MAKI 7

Nu wɔlɔ‐zaɣagitiɛ yaa ʋai

1Tei Favilesiitiɛ vɛɛ tɔ‐dɛɛ ɣala‐mɔitiɛ va te taniga te wuloni Yɛlusulɛɛ te ɣaa lɛ ba Ziizɛ ma, 2te wɛlɛni na va ga ná kala dopoitiɛ taniga te laa miini ga te maa‐woola pele. Na ɣa ga tɛ lɛ zeea‐wuo‐yeke kɛɛni. 3Su‐wulo‐zu ɣa ga Favile‐siitiɛ vɛɛ Dusii zɔitiɛ ɣaazɔ va tɛ lɛ ŋɛni mia ani dɛ tɛ lɛ maa‐wuo yeke kɛɛni. Ta fai nii ɣɛ ga te ziɛ ga nu wɔlɔ‐zaɣagitiɛ yaa ʋai. 4Ŋɛni nɛpɛ ka ziɣi na dɔwɔ ƃalagi zu, kɛni dɛ ta maa‐wuo yeke kɛɛ la tɔ vɛɛ miizu. Faa lamaa ɣa na ta ziɛ la è ɣɛ velei kpoale ŋɛnia maa‐wuo yeke fai la ta diɣia, kokoa é vɛɛ betea va. 5Na ʋaa ma Favilesiitiɛ ƃɔga tɔ‐dɛɛ ɣala‐mɔitiɛ te gáa zaɣa kɛɛni te ɣɛ ma, “Zɛƃɛi é kɛɛ yà ɣala dopoitiɛ tɛ lɛ zia ga nu wɔlɔ‐zaɣagitiɛ yaa ʋai, to mu tiɛ laa mi ga te maa‐woola pele?” 6É ɣɛ te ma, “Aizeea woi ɣɛni ƃo pa pele ma fai nii zu é zɛni na luo é bo ga wo la, wai ŋɛ ni wo ga daa‐nɛɛ‐wũ‐ba vea. È ɣɛ velei ponɛi la ná kɔlɔi zu, Gala giɛ ɣɛ tea,

‘Numai niitiɛ ta wũfesu mà ga te laa vele‐zuvɛ,

kɛ̀ te ɣigi maa woozavɛ bà.

7Ta nɔ fèlizu ƃɔɔvɛ tiɛ numaa ɣala bo ga

nu ƃuse yaa lɔgi è ɣɛ yá ɣɛ ga deʋei

kuloai zèea.’ ”

8Ziizɛ ɣɛni wɔnɔ te ma, “Wa ƃesu Gala na tɔgi va wiɛ ɣata nu ƃuse yaa ʋaa va. 9Wo welevɛ ga ɣɛlɛ vele Gala na tɔgi va kɛɛ ʋaa ma wo ƃɔɔ luo lɔɔ zei! 10Ƃɔvɛlaale Mooze ɣɛni tea, ‘Wũfe è ɣeea ma ta è lee.’ Na ɣa ɣɛɛ na, ‘Nui nɛpɛ yá faa yowũ wo ga kéea la ta dée, ƃe ba manui za ga gaama.’ 11Kɛ̀ wa bosu ga ani nu ɣa bo na kéea ma ɔɔ é bo dée ma ga, ‘Nii pagɛi ɣɛ è maa zɔlɔ wo zèea tɔ ga “kɔbã” na zu‐wulo‐zu ɣa ga feevɛ Gala zeea,’ 12— yá na wo na, wɛ lɛ kɔnɔ ƃega bá ɔ́ faa nɛpɛ kɛ kéea vɛ ɔ́ nɔ ɣɛ ga dée. 13Vele ɣa na wo Gala daa woi ɣɛɛ la ga faa yãka ga wo yaa ʋai wo daazu wo manu zuwui ya, é vɛɛ faa zii lamaa va wa kɛ.”

