TE ƔƐƐ VAITIƐ 8

1Na ɣa ɣɛɛ na Sɔɔ yii‐ma ɣɛni ga paa ʋai.

Sɔɔ ɣa Gala pɛlɛi ƃɔɔlasu

Na maʋoloi ɣa Gala pɛlɛi‐ƃɔɔla fai wu ziɣini la ga kpakpaa Yɛlusulɛɛ. Na ɣa ɣɛɛ na é wulo Ziizɛ na keelaitiɛ wulu, Gala pɛlɛi wu vea ɣaazɔ te yɛzɛni Yudiiya ligi zu wɔlɔ‐kɔlɔ ma ɣaali ta Sameelia. 2Zinaitiɛ te zɔƃɛlɛ ɣɛni Gala fai zu te Setiifɛ̃ loowuni te maƃee loo ga kavele teegɔ. 3Kɛ̀ Sɔɔ ɣɛni Gala pɛlɛi ŋala‐ŋalasu. Ɔ́ lɔ pɛlɛ ɣile‐giledai wu yíɛ zinaa mai ta ŋazaa yíɛ te wu kpidi vɛlɛ wu.

Goo vagɔi wogɛ Sameelia

4Tɔwɔ niitiɛ te yɛzɛgɛi ɣɛ te vileni ga Gala goi woga. 5Fele liini Sameelia lai ta zu é Kolai maʋai wo na tiɛ ga woo maa zeezea. 6Kpɔ gwalai woi ɣɛni su ɣile te wui lo nii ma Fele boni, tei te goi mɛnini te wɛlɛ wɔnɔ faitiɛ va é te ɣɛɛni é dɛ ga seele. 7Ƃɔvɛlaale gɔʋɛ yowũa te ziɣini nu lamaa wulu niitiɛ te ɣɛ te wulu, gɔʋɛ yowũitiɛ ƃɔɔ tiɛ loba ga ʋike. Na ɣa ɣɛɛ na niitiɛ te mɛlɛ‐ŋɛlɛgɛi ɣɛ ɔɔ te wɔwɔ zai tiɛ te lamaa te valoni. 8Na ma kuu‐zu‐nɛɛ ƃakpa ɣɛni tai na zu.

9Kɛ̀ zunu ɣila ge ɣɛni na daa ga Saimɔ é ɣaʋuni dɛ pa yíɛ pote kɛ tai zu. Maʋai é Sameelia yui ɣaazu laa ʋeni yíɛ bo tɔ ƃɔɔ ga é ɣɛni ga nu ɣaa‐wua ta. 10Te pɛ te wui toni goo ma é ziɣi ƃɔɔ to‐su‐vala‐bɛ vea ma é loo to‐su‐ba vea ma tiɛ ɣɛ tea, “Zunui nii ɣa é ga gaa‐ƃai na é Gala zéea daa ga gaa‐ƃaa walai.” 11Te wui toni goo ma, ƃɔvɛlaale é te ɣaazu laa ʋeni ga potegi ga su woozaa. 12Kɛ̀ tei te Fele nii woi ziɣini ga gaama é woo vagɔi woni é vile Gala na masadai va ta Ziizɛ Kolai na daa‐zeigi, te bataize ɣɛɛni ga tiɛ, na ɣa ga zinaa vɛɛ ŋazaa va. 13Saimɔ tɔ ɣagi siɣini ga gaama. Tei sa ná bataize‐ɣɛɛ ʋai wuloni ba, é wũ kpadoni ɣɛɛ ʋai va Fele va. Faitiɛ é te vɛtɛni tiɛ ɣɛ ga seelea é vɛɛ pote kpaazagitiɛ va te ɣɛɛni, te gaazu laa ʋeni.

14Tei Ziizɛ na keelaitiɛ te ɣɛ Yɛlusulɛɛ te mɛnini ga Sameelia yui yee zeini Gala goi wu, te Pite leveni ta Jɔ̃ te wɔ vɛ. 15Niitiɛ te vaani te Gala feli te ʋaa ma ga te Gala baa ŋinɛgi yee maa zɔlɔ wo. 16Ƃɔvɛlaale ɛ́ lɛ ŋɛni dɛ vaani te ta nɛpɛ pɔ. Kɛ̀ te bataize ɣɛɛni dɛ nɔ ga tiɛ de maliɣii Ziizɛ na daa‐zeigi zu. 17Pite ƃɔga Jɔ̃ te yee vɛɛ sa te wũmɔ te Gala baa ŋinɛgi yee maa zɔlɔ wo.

18Tei Saimɔ wɛlɛni na va ga Gala baa ŋinɛgi yee maa ɔ́ zɔlɔ wo Ziizɛ na keelaitiɛ ta yee‐vɛɛ‐nu‐wũmɔi zaala zu, é wuloni ga naʋolo 19é ɣɛ te ma, “Nà ƃalaa a gaa‐ƃai nii ʋe zèea, kɛɛ ʋaa ma nui nɛpɛgi gà yee vɛɛ wũmɔ é Gala baa ŋinɛgi yee maa zɔlɔ wo.” 20Kɛ̀ Pite ɣɛni ma, “È vɛɛ yà ɣanigi va wo zu ɣa ŋala‐ŋala, ƃɔvɛlaale kɛɛvɛ è ɣigi zu ga yà zoo è Gala na faa‐nɛi nii maa zɔlɔ wo ga naʋolo! 21È wɔɔ laa lɛ fai nii va. Yà dɔ lɛ su. Ƃɔvɛlaale yà ɣi‐gaa‐ziɛi lɛ ga gaama Gala gaazu. 22Wulu ɣaa ʋe è luo vele yowũ‐yowũgi nii va è de maliɣii ʋeli, kɛɛ ʋaa ma ani yá zolowo na é è wuu zu ʋai nii zu ʋaa yɛ yìɛ. 23Ƃɔvɛlaale è maʋai gè pɛtɛga kulovɛ è ɣɛ nu ɣa ŋɛni mawãla wɔ̃ɔ, è ɣiliai wɔnɔ faa yowũ va.” 24Saimɔ gaa wote é ɣɛ tea, “A de maliɣii ʋeli màʋaa ma, kɛɛ ʋaa ma nii nɛpɛgi wo boga é ʋoolo bà.”

