MAFIYU 23

Ziizɛ tɛnɛ boni é vile tɔ‐dɛɛ ɣala‐mɔitiɛ va ta Favilesiitiɛ

1Tei sa na ɣɛɛni, Ziizɛ boni kpɔgi ma ta ná kala dopoitiɛ é ɣɛ te ma, 2“Tɔ‐dɛɛ ɣala‐mɔitiɛ ƃɔga Favilesiitiɛ ta zeini Mooze zei‐zuvɛ. 3Na ma nii nɛpɛ ta bo wo ma, a wiɛ kɛ. A wiɛ ziɛ ga te woi. Kɛ̀ ɛ́ lɛ ga niitiɛ ta ɣɛ te ɣɛɛzu wiɛ natiɛ ɣɛ. Toku ge zei ga ta Gala goi wo, kɛ̀ tɛ lɛ sú ʋai ɣɛɛ. 4Ta kasɔ vii‐vii gili é ga kasɔi siɣizu ƃai, tiɛ da numaa ɣala ga. Kɛ̀ tɛ lɛ yee ƃeɣa ƃalaa ʋowũga ba ta ziɣi ʋaa zu. 5Ta ɣɛɛ ʋai ƃɔgɔpɛ kɛ ga nu ƃuse wɛlɛ su va. Ƃɔvɛlaale ta ta lɔ kɔlɔi lɔɔ vɛbɛgitiɛ ɣaa ƃakpa te ta zeɣei laa yifegi wooza. 6Na ɣa ɣɛɛ na vɛ ná ga lɔwɔ‐ba vea zei‐zu kuu‐ɣaa‐zuvɛ minɛ ɣa te ná wõini. Te wõivɛ ga zei‐zuvɛ vɛ ná ɣaa wuai é leve baa pɛ ba Gala‐feli wɔtaitiɛ wu. 7Te wõini wũfe‐ma laali‐ma yíɛ wo ga tiɛ dɔwɔ ƃalagitiɛ ɣa. Na ɣa ɣɛɛ na numaitiɛ tiɛ te lili ga kala‐mɔɔ. 8Kɛ̀ wa dɛi, maa lɛ nɛɛni tɔ ɣɛ wo lilisu ga kala‐mɔɔ, ƃɔvɛlaale kala‐mɔɔ ɣila nɔ ɣa é wo ya. Na ɣa ɣɛɛ na wa nɔ ga ŋɛni ɣilekpu. 9A mɛ lɛ nu ta nɛpɛ tili ga wo ɣeea zui ɣa, ƃɔvɛlaale wo ɣeea ɣa nɔ ɣilekpu. Na ɣa ga nii é gee‐zuvɛ. 10Te mɛ lɛ ƃalaa wɔnɔ wo lili ga numaa wũda vea, ƃɔvɛlaale wo wũda nui ɣa nɔ ɣilekpu. Na ɣa ga nii Gala zee ƃakogɛi ba ga masa. 11Nui é ga nu walai é leve wo pɛ wo va towa é ga wa lii‐ɣee nui. 12Nui nɛpɛ yá ƃɔɔ ʋaa wɔɔlɔ, manui ɣa yii bu. Nui nɛpɛ ɛ́ lɛ ƃɔɔ ʋaa wɔɔlɔɔ, manui ɣa wɔɔlɔ.”

Ziizɛ ta laa‐nɛɛ‐wũ‐ba ʋai vɛɛni te va ga faa

13Ziizɛ ɣɛni tea, “Wai wo ga tɔ‐dɛɛ ɣala‐mɔitiɛ ƃɔga Favilesiitiɛ, wo ga daa‐nɛɛ‐wũ‐ba veaitiɛ, kpalo velivɛ wo ma! Ƃɔvɛlaale wa Gala ta masadai laa wulusu numaa luo. Wa ɣagi wɛ lɛ lɛɛ ná ɔ́ nɔ ɣɛ ga wo ʋa bu niitiɛ te wõini te lɛ na natiɛ te lɛ.

[ 14“Kpalo velivɛ wo ma, wai wo ga tɔ‐dɛɛ ɣala‐mɔitiɛ wa ƃɔga Favilesiitiɛ, wai ŋɛ ni wo laa nɛi wo wũ ba! Ƃɔvɛlaale pó ŋazaitiɛ zini gɛ lɛ te vɛ wa ta vɛlɛitiɛ ƃolosu te ya ga woia, wiɛ Gala feli ga sú woozaa ga ƃɔɔ‐lɛɛ vele wiɛ kɛ́ ga numaa te la ga wiɛ. Nà ma fai bɔɔlɔ kele ka yɛ wo ma.]

