MAFIYU 4

Ziizɛ lɛɛ ʋai gá dɛvele vɛ

1Tei na ɣɛɛni, Gala baa ŋinɛgi pele wuloni ga Ziizɛ é lii la kpooʋei zu ga dɛvele tɛ gá. 2Ziizɛ zi dɔɔni ga folo yee naagɔ kpidi yee naagɔ. Tei sa na wuloni ba, pulu ɣɛni má. 3Tɛ‐ga‐wo nui va é ɣɛ má, “Ani yà ɣa è ga Gala dui, bo kwɔtii niitiɛ ma te ɣɛ ga kpoolo‐ʋɔɔ.” 4Kɛ̀ é gaa woteni é ɣɛ ma, “Ponɛvɛ Gala kɔlɔi zu mawoi ga,

‘Nu lɛ nɔ ŋeteai ɣɛɛ ga daa‐mii ŋɛni tɛ ɣilekpu.

Kɛ̀ towaa kɛ ga woi nɛpɛ yá wulo Gala da.’ ”

5Dɛvele zɛba é Ziizɛ ziɣi é lii la taa maa wuai zu é sei Gala‐feli wɔta walai losovɛ 6é ɣɛ ma, “Ani yà ɣa è ga Gala dui, wulo è loo. Ƃɔvɛlaale ponɛvɛ mawoi ga,

‘Gala ka ná keelaitiɛ leʋe è maʋaa ma.’

Na ɣa ɣɛɛ na,

‘Ta è ƃalo ga yee kɛɛ ʋaa ma è wɔwɔ

mɛ lɛ ziɣe kwɔti va.’ ”

7Ziizɛ ɣɛ wɔnɔ ma, “Ponɛvɛ mawoi ga ‘Mɛ lɛ è maliɣii Gala su wɔ̃ɔ.’ ” 8Dɛvele siɣi kɔnɔ é lɛɛ la gizi gwala ta ma togɛi ga ƃolo é zui zu masadai ɣaazɔ zu lɛɛ la é vɛɛ te maƃaa‐la‐mai va. 9É ɣɛ ma, “Gà niitiɛ ɣaazɔ ʋe è ya ani yà vɛɛ na kɔ̀wɔ wu.” 10Ziizɛ ɣɛ sa ma, “Seeta, ziɣi vɛ è li! Ƃɔvɛlaale ponɛvɛ mawoi ga,

‘Yà è maliɣii Gala feli,

na ɣa ɣɛɛ na tɔ ɣilekpu nɔ ɣa yà tii ɣɛ bɛ́.’ ”

11Dɛvelle ziɣi púlu. Na ɣɛɛzu Gala ta ɣeelaitiɛ te va te báa ʋaa ɣɛ.

Ziizɛ na tii lɔɔ zeini Geealali

12Tei Ziizɛ mɛnini ga te Bataize‐ɣɛɛ Jɔ̃ zoga, é liini wulu Geealali yui zu. 13É ziɣini Nazɔi lai zu é li Kapɔɔnia ziɛ walai wobavɛ Zɛbulɔ̃ ligi zu ta Nafetali ligi zu. 14É nii ɣɛɛni ga fai nii Gala daa woo‐wo nui Aizeea boni é leve ma. 15É ɣɛni tea,

“Zɛbulɔ̃ yui ta Nafetali yui,

vɛ ná ga yuwu wɔ vele,

Jɔdɛ̃ yiɛ walai wulu ʋaa va,

ná ɣa na ga Geealali zii ƃalaagitiɛ ʋaa ma—

16Taitiɛ te ga kpidi zu veaitiɛ te wɛlɛɛ

ŋada wodoa walai va.

Niitiɛ te yɛga vɛ ligi zu ná ga saa maa niinigi wu,

ŋada wodoai laa laoga te ʋaa ma.”

17É ziɣi na maziɛ su ma, Ziizɛ vɛɛni sa ga Gala goo woga yíɛ ɣɛ tea, “A wulu ɣaa ʋe faa yowũ va, ƃɔvɛlaale Gala ta masadai maa ƃua.”

Ziizɛ feza‐kpɛɛ ʋea naago lilini

18Tei sa Ziizɛ ɣɛni ziɛzu Geealali yiɛ walai woba, é wɛlɛni zinaa felegɔ va te ga keea kaa gila. Natiɛ te ɣɛni ga Saimɔ nii ta tili ga Pite ta ƃɔga deɣei Ɛĩdulu tiɛ ƃele vili ziɛ walai wu. Ƃɔvɛlaale te ɣɛni ga ƃele‐vili bea. 19É ɣɛni te ma, “A vile pùlu. Gà wo ɣɛ ga nu‐mai bea Gala ma.” 20Te ƃeni sa ta ƃeleitiɛ va ga maa ʋilea te vile púlu. 21Tei sa é ziɣini na yíɛ li, é wɛlɛni wɔnɔ nu felegɔ va te ga keea kaa gila. Natiɛ te ɣɛni ga Zɛbɛdi dui Jĩi é vɛɛ deɣei Jɔ̃ va te kẽegi zu ta te ɣeea Zɛ‐bɛdini. Te ɣɛni ta ƃeleitiɛ zu zɔlɔsu. Ziizɛ zɛba sa é te lili. 22Te ƃeni sa kẽegi ʋaa va ga maa ʋilea te te ɣeea yɛ ná te vile púlu.

Ziizɛ kala‐bo boni é Gala goo wo é numaa valo

23Ziizɛ leve‐teveni sa Geealali yui wɔlɔ‐kɔlɔ ma yíɛ numaitiɛ ɣala bo ta Ɣala‐feli wɔtaitiɛ wu yíɛ woo niinɛ vagɔi wo é vile Gala ta masadai va yíɛ seeƃɛ zii ɣaazɔ valo numaitiɛ ma yíɛ te lɔtɔ zu wodo. 24Na ma tɔ́wɔi ziɛni Siilia yui wɔlɔ‐kɔlɔ ma ɣaali. Na ɣa ɣɛɛ na te vaani pɔ́ ga seeƃɛ veaitiɛ ɣaazɔ é te valo. Natiɛ ta ga numaitiɛ seeƃe zii laali‐taaliga te ɣɛni te va taƃa yìɛ wo ga tiɛ. È ɣɛ velei niitiɛ te ɣɛni la gɔʋɛ yowũa te ɣɛni te wulu, ʋeli‐ʋeli kɛɛ vea, é vɛɛ zee‐za‐ma vea va ta kɔwɔ‐za‐ma vea. 25Tei sa na ɣɛɛni, kpɔ gwala wuloni Geealali, é wulo vɛ ligi zu ta na lili ga Dikapɔlɔ, é wulo Yɛlusulɛɛ ta Yudiiya yui, é wulo kɔnɔ ziɛ walai Jɔdɛ̃ wulu vele te pɛ te vile Ziizɛ wulu.

Currently Selected:

MAFIYU 4: DN1971

Highlight

Copy