MAKI 3

Zunui zee ʋɔi ɣɛ ma

1Ziizɛ lɛɛni wɔnɔ Gala‐feli wɔtai wu, zunu ta na zee ʋɔi ma. 2Te ɣɛni sa Ziizɛ maa ʋɛɛnɛsu ga te wɛlɛ na va ga ani towaa balo ga doowo foloi, kɛɛ ʋaa ma te faa vɛɛ ba. 3Nui nii zee ʋɔi ɣɛ ma, Ziizɛ ɣɛni sa ma, “Va vɛ.” 4Na ɣa ɣɛɛ na é ɣɛni numaitiɛ ma,“? Tɔ tɔ su ga nu faa vagɔ ɣɛ ga doowo folo ɔɔ nu faa ŋala‐ŋala kɛ? Tɔ tɔ su ga nu nu yɛʋui yɛ zéea ɔɔ é nu vaa?” Kɛ̀ te fɔɔni su kpãa. 5É wɛlɛni te va ga zii‐ɣaa‐wãla zíi yiɛ zuuli nu ʋaa vala fai ma te ɣaazu. É ɣɛ sa zee‐ʋɔ‐ma nui ma, “Yee zu zakpa.” Nà yee zu zakpa. Zée ƃɛtɛ sa ga kavele. 6Favilesiitiɛ te wuloni sa ga maa ʋilea te li ta Yɛloo maa veaitiɛ te fuo loo ga Ziizɛ la ga velei ta su ƃɔnɔ wo da.

Kpɔgi é ɣɛni ziɛ walai la

7Ziizɛ zu wuloni numaitiɛ va ta ná kala dopoitiɛ te li ziɛ walai la. Kpɔ gwala ziɣini Geealali é vile pulu. Kpɔgi ta wala ƃɔni su te wulo Yudiiya, 8Yɛlusulɛɛ, Yedumia yui zu é vɛɛ Jɔdɛ̃ wuluvɛ vele va. Te wuloni Taalɔ lai ƃɔga Saidɔ̃ lai te wobavɛ laitiɛ zu te va pɔ́. Ƃɔvɛlaale te kɛ́ɛ ʋai natiɛ ɣaazɔ mɛnini. 9É boni ná kala dopoitiɛ ma ga te kɛ kẽegi ta ɣɛ na máʋaa ma kpɔgi mazaƃu ma, kɛɛ ʋaa ma ani tɔ kpaɣi na é vili su. 10Ƃɔvɛlaale é nu lamaa valoni. Na maʋaa ma taitiɛ nɛpɛ seeƃɛ ɣɛni te va te maa ʋilini ba kɛɛ ʋaa ma te ʋowũ ba. 11Siɛ nɛpɛ gɔʋɛ yowũ kɛɛ veaitiɛ tɔ pɛtɛ na, tɔ vɛɛ kɔwɔ wu tiɛ loba tiɛ ɣɛ ma, “Yà ɣa è ga Gala dui.” 12É maazu ɣilini ga kpaanaga te ya ga te mɛ lɛ dada maa ziɛ.

Ziizɛ yee ƃakoni keela puugɔ kai felegɔi ʋa

13Ziizɛ lɛɛni sa ɣɛ gizii ma é niitiɛ lili é te wõi ɣɛɛni. Natiɛ wɔ te va pɔ́ vɛ. 14É nu puugɔ kai felegɔ wuloni te zu, niitiɛ é te laa zeini wɔnɔ ga keelaitiɛ ga te ɣɛ ba, na ɣa ɣɛɛ na é te leve ga te Gala goi wo. 15Na ɣa ɣɛɛ na gaa‐ƃaa ɣa ɣɛ te ya pɛ ga te gɔʋɛ yowũa ƃɛ numaa wulu. 16Nu puugɔ kai felegɔitiɛ é te wuloni tiɛ ɣa: Saimɔ nii é daa zeini ga Pite; 17Jĩi nii é ga Zɛbɛdi dui ta déɣei Jɔ̃, niitiɛ é te laa zeini ga Boanɛgi, na zu‐wulo‐zu ɣa ga niitiɛ te ga gee‐ƃɛdɛ vea; 18Ɛĩdulu, Fele, Bɔtalɛmu, Mafiyu, Taamɔ, Afia dui Jĩi, Taadia, Saimɔ nii é ga Keena nui, 19é vɛɛ Dudia Asikaalia va, nii é wuloni ga kɔ́wɔ wulu wɔɔ.

