MAFIYU 27

Te liini ga Ziizɛ Paila wɔ

1Tei gela boni, laa‐aale gwalaitiɛ ɣaazɔ vɛɛ zuu wũgitiɛ va te deʋeni ga te Ziizɛ vaa. 2Te gilini sa te lo túo te lii la te zée ia gɔmɛti nu walai Paila ya.

Dudia zaa ʋai

3Dudia nii é wuloni ga Ziizɛ wɔwɔ wulu wɔɔ, tei é ná vɛtɛni ga te faa vɛɛ bá ga woo, maa‐wõi looni má ná faa yowũi ʋaa ma é va wulu ga kani kpulu‐kpulu zee saagɔi laa‐ʋaale gwalaitiɛ wɔ ta zuu wũgitiɛ. 4É ɣɛni te ma, “Gè faa yowũ ɣɛɛ ga velei gè wuloa la ga nui nii wɔwɔ wulu wɔɔ ga te paa. Na ɣa ga nui nii kɛ́ɛ‐zɔ gɛ lɛ faa zu.” Natiɛ wɔ te ɣɛ ma, “Gá ʋaa zɛƃɛi é nà zu? Wɛlɛ máʋai zu va yà ƃɔɔ.” 5É zɛba sa é kani kpulu‐kpulugitiɛ wu ya Gala‐feli wɔta walai wu é ziɣi na é li é ƃɔɔ zɛlɛ. 6Kɛ̀ laa‐ʋaale gwalaitiɛ te kani kpulu‐kpulugi yɛvɛni te ɣɛ tea, “Ɛ́ lɛ tɔ su ga gé pu naʋolo wuu‐zu ɣɛɛ‐zuvɛ, toku ge zei ga tɔ ga ŋama naʋolo.” 7Na ma te zeini ma te zɛba te diɣi‐lo nui na kpalagi ɣeea la ga tiɛ wɛ̃ɛ loowu na. 8Na ma é ziɣi ƃɔɔ nà maziɛ su ma é loo zai ŋɛ ni ma, ta kpalagi na lilisu nɔ ga Ŋama Ƃalagi. 9Tɔwɔ nii Gala daa woo‐wo nui Jɛlɛmaiya boni tevea ɣa na é ɣɛ ma. Na ɣa ga tei é ɣɛni tea, “Te kani kpulu‐kpulu zee saagɔ ziɣini. Na ɣa ga nui nii te sɔ̃wɔ ƃala kuloa mázɔ̃wɔi nii Yezɔi nu zuwui taniga te sɔ̃wɔ ƃala kuloni. 10Te te ʋe sa ga diɣi‐lo nui na kpalagi zɔ̃wɔ, è ɣɛ velei nɔ de maliɣii deʋeni la é da zèea.”

Paila Ziizɛ ɣaa zaɣani

11Ziizɛ loni sa gɔmɛti nu walai laa wu. Gɔmɛti nu walai gaa zaɣa kɛɛni é ɣɛ ma,“? Yà ɣa è ga Dusiitiɛ ta masagi?” Ziizɛ ɣɛ ma, “Kavele ɣa na è boga.” 12Kɛ̀ tei laa‐ʋaale gwalaitiɛ ƃɔga zuu wũgitiɛ te ɣɛni kɛ́ɛ‐zɔ bosu, ɛ́ lɛ te woi ɣaa woteni. 13Paila ɣɛ sa ma,“? Ɛ̀ lɛ fai liigoi mɛnisu te bosu ga è la?” 14Kɛ̀ ɛ́ lɛ gói ɣaa woteni. Ɛ́ lɛ gilekpu kpalaa looni ga. Na ma gwala wuloni ga gɔmɛti nu walai.