25Tei sa te seele woo ʋeeni te de maliɣii woi wo, te galeni ma tiɛ li wulu Yɛlusulɛɛ tiɛ woo vagɔi wo Sameeliaitiɛ ta lai lamaa zu.

Fele ƃɔga Iitiopia wɔmɛti lii‐ɣɛɛ nu walai

26Kɛ̀ Gala ta ɣeelai nii kuloai de maliɣii wɔ vɛ é ɣɛni Fele ma, “Wu ziɣi è li ga nu wɔwɔ yee‐su vele foloi ʋaa va pelei nii zu é ziɣizu Yɛlusulɛɛ é li Geeza.” Nii ɣa ga zuu ʋɔɔ maa vele. 27Bu‐ziɣi vele ɣa na é li. Nù wɔgi te kɛɛzu, Iitiopia zunu ɣila ge ɣɛni na ga Iitiopia ŋaza nu masa gwalai na daa ga Kãdee na tii‐ɣɛɛ nu walai. Towaa é ɣɛni ga ná sei‐kobai nii kwéligi ɣaazɔ ʋaa laa lɔgɛi ɣɛ ba. Zunui nii vaani ga é Gala feli Yɛlusulɛɛ. 28É ɣɛni sa liizu wulu. É ɣɛni zeini kai nii zu ta daa lɔ soo va yíɛ lii la yíɛ Gala daa woo‐wo nui Aizeea na kɔlɔi lodo. 29Gala baa ŋinɛgi ɣɛ Fele ma, “Li è vile kai nii ma.” 30Fele ƃize vele ɣa na é ɣɛ é li zunui wɔ vɛ. É nà woo mɛni yíɛ Gala daa woo‐wo nui Aizeea na kɔlɔi lodo. É gaa‐zaɣa kɛɛni é ɣɛ ma, “?Yà nii ɣaa ɣaazu è dodosu?” 31Nà ɣɛ ma, “Gà leve ɣɛ le gè na ɣɛ, kɛni nu ta ɣa dɛ gàazu?” É Fele lili sa ga nà vili su é zei koba. 32Tɔwɔ nii wɔgi é ɣɛni dodosu Gala kɔlɔi ʋaa va, towaa—

“Te liini la ga te paa è ɣɛ baala. È ɣɛ velei nɔ baala

zuwu maazu ɣa ɣɛɛ la ƃu maa‐leɣa‐leve nu laa wu,

vele nɔ na dáa ɣa wulu da.

33Pɛnɛ velei zu te vɛ te ná goo gaama ʋai zakpeni zéea.

Ƃɛ ɣa yá zoo é mazuwui maʋaa zu wulo? Ƃɔvɛlaale

zɛʋui wulovɛ sa zéea.”

34Tii‐ɣɛɛ nu walai ɣɛ Fele ma, “È veevɛ bo mà. ?Gala daa woo‐wo nui ɣa fai nii wosu é vile ƃɔɔ va ƃaa tɔ bosu é vile nu ƃɔnɔ ba?” 35Fele ƃɔɛ lɔɔ zei sa ga woo vagɔi woga é vile Ziizɛ va. É tɔɔ zeini Gala kɔlɔi zu woi nii va. 36Tei te ɣɛni pelei ma tiɛ li, te ziitini ziɛ ta ma. Tii‐ɣɛɛ nu walai ɣɛ tea, “Wɛlɛ, ziɛ ɣa! Zɛƃɛi sa yá bataize‐ɣɛɛ ʋai ziɣi ma gàazu?” [ 37Fele ɣɛ má, “Ani síɣivɛ yìɛ ga gaama ga yii ɣaazɔ, towaa ɣɛ ga yìɛ.” É gáa woteni é ɣɛ tea, “Síɣivɛ bɛ̀ ga gaama ga Ziizɛ Kolai ɣa ga Gala dui.”] 38É boni ga te kai lo. Te felegɔ te vile sa ziɛi wu, na ɣa ga Fele ƃɔga tii‐ɣɛɛ nu walai. Fele zɛba do é bataize ɣɛɛ la. 39Tei sa te wuloni ziɛi wu te lɛ, de maliɣii vaa ŋinɛgi Fele ziɣini é lii la. Tii‐ɣɛɛ nu walai lɛ sa wɔnɔ pɛtɛni. É li sa ga lii‐zu vele yíɛ wuu zu nɛɛ. 40Kɛ̀ te Fele vɛtɛni Azoota lai zu. É ɣɛni levesu yíɛ woo vagɔi wo tai ɣaazɔ zu é yesu é va Sɛsɔluiya lai zu.

Currently Selected:

TE ƔƐƐ VAITIƐ 8: DN1971

Highlight

Copy