Niitiɛ ta nu ɣɛ ga nui maa woolagɛi

14Ziizɛ numaitiɛ lilini kɔnɔ pɔ́ vɛ é ɣɛ te ma, “A wui lo wo pɛ wo nii ɣaa ɣa. 15Ŋɛni ta nɛpɛ gɛ lɛ ŋetea nu ɔ́ mi ɔ́ máa woola. Kɛ̀ fai niitiɛ ta wulo nu ɣigi zu ta ɣa ta maa woola. [ 16Nui nɛpɛ faa‐mɛni gui wũ ba, é wui lo.]” 17Tei sa é numaitiɛ yɛni é lɛ pɛlɛi wu, ná kala dopoitiɛ te gaa zaɣani sakpegi ʋaa ma. 18É ɣɛni te ma,“? Wa ƃalaa wa ga faa‐ɣaa‐ɣaa lala vea? We lɛ kwɛ̃ni ga ŋɛnii nɛpɛ nu ɣa mi ɛ́ lɛ maa woolaga? 19Ƃɔvɛlaale ɛ́ lɛ lɔɔ kigi zu, kɛ̀ kuu‐zuvɛ ɣa a lɔ na é leve.” Ziizɛ maa ŋɛɛ ziɣini daa‐mii ŋɛni ɣaazɔ va woi niitiɛ mavele ma. 20É ɣɛni wɔnɔ te ma, “Nii yá wulo nu ɣigi zu towa a maa woola. 21Ƃɔvɛlaale nu ɣigi zu ɣa tuƃo‐vele‐yowũ‐wulo ɣi‐gaa‐ziɛ ɣa wulo na é vɛɛ niitiɛ va. Natiɛ ta ga kui‐yɔɔzu wɛ̃ɛ‐yeke‐kɛɛ, wũmɔ, nu‐vaa ʋaa, 22zini‐bɛ nu ƃɔga ŋaza keea nu ta wɛ̃ɛ‐zo fai, kuu‐zu‐yii, wãla‐lɔɔ, pɛɛ ʋaa, ƃaa‐wulo‐ma luo, sili, daa‐ŋala‐ŋala, kpɔɔ‐ʋaa‐wɔɔlɔ‐gaazu é vɛɛ titi tuo va. 23Faa yowũi niitiɛ ƃɔgɔpɛ ta wulo nu ɣigi zu te maa woola.”

Ŋaza nui na zee‐la‐mai

24Ziizɛ ziɣini na é li Taalɔ ligi zu. É lɛ na pɛlɛ ta wu. Ɛ́ lɛ ŋɛni wõini nu ɔ́ kwɛ̃ ga é ɣɛni na. Tɔwɔ ɛ́ lɛ ŋɛni loowu pele ɣaa. 25Ŋaza nu ta ɣɛni na gɔʋɛ yowũ dúu ŋaza nui wulu. É Ziizɛ maa woo mɛnini ga maa ʋilea é va é loo kɔwɔ wu. 26Ŋaza nui nii ɣɛni ga Geliiki nu é ga Sailofinisia luu‐ɣaa. É pee ʋeeni Ziizɛ vɛ ga nà gɔʋɛ yowũi ƃɛ duu ŋaza nui wulu. 27Ziizɛ ɣɛni ŋaza nui ma, “Pagɛ dɛ lopaitiɛ te vile, ƃɔvɛlaale ɛ́ lɛ pele ma ga nu é lopaitiɛ ta laa‐mii ŋɛnii ziɣi é pili gilewua vɛ.” 28Ŋaza nui gaa woteni zéea é ɣɛ ma, “Kèea, gilewuitiɛ ƃalaa te teevei wu ta mɔkolu vɛnɛi nii mi yá loo lopaitiɛ ya.” 29Ziizɛ ɣɛ ma, “È woi nii ma, yà lii wo sa. Gɔʋɛ yowũi ziɣia è lui wulu.” 30Ŋaza nui liini ná pɛlɛi wu é wɛlɛ lopoi va laani betei ɣa gɔʋɛ yowũi ziɣiai sa pulu.

Ziizɛ mumugi valoni

31Ziizɛ wulu ɣaa ʋeni sa é wulo Taalɔ ligi zu é leve Saidɔ̃ lai zu é ziiti Geealali yiɛ walai ma. É leveni Dikapɔlɔ ligi zu ga é ziiti na. 32Te vaani pɔ́ ga zunu ta gui ʋooleai daa ɣatagɛi te pee ʋe bɛ ga é yee vɛɛ ma. 33Tei Ziizɛ kuloni kpɔgi zu é lii la te felegɔ ŋada laa, é yee ƃeɣaitiɛ lɔɔni gui zu é laa life ya é ʋowũ nɛgi va. 34É wɛlɛni gee‐zuvɛ va é yɛʋui lɛ é too é ɣɛ ma, “Ɛfata,” na ɣa ga “Ƃe ba daa zu leve.” 35Guitiɛ zu laa laoni sa ga maa ʋilea, nɛgi wu ziɣi é laa wɔlɔ ga gaa wodoa. 36Ziizɛ te lɛnɛni ga te mɛ lɛ bo nu nɛpɛ ma. Kɛ̀ velei nɔ ɔ́ te lɛnɛ da, vele nɔ na tɔ wɔɔlɔ la boga zu ga woo maa zeezea. 37É wuloni ga numaitiɛ é leve kɛɛzu va tiɛ ɣɛ tea, “Fai ɣaazɔ é kɛɛ maa‐wulo‐zu lɛ ta va. Tɔ ƃalaa kɛɛzu gui ʋoole vea tiɛ faa mɛni, mumuga tiɛ yɛpɛ.”

Currently Selected:

MAKI 7: DN1971

Highlight

Copy