MAKI 12

Yiiti‐wulo veaitiɛ te ŋasa ƃalagi zu

1Ziizɛ vɛɛni ga ƃɔɛ te wɔ sake goo zu yiɛ ɣɛ tea, “Zunu ta ŋasa ƃala daa leveni, é kpaki tite ma, é zɛba é ŋasa vai ziɣe wɔɔwɔi lo kpalagi zu. Na ɣa ɣɛɛ na é taka gaa wooza loni é kpalagi ɣɛ sa yiiti‐wulo veaitiɛ ya é li zuu ƃɔnɔ su. 2Tei sa ŋasa vaitiɛ te ƃoei ziɛgi ziitini, é tii‐ɣɛɛ nu ɣila teveni yiiti‐wulo veaitiɛ wɔ vɛ ga te ŋasa vai ta ʋe zéea é lii la pɔ. 3Kɛ̀ te na zoni te kpooʋe te teve wulu ga zeea yãka. 4É tii‐ɣɛɛ nui ta ƃɔnɔ teve wɔnɔ te wɔ vɛ. Te ŋada zeini nà wũgi va te so ga ƃaa‐wulo vele ma. 5É ta ƃalaa teveni wɔnɔ te na vaa. Te nii ɣɛɛni ga nu lamaa, na ɣa ga niitiɛ zunui te leveni. Tɔ taniga ƃooʋe te taniga vaa. 6Nui gila pɔ ge ɣɛni dɛ na wulu ga é teve. Na ɣɛni ga wòila lui. Daa‐wulo‐zuvɛ sa é na leveni te wɔ vɛ yiɛ ɣɛ tea, ‘Ta wũfe dùi ma.’ 7Kɛ̀ yiiti‐wulo veaitiɛ te ɣɛni ɣii ma, “Po ŋɛni keea nu ɣa é vaazu ɣɛɛzu do. A va de paa, kɛɛ ʋaa ma kweligi ɣɛ ga de wo.’ 8Te soni sa te paa te kulo ŋasa ƃalagi va te pili. 9Zɛƃɛ ɣa sa ŋasa ƃala keea nui ɣa kɛ? Towaa va é yiiti‐wulo veaitiɛ zu ŋala‐ŋala é ŋasa ƃalagi leve ta ƃalaaga wɔ. 10Wɛ dɛ fai nii lodoni Gala kɔlɔi zu? Na ɣa ga nii mawoi ga

‘Kwɔti ƃɔɔƃɔɔgi nɔ pɛlɛ‐lo beaitiɛ te ɣɛlɛɛ ba,

towa é ɣɛɛ ga kwɔtii maʋaa wɔɔlɔɔ baa pɛ ba.

11Nii ɣa ga de maliɣii ɣɛɛ ʋaa.

Tɔwɔ maʋai wala wulovɛ ga diɛ.’ ”

12Te pele ɣaa ziɛni ga te Ziizɛ zo, ƃɔvɛlaale te gaa ɣaani ga é sakpegi zɔɔ ga te la. Kɛ̀ te luoni kpɔgi va te ƃe sa ba te li.

Gaa‐zaɣa‐kɛi é vile wũ‐fɔɔnɛ‐ʋee veeai va

13Te Favilesiitiɛ taniga leveni Ziizɛ wɔ vɛ ta Yɛloo maa veaitiɛ taniga ga te so goo ma. 14Te vaani pɔ́ vɛ te ɣɛ ma, “Kala‐mɔi, gé kwɛ̃ni ga yà ga gaama luo‐wo nu. Ɛ̀ lɛ ƃalani ga nu ƃuse lo è wulu, ƃɔvɛlaale nu ƃuse lo‐suvɛ lɛ è ɣaazu ga faa. Kɛ̀ yà Gala na pelei maʋaa lɛ ga ƃɔɔƃɔɔ su? Tɔ pele ma Gala gaazu ga gíɛ wũ‐fɔɔnɛ‐ʋee ʋe ɣalaso gwalai Siiza ya, ƃaa gé mɛ lɛ kɛ? Gé fe ƃaa gé mɛ lɛ fe?” 15Tɔwɔ ta laa‐nɛɛ‐wũ‐bai wɛ̃ɛ pele ma Ziizɛ vɛ, é boni é ɣɛ te ma, “Aƃɛ zu‐wɔ̃ɔ ka wo bosu gàazu? A va ga naʋoloi ta gè pɛtɛ.” 16Te va sa ga gila pɔ́. É ɣɛ te ma, “Ƃɛɛ maa‐niini ka ga nii é naʋoloi ma ta ná daa‐zeigi?” Te ɣɛ ma, “Siiza ve.” 17Ziizɛ ɣɛ te ma, “Nii é ga Siiza na dɔ a nà ʋe Siiza ya. Nii é ga Gala na dɔ wo nà ʋe Gala zeea.” Ziizɛ ʋai vilini te ma ga ki‐gaa‐ziɛ.

