Matthew 26

Di Jewish liida dem plan fi kil Jesus

(Mark 14.1, 2; Luke 22.1, 2; John 11.45-53)

1Wen Jesus don seh aal demya tingz, ihn tel ihn disaipl dem, 2“Unu nuo seh di Paasuova fiis gwain hapm iina two diez, ahn di Son a Man gwain get han uova ahn get niel'op pahn wan kraas.”

3Den di hai priis ahn di ada Jewish rilijos liida dem gyada tugeda iina di palis fi Caiaphas, huu dah wehn di Hai Priis. 4Dehn wende plan op how fi grab Jesus bitout di pipl dehn nuo, ahn den kil im. 5Bot dehn kiip deh seh, “Wi kyaahn du dis wail di selibrieshan gwain aan, fi di pipl dem no mek wan big prablem outa ih.”

Wan uman put porfyuum pahn Jesus

(Mark 14.3-9; John 12.1-8)

6Wen Jesus wehn deh dah Bethany toun iina Simon di Lepa hous, 7wan uman kom tu im wid wan alabasta bakl ful a wan uova dier swiit aintment, ahn ihn puor'ih out pan Jesus hed wail ihn wende sidong roun di tiebl. 8Bot wen Jesus disaipl dem si dis, dehn get beks ahn seh, “Wai yo deh wies di porfyuum? 9Wi shuor seh wi kuda sel dis porfyuum fi wan paila mony ahn den gi di puor pipl dem di mony weh wi get aafa it!”

10Bot Jesus, weh wehn nuo seh dehn wehn beks, aks dem, “Weh unu deh moles dis uman fah? Ihn jos don du somting gud fi mii. 11Bikaaz unu gwain gat di puor pipl dem roun unu aal di taim, bot unu no gwain gat mii aal di taim. 12Wen shii puor di porfyuum uova mi bady, ihn wende pripier mi fi get ber. 13Ah deh tel unu di chruut: enywie iina di huol worl weh dehn priich dis gud nyuuz, di pipl dem gwain memba dis uman ahn taak bout wat ihn wehn du.”

Judas deh baagin fi sel out Jesus

(Mark 14.10, 11; Luke 22.2-6)

14Den, wan outa di twelve disaipl dem, weh wehn niem Judas Iscariot, gaan tu di chiif priis dem, 15ahn seh, “Wat unu wi gi mi if Ah han Jesus uova tu unu?” Ahn dehn gi'im thirty piis a silva chienj, 16ahn fahn den Judas staat luk wan chaans fi dehn kuda grab Jesus.

Jesus ahn ihn disaipl dem pripier fi di Paasuova Sopa

(Mark 14.12-21; Luke 22.7-13, 21-23; John 13.21-30; 1 Corinthians 11.23-25)

17Now pan di fos die wen dehn selibriet di fiis fi di bred bitout iis, di disaipl dem gaan tu Jesus ahn seh, “Weh paat yu waahn wi fi go ahn fiks'op, so yo kyan iit di Paasuova sopa?”

18Jesus seh, “Unu golang iina di sity tu wan man —Jesus wehn tel dem ihn niem— ahn seh tu im, ‘Di Tiicha seh: Mi taim deh nier; Ah gwain selibriet di Paasuova sopa wid mi disaipl dem iina yo hous.’ ”

19So di disaipl dem du jos weh Jesus wehn tel dem fi du, ahn dehn get di Paasuova sopa redy.

20Wen di son gaan dong iina di iivnin, Jesus wende sidong roun di tiebl wid ihn twelve disaipl dem. 21Ahn wail dehn wende iit, Jesus seh, “Ah deh tel unu di chruut: Wan a unu gwain sel mi out.”

22Di disaipl dem wehn fiil uova bad wen dehn hier dis, so evry wan a dem seh tu Jesus, “Laad, dah no mii, no chruut?”

23Jesus ansa seh, “Di siem wan weh deh dip ihn han iina di pat wid mi, dah di wan weh gwain sel mi out. 24Ih rait dong seh di Son a Man hafy ded, so ih hafy hapm. Bot how bad ih gwain bii fi di man weh sel out di Son a Man! Ih wuda beta fi dis man if ihn neva baan ataal.”

25Den Judas —di siem wan weh wehn gwain sel'im out— seh, “Tiicha, dah no mii, no chruut?” Jesus seh tu im, “Judas, dah yu yoself deh seh yu dah him.”#26.25 Or: “Yu don sehso yoself.”

Di Laas Sopa

(Mark 14.22-26; Luke 22.14-20; John 13.1-35)

26Ahn az dehn wende iit, Jesus tek op wan bred ahn bles ih. Den ihn brok'ih iina piisiz ahn giv it tu ihn disaipl dem ahn seh, “Unu tek dis ahn iit'it. Dis dah mi bady.”

