हय्सिनं दँय् छकः छगू छगू लाया लागि नयेगु नसा बन्दोबस्त यायेमाः।
8इमिगु नां थथे दु –
एफ्राइमया पहाडी देशय् – बेन-हूर।
9माकाज, शाल्बीम, बेथ-शेमेश व
एलोन-बेथहानानय् – बेन-देकेर,
10अरूब्बोतय् – बेन-हेसेद
(थ्वयागु जिम्माय् सोको व हेपेरया फुक्क देश दु),
11नापोत डोरय् – बेन-अबीनादाब,
(सोलोमनया म्ह्याय् ताफातयात थ्वं ब्याहा याःगु खः),
12तानाक व मगिद्दो व यिजरेल क्वय्या
सार्तानया लिक्क दुगु बेथ- शान फुक्कभनं,
हाबिल महोला व योक्माम तक – अहीलूदया काय् बाना,
13रामोत-गिलादय् – बेन-गेबर
(थ्वयागु जिम्माय् गिलादय् दुगु मनश्शेया काय् याईरया बस्तीत व
बाशानय् दुगु अर्गोबया जिल्ला अले मू लुखाय् कँय्या बार दुगु
पखालं घेरय् यानातःगु खुइगू ततःधंगु शहरत नं दु),
14महनोमय् – इद्दोया काय् अबीनादाब।
15नप्तालीइ – अहीमास।
(थ्वं सोलोमनया म्ह्याय् बासमतयात ब्याहा याःगु खः)
16आशेर व आलोतय् – हूशैया काय् बाना,
17इस्साखारय् – पारूहया काय् यहोशापात,
18बेन्यामीनय् – एलाया काय् शिमी,
19गिलादय् – ऊरीया काय् गेबेर
(एमोरीतय् जुजु सीहोन व बाशानया जुजु ओगया देश)।
व उगु जिल्लायाम्ह छम्ह हे जक बडा-हाकिम खः।
सोलोमनया न्हियान्हिथंया नसा
20यहूदा व इस्राएलयापिं मनूत समुद्र सिथय् च्वंगु फि थें हे यक्व दु। इपिं सकसिके नयेत्वनेत माक्व दु, अले इपिं लय्ताः। 21यूफ्रेटिस खुसिंनिसें कयाः पलिश्तीतय्गु देश व मिश्रया सिमाना तकयागु फुक्क देशय् सोलोमनं शासन याइगु खः। अन च्वंपिं मनूतय्सं सोलोमनयात कर पुलिगु, वयागु जिवंकाछि हे इपिं वयागु अधीनय् च्वन।#उत १५:१८; २ इति ९:२६
22सोलोमनया दरबारय् नयेत छन्हुया लागि न्हयेन्यामुरि (७५) भिंगु छुचुं, सछि व नेय्मुरि (१५०) अन्न, 23झिम्ह लहिनातःपिं द्वहंत, निइम्ह ख्यःयापिं द्वहंत अले सछिम्ह (१००) फै-च्वलय्नापं चल्ला, हरिण, जरायो व खाचा माः। 24वं यूफ्रेटिस खुसिया पच्छिमपाखेया फुक्क देश, अर्थात तिफसांनिसें कयाः पच्छिमपाखे गाजा तक शासन याइगु खः अले प्यखें शान्ति दु। 25सोलोमनयागु जिवंकाछि हे उत्तरय् दानंनिसें कयाः दच्छिनय् बेर्शेबा तक यहूदा व इस्राएल याउँक च्वन, फुक्क मनूत थथःगु दाखमा व यःमरिमाया क्वय् याउँक च्वन।
26सोलोमनया रथया सलत तयेत प्यद्वः (४,०००) क्वथात दु। वया झिंनिद्वःम्ह (१२,०००) सल दु।#१ राज १०:२६; २ इति १:१४; ९:२५
27वया झिंनिम्ह जिल्लाया बडा-हाकिमतय्सं थथःगु पाः वइगु लाय् सोलोमन जुजु व वलिसें नइपिनिगु लागि माःगु नयेगु नसा बन्दोबस्त याइगु। छुकिंयागु नं मगाःमचाः मजुइमा धकाः इमिसं स्वइगु। 28इपिं छम्ह छम्हय्सिनं थथःगु पाः वइबलय् सल व रथया सलया निंतिं नं तछ्व व छ्वालि तय्के छ्वइगु।
सोलोमनया ज्ञान
29परमेश्वरं सोलोमनयात यक्व बुद्धि व ज्ञान अले समुद्र सिथय् च्वंगु फि ति हे दुग्यां बियादिल। 30पुर्बयापिं व मिश्रयापिं फुक्क बुद्धि दुपिं मनूत स्वयाः सोलोमन यक्व बुद्धि दुम्ह खः। 31व मेपिं फुक्क मनूत स्वयाः बुद्धि दुम्ह खः। एज्री एतान अले माहोलया काय्पिं हेमान, कलकोल व दर्दा स्वयाः नं व यक्व बुद्धि दुम्ह खः। वया नां जःखः च्वंगु फुक्क जाति जातितय्थाय् न्यनावन।#भज ८९ 32वं स्वद्वःपु (३,०००) हितोपदेश व द्वःछि व न्यापु (१,००५) म्ये च्वल।#हितो १:१; १०:१; २५:१; श्रेष्ठ १:१ 33वं स्वांसिमाया बारे लेबनानया स्वसिमांनिसें कयाः अंगलय् बुयावइगु हिसप तकया बारे बयान यात। वं पशु, झंगः व घिसय् जुयाजुइपिं जन्तुत व न्याया बारे नं स्यन। 34सोलोमनयागु बुद्धिया बारे स्यूपिं संसारयापिं फुक्क जुजुपिन्सं छ्वयाहःपिं फुक्क जातियापिं मनूत वयागु बुद्धिया खँ न्यनेत वयाथाय् वइगु।
Currently Selected:
१ राजा 4: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
