TE ƔƐƐ VAITIƐ 4

Pite ƃɔga Jɔ̃ ta faa‐wo‐bo kpɔgi laa wu

1Tei te ɣɛni ƃɔɛzu numaitiɛ wɔ, laa‐ʋaalegitiɛ ƃɔga Gala‐feli wɔta walai maa‐ƃɛɛ veaitiɛ te wũ‐tuo nui é vɛɛ sa Sadusiitiɛ va te lɛɛni ga tiɛ ɣili‐ɣili. 2Wãlagɛi ɣɛ tiɛ ƃɔvɛlaale te ɣɛni numaitiɛ yala bosu tiɛ kɔnɔ nu wu‐ziɣi ʋaa wo saa ya ga woo maa zeezea Ziizɛ wu‐ziɣi ʋai ma saa ya. 3Te te zoni te te vili kpidi vɛlɛ wu ga te yɛ na gela bo, ƃɔvɛlaale é ɣɛni ʋɔlɔ sa ga kpɔkɔ. 4Kɛ̀ taitiɛ te woi mɛnini te bɔɔlɔ‐zu te siɣini ga gaama. Na ɣa ɣɛɛ na te mazinaitiɛ tɔ zoo te ziiti wulu dooluo zu.

5Tei sa gela boni, te maazu veaitiɛ ƃɔga nuwutiitiɛ é vɛɛ sa wuigitiɛ va te ɣaa lɛi ɣɛ ba Yɛlusulɛɛ. 6Eena, nui é ɣɛni ga laa‐ʋaale gwalai, Keeafa, Jɔ̃, Alezãda é vɛɛ sa laa‐ʋaale gwalai na kaalai ɣaazɔ va ta ɣa te ɣɛni na. 7Tei te vaani ga tiɛ kpɔgi zaama, te te ɣaa‐zaɣa kɛɛni te ɣɛ te ma, “Gaa‐ƃaa zɛƃɛ zu ve, ƃaa daa‐zeigi zɛƃɛ zu ɣa wo nii ɣɛɛni na?” 8Na ɣɛɛzu Pite nii zii laa ʋegɛi ɣɛ Gala baa ŋinɛgi vɛ é ɣɛ te ma, “?Wai wo ga numaitiɛ maazu veaitiɛ é vɛɛ nuwutiitiɛ va, 9wa gé ɣaa‐zaɣa kɛɛzu za é vile faa vagɔi nii va kɛ́i ga mɛlɛ‐ŋɛlɛ nui? —pele zɛƃɛi zunui nii valoa la? 10Ka dɔɔ kɛ mu a nii wɛ̃ɛ wo ɣaazɔ é vɛɛ Yezɔitiɛ ɣaazɔ va, ga Nazɔi nui Ziizɛ Kolai na daa‐zeigi zu ɣa zunui nii valoa na é loni wo laa wu. Ziizɛi nii ɣa wo kpakoni pɛɛ‐pulu wulu likpii ma é ga nui Gala ge bu ziɣini saa ya. 11Nii ɣa é ga kwɔtii wo ɣɛlɛɛ ba, wai wo ga pɛlɛ‐lo beaitiɛ, tɔ wɔ ka é ɣɛɛ sa ga kwɔtii maʋaa wɔɔlɔɔ baa pɛ ba. 12Tɔwɔ balolai lɛ zɔlɔ woga nu taƃɔnɔ saala zu, ƃɔvɛlaale daa‐zei taƃɔnɔ nɛpɛ gɛ lɛ dɛ zɔlɔ woni nu ƃusea zaama gee wɔlɔgi wu nii pagɛi a de valo saala zu ƃɔɔ ti.” 13Tei te wɛlɛni Pite na duo lalai va ta Jɔ̃ te ná vɛtɛ wɔnɔ ga tɛ lɛ ŋɛni kɔlɔ wɛ̃ni, tɔwɔ te lo‐su lɛ ŋɛni ma leelaa, ki‐gaa‐zie vilini tiɛ. Te gaa ɣa sa ga te ɣɛni Ziizɛ va. 14Kɛ̀ tei tɔwɔ te ɣɛ wɛlɛzu zunui va baloai é loni te woba, faa ta nɛpɛ gɛ lɛ ŋɛni te la tɔ maʋai maa wulo la. 15Kɛ̀ tei sa te boni te ma ga te wulo faa‐wo‐bo kpɔgi zu, numaitiɛ te wũ‐pile boni 16tiɛ ɣɛ tea, “Aƃɛ ɣa sa a da kɛ ga zinai niitiɛ? Ƃɔvɛlaale faa maa‐wɔlɔ‐wɔlɔ kɛɛ ʋai te zaala zu nii é ga seele, gaa wodovɛ Yɛlusu‐lɛɛ vea ƃɔgɔpɛ gaazu. Da wɔ dɛ lɛ zooga dɔ maʋai zakpe. 17Kɛ̀ nii yá kɛ fai nii mawoo lɛ zia numaitiɛ zaama ɔ́ leve vɛ va tɔ ga a de ƃaa zaɣa te ma ga te mɛ lɛ sa ƃɔɛ nu ta nɛpɛ pɔ daa‐zeigi nii zu.” 18Na ʋaa ma te te lilini te bo tiɛ ga te mɛ lɛ sa faa ta wo ɔɔ kala‐bo ta nɛpɛ bo Ziizɛ na daa‐zeigi zu. 19Kɛ̀ Pite ƃɔga Jɔ̃ te te woi ɣaa woteni te ɣɛ te ma, “Ani tɔ ga gaama Gala gaazu ga wa ɣa pagɛi nu wui lo wo woo ma Gala taale, wa ƃɔɔ nɔ ɣa wa na ɣaa leve. 20Ƃɔvɛlaale nii gé pɛtɛga ta nii gé mɛniga, kɛtei nɔ gé bo.” 21Tei sa wɔnɔ te ƃaa zaɣani tiɛ, te ƃeni te va te li. Tɛ lɛ pele zɔlɔ woni ga te te laa nɔwɔ wo da numaitiɛ zaƃu ma. Ƃɔvɛlaale nui ɣaazɔ Gala daa maa lɛɛni fai nii ma é ɣɛɛni. 22Ƃɔvɛlaale zunui nii baloi woni la é dɛ ga seele, kaa wenagi levegɛi sa ɣɛ kwena zee naagɔ va.

Ziizɛ wulu veaitiɛ ta Gala felizu duo lala ʋaa ma

23Tei sa te ƃeni tiɛ, te liini te vaitiɛ wɔ vɛ te fai nii la te vɛ laa‐ʋaale gwalaitiɛ ƃɔga nuwutiitiɛ te boni te ma. 24Tei te nii mɛnini te ƃɔni te woi lɛ gee zu Gala pɔ vɛ te ɣɛ tea, “Gá nu keea nu, yài è gee ƃɛtɛni ta zui é vɛɛ yuwu va ta te zu ŋɛni ɣaazɔ, 25yài é wuloni yà lii‐ɣɛɛ nui gé ɣeea Deeve la yíɛ bo ga è woi è vaa ŋinɛgi zaala zu yíɛ ɣɛ tea,

‘Zɛƃɛi é kɛɛni zii ƃalaaga tiɛ woei leve, na ɣa ɣɛɛ na numaa tiɛ ɣi gaa ziɛ faa yãka ma?

26Zui zu masagitiɛ te kɔɔ ƃɛtɛni, numaitiɛ maazu veaitiɛ ɣaa

lɛi ba

ga te wɔ è wɔ, yài è ga gé maliɣii, ta nui è yee ƃakoga ba ga masagi.’

27Ƃɔvɛlaale te ɣaa lɛɛni ba tai nii zu ga ƃɔɔƃɔɔ su ga te wɔ Ziizɛi nii wɔ kuloai su ga tee ga yà lii‐ɣɛɛ nu, nii è yee ƃakoga ba ga masagi. Natiɛ ta ga Yɛloo ƃɔga Pãtia Paila é vɛɛ sa zii ƃalaagitiɛ va ta Yezɔi veaitiɛ. 28Te ɣaa lɛɛni ba ga nii nɛpɛgi è yee viliga su è deʋe ga é leve ma ga ná yee luo vele, te kɛ. 29-30Na ʋaa ma, gé maliɣii, yà yee zakpa na ga è nu valo, faani tiɛ ɣɛ ga seele, faa maa‐wɔlɔ‐wɔlɔga tiɛ ɣɛ Ziizɛi nii na daa‐zeigi zu kuloai su ga tee ga yà lii‐ɣɛɛ nui, wɛlɛ ƃalaa pɛ velei va te ƃaa zaɣasu la gíɛ è ʋa bu gái gé ga yà lii‐ɣɛɛ veaitiɛ gé è woi wo duo ʋaa ta nɛpɛ ge mɛ lɛ ɣɛ ba.” 31Tei sa te Gala felini, vɛ te ɣaa lɛi ɣɛ ba na ná ƃelini. Na ɣa ɣɛɛ na Gala baa ŋinɛgi te pɛ te yii laa ʋeni te Gala goi wo sa ga duo lala vele.

Ŋɛnii ɣaazɔ ɣa su ɣile te ya

32Nu ƃɔgi niitiɛ te Ziizɛ ʋaa ziɣini ga gaama, te woo lai ɣɛ ma te ɣigi ɣile. Nu ta lɛ ŋɛni tea ŋɛnii nɛpɛgi é sɔlɔ woga tɔ ga pó, kɛ̀ ŋɛnii ɣaazɔ ɣɛni te ya su ɣilekpu. 33Na ɣa ɣɛɛ na Ziizɛ na keelaitiɛ te seele woo ʋeeni ga gaa‐ƃaa wala de maliɣii Ziizɛ wu‐ziɣi ʋai ma saa ya. Baa ƃakpa laani sa te ɣaazɔ ma. 34Nu ta nɛpɛ gɛ lɛ ŋɛni na ɔ́ ƃala te zaama, ƃɔvɛlaale niitiɛ nɛpɛ tɔ ɣɛ ga zuu ɔɔ pɛlɛ keea vea tɔ te zɔ̃wɔ wulo. Nii tɔ sɔ̃wɔ wulo tɔ va ga mazɔ̃wɔi 35te pu Ziizɛ na keelaitiɛ ɣakala. Na ɣa ɣɛɛ na tɔ gaa wɛɛ te ɣile‐giledai vɛ ga velei nɔ maƃala ɔ́ ɣɛ la te ma. 36Nii mavele ma Zoosɛ nii Ziizɛ na keelaitiɛ te daa‐zei kpɔnɔ seini ba ga Banaba (nii zu‐wulo‐zu ɣa ga nu yii‐lɔɔ zunu lui), nii é ɣɛ ga Liiʋai ta é wɔnɔ ga taa‐zei Saipɔlɔ yui ʋaa ma, 37é zuu ta zɔ̃wɔ wuloni nii é ɣɛ ga pó é va ga manaʋoloi é pu Ziizɛ na keelaitiɛ ɣakala.

Currently Selected:

TE ƔƐƐ VAITIƐ 4: DN1971

Highlight

Copy