27Den Jesus tek op wan kop a wain ahn gi God tanks fi ih. Den ihn giv it tu ihn disaipl dem ahn seh, “Unu drink outa ih, aala unu. 28Bikaaz dis dah mi blod weh gwain ron fi plenty pipl kyan get paadn fi dehn sin dem, ahn ih gwain mek wan nyuu agriiment bitwiin God ahn ihn pipl dem. 29Ah deh tel unu: Ah no gwain drink no muo wain til di die wen Ah drink nyuu wain wid unu iina mai Faada Kingdom.”

30Den dehn sing wan hims, ahn aftawod dehn gaan op pan Alivz Mountin.

Jesus seh Simon Peter gwain seh ihn no nuo im

(Mark 14.27-31; Luke 22.31-34; John 13.36-38)

31Wen dehn get deh, Jesus tel ihn disaipl dem, “Sieka mii, aala unu gwain ron, lef mi tinait jos how ih rait dong seh, ‘Ah gwain straik di shepad, ahn aal di shiip dem gwain skyata weh.’ 32Ahn afta Ah kom bak fahn mongs di ded dem, Ah gwain dah Galilee lan hed a unu.”

33Bot Peter seh, “No mata if evrybady lef yo, yu kyan mek shuor seh Ai no gwain du'ih ataal!”

34Jesus seh tu im, “Ah deh tel yo di chruut, Peter; dis siem nait yah, bifuor di ruusta kruo, yu gwain tel lai three taim seh yu no nuo mi ataal.”

35Bot Peter seh tu Jesus, “Nuo sah, nat iivn if Ah hafy ded wid yo, Ah no gwain seh Ah no nuo yo!” Ahn di res a di disaipl dem seh di siem ting.

Jesus prie iina Gethsemane Gyaadn

(Mark 14.32-42; Luke 22.39-46)

36Den Jesus gaan wid dem dah wan plies weh dehn kaal Gethsemane, ahn ihn seh tu ihn disaipl dem, “Unu sidong rait yah wail Ah go uova dehso, go prie.” 37Ahn Jesus ker Peter ahn Zebedee two son dem wid im, ahn ihn staat fiil uova sad, ahn plenty tingz wende iina ihn main. 38Den ihn seh tu dem, “Di sadnis weh Ah fiil rait now so big Ah fiil laik ih gwain kil mi. Unu wiet rait yahso, ahn stie wiek wid mi.”

39Den Jesus gaan likl forda ahed fahn weh dehn deh, ahn ihn drap dong pahn ihn fies ahn staat prie, “Mai Faada, if yuu waahn, mek Ah no sofa aala dis. Stil yet, dah no weh Ai waahn; dah weh yuu waahn Ah gwain du.”

40Wen Jesus gaan bak weh paat ihn disaipl dem wende, ihn fain dem deh sliip. So ihn seh tu Peter, “Unu miin seh unu kudn stie wiek wid mi nat iivn fi wan owa? 41Aala unu hafy stie wiek ahn prie fi di devl no temp unu ahn mek unu sin, bikaaz iivn if unu spirit wilin, unu bady wiik.”

42So fi di sekant taim Jesus gaan prie, ahn seh, “Mai Faada, if dis kop a sofarin kyaahn paas fahn mi eksep Ah drink'ih, den mek weh yo waahn hapm, hapm.” 43Ahn wen ihn kom bak, ihn fain ihn disaipl dem deh sliip agen; dehn kudn kiip dehn ai uopm ataal.

44Den, Jesus lef dem dehso agen, ahn gaan prie fi di third taim, deh seh di siem ting agen. 45Den ihn kom bak upaa ihn disaipl dem wende ahn seh tu dem, “Unu stil yet deh sliip ahn res? Luk yah! Di taim kom now fi di Son a Man get han uova tu di sinful pipl dem fi dehn du weh dehn waahn du wid im. 46Get'op; mek wi go! Si! Di wan weh deh sel mi out deh kom!”

Dehn grab Jesus

(Mark 14.43-50; Luke 22.47-53; John 18.3-11)

47Wail Jesus wende taak, Judas —huu dah wehn wan a di twelve disaipl— get deh. Ahn wan paila pipl wid suod ahn big stik wende wid im, bikaaz di chiif priis ahn di ada Jewish rilijos liida dehn wehn sen dem. 48Now, di man weh sel out Jesus wehn don tel dem seh, “Di siem man weh Ah gwain kis dah di wan weh unu deh luk fah, so unu grab im.”

49So, siem taim Judas gaan op tu Jesus ahn seh, “Gud iivnin, Tiicha!” ahn ihn gi'im wan kis.

50Jesus seh tu im, “Mi fren, du wat yo kom yah kom du.”

