MAKI 1

Bataize‐ɣɛɛ Jɔ̃ na Gala goo‐wogai

1Woo niinɛ vagɔi lɔɔ‐zei‐zuvɛ ɣa é vile Ziizɛ Kolai va, nii é ga Gala dui.

2È ɣɛ velei Gala daa woo‐wo nui Aizeea ponɛni la Gala kɔlɔi zu, é boni ga Gala ka ɣɛɛzu tea,

“Wɛlɛ! Gà nà keela woo‐wo nui levesu è luo,

nui yá pelei ɣavele ɓɛtɛ yìɛ.

3Nu ta ɣa lobasu kpooʋei zu yíɛ bo ga,

‘A de maliɣii na pelei ɣavele ƃɛtɛ.

A ná pelei lete to.’ ”

4Bataize‐ɣɛɛ Jɔ̃ vaani kpooʋei zu yíɛ Gala goi wo é vile bataize‐yɛɛ ʋai nii va pilegɛi pulu‐ɣaa‐ʋe faa va faa yowù va su‐ʋaa‐yɛ faa ma. 5Yudiiya yui yaazɔ pɛ é vɛɛ Yɛlusulɛɛ lai va te liini pɔ́ vɛ te ta ʋaa yowũitiɛ wulo sa la te bo, tɔwɔ é bataize ɣɛ ga tiɛ ziɛ walai Jɔdɛ̃ wu. 6Seɣei Jɔ̃ ɔ́ tɛ ma kpɛtɛi ɣɛ ga suoi daa ga “keeamɔ” maleɣai yíɛ zaama ɣili ga suo wɔlɔ zaama‐ɣili. Koto kpɔga kõei gulo ɣa ɔ́ te mi. 7Tɔwɔ é Gala goi woni yíɛ ɣɛ tea, “Nui é pùlu é vaazu kée ɣaa ƃaavɛ é leve bà. Tɔ ga nui gɛ̀ lɛ kuloni bu ga gè maa yii gè ná savala tokoi laa ʋũi. 8Gè bataize ɣɛɛ ga wiɛ ga ziɛ. Kɛ̀ towaa bataize ɣɛ ga wiɛ ga Gala baa ŋinɛgi.”

Bataize‐ɣɛɛ ʋai ga Ziizɛ ta tɛ‐gai é woni da

9Nà maziɛgi zu Ziizɛ ziɣini Nazɔi lai zu Geealali yui zu, Jɔ̃ bataize ɣɛɛ la Jɔdɛ̃ wu. 10É ɣɛni ƃɔɔ nɔ wulozu ziɛi wu é wɛlɛ sa Gala ta va ná laa laogɛi, Gala baa ŋinɛgi yíɛ sa yii ma maʋaa wuloai è ɣɛ ƃiiƃɔku. 11Woo ta wɔ ge wuloni gee wɔlɔgi zu yíɛ ɣɛ tea, “Yà ɣa è ga ẁõila lui. Zìi wala laavɛ è maʋai vɛ.”

12Gala baa ŋinɛgi kɛɛni é li kpooʋei zu ga maa ʋilea. 13É kɛɛni kpooʋei zu ga folo yee naagɔ, Seeta yíɛ tɛ gá. É ɣɛni dɔƃɔ zuoitiɛ zaama, kɛ̀ Gala ta ɣeelaitiɛ te báa ʋaa ɣɛɛni.

Ziizɛ ƃele‐ʋili bea naagɔitiɛ lilini

14Jɔ̃ zogɛi sa ma ɣɛ, Ziizɛ vaani Geealali yui zu yíɛ woo niinɛ vagɔi wo kuloai Gala zeea. 15É ɣɛni ɣɛɛzu tea, “Kui ziitia. Gala na masadai maa ƃua. A wulu ɣaa ʋe faa yowũ va wo woo niinɛ vagɔi ziɣi ga gaama.”

16Tei sa Ziizɛ ɣɛni ziɛzu Geealali yiɛ walai wukũi ba, é wɛlɛni Saimɔ va ta déɣei Ɛĩdulu tiɛ ta ƃele walai vili ziɛi ma, ƃɔvɛlaale te ɣɛni ga ƃele‐vili bca. 17Ziizɛ ɣɛ te ma, “A vile pùlu. Gà kɛ wo ɣɛ ga nu‐mai bea Gala ma.” 18Te ƃeni sa ta ƃeleitiɛ va ga maa ʋilea te vile púlu. 19Tei sa é liini kɔnɔ ga ta wolo, é wɛlɛni Zɛbɛdi duu Jĩi va ta déɣe Jɔ̃. Te ɣɛni ta ŋeegi zu tiɛ ta ƃele walaitiɛ zu zɔlɔ. 20É Jĩi lilini sa ta Jɔ̃ ga maa ʋilea. Natiɛ te te ɣeea Zɛbɛdi yɛ kẽegi zu é vɛɛ tii‐ɣɛɛ veaitiɛ va te vile púlu.