15“Kpalo velivɛ wiɛ, wai wo ga tɔ‐dɛɛ ɣala‐mɔitiɛ wa ƃɔga Favilesiitiɛ, wai ŋɛ ni wo laa nɛi wo wũ ba! Ƃɔvɛlaale wa leve‐tevesu yuwu ɣa wiɛ leve‐teve zui ɣa ga wo laa lo nɔ nu ɣila ba máa ʋeli. Manui ɣa vile na wa luoi wulu, wo kɛ ga wo ɣavele ga gili‐zu felegɔ. Na ɣa ga velei kuloai la bu wiɛ wa ɣagi ga wo li daa‐nɔwɔ‐wo ŋada laavɛ.

16“Kpalo velivɛ wo ma, wai ŋɛ ni wo ga gaazu‐wele vele‐wulo veaitiɛ! Wai wo ɣɛɛzu tea, ‘Ani nu ta nɛpɛ ka wona na Gala feli wɔta walai ma, ɛ́ lɛ ga faa nɛpɛ. Kɛ̀ ani nu ɣa wona na zɛnigi ma é Gala‐feli wɔta walai ʋaa ma, kɛni manui ɣa ziɛ ga ná kwonai laa woi.’ 17Wai ŋɛ ni wo litigɛi wo ɣaazu wuai, zɛbɛ ɣa é ga ŋɛni ɣaa wuai? ?Zɛnigi ve ƃaa Gala‐feli wɔta walai nii é zɛnigi ɣɛɛ ga ŋɛnii kuloai su leelaa Gala faa ma nà ve? 18Wa wɔnɔ ɣɛɛzu tea, ‘Ani nu ɣa wona na Gala zeke‐kɛɛ vanagi ma, nà lɛ ɣɛɛ ga faa ta nɛpɛ. Kɛ̀ ani nu ɣa wona na faa‐nɛi ma é Gala zeke‐kɛɛ vanagi ɣa, kɛni manui ɣa ná kwonai zu ʋai ɣɛ.” 19Wai ŋɛ ni wo ɣaazu wuai, zɛbɛ ɣa é ga ŋɛni ɣaa wuai? ?Faa‐nɛi ve ƃaa ŋɛnii nii é faa‐nɛi ɣɛɛ ga ŋɛnii kuloai su leelaa Gala faa ma? 20Na ma nui yá wona Gala zeke‐kɛɛ vanagi ma towaa wona ma é wona wɔnɔ pɛ ŋɛnii ma é gá. 21Nui wɔgi yá wona Gala‐feli wɔta walai ma, manui ɣa wona ma é wona Galagi nii ma ná ga kɛɛzuvɛ. 22Nui wɔnɔ yá wona gee wɔlɔgi ma manui wona ɣa na Gala na masa kpɔkpɔgi ma é wona nii ma é zeini masa kpɔkpɔgi ƃɔɔ ɣa.

23“Kpalo velivɛ wo ma, wai wo ga tɔ‐dɛɛ ɣala‐mɔitiɛ wa ƃɔga Favilesiitiɛ, wai ŋɛ ni wo laa nɛi wo wũ ba! Ƃɔvɛlaale wa gulu‐wuluga ɣaa wɛɛ su puu wiɛ sei‐zu ɣile‐gile fe Gala bɛ ga faa‐nɛɛ. Niitiɛ wɔgi te ga faa ɣaa wua Gala na tɔgi ʋaa va, wo laa wuloa te ɣɛɛ ʋaa zu. Natiɛ ta ga tele‐bo, gaazu‐maa‐wõi‐ɣaa‐woga é vɛɛ nu ɣɛɛ va ga nui nu laa la. Maa nɛi ɣɛ wo fai niitiɛ ɣɛ. Fai zɔitiɛ wo te ɣɛɛzu nà lɛ ƃega te ɣɛɛ ʋaa ziɣi ma. 24Wai ŋɛ ni wo ga gaazu‐wele vele‐wulo vea, wa gove ŋɛni vɛlɛ‐vɛlɛ kulo wo ƃoale ŋɛni ɣa, wa wɔ wiɛ soo ƃoale!

25“Kpalo velivɛ wo ma, wai wo ga tɔ‐dɛɛ ɣala‐mɔitiɛ wa ƃɔga Favilesiitiɛ, wai ŋɛ ni wo ga daa‐nɛɛ‐wũ‐ba veaitiɛ! Ƃɔvɛlaale wa kɔpui wulu vele maa ziɣi é vɛɛ peletei wuluvɛ vele va. Te zuvɛ vele wɔ daa ʋegɛi wo ya ga woia‐ŋɛni‐zɔlɔ‐woga ta ŋɛni‐wòi‐kulo yii‐ma‐ɣɛɛ‐woga. 26Favilesiitiɛ, wai ŋɛ ni wo ɣaazu wuai, a kɔpui zuvɛ vele maa ziɣi dɛ ɣaʋu pa, kɛɛ ʋaa ma puluvɛ vele ƃalaa maa ziɣi.

