Ageini 33

Yakobo Oriamo kede Esau

1Aso, Yakobo oko tingo wange di eko neno di Esau tie bino kede cuo tol ongwon (400). Di do en eko popoko idwe mege ne Lea kede Lakeri kede ne ipasoi are. 2En eko cibo apasoi kede idwe gi anyim, di Lea kede idwe mege oko lubo, di do Lakeri kede Yosepu oko bedo ki cen. 3Yakobo kikome oko kato anyim di eko ot paka tuno but omin mere; eluro wie piny tien kanyaare kakame oudo etie ot kede bute. 4Do Esau oko ringo bute di oko gwako ngute di kiko donyo koko. 5Kakame Esau otingo kede wange eko neno mon kede idwe, en eko penyo Yakobo be, “Alu ige atie kedi gi?” Yakobo oko dwoko be, “Gin kibedo idwe kame Rubanga omio ngatic ni pi kisa mere.” 6Di do apasoi oko nyiko kunono, gin kede idwe gi, di kiko luro wi gi piny. 7Lea kede idwe mege da oko nyiko kunono, gida kiko luro wi gi piny; me ajikini Yosepu kede Lakeri da oko nyiko kunono, gida kiko luro wi gi piny.

8Esau oko waco be, “Do twon esirit me leini kame ango ariamo kede gi dedede menyo?” Yakobo oko dwoko be, “Me yomo cuny adwong na di eko bino timo na bero.”

9Do Esau oko waco be, “Omina, ango atie kede jamini aroma, in wek gigo dong megi.”

10Yakobo oko waco be, “Li, okwe; ka in itieko yei pi timo nango bero poore iyei giamia me cinga, pien ateteni neno wangi rom aroma bala neno wang Rubanga, pien in igama iepone aber twatwal. 11Okwe gam giamia na kame akelo buti, pien Rubanga otimo na tim me kisa, doko da ango atie kede gi dedede kame amito.” Aso, en eko ngangao omin mere tuno en yei gamo gi.

12Esau oko waco be, “Oyai omak yongayo, ango abino ot karacel kede in.” 13Do Yakobo oko waco ne be, “Adwong na, in ingeo be idwe pwodi nep, doko miero apar pi romini kede dok kame doto idwe; ka akolo gi tetek pi ceng acel gin dedede kibino totoun. 14Pi mano, adwong na, in tel ne ngatic nin yongayo, di ango ako bino donyo lubi momot di lubere kede kite kame dok kame tie i nyima kede idwe twero ot kede, paka tuno di ango ako bino udi Seir.”

15Esau oko waco be, “Kong awek ni jo mogo kame tie keda.”

Do Yakobo oko dwoko be, “Adwong na, kara itie lole pinyo?” 16Aso, cenge nono Esau oko mako yongayo cako dok Seir. 17Do Yakobo oko ot Sukot eko gero ot kuno kede awi ne doke mege, pi mano kolwongo kanono be Sukot.

18Kakame oudo etie dwogo kede ki Mesopotamia, Yakobo oko tuno kede mulem i bomba me Sekem i lobo me Kanan, di en eko guro eema mere i nyim bomba. 19#Yosua 24.32; Yokana 4.5En eko wilo lobo kame oudo egero iye eema nono pi silingi me siliba tol acel kibut ikwae ka Kamor, en papa me Sekem. 20En eko gero alutari kuno di eko cako nyinge be El, Rubanga me Isirael.

Currently Selected:

Ageini 33: BILK13

Highlight

Copy