Den, di ada man dehn kom op, grab Jesus, ahn mek fi ker im weh. 51Siem taim wan a di disaipl weh wehn dedeh wid Jesus haal out ihn suod, weh ihn wehn gat, chop di Hai Priis sorvant ahn kot aaf ihn iez. 52Jesus seh tu im, “Put bak op yo suod! Bikaaz enybady weh fait wid wan suod, gwain get kil wid wan suod tu! 53Yuu no tink seh Ai kuda kaal mi Faada, ahn ihn wuda sen muo an seventy thousand ienjel fi fait fi mi rait now? 54If dat hapm, how weh wehn rait dong iina di Skriptyo gwain kom chruu?”

55So Jesus seh tu di paila pipl weh wehn dedeh, “Wai unu kom out yah wid suod ahn big stik fi grab mi laik Ai dah wan tiif, wen evry die Ah yuuztu sidong iina di Templ ahn tiich, ahn stil yet unu neva grab mi? 56Bot wat hapm now dah weh di prafit dem wehn rait dong iina di Skriptyo, ahn ih mos hapm how ih seh.”

Den aal di disaipl dem lef im deh ahn ron gaan weh.

Di rilijos liida dem joj Jesus

(Mark 14.53-65; Luke 22.66-71; John 18.19-24)

57So dem weh wehn grab Jesus ker im tu Caiphas, di Hai Priis, weh paat di tiicha a di Laa ahn di ada Jewish rilijos liida dem wehn gyada op. 58Bot stil yet, Peter wende fala Jesus fahn foor til ihn get iina di Hai Priis kuot-yaad. Ahn ihn gaan sidong mongs di Templ gyaad dem fi si wat dehn gwain du wid Jesus. 59Wail dah taim kom, di chiif priis dem ahn di huol Kongsl wende luk somting fi akyuuz Jesus aafa, so dehn kuda kandem im tu det. 60Bot dehn kudn fain notn ataal, iivn duo plenty pipl wende tel lai pan im. Tu di laas, two man kom op, 61ahn seh, “Dis man seh, ‘Ai kyan brok dong God Templ ahn bil'ih bak iina three diez.’ ”

62Den di Hai Priis stan op ahn seh tu Jesus, “Weh hapm? Yu no gat notn fi seh bout wat demya man jos don seh bout yo?” 63Bot Jesus neva seh wan wod. Den di Hai Priis seh tu im, “Ah aada yo iina di niem a di livin God fi tel wi if yuu dah di Mesaya, God Son!”

64Jesus seh tu im, “Dah yu yoself deh seh Ai dah him,#26.64 cf. Matthew 26.25. bot Ah deh tel unu seh, fahn rait now unu kyan staat luk fi si di Son a Man deh sidong dah di plies a ana saida di Aalmaity. Ahn unu gwain si'im deh kom bak dong iina di kloud fahn hevn.”

65Wen ihn hier dis, di Hai Priis get so beks ihn tier uopm ihn kluoz ahn seh, “Dis man deh taak gens God! Wai wi stil niid muo wiknis? Luk, unu unuself jos don hier im disrispek God! 66So wat unu disaid fi du wid dis man?”

Di pipl dehn seh, “Ihn hafy ded!”

67Den dehn spit iina ihn fies ahn hit'im op wid dehn fis, ahn som a dem lik'im pahn ihn mout. 68Den dehn seh tu im, “Eh yo, Mesaya! Sins yuu dah wan prafit, tel wi dah huu hit yo?”

Peter seh ihn no nuo Jesus

(Mark 14.66-72; Luke 22.54-62; John 18.15-18, 25-27)

69Now Peter wende sidong outsaid iina di kuot-yaad, wen wan sorvant gyal kom op tu im ahn seh, “Yuu wende wid Jesus fahn Galilee tu.”

70Bot Peter tel im fronta evrybady seh, “Nuo sah! Ah no nuo dah weh yu deh taak bout.” 71Ahn wen ihn wehn gwain outsaida di giet, wan nada sorvant gyal si'im ahn seh tu di pipl dem weh wehn dedeh, “Dis man wende wid Jesus fahn Nazareth tu!”

72So Peter tek uot ahn seh, “Ai no nuo dah man!”

73Likl lieta di pipl dem weh wende stan op dehso kom op tu Peter ahn tel im, “Wi shuor seh yo dah wan a dem, bikaaz di wie yo taak sink yo.”

74Den ihn staat kos ahn tek uot, deh seh, “Ah no nuo di man ataal!” Siem taim di ruusta kruo. 75Ahn Peter memba weh Jesus wehn seh, wen ihn tel im, “Bifuor di ruusta kruo, yo gwain seh yo no nuo mi three taim.” Ahn ihn gaan outsaid, gaan hala ahn hala til ihn kudn hala no muo.

Currently Selected:

Matthew 26: NTIC

Highlight

Copy