Gaa‐zaɣa‐kɛi é vile nu wu‐ziɣi ʋai va saa ya

18Sadusiitiɛ te vaani Ziizɛ wɔ. Na ɣa ga niitiɛ ta ɣɛ bosu ga nu lɛ wu ziɣia saa ya. Te gaa zaɣa kɛɛni tiɛ ɣɛ ma, 19“Kala‐mɔi, Mooze kɔlɔ wonɛni gé vaa ma ga ani nu diɛ wuu‐zu luu ga. 20Tɔwɔ zinaa lea lɔfela te ɣɛni na. Te liɛi ŋaza zei, ɛ́ lɛ ŋɛni duu ɣaani ba é za. 21Pulu lete ma leɣei sei ga ŋaza. Nà wɔ gɛ lɛ duu ɣaani ba é yɛsu é za. Sava kelei balaa seini ga ŋaza, ɛ́ lɛ duu ɣaani ba é yɛsu é za. 22Te nu lɔfela pe te seini ga ŋaza, ta wɔ te lɛ duu ɣaani ba é yɛsu te za. Ŋaza nui tɔ ƃalaa é za sa.” 23Te ɣɛ sa Ziizɛ ma, “Yá ɣɛ na sa ga bu‐ziɣi‐wo foloi saa ya, ani ta wu zigi na, ƃɛ ɣa sa ŋaza ɣa ɣɛ ga ŋaza nui? Toku ge zei ga te nu lɔfela pɛ te seini ga ŋaza.” 24Ziizɛ ɣɛ te ma,? “ Nii lei ɔ́ wo ɣɛ ga nui goi lɛ pele ma? Ƃɔvɛlaale wɛ lɛ Gala kɔlɔi zu woi wɛ̃ni ɔ́ nɔ ɣɛ ga wo Gala na gaa‐ƃai wɛ̃ɛ. 25Toku ge zei ga numaitiɛ ta wu ziɣi na saa ya, zinaa te lɛ sa ŋaza wuloa ɔ́ nɔ ɣɛ ga ŋazaa te zei zini bɛ. Kɛ̀ ta ɣɛ ga Gala ta ɣeelaitiɛ ɣavele. 26Nii é ga nu wu‐ziɣi ʋai saa ya, a li na ga nà wɔɔ la vele, we lɛ dɛ woi nii lodoni é Mooze na kɔlɔi zu Gala kɔlɔi ʋaa va nii pilegɛi fitegi va? Na ɣa ga velei Gala ge boni la Mooze ma yíɛ ɣɛ ma, ‘Nà ɣa gè ga Eeƃɔlɔhɛ̃ɛ na Galagi, gè ga Aize na Galagi, gè kɔnɔ ga Yeekɔ na Galagi.’ 27Ɛ́ lɛ ga saa vea ta Ɣala. Kɛ̀ ʋulu‐su vea ta Ɣala be. Wo woi lɛ pele ma ga bɛnɛ.”

Tɔgi kpakpa kelegi

28Tɔ‐dɛɛ ɣala‐mɔitiɛ te ɣila ge vaani é te woo mɛni tiɛ fai vili‐pili yɔɔzu. Tei é pɛteni ga Ziizɛ gaa woteni te ya ga pagɔ, é gaa zaɣani é ɣɛ ma, “Zɛƃɛ ɣa é ga Gala na tɔgi bɔɔlɔ kelegi?” 29Ziizɛ gaa woteni é ɣɛ ma, “Tɔgi bɔɔlɔ kelegi ɣa ga nii. ‘A wui lo Yezɔi veaitiɛ. De maliɣii Gala tɔ ɣilekpu ka é ga nu pe maliɣi. 30Wõi ga è maliɣii Gala ge yii ɣaazɔ ta è ɣigi ɣaazɔ é vɛɛ yà ɣi‐gaa‐ziɛi ɣaazɔ va ta yà ɣaa‐ƃai ɣaazɔ.’ 31Fele kelei ɣa ga nii. ‘Wõi ga è wɔɔ nu è ɣɛ velei è ƃɔɔ wõini la.’ Tɔ kpalaa gɛ lɛ na ɔ́ leve niitiɛ va. 32Tɔ‐deɛ ɣala‐mɔi ɣɛ ma, “Gaama ve, kala‐mɔi. È boga ga gaama ga Gala ka ɣilekpu kpẽi. Ta ƃalaa gɛ lɛ na é wulo ulu. 33Pagɛ nu wõi la ga yii ɣaazɔ ta ná ki‐gaa‐ziɛi ɣaazɔ é vɛɛ ná gaa‐ƃai ɣaazɔ va. Na ɣa ɣɛɛ na è wõi ga è wɔɔ nui è ɣɛ velei è ƃɔɔ wõini la. Nà wɔɔlɔvɛ ŋɛni galaa va ga faa‐nɛɛ‐ɣɛɛ Gala bɛ ta zalaɣai ɣaazɔ.” 34Tei Ziizɛ wɛlɛni na va ga tɔ‐dɛɛ ɣala‐mɔi gaa woteni ga kele‐gele pele, é ɣɛni ma, “È maa lɛ woozani Gala na masadai va.” Tei sa na wuloni ba, é ɣɛni ga nu ta nɛpɛ na mɛni‐masa‐kɛ̃ɛ ʋaa ga é gaa‐zaɣa‐kɛɛ nɛpɛ bo ga Ziizɛ.

