Tice 22

1“Imiegