YouVersion Logo
Search Icon

Luke 2

2
Jesus baan
(Matthew 1.18-25)
1Iina demde diez di Roman ruula, Caesar Augustus, wehn gi aadaz fi mek wan sensos a di huol kingdom. 2Dat dah di fos sensos weh dehn wehn mek, wen Quirinius dah wehn govana fahn Syria. 3Ahn aal di pipl dem wehn hafy go dah di toun weh dehn uol pierans dem wehn baan fi get dehn niem pan di regista lis.
4So Joseph wehn hafy lef di toun a Nazareth iina Galilee lan, ahn gaan dah Bethlehem toun, weh iina Judea lan. Bethlehem dah weh King David wehn baan, ahn so Joseph wehn hafy go dehso, bikaaz ihn dah wehn wan a King David disendans. 5So Joseph gaan deh fi regista wid Mary —huu ihn wehn gwain marid wid— ahn shii wehn pregnant. 6Ahn wen dehn wehn dedeh, di taim kom fi Mary gat di bieby, 7ahn ihn gat ihn fos bieby, wan bwai. Mary rap im op iina linin klaat ahn put im iina wan baks weh dehn fiid di animal dem iina, bikaaz non spies neva deh fi rent wan ruum fi Mary, Joseph ahn di bieby.
Di ienjel ahn di man dem weh main shiip
8Dah siem nait, som man dehn wende out dehso iina di fiil, ahn dehn wende main dehn shiip. 9Den aalava sodn wan a di Laad ienjel apier'op pan dem, ahn plenty lait fahn God shain pan dem. Ahn di man dem get uova fried. 10Bot di ienjel seh, “Unu no get fraitn! Ah kom fi gi unu wan gud nyuuz, weh gwain mek aal di pipl dem get glad. 11Bikaaz tinait unu Sievya, Christ di Laad, don baan aredy iina David toun!#2.11 Nuotis seh: “David toun” dah di plies weh, David —di bwai weh ton wan a di muos powaful King a Israel— gruo'op. 12Ahn dis gwain bii how unu wi nuo seh dah chruut: Unu gwain fain di bieby rap op iina som linin klaat, ahn deh lidong iina wan baks weh dehn fiid di animal dem iina.”
13Ahn siem taim wan paila ienjel fahn hevn kom dong bihain di fos ienjel, ahn dehn wende sing priez tu God ahn seh,
14“Gluory bii tu God hai op iina hevn,
ahn piis tu aala dem pan ort weh ihn pliiz wid!”
15Ahn wen di ienjel dehn gaan bak dah hevn, di man dem weh wende main di shiip dem seh tu wan anada, “Mek wi go dah Bethlehem, go si wat deh hapm bout weh di Laad jos don tel wi.”
16So dehn hory gaan, ahn wen dehn get dehso, dehn fain Mary ahn Joseph. Ahn dehn si di bieby deh lidong iina di baks weh dehn fiid di animal dem iina. 17So wen di man dem weh main di shiip si di likl bieby, dehn tel evrybady weh di ienjel dem wehn jos don tel dem. 18Ahn wen aal di pipl dem weh wehn hier weh di man dem wende seh, dehn wehn uova sopraiz. 19Ahn Mary memba aal demde tingz weh hapm, ahn ihn tink bout'ih plenty, ahn ihn kiip dem iina ihn haat. 20So di man dem weh main di shiip gaan bak weh dehn kom fram, deh priez God fi aal di tingz weh dehn jos don si ahn hier, bikaaz aal di tingz weh di ienjel wehn tel dem, dah wehn chruut.
Dehn ker bieby Jesus dah di Templ
21Eight diez afta Jesus wehn baan, di taim wehn kom fi sorkomsaiz im ahn gi'im niem; so dehn gi'im niem Jesus, jos laik how di ienjel tel dem fi du bifuor Mary wehn get pregnant. 22Den di die kom fi dehn go, go get bak demself kliin. So Joseph ahn Mary gaan op dah di Templ dah wan rilijos serimony fi mek bak Mary kliin, bikaaz dat dah weh Moses Laa wehn tel dem fi du. Ahn Joseph ahn Mary wehn tek bieby Jesus dah Jerusalem tu, fi gi'im op tu di Laad, 23bikaaz ih rait dong iina God Laa seh, “Aala di bwai bieby dem weh baan fos, dah fi di Laad.” 24So Mary ahn Joseph gaan dah di Templ ahn gi di priis dehn aafrin so dehn kuda obie God Laa, weh seh, “Unu fi aafa iida wan pier a dov or two wail dov.”