Zunui gɔʋɛ yowũi ɣɛni pulu

21Te liini taa ta zu daa ga Kapɔɔnia. Tei doowo foloi ziitini, Ziizɛ lɛɛni Gala‐feli wɔtai wu é numaitiɛ ɣala bo na. 22Ziizɛ na kala‐bogi wala vilini numaitiɛ ma ga ki‐gaa‐ziɛ, ƃɔvɛlaale é te ɣala boni è ɣɛ nui gaa‐ƃaa zéea, ɛ́ lɛ ŋɛni kɛɛni ga tɔ‐dɛɛ ɣala‐mɔitiɛ ta dɛi ɣavele. 23Zunu ta ɣɛni ta Ɣala‐feli wɔtai wu gɔʋɛ yowũ púlu. É lobani 24yĩɛ ɣɛ tea, “Nazɔi Yiizɛ, yà ʋaa zɛƃɛ ɣa é gá ʋaa zu? È vaa ga è gé zu ŋala‐ŋala? Gè kwɛ̃ni ga nui è le. Yà ɣa è wuloai su leelaa ga Gala na dɔ.” 25Kɛ̀ Ziizɛ yii ɣaa wãlani gɔʋɛ yowũi ma é ɣɛ ma, “Ná ɣɛ ƃu, è ziɣi púlu!” 26Gɔʋɛ yowũi tooni yíɛ ƃeli. Nà ɣɛɛzu é loba ga woo wala é ziɣi pulu. 27Ziizɛ maʋai wuloni ga tiɛ ga tamaa. Na ʋaa ma te ɣiini gaa zaɣa kɛɛni tiɛ ɣɛ tea, “Nii zu‐wulo‐zu ɣa ga minɛ? Kala‐bo niinɛ ɣa! É gɔʋɛ yowũitiɛ pɛ deʋea ga gaa‐ƃaa natiɛ te goo mɛni.” 28Dáa wuloni ga maa ʋilea Geealali ligi zu ɣaazɔ.

Ziizɛ nu lamaa ʋaloni

29É wuloni Gala‐feli wɔtai wu ga maa ʋilea, Jĩi ƃɔga Jɔ̃ te vɛɛ ba te li Saimɔ ƃɔga Ɛĩdulu ta vɛlɛi wu. 30Saimɔ mɔɛ ɣɛni laani kɔɔlɛ ʋile yiiyai la. Te maʋai wo sa má ga maa ʋilea. 31Ziizɛ liini pɔ́ vɛ é kpalo ga zee é bu ziɣi. Kɔɔlɛ ʋilei ɣaa yiini sa ma ga maa ʋilea. É te wɔ̃nɔ zeke kɛ. 32Folo ɣai too‐zuvɛ sa kpɔkɔi na, te vaani ga seeƃɛ veaitiɛ ɣaazɔ pɔ́ é vɛɛ taitiɛ va gɔʋɛ yowũ ɣɛni te wulu. 33Taa pɛ ge ɣaa lɛɛni ba pɛlɛi la. 34É seeƃɛ zii laali‐taali tamaa valoni kɛɛ vea ma. É gɔʋɛ yowũ ƃɛ kɛɛ vea wulu. Ɛ́ lɛ ƃɛga ƃe gɔʋɛ yowũitiɛ va tɔ laa wɔlɔ, ƃɔvɛlaale te ɣɛni ga kwɛ̃ɛga ga nui é le.

Ziizɛ Gala goi woni Geealali

35Su woozai ɣɛ dɛ gela ɔ́ vɛɛ bosu, Ziizɛ wu ziɣini é li tɔ ɣilekpu ŋada laa. É Gala feli na. 36Saimɔ ta baitiɛ te daɣani ba. 37Te pɛtɛni te ɣɛ ma, “Nu pɛ ka è ɣaa ziɛzu.” 38É ɣɛ te ma, “A dii na wulu laitiɛ zu kɛɛ ʋaa ma gè Gala goi wo nátiɛ. Ƃɔvɛlaale nà ɣa gè mawulo woga ŋetea.” 39É leveni sa Geealali yui wɔlɔ‐kɔlɔ ma ɣaali yíɛ Gala goi wo ta Ɣala‐feli wɔtaitiɛ wu yíɛ gɔʋɛ yowũa ƃɛ numaa wulu.

Ziize gee nui ʋaloni

40Gee keea nu vaani pɔ́ é vɛɛ kɔwɔ wu é pee ʋe bé é ɣɛ ma, “Ani yà ʋaa na bu, yà zoo è bàlo màa ziɣi.” 41Gaazu‐maa‐wõi Ziizɛ zoni é yee zakpa é ʋowũ ba é ɣɛ ma, “Daavɛ zìi ma. Valo è maa ziɣi.” 42Gee zeeƃɛi ziɣini sa na va ga maa ʋilea, máa ziɣi. 43Ziizɛ teveni ga su ʋilea é ɣaazu ɣili boga va ma 44yíɛ ɣɛ ma, “Kɛsɛ ga è mɛ lɛ ta wo nu ta nɛpɛ ma. Kɛ̀ li è ƃɔɔ lɛ ga laa‐ʋaalegi. Na ɣa ɣɛɛ na è faa‐nɛi nii ɣɛ Mooze maʋaa leʋeni é da wo ya dɛɛ ʋaa ma ga numaitiɛ ga seele ga è valoa.” 45Kɛ̀ é wuloni é vɛɛ ga laa wu ziɣia ma yiɛ bo. É Ziizɛ maa woo ziɛni ŋada zii ƃɔgɔpɛ. Na ma Ziizɛ lɛ ƃega sa kɔnɔ lɛ taa zu numaa ɣaazu. Kɛ̀ kuloai ɣɛ tai va. Numaitiɛ wɔ te ziɣini ŋadɛi ɣaazɔ te va pɔ́.

Currently Selected:

MAKI 1: DN1971

Highlight

Copy