É woni ga Ziizɛ za

15É ɣɛni ga gɔmɛti nu walai yaa ʋaa ga pilisinei kpɔgi ɔ́ wõi ɣɛ é ƃe ba te vɛ teve‐maazu wui zu. 16Tɔwɔ pilisine ta ɣɛni na kwɛ̃ɛgɛi nu pɛ bɛ ná tuo vele yowũi ʋaa zu dáa ga Ziizɛ Balaaba. 17Na ma tei te ɣaa lɛɛni ba, Paila ɣɛni te ma, “Ƃɛ ɣa wo wõini gè ƃe bá wiɛ, Ziizɛ Balaaba ƃaa Ziizɛi nii ta tili ga Kolai?” 18Ƃɔvɛlaale é ɣɛni ga kwɛ̃ɛga ga sili laa zɔ‐su ɣa te Ziizɛ yee laani la zéea. 19Na wuloa su, tei Paila ɣɛni zeini faa‐wo‐bo kpɔkpɔgi ɣa, ŋazai woo leveni pɔ́ vɛ yíɛ ɣɛ ma, “Mɛ lɛ faa nɛpɛ kɛ ga tele‐bo tuo‐wo nui na, toku ge zei ga gè laa nɔwɔ woni zaa máʋai zu sè‐suvɛ.” 20Tɔwɔ laa‐ʋaale gwalaitiɛ ƃɔga zuu wũgitiɛ te lɔɔni numaitiɛ wũ su ga te bo Paila ma é ƃe Balaaba va é Ziizɛ zu ƃɔnɔ wo. 21Gɔmɛti nu walai te ɣaa zaɣa kɛɛni wɔnɔ é ɣɛ te ma, “Ƃɛ ɣa wo wõini gè ƃe ba wo vɛ nu felegɔi niitiɛ zu?” Te ɣɛ tea, “Balaaba.” 22Paila ɣɛ te ma, “Zɛƃɛ mu ka sa gà kɛ ga Ziizɛi nii dáa ga Kolai?” Te pɛ te ɣɛ ma, “Pagɛ é ƃako pɛɛ‐pulu wulu likpii ma.” 23Paila ɣɛ te ma, “Zɛƃɛ ʋaa zu? Faa yowũ zɛƃɛ ɣa é kɛɛ?” Kɛ̀ te liini nɔ ga luo doba‐bogai zu tiɛ ɣɛ tea, “Pagɛ é ƃako gului ma.” 24Tei Paila wɛlɛni na va ga góo ta wolo ƃalaa lɛ ŋɛni lɔɔzu te va, kɛ̀ to mu zaɣa‐zaɣa faa lɔɔ ɣɛni zeizu, é ziɛ ziɣini é ya wuo kpɔgi ɣaazu yíɛ ɣɛ tea, “Màa wuovɛ zunui nii maŋamai ʋaa zu. A wɛlɛ máʋai zu va wa ƃɔɔ.” 25Numaitiɛ ɣaazɔ te gói ɣaa woteni te ɣɛ ma, “Ƃe ba máŋamai ʋaa ɣɛ ga gé vaa ʋaa gá gé lea!” 26Paila zɛba sa é ƃe Balaaba va te vɛ. Tei sa é kɛɛni te Ziizɛ ƃooʋe, é zée laani sa numaitiɛ ya ga te kpako gului ma.

Sɔdasiitiɛ te ŋɛɛ wuloni Ziizɛ zu

27Gɔmɛti nu walai na sɔdasiitiɛ te Ziizɛ ziɣini sa te lii la ná pɛlɛi wu, sɔdasi ƃulu kpakpa walai ɣaazɔ ɣaa lɛi ba dáa wu. 28Te maa ʋooni te seɣe ƃoei yogbo too kɔ́ba. 29Te zɛba te ŋai fɛlɛ ga masa bɔɔlɔ kavele te pɛɛ wũmɔ. Te tukpo la zée zagi ɣa. Tei sa te vileni ŋibia dáa wu, te ɣɛni ŋɛɛ wulozu su tiɛ ɣɛ ma, “È yĩsɛ‐o, Dusiitiɛ ta masagi!” 30Te laa lifeni ma te tukpogi ziɣi te dowa la wũgi va. 31Tei sa te ŋɛɛ wuloni su, te yogbo kpoeigi wuloni kɔ́ba te kpɔɔ zeɣei loo kɔba te li sa la ga te kpako gului ma.

