Mark 13

Jesus taak bout di Templ weh dehn gwain brok dong

(Matthew 24.1, 2; Luke 21.5, 6)

1Wen Jesus wende lef di Templ, wan a ihn disaipl seh, “Tiicha, luk pan demya bildin; how dem prity wid dehn uova big brik!”

2Jesus ansa ahn seh, “Unu si aal demya big bildin? Non a dem no gwain lef deh stan op, nat iivn wan brik pan tapa wan anada, weh dehn no gwain chruo dong.”

Di trobl weh deh kom

(Matthew 24.3-14; Luke 21.7-19)

3Lieta, wen Jesus wende sidong him wan op pahn Alivz Mountin, uova di neks saida di Templ, Peter, James, John, ahn Andrew kom taak wid im iina praivit. 4Ahn dehn seh, “Tel wi, wentaim demya tingz gwain hapm, ahn wish sain wi gwain si fos so wi kyan nuo seh aal dis gwain suun staat?”

5Den Jesus staat ansa dem seh, “Unu wach out, ahn no mek nonbady fuul unu op, 6bikaaz plenty pipl gwain kom deh yuuz mai niem deh seh, ‘Ai dah di Mesaya!’ Ahn dehn gwain fuul'op plenty a unu. 7Wen unu hier dehn taak bout plenty waar ahn rayat, no get fraitn, bikaaz aal demya tingz gwain hafy hapm fos, bot dat no miin seh dat dah di en yet. 8Di kontry dem gwain fait gens wan anada, ahn di kingdom dem gwain fait gens wan anada tu. Iina plenty difrent plies di ort gwain shiek, ahn di pipl dem gwain paas hongry. Aal demya tingz dah jos di biginin a plenty sofarin, laik di pien wan uman weh deh briid get jos bifuor ihn gat ihn pikniny.

9“Unuself fi wach out. Dehn gwain grab unu ahn ker unu dah di Kongsl dem. Ahn dehn gwain biit unu op iina di sinigag dem sieka mi, ahn unu gwain hafy gi akount ah weh unu biliiv fronta di govana ahn king dem. 10Ahn bifuor aal dis hapm, aal di pipl dem mos hier di gud nyuuz fos. 11Bot wen dehn grab unu ahn ker unu dah di joj, unu no fi fret bout weh unu gwain seh fi difen unuself. Wen di taim kom fi unu taak, seh wat di Laad put iina unu main fi seh, bikaaz di wod dem weh unu gwain seh dah no fi unu wod, bot fi di Holy Spirit. 12Wan breda gwain gi uova ihn uon breda fi dehn kil im, ahn di pupa dem gwain gi uova dehn pikniny fi dehn kil dem, ahn di pikniny dem gwain get gens dehn pierans fi dehn kil dem tu. 13Ahn evrybady gwain hiet unu sieka unu chros ahn fala mii. Bot enywan a unu, weh kiip ihn fiet tu di en, gwain get siev.

Jesus tiich bout di Teribl Ting weh gwain hapm

(Matthew 24.15-28; Luke 21.20-24)

14“Ahn unu gwain si di Uova Teribl Ting deh stan op iina di Holy Plies weh ih no bilang. So wen unu si dis hapm —mek di wan weh deh riid dis leta andastan dis— aala dem weh liv dah Judea lan fi hory, go'op pan di mountin dem. 15Di man weh deh pan ihn hous-tap no fi luuz taim deh kom dong fi tek out enyting weh deh iina di hous, 16ahn di wan weh deh work iina ihn grong, no fi go bak huom fi get ihn kluoz dem, bot ihn fi ron striet op pan di mountin tu. 17How haad ih gwain bii iina demde diez fi di uman dem weh deh briid, ahn demde weh gat dehn likl bieby iina han! 18Prie tu God fi demya tingz no hapm iina kuol taim, 19bikaaz iina daty taim plenty sofarin gwain deh, di kain a sofarin weh neva hapm sins God kriyiet di worl til now; ahn notn no gwain bii laik dis aftawod. 20Ahn if di Laad neva shaatn op demya diez, nonbady wuda get siev; bot jos sieka dem weh God wehn chuuz, ihn gwain shaatn di taim.

21“Den if enybady tel unu iina daty taim: ‘Unu luk yah!’ or, ‘Unu luk deh! Dis dah Christ, di Mesaya!’ unu no biliiv dem. 22Bikaaz plenty faals Christ ahn faals prafit gwain kom op. Ahn dehn gwain trai trik di pipl deh shuo dem som big mirakl ahn wandaz tu. Dehn gwain iivn trai trik di pipl weh God don chuuz, if dehn kyan fuul dem tu. 23So unu wach out! Memba, Ah don tel unu evryting bifuor ih hapm.

Wat gwain hapm wen Jesus, di Son a Man, kom bak pan ort

(Matthew 24.29-31; Luke 21.25-28)

24“Den afta dis taim a sofarin kom tu di en, di son gwain get daak ahn di muun no gwain shain niida. 25Ahn di staar dem gwain faal dong fahn op iina di ier; aal di powa dem fahn iina hevn gwain get shiek op. 26Den evrybady gwain si di Son a Man deh kom bak iina di kloud dem wid plenty powa ahn gluory. 27Ahn den, ihn gwain sen out ihn ienjel dem tu di four kaana a di ort fi gyada tugeda dem weh God don chuuz fahn aal uova di worl, fahn wan en tu di ada en.

Dis dah how wi gwain nuo seh di taim deh nier

(Matthew 24.32-35; Luke 21.29-33)

28“Unu laan wan lesn aafa di fig trii: wen di lim dem staat put out liif, unu nuo seh drai weda deh nier. 29Rait so, wen unu si aal demya tingz weh Ah tel unu bout staat hapm, unu wi nuo seh di taim deh nier, ahn ih gwain staat kwika an weh unu tink. 30Hier dis chruut weh Ah deh tel unu: Aal demya tingz gwain hapm bifuor di pipl weh deh liv iina daty taim ded. 31Disya hevn ahn ort gwain don weh wid, bot aal weh Ai deh tel unu gwain kantinyo fareva.

Nonbady no nuo di die nar di taim wen Jesus deh kom bak

(Matthew 24.36-44; Luke 17.26-36)

32“Bot nonbady no nuo di die, nar di taim a di die wen di Son a Man gwain kom bak; nat iivn di ienjel dem iina hevn, nar di Son, bot ongl God di Faada nuo dat. 33So unu pripier ahn pie atenshan, bikaaz unu no nuo wish die Ah deh kom bak. 34Ih gwain bii laik wan man weh gwain dah wan foor kontry ahn lef ihn sorvant dem fi main ihn hous. Ihn lef work fi evry wan a dem ahn ihn tel ihn wach-man fi wach gud. 35So, unu beta kiip unu ai uopm, bikaaz unu no nuo wen di uona a di hous deh kom bak. Ih maita bii iina di iivnin or migl nait or bifuor die or afta di son kom op. 36If unu no nuo wen ihn deh kom bak, mek shuor seh ihn no fain unu deh sliip laik sombady weh no pripier. 37So wat Ah tel unu, Ah tel evrybady els: Kiip deh wach!”

Currently Selected:

Mark 13: NTIC

Highlight

Copy