TE ƔƐƐ VAITIƐ 10

Pite ƃɔga Kɔniilia

1Zunu ɣila ge ɣɛni Sɛsɔluiya daa ga Kɔniilia é sɔdasi wũ gila maazu sɔdasi ƃulugi nii zu daa ga Etali zɔdasi ƃulugi. 2É ɣɛni ga zunui sɔƃɛlɛ Gala fai zu yíɛ luo ba é vɛɛ pɔ pɛlɛ wu vea va. É ɣɛni ga nui ta é ga nu bɔɔ nu numaa ʋaa ma. Na ɣa ɣɛɛ na ɔ́ Gala feli ga ɣee nɛpɛ. 3Kpɔkɔ ʋolo ɣaa ƃaa‐ƃaa daa yɔɔzu foloi ʋaa va ná wuuni gaazu ga gaa wodoa Gala na keelai yíɛ va pɔ́ vɛ vele yíɛ ɣɛ ma, “Kɔniilia.” 4É ɣaazu ƃako ba duo ƃakpa maazu é ɣɛ tea, “Aƃɛ ve, màliɣii?” Nà ɣɛ ma, “Yà Ɣala‐feliai ƃɔga yà ʋaa‐nɛɛ‐ɣɛɛ te lɛɛ Gala ta, na ɣa ɣɛɛ na ná ɣa Gala kuu zu. 5Na ma zinaa leve na Japa te va ga Saimɔ nii daa ga Pite. 6Daa‐zu vɛɛvɛ Saimɔ wɔ vɛ, kɔlɔ‐vaa nui nii ná pɛlɛi yuwu wukũigi va.” 7Tei Gala ta ɣeelai nii é ƃɔɛni pɔ́ é ziɣini na, é ná tii‐ɣɛɛ veaitiɛ felegɔ lilini é vɛɛ sɔdasi gila ba nii sɔƃɛlɛ ɣɛni Gala faa zu niitiɛ zaama te ɣɛni ba. 8Tei sa é fai ɣaazɔ zu wuloni te ma, é te leveni Japa.

9Tei te ɣɛni ta ziɛi ma na wulu ʋoloi tiɛ lɔtɔ tai va, Pite lɛɛni pɛlɛ wɔma ga é Gala feli ga folo gaa‐lɔ‐ga. 10Pulu soni, ŋɛni ta mii‐wõi so. Kɛ̀ tei sa te ɣɛni daa‐mii ŋɛni ɣavele ƃɛtɛzu, maʋaa wuloni sa è ɣɛ ɔ́ ɣɛ zesu. 11É wɛlɛni gee wɔlɔgi va daa laogɛi, ŋɛni ta yíɛ yii zui ma è ɣɛ seɣe wele kpakpa sogɛi gui laa zei‐zu naagɔi va. 12Kpeɣa zuoi mazii ɣaazɔ é ŋetea é vɛɛ kpokpo suoi mazii ɣaazɔ va ta wɛ̃niitiɛ te ɣɛni su. 13Woo ta ziitini ma yíɛ ɣɛ tea, “Wu ziɣi, Pite. Paa è mi.” 14Kɛ̀ Pite ɣɛ tea, “Nà lɛ zolowoga, màliɣii, ƃɔvɛlaale gɛ̀ dɛ wɔlɔ‐wɔlɔ ŋɛni ta miini nii ƃaa lɛ ma ɔɔ nii maa lɛ ziɣini.” 15Woi ziiti wɔnɔ ma na wului yíɛ ɣɛ tea, “Nii Gala ge maa ziɣia mɛ lɛ wɔlɔ‐wɔlɔ tili ga ŋɛnii ƃaa lɛ ma.” 16Nii ɣɛɛni ná zei‐zu ɣɛ sava. Na ɣa ɣɛɛ na ŋɛnii nii lɛɛni gee‐zuvɛ ga maa ʋilea.

17Pite ɣigi zu ɣɛni dɛ nɔ yɔʋɔ ɣíɛ yi gaa ziɛ ga nii ɔ́ ɣɛ ga fai nii zu‐wulo‐zuvɛ é wuuni gaazu. Nu wɔgi te kɛɛzu zinai natiɛ Kɔniilia te leveni, tei sa te Saimɔ na pɛlɛi maɣaa‐zaɣa‐kɛɛ woni, te loni daavɛ. 18Te tili bo te gaa‐zaɣa‐kɛɛ wo ga ani ná ɣa Saimɔi nii daa ga Pite daa‐zu vɛi ɣɛ na. 19Tei Pite ɣɛni ɣi gaa ziɛzu fai nii ma é wuuni gaazu, Gala baa ŋinɛgi ɣɛni ma, “Wɛlɛ, zinaa felegɔ ta è ɣaa ziɛzu. 20Wu ziɣi è vile. Vɛɛ te va wa tiɛni wo li. È mɛ lɛ ɣi gaa ziɛ, ƃɔvɛlaale gè te levega.” 21Pite vile pele ɣa na é ɣɛ é li zinaitiɛ wɔ vɛ é ɣɛ tea, “Nà ɣa gè ga nui wo gaa ziɛzu. ?Wo vaa ʋai mazaƃui ɣa ga zɛƃɛ?” 22Te ɣɛ tea, “Kɔniilia nii é ga sɔdasi wũ gila wũ‐tuo nui tuo vele ɣaa lɔgɛi yíɛ luo Gala ba, nui nii daa‐wo goi vagɛi Dusi yui ɣaazɔ zu, towaa Gala ta ɣɛɛla maa‐wuai pele wuloni la ga é keela leve è luo è va ná pɛlɛi wu. Na ɣa ɣɛɛ na é nii mɛni é è la ga è bo.” 23Te lili pele ɣa na é ɣɛ bɛ́ pɛlɛi wu ga te ɣɛ ga maa wɛ̃ɛya.

Na wulu ʋoloi é wu ziɣini ta tiɛni te li. Na ɣa ɣɛɛ na Gala pɛlɛ wu veaitiɛ te ɣɛni Japa taniga te vɛɛni ba. 24Na wulu ʋoloi é lɛɛni Sɛsɔluiya. Kɔniilia ɣaazu ɣɛni te luo. Na ma é kaa yɔ̃wɔitiɛ lilini ɣɛ ŋada ɣila é vɛɛ ná siɛ puluitiɛ va. 25Tei Pite lɛɛni pɛlɛi wu, Kɔniilia vaani túo é loo kɔwɔ wu é feli. 26Kɛ̀ Pite bu ziɣini yíɛ ɣɛ ma, “Wu ziɣi è lo. Nà ƃalaa gà ga nu ƃuse.” 27Tei sa é ɣɛni ƃɔɛzu pɔ́, é liini é wɛlɛ nu lamaa va gaa lɛi ba. 28É ɣɛ te ma, “Wa ƃɔɔ wo kwɛ̃ni ga velei ɛ́ lɛ la tɔ su Dusi nu ʋaa ma ga é vɛɛ zii ta ƃɔnɔ nɛpɛ ba ɔɔ é laali ma. Kɛ̀ Gala ge dɛɛ gàazu ga gè mɛ lɛ nu ta nɛpɛ tili ga nui ƃaa lɛ ma ɔɔ nii maa lɛ ziɣini. 29Na ma tei te nu leveni tùo, gè vaani sakpe ta nɛpɛ gɛ lɛ ŋɛni zìi zu. Nii mavele ma gà wo ɣaa zaɣa kɛɛzu ga zɛƃɛi wo tìliga ma?” 30Kɔniilia ɣɛni tea, “Folo saagɔ levega sa gè ɣɛni Gala felizu ga kpɔkɔ ʋolo ɣaa ƃaa‐ƃaa. Vɛ yɔɔzu nɔ ná wuloni. Nu wɔgi é ɣɛɛzu zunu ta ɣɛni loni dàa wu seɣe ʋolo‐ʋolo ge kɔ ba 31yíɛ ɣɛ tea, ‘Kɔniilia, yà Ɣala‐feliai mɛnigɛ Gala bɛ. Na ɣa ɣɛɛ na yà ʋaa‐nɛɛ‐ɣɛɛ ɣalama ɣa Gala kuu zu. 32Na ma nu leve Japa é Saimɔ nii ɣalama ɣaa‐zaɣa kɛ daa ga Pite. Daa‐zu vɛɛvɛ kɔlɔ‐vaa nui Saimɔ na pɛlɛi wu yuwu wukũigi va.’ 33Keela leve pele ɣa na bɛ̀ ɣɛ è luo ga maa ʋilea. Yà wɔ kaze lɛ ŋɛni yìɛ, è vaa. Na ma gé ɣaazɔ gá vɛ Gala gaazu kɛɛ ʋaa ma gé nii ɣaazɔ mɛni de maliɣii è leʋea la ga è bo.”

Pite ɣa ƃɔɛzu Kɔniilia na pɛlɛi wu

34Pite ƃɔɛ lɔɔ zei sa é ɣɛ tea, “Gaama zu, gè wɛlɛɛ ná va ga Gala gɛ lɛ ga nui yá nu zu ɣɛvɛ. 35Kɛ̀ zii ɣaazɔ zaama nui nɛpɛ yá luo Gala ba yíɛ gaamai ɣɛ, towaa yá yee zei bu. 36Wo woi wɛ̃ni é teveni Yezɔi veaitiɛ wɔ vɛ yíɛ woo vagɔi wo é vile zii‐laa va Ziizɛ Kolai zaala zu (tɔ ga nu pɛ maliɣi). 37Woi nii é woni ga goo maa zeeze Yudiiya yui zu wɔlɔ‐kɔlɔ ma ɣaali, nii tɔɔ zeini Geealali, tei sa bataize‐ɣɛɛ ʋai nii Jɔ̃ maƔala goi woni é wuloni ba. 38Wo kwɛ̃ni ga velei Gala ge yee ƃadoni la Nazɔi Yiizɛ va ga baa ŋinɛgi levega pɔ́ ta gaa‐ƃaa ʋeea zéea. Wo kwɛ̃ni wɔnɔ ga velei é vileni la ga faa vagɔ‐ɣɛɛ ta niitiɛ ɣaazɔ valoa dɛvele zeiyai ɣɛ te ɣa, ƃɔvɛlaale Gala ge ɣɛni koba. 39Tɔwɔ gá ga seelea nii ɣaazɔ ʋaa ma é kɛɛni Dusiitiɛ ta yui zu é vɛɛ Yɛlusulɛɛ lai zu va. Te paa velei ɣɛɛni ga sɛlɛga gulu ma. 40Kɛ̀ Gala ge bu ziɣini foloi sava kelei ma é maa wodo 41ɛ́ lɛ ga nui ƃɔgɔpɛ gaazu, kɛ̀ gé ɣaazu gái Gala ge yee ƃakoni gé va ga gé ɣɛ ga seelea, na ɣa ga gái gé laa miini gé ƃoale gá tiɛni bu ziɣiai ma saa ya. 42É gé leʋeni ga gé Gala goi wo numaitiɛ ma, na ɣa ɣɛɛ na gé seele woo ʋe ga towaa é ga nui kuloai Gala bɛ ga é ɣɛ ga ʋulu vea ta saa vea ta ʋaa‐wo gaa‐leve nui. 43Towa Gala daa woo‐wo beaitiɛ ƃɔgɔpɛ te mazeele woo ʋeezu ga nui nɛpɛ yá maʋaa ziɣi ga gaama towaa faa yowũ zu‐ʋaa‐yɛga maa zɔlɔ wo ná daa‐zeigi zaala zu.”

Gala baa ŋinɛgi ɣa vaazu zii ƃalaagitiɛ wɔ vɛ

44Tei Pite ɣɛni dɛ nɔ nii wosu, Gala baa ŋinɛgi vaani nui ɣaazɔ wɔ é woi mɛnini. 45Na ɣa ɣɛɛ na niitiɛ te yɛni Pite wulu te va te ɣɛni ga niitiɛ te Ziizɛ ʋaa ziɣini ga gaama sei‐kpoto‐ma veaitiɛ zaama. É te ɣaazu laa ʋeni, ƃɔvɛlaale Gala baa ŋinɛgi maʋaa‐nɛi laa loa ƃalaa pɛ ga zii ƃalaagitiɛ. 46Ƃɔvɛlaale te te woo mɛnini tiɛ ƃɔɛ woo laali‐taaliga zu tiɛ Gala na daa‐zeigi maa lɛ. Na ma Pite boni yíɛ ɣɛ tea, 47“?Nu ta nɛpɛ ka zoo é ziɛ maʋaa zakpe bataize‐ɣɛɛ ʋaa ma ga numai niitiɛ te Gala baa ŋinɛgi yee maa zɔlɔ woga è ɣɛ velei nɔ de kɛɛ la?” 48É bo sa ga bataizei ɣɛ ga tiɛ Ziizɛ Kolai na daa‐zeigi zu. Te maa nɛɛnɛ sa ga é ŋiila felegɔ ɣɛ na.

Currently Selected:

TE ƔƐƐ VAITIƐ 10: DN1971

Highlight

Copy