Te Ziizɛ ƃakoni gului ma

32Te ɣɛi ma sa liizu, te wũ kuloni Saalĩi lai zu zunu ta ma dáa ga Saimɔ. Te Zunui nii zoni ga gaa‐ƃaa é pɛɛ‐pulu wulu likpii ziɣi Ziizɛ vɛ. 33Tei te ziitini ŋadɛi vɛ tɔ ná lili ga Gɔgata, nà wɔ su‐wulo‐zu ɣa ga wũ fooyo ŋada laavɛ, 34te ŋasa vai mayiɛi ta ʋeeni zéea ga é kpoale. Tɔwɔ supuai ɣɛ ga ŋɛni wãla‐wãla. Kɛ̀ tei é kɔ̃ɔni, ɛ́ lɛ ŋɛni kɛɛni ɔ́ kpoale. 35Tei te kpakoni gului ma, te ná seɣei ɣaa wɛɛni ɣii vɛ. Te nii ɣɛɛni ga kpɔzɔ‐loo vele ga te kwɛ̃ ga zɔi yá ziiti nu ma. 36Te zeini sa ga te maazu vɛtɛ na. 37Te ŋɛni ta wonɛni ga dá te pɛɛ wũ maazuvɛ. Mawoi ɣɛni ga “Ziizɛ ɣa, nii é ga Dusiitiɛ ta masagi.” 38Tɔwɔ te wũmɔ vea felegɔ vɛɛni bá ta tiɛni te te ƃako gului ma, gila ge ga zée za‐su vele, zɔi wɔ ge ga kɔ́wɔ yee su vele. 39Numai niitiɛ te ɣɛni levesu bá te ɣɛni ŋɛɛ wulozu sú tiɛ wũgi ɣɛ ma kpɔkɔ‐kpɔkɔ 40tiɛ ɣɛ ma, “Yài ɔ̀ zoo è Gala‐feli wɔta walai wolo è to folo saagɔ zu, ƃɔɔ valo na! Ani yà ɣa è ga Gala dui, wulo gului ma è vile.” 41Vele nɔ na wɔnɔ ƃalaa laa‐ʋaale gwalaitiɛ vɛɛ tɔ‐dɛɛ ɣala‐mɔitiɛ va ta zuu wũgitiɛ te ɣɛni ŋɛɛ wulozu la sú tiɛ ɣɛ tea, 42“É numai zɔitiɛ valoni, tɔwɔ ɛ́ lɛ zooga ɔ́ ƃɔɔ valo. Towa é ga Yezɔi masagi. Ƃe na ba é wulo gului ma é vile. Na ɣa ɣɛɛ na gá sa gá máʋaa ziɣi ga gaama. 43Dáavɛ ga Gala. Ƃe ba Gala ge kulo su ani kpalavɛ máʋaa ma. Toku ge zei ga é ɣɛni tea, ‘Nà ɣa gè ga Gala dui.’ ” 44Wũmɔ veaitiɛ te ƃakogɛi ɣɛ ta tiɛni natiɛ ƃalaa te ƃɔɛni nɔ ma ŋɛ na.