Ziizɛ ƃɔga Biazibɔ

20Ziizɛ lɛ sa pɛlɛi wu. Kpɔgi ɣaa lɛɛni ba na kɔnɔ ga tɛ lɛ ƃega zoo ƃalaa tɔ laa mi. 21Tei kaa yɔ̃wɔitiɛ te maʋai mɛnini, te liini ga te so, ƃɔvɛlaale te ɣɛni tea, “Kígi lɛ koba.” 22Tɔ‐dɛɛ ɣala‐mɔitiɛ te ziɣini Yɛlusulɛɛ te ɣɛni tea, “Biazibɔ ɣa púlu. Gɔʋɛ yowũitiɛ ta masagi na gaa‐ƃai ɣa é gɔʋɛ yowũ ƃɛɛzu la numaa wulu.” 23Na ʋaa ma Ziizɛ te lilini pɔ vɛ é sakpe sɔɔ te ma é ɣɛ tea,“? Seeta ɣa Seeta ƃɛ nu wulu? 24Ani masada ɣaa ɣa wɛɛ na su tiɛ wɔ ɣiini pɔ, masadai na lɛ yɛga ma. 25Ani kaalaa ɣaa ɣa wɛɛ na su tiɛ wɔ ɣiini pɔ, kaalai na ɣa leve. 26Ani Seeta ɣa wu ziɣi na ga ƃɔɔ na ɣa ɣɛɛ na gaa wɛɛ su yíɛ wɔ ƃɔɔ wɔ, máʋai lɛ yɛga ma. Ná gaa‐ƃai ɣa wɛ̃ɛ. 27Kɛ̀ nu lɛ zooga ɔ́ lɛ gaa‐ƃaa nu na pɛlɛ wu ɔ́ kweligitiɛ ziɣi ga gaa‐ƃaa, kɛni kilaa manui ɣa gaa‐ƃaa nui ɣili ɣaʋu pa. Na ɣa ɣɛɛ na tɔ sa yá nà ná pɛlɛi wu ʋowo ga ƃɔɔƃɔɔ su.” 28Ziizɛ ɣɛni tea, “Gè bo wiɛ ga gaama, faa yowũ ɣaazɔ zu ʋaa ɣa yɛ numaa vɛ é vɛɛ Gala daa ŋala‐ŋala goi nɛpɛ ba ta bo. 29Kɛ̀ nui nɛpɛ yá Gala baa ŋinɛgi laa ŋala‐ŋala, ná faa yowũi zu ʋaa lɛ wɔlɔ‐wɔlɔ yɛga. Kɛ̀ faa yowũi nii su ʋaa lɛ yɛga wɔlɔ‐wɔlɔ ta wɔlɔ‐wɔlɔ towa zɛgɛi manui ma.” 30Ziizɛ nii woni te ma ƃɔvɛlaale te ɣɛni tea, “Gɔʋɛ yowũ ɣa púlu.”

Ziizɛ dee ƃɔga Ziize deɣeitie

31Ziizɛ dee vɛɛ déɣeitiɛ va te vaani te lo pɛlɛi woba te woo leve túo ga é va. 32Kpɔgi ɣɛni wuuni Ziizɛ woba. Te ɣɛ sa ma, “È lee vɛɛ è leɣeitiɛ va ta ŋeteavɛ tiɛ wõi ɣɛ ga te è vɛtɛ.” 33Ziizɛ gaa woteni te ya é ɣɛ tea, “Ƃɛ ɣa é ga dèe ta dèɣeitiɛ?” 34Taitiɛ te ɣɛni wuuni koba é wɛlɛni te ɣaazu va leelia é ɣɛ tea, “Dèeni ka ta dèɣeitiɛ! 35Nui nɛpɛ yá Gala zii‐mai ɣɛ, manui ɣa é ga dèɣe é ga nà seela é ga dèe.”

Currently Selected:

MAKI 3: DN1971

Highlight

Copy