१ राजा 19
19
एलिया होरेब पर्वतय् बिस्युं वंगु
1एलियां छु छु यात, फुक्क अगमवक्तातय्त वं तरवारं गय् यानाः स्यात धइगु खँ आहाबं ईजेबेलयात कन। 2उकिं ईजेबेलं एलियायाथाय् छम्ह दूतयात थथे धाय्के छ्वल, “गथे छं जिमि अगमवक्तातय्त स्यात, अथे हे यानाः कन्हय् थुगु हे इलय् तक जिं छन्त मस्यात धाःसा द्यःतय्सं जितः स्यायेमा।”
3एलिया ग्यानाः थःगु ज्यान बचय् यायेत बिस्युं वन। यहूदाया बेर्शेबाय् थ्यनेधुंकाः वं थः च्यःयात अन हे त्वःतल। 4थः धाःसा मरुभूमिइ न्हिच्छि न्यासि वन। व छमा सिमा दुथाय् दित अले सिमाया क्वय् फेतुनाः वं थः सीसां जिल धकाः मतिइ तयाः प्रार्थना यात, “हे परमप्रभु, जिगु ज्यान कयादिसँ, आः अप्वः जुइ धुंकल। छाय्धाःसा जि थः पुर्खात स्वयाः भिंम्ह मखु।”#योना ४:३ 5व हे सिमाया क्वय् व ग्वारातुल अले स्याक्क न्ह्यः वय्कल।
आकाझाकां छम्ह स्वर्गदूत वयाः वयात थियाः थथे धाल, “दनाः न!” 6वं थुखे उखे स्वल। थःगु छ्यं लिक्क वं क्वाःगु कोइलाय् छपा मरि व छथल लः खन। नयाःत्वनाः व हानं द्यन।
7परमप्रभुया स्वर्गदूत हानं लिहां वल। निक्वः खुसी वयात थियाः थथे धाल, “दनाः न, छ तापाक वने माःनि।” 8वं दनाः नल, त्वन, व हे नसां बल दयाः पिइन्हु तक चान्हि न्यासि वँवं व परमेश्वरया पर्वत होरेबय्#१९:८ होरेब थ्व सीनै पर्वतया मेगु नां खः थ्यंकः वन। 9अन छगू गुफाय् दुहां वनाः चच्छि अन हे च्वन।
परमप्रभु एलिया थासय् खनेदय्क झाःगु
परमप्रभुया थ्व वचन वयाथाय् वल, “अय् एलिया, थन छ छु यानाच्वनागु?”
10वं लिसः बिल, “दक्व शक्ति दुम्ह परमप्रभु परमेश्वरया निंतिं जिके यक्व जोश दु, इस्राएलीतय्सं छिगु बाचायात त्वःतूगु दु, छिगु वेदीत थुनाब्यूगु दु अले छिकपिनि अगमवक्तातय्त तरवारं स्याःगु दु। जि जक ल्यंदनि, इमिसं जितः नं स्यायेत स्वयाच्वंगु दु।”#रोम ११:३
11परमप्रभुं धयादिल, “पर्वतय् वनाः परमप्रभुया न्ह्यःने दँ, छाय्धाःसा परमप्रभु अनं जुयाः झायादीत्यंगु दु।”
अले तसकं वःगु वाफसं परमप्रभुया न्ह्यःने पहाडयात तछ्यानाबिल, ल्वहंयात कुचा कुचा यानाबिल। अय्नं परमप्रभु उगु फसय् मदी। वाफय् वयेधुंकाः भ्वखाय् ब्वल। उगु भ्वखाचय् नं परमप्रभु मदी। 12भ्वखाय् ब्वयेधुंकाः मि वल, अय्नं परमप्रभु उगु मिइ मदी। मिया लिपा नाइसे च्वंगु, चिसलं खँ ल्हाःगु सः ताये दत। 13व सः तायेवं एलियां थःगु ख्वाः गां त्वपुल, अले पिहां वनाः गुफाय् दुहां वनेथाय् दन।
छगू सलं वयात थथे धाल, “एलिया, छ थन छु यानाच्वनागु?”
14वं लिसः बिल, “दक्व शक्ति दुम्ह परमप्रभु परमेश्वरया निंतिं जिके यक्व जोश दु, इस्राएलीतय्सं छिगु बाचायात त्वःतूगु दु, छिगु वेदीयात थुनाब्यूगु दु अले छिकपिनि अगमवक्तातय्त तरवारं स्याःगु दु। जि जक ल्यंदनि, इमिसं जितः नं स्यायेत स्वयाच्वंगु दु।”
15परमप्रभुं वयात धयादिल, “हुँ, दमस्कसया मरुभूमिइ लिहां हुँ, अन थ्यनेधुंकाः छं अरामयाम्ह जुजु जुइत हजाएलयात अभिषेक या!#२ राज ८:७-१३ 16अले इस्राएलया जुजु जुइत निम्शीया काय् येहूयात अभिषेक या, अले थःगु थासय् अगमवक्ता जुइत हाबिल-महोलायाम्ह शाफातया काय् एलीशायात अभिषेक या।#२ राज ९:१-६ 17हजाएलया तरवारं बचय् जूपिन्त येहूनं स्याइ, येहूया तरवारं बचय् जूपिन्त एलीशां स्याइ। 18अय्नं जिं इस्राएलय् न्हय्द्वःम्ह (७,०००) बचय् यानातये। थुपिं फुक्क बालया न्ह्यःने छ्यं क्वःमछुकुपिं व वयात चुप्पा मनःपिं खः।”#रोम ११:४
एलीशायात सःतूगु
19उकिं एलिया अनं वन, वं द्वहंतय्त साय्काः बुँ पालाच्वंम्ह शाफातया काय् एलीशायात लुइकल। वया न्ह्यःने झिंनिज्वः द्वहं दु। व थः धाःसा दकलय् लिपाया द्वहंया ज्वःनापं बुँ पालाच्वंगु खः। एलियां वनाः थःगु गा त्वयाः एलीशायात न्यय्काबिल। 20अले एलीशा थः द्वहंत त्वःताः एलियाया ल्यूल्यू ब्वाँय् वन। एलीशां धाल, “जितः थः मां-बौयात चुप्पा नयाः बिदा काय्के बियादिसँ, अले जि छिगु ल्युने वये।”
एलियां धाल, “हुँ, जिं छन्त छु यानागु दु?”
21अले एलियायात त्वःताः वं छज्वः द्वहं कयाः स्यात। वं हलोया सिँ छ्वय्काः ला दय्काः मनूतय्त बिल, इमिसं ला नल। अनंलि एलीशा एलियाया ल्यूल्यू वन अले वयागु सेवा यात।
Currently Selected:
१ राजा 19: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