Ziizɛ zaa ʋai

45Tɔwɔ é ziɣi ƃɔɔ folo gaa‐lɔ‐ga ma é loo kpɔkɔ ʋolo ɣaa‐ƃaa‐ƃaa ma kpidi vɛɛni zui maazu. 46Tei sa é ɣɛni ga kpɔkɔ ʋolo ɣaa‐ƃaa‐ƃaa daa yɔɔzu, Ziizɛ lobani yíɛ ɣɛ tea, “Yiilai, Yiilai, lama sabatani?” Nà wɔ ka ga, “Nà Galagi, nà Galagi, zɛƃɛi é kɛɛ è yee wuloa màʋaa zu?” 47Taitiɛ te ɣɛni loni ná woba tei te nii mɛnini, te taniga te ɣɛni tea, “Zunui nii ɣa Yiilaija lilisu.” 48Te ɣila ge ƃizeni sa é su‐wuogi lɔ dɔɔ ƃoda‐ƃoda bu nà su laa ʋe é dɔ gului ɣa é fe zéea ga é kpoale. 49Kɛ̀ zɔitiɛ te ɣɛni ma, “Ná maa kpowũ de wɛlɛ na va ga ani Yiilaija ɣa va é balo.” 50Ziizɛ lobani wɔnɔ ƃɔɔ ga woo wala zɛ́ʋui wulo sa zéea. 51Tei na ɣɛɛni, Gala‐feli wɔta walai wu zeɣei velini su fele é ziɣi ƃɔɔ maazu é yii kɔwaavɛ. Zui ƃelini sa, kwɔtia tiɛ veli‐veli. 52Kabaitiɛ te laa laoni. Na ɣa ɣɛɛ na Gala na dɔ numaitiɛ te laa wɔlɔ yee ma te lamaa te mawomaitiɛ te wu ziɣini saa ya. 53Tei sa Ziizɛ wu ziɣini saa ya, te wuloni kaba yeɣeitiɛ zu te li taa wala maa wuai zu te wulo numaa lamaa ɣaazu. 54Sɔdasi wũ gila maazu nui ƃɔga taitiɛ te ɣɛni ba tiɛ Ziizɛ maazu vɛtɛ, tei te wɛlɛni zui va yiɛ ƃeli é vɛɛ fai zɔitiɛ va te ɣɛɛni, te laa ʋeni ga duo te ɣɛ tea, “Ƃɔɔƃɔɔ su nii ɣɛni ga Gala duu!” 55Ŋazaa lamagɛi ɣɛ ƃalaa na te ƃɔɔ woozala tiɛ wɛlɛ. Ta ɣa te vileni Ziizɛ wulu ta tiɛni te ziɣi Geealali tiɛ báa ʋaa ɣɛ. 56Meele Mɛdaliini, Jĩi ƃɔga Zoosɛ te lee Meele é vɛɛ Zɛbɛdi dea zinaitiɛ te lee va te ɣɛni ŋazai niitiɛ zaama.

Ziizɛ loowu fai

57Tei sa é ɣɛni ga kpɔkɔ, kpɛtɛ nu ta vaani é ga Alematia nu dáa ga Zoosɛ. É ɣɛni ga Ziizɛ na kala dopoi ta ƃalaa pɛ. 58É liini Paila wɔ é feli Ziizɛ mawomai ma. Paila wɔ ge bo ga te fe zéea. 59Zoosɛ é pomai ziɣini é maa ƃiti ga gbaza niinɛ é 60da kpɔɔ ɣaba yeɣɛ niinɛi zu nii teveai ɣɛ bɛ́ kwɔti va. É zɛba do sa é kwɔti ƃakpa ɣili‐kili é pɛɛ kaba yeɣei la é ziɣi na é li. 61Meele Mɛdaliini ƃɔga Meele zɔi te ɣɛni na zeini kabai la.

Kabai maa‐ƃɛɛ zɔdasiitiɛ

62Na wulu ʋoloi, na ɣa ga tei sa dɔwɔ walai wuloni ga, laa‐ʋaale gwalaitiɛ te vɛɛ Favilesiitiɛ va te ɣaa lɛɛni ba Paila yii la. 63Te ɣɛni ma, “Kèea, gé ɣi ka su ga nii ŋɛ ni é zɛɛ ʋaa laa‐zeigi zeiya ƃɔɔ va kɛ́i ma ʋulu‐ʋulu kɔwɔ ɣa, é ɣɛni tea, ‘Folo saagɔ ɣa wulo na su gà wu ziɣi saa ya.’ 64Na ma bo te kabai maazu vɛtɛ é yɛsu foloi sava kelei leve, ná kala dopoitiɛ te mɛ lɛ va liizu tɔ wũmɔ tɔ lii la tɔ ɣɛ numaitiɛ ma, ‘É wu ziɣia saa ya.’ Na ɣa ɣɛɛ na gaa‐wɔlɔ gaa‐ƃelagi ɣa yowũ é leve mamaa wũgi va.” 65Paila ɣɛ te ma, “A sɔdasia ziɣi. A li wo kɛ te ná maazu vɛtɛ ga velei ta zoo te kɛɛ la.” 66Te lii vele ɣa na é ɣɛ te kabai maa ƃɛ. Te nii ɣɛɛni ga velei te kɔlɔ wonɛni la te pɛɛ ba ga nu mɛ lɛ daa lao ta sɔdasiitiɛ te te zeini na ga te ná maa ƃɛ.

Currently Selected:

MAFIYU 27: DN1971

Highlight

Copy