Gaa‐zaga‐kɛi é vile nui va Gala zee ƃakogɛi ba ga masa

35Tei Ziizɛ ɣɛni kala‐bo bosu Gala‐feli wɔta walai wu, é ɣɛni tea, “Tɔ ɣɛ le tɔ‐dɛɛ ɣala‐mɔitiɛ te bosu ga nui Gala zee ƃakogei ba ga masa tɔ ga Deeve duu, na ɣa ga Kolai? 36Tei Gala baa ŋinɛgi puuni Deeve ɣigi zu, é ɣɛni tea,

‘Gala ge ɣɛni màliɣii ma,

zei ga zèe za‐su vele

é yɛsu gè è wɔɔ yɔ̃wɔitiɛ vɛɛ è wɔwɔ wu.’ 37Deeve ɣagi ɣa tilisu ga máliɣi. Nà wɔ ka ɣɛɛ na tɔ sa a ɣɛ ɣɛ le ga Deeve ƃɔɔ duu?” Kɔ gwala wui toni goi ma ga kuu‐zu‐nɛɛ.

Ziizɛ tɛnɛ boni ga tɔ‐dɛɛ ɣala‐mɔitiɛ la

38Ziizɛ boni ná kala‐bo goi zu é ɣɛ tea, “A ƃɔɔ maazu vɛtɛ ga tɔ‐dɛɛ ɣala‐mɔitiɛ. Ta ɣa te wõini ga yogbo sɔkpɔ te ma tiɛ leve da. Na ɣa ɣɛɛ na te wõini ƃaa‐la‐ma laali‐ma yie wo ga tiɛ dɔwɔ ƃalagitiɛ ɣa. 39Te wõivɛ kɔnɔ ga sei‐wo‐suvɛ vɛtiɛ ná vapagɛi é leve baa pɛ ba Gala‐feli wɔtaitiɛ wu é vɛɛ vɛtiɛ va ná ga ƃaa‐la‐ma zei‐wo‐suvɛ kuu‐gaa‐zuvɛtiɛ ʋaa va. 40Po ŋazaitiɛ zini gɛ lɛ te vɛ, ta ɣa te natiɛ ta vɛlɛitiɛ ƃolosu te ya. Na ɣa ɣɛɛ na ta ƃɔɔ wulo sa ga nui mazii tɛ lɛ le ga Gala‐feliai ga su wooza. Fai é vaazu yɛsu te ma gwala ɣa ƃaka.”

Po ŋazai na faa‐nɛi

41Ziizɛ zeini naʋolo‐wuu‐zuvɛ ɣeeɣi daavɛ Gala‐feli wɔta walai ʋaa va yiɛ nu ƃulu gwalai maa ƃɛɛ tiɛ ta naʋoloi wu naʋolo‐wuu‐zuvɛ. Kpɛtɛ vea lamaa te naʋolo lamaa wuuni na. 42Po ŋaza gila ge vaani na nii zini gɛ lɛ ŋɛni bɛ mɔɔlɛi. É naʋolo vɛlɛ‐vɛlɛ puuni na nii ɔ́ ƃɔ su é ɣɛ ga kapa gila. 43Ziizɛ ná kala dopoitiɛ lilini pɔ vɛ é ɣɛ te ma, “Gè bo wiɛ ga gaama, po ŋazai nii mɔɔlɛi ŋɛ ni, é naʋolo wuuni wu é leve nui pɛ ba é naʋolo wua navolo‐wuu‐zuvɛ. 44Ƃɔvɛlaale te pɛ te kulovɛ te weli tama‐tamagitiɛ zu. Kɛ̀ ná dɛi ná mɔɔlɛ ŋɛni woloi zée yɛga ma ŋeteai‐ɣɛɛ ʋaa zu towa é pua na.”

Currently Selected:

MAKI 12: DN1971

Highlight

Copy