25Now iina dah taim dehn wehn gat wan man, weh liv iina Jerusalem, niem Simeon. Ihn wehn raichos ahn ful a di Spirit, ahn ihn wende wiet fi Israel get siev. Di Holy Spirit wende wid Simeon, 26ahn ihn wehn shuo im seh ihn neva wehn gwain ded bifuor ihn si di Mesaya, huu God wehn pramis fi sen tu ihn pipl dem. 27Dat die di Spirit liid Simeon fi go iina di Templ kuot-yaad iina di siem taim wen Mary ahn Joseph ker bieby Jesus deh fi du weh di Laa tel dem fi du. 28Ahn Simeon tek Jesus iina ihn han ahn staat priez God deh seh:
29-32“Laad, yo kiip yo pramis tu mi,
ahn Ah priez ahn tank yo!
Wid mi uon two ai Ah si di Sievya huu yuu chuuz,
huu gwain set yo pipl frii!
Ahn evry nieshan gwain si'im,
bikaaz ihn gwain bii laik wan lait,
weh gwain mek di farina nuo yo wie,
ahn gi'yo pipl Israel ana.
So now, Laad, sins Ah si'im,
yo sorvant kyan ded now iina piis.”
33Joseph ahn Mary kuda haaly biliiv weh Simeon wehn seh bout dehn son Jesus. 34Ahn Simeon bles dem ahn seh tu Mary, “Hier weh Ah deh tel yo: God pik yo son fi siev plenty pipl iina Israel lan, bot plenty a dem gwain get laas tu. Ahn az fi demya pipl, ihn gwain bii laik wan sain fahn God tu dem, bot dehn gwain rijek im ahn mak ihn mesij. 35So aal di tingz weh dehn huol diip dong iina dehn haat gwain kom out iina di lait.
“Ahn az fi yuu, yo gwain sofa plenty fi si aala dis, laik if dehn wehn stab yu iina yo haat wid wan suod.”
36Now wan uman prafit weh wehn niem Anna —Phanuel daata fahn di traib a Asher— wehn dedeh tu. Ihn wehn uova uol, ahn wehn liv wid ihn hozban ongl seven yierz bifuor ihn ded. 37Anna dah wehn wan wido til dah taim wen ihn wehn gat eighty-four yierz. Ihn neva lef di Templ ataal, bot nait ahn die ihn wende waaship God, deh faas ahn deh prie. 38Di siem taim wen Simeon wende bles Jesus, Anna kom op tu Mary dem, ahn gi God tanks fi weh ihn si. Ahn fahn daty taim, Anna wende taak bout Jesus tu evrybady weh wehn iina di Templ deh wiet fi God fi frii Jerusalem.
39Afta Joseph ahn Mary don weh God Laa seh dem wehn fi du, dehn gaan bak dah Galilee lan dah dehn huom toun iina Nazareth. 40Ahn Jesus gruo'op strang, ahn wehn gat plenty sens; bikaaz God blesin wende pan im.
Jesus az wan likl bwai iina di Templ
41Now Jesus muma ahn pupa yuuztu go Jerusalem fi di Paasuova rilijos fiis evry yier. 42So, wen Jesus wehn gat twelve yierz, dehn gaan op dah Jerusalem akaadn tu dehn kostom. 43Ahn afta di fiis wehn don, ihn muma ahn pupa gaan, bot Jesus stie iina Jerusalem, ahn ihn pierans dehn neva nuotis. 44Dehn wehn tink seh ihn wehn dedeh wid dem iina di gruup, ahn dehn wehn don travl fi wan huol die. Den dehn staat deh luk fi im roun dehn famaly ahn fren dem weh wende wid dem.
45Bot dehn neva fain Jesus, so dehn hafy ton bak ahn gaan dah Jerusalem, gaan luk bak far im. 46Afta three diez, dehn fain Jesus iina di Templ kuot-yaad, deh sidong wid di tiicha dem, ahn deh hier dem, ahn deh kwestyan dem tu. 47Evrybady weh hier Jesus wehn sopraiz wid how ihn andastan ahn ansa dem. 48Ahn wen ihn muma ahn pupa dem si Jesus, dehn wehn uova sopraiz. Ihn muma seh tu im, “Mi son, wai yo triit wi so? Mii ahn yo pupa wende luk fi yo lang taim ahn deh wory uova yo.”
49Jesus wehn sopraiz ahn ihn aks dem seh, “Wai unu wende luk fi mi iina wan nada plies? Unu no nuo seh Ah fi deh iina mai Faada hous?” 50Bot ihn pierans neva andastan weh ihn wende seh tu dem.
51Den Jesus gaan dong fahn Jerusalem tu Nazareth wid dem ahn ihn wehn obie dem aal di taim. Ahn ihn muma memba aal demde tingz weh hapm, ahn tink bout'ih plenty ahn kiip dem iina ihn haat. 52So Jesus gruo'op rait dehso, deh get muo sensabl ahn stranga; ahn God ahn di pipl dem wehn lov im muo ahn muo.

Currently Selected:

Luke 2: NTIC

Highlight

Share

Copy

None

Want to have your highlights saved across all your devices? Sign up or sign in