27“Kpalo velivɛ wo ma, wai wo ga tɔ‐dɛɛ ɣala‐mɔitiɛ wa ƃɔga Favilesiitiɛ, wai ŋɛ ni wo ga daa‐nɛɛ‐wũ‐ba vea! Toku ge zei ga wo maʋaa wulovɛ è ɣɛ kabaitiɛ te wobegɛi. Natiɛ wɔ ka podo ɣala‐kala‐ga vele vagɛi te maʋaa va, te zuvɛ vele wɔ daa ʋegɛi ga nu ɣai é vɛɛ maa‐yɛ̃ɛlɛ ŋɛnii zɔitiɛ va. 28Vele nɔ na ƃalaa wo la ga tele‐bo tuo‐wo bea podo ɣala‐kala‐ga vele, tɔwɔ wo yii zu vele laa ʋegɛi ga daa‐nɛɛ‐wũ‐ba luo ta tuƃo vele yowũ.”

Ziizɛ ta lɔ‐kpɛ‐ma ʋai yɛni na luo é bo

29Ziizɛ ɣɛni wɔnɔ tea, “Kpalo velivɛ wo ma, wai wo ga tɔ‐dɛɛ ɣala‐mɔitiɛ wa ƃɔga Favilesiitiɛ, wai ŋɛ ni wo ga daa‐nɛɛ‐wũ‐ba vea! Toku ge zei ga wa ŋɛni lo Gala daa woo‐wo beaitiɛ te maɣabaitiɛ maazu wo tele‐bo tuo‐wo beaitiɛ ta dɛi ƃɛtɛ ga é va. 30Wa na ɣɛɛ na wa ɣɛ tea, ‘È ɣɛ gé ɣɛni ŋetea, gɛ́ lɛ ƃega vɛɛ gé mama gwɔlɔni ba gá tiɛni gɔ́ Gala daa woo‐wo beaitiɛ wũ daa vili.’ 31Nà mavele ma wa seele woo ʋeezu ƃɔɔ ʋaa ma ga yowũa. Na ɣa ga velei wo bosu la ga numaitiɛ te Gala daa woo‐wo beaitiɛ vaani, wa ga natiɛ te lea. 32Vɛ mu wo mama gwɔlɔni te yee wɛ̃ɛga na, a ná mata laa wulo. 33Wai ŋɛ ni wo ga kaalia, wo ga kaaliitiɛ te lea, wa leve ɣɛ le wo wulo faa‐vɛɛ ʋai zu wo va ga wo li daa‐nɔwɔ‐wo ŋada laavɛ? 34Na ma gà Gala daa woo‐wo bea leve wo wɔ vɛ é vɛɛ kele‐ɣele bea va ta tɔ‐dɛɛ ɣala‐mɔa. Wa wɔ wa taniga vaa wo taniga ƃako gulu ma. Na ɣa ɣɛɛ na wa taniga ƃooʋe wa Ɣala‐feli wɔtaitiɛ wu. Wa te ƃɔɔla nà laa zu wo li na wulu lai zu wo te ƃɔɔla na. 35Nà ɣa ɣɛ kɛɛ ʋaa ma tele‐bo tuo‐wo beaitiɛ nɛpɛ te wũ daa viliga zui ɣa te maʋai yɛ wo wũmɔ. Na ɣa ga é ziɣi ƃɔɔ Eebɔ nii ma kɛɛ‐zɔ yowũ lɛ ŋɛni faa zu é loo Zɛkɛlɔiya nii ma é ɣɛni ga Balakaiya dui, nii wo paani Gala zeke‐kɛɛ vanagi ƃɔga Gala‐feli wɔtai te yɔɔzuvɛ. 36Gè bo wiɛ ga gaama, fai nii ɣaazɔ ɣa yɛ zei‐zaa nu ƃusei niitiɛ wũmɔ.”

Ziizɛ na wõilai Yɛlusulɛɛ lai ʋaa ma

37Ziizɛ ɣɛni tea, “Ee Yɛlusulɛɛ lai, Yɛlusulɛɛ lai, yài è Gala daa woo‐wo beaitiɛ vaazu, niitiɛ te levegɛi è wɔ yìɛ te vaa ga te zɔɔ ga kwɔti, siɛ tamaa zu gɔ̀ wõi ɣɛ gè è zu veaitiɛ ɣaa lɛ ba è ɣɛ duu dee lɛɛ ɣa dea ɣaa lɛ ba wove bu, tɔwɔ tɛ lɛ ƃega kɛ! 38Tɔwɔ dàa wulovɛ sa yà vɛlɛi ʋaa zu ga é yɛ ga mayãka. 39Gè bo yiɛ, ɛ̀ lɛ sa pɛ̀tɛga wɔnɔ é yɛsu sa yìɛ bo yìɛ ɣɛ tea, ‘Tuuyiɛ ɣa nui nii ma é vaazu de maliɣii Gala na daa‐zeigi zu.’ ”

Currently Selected:

MAFIYU 23: DN1971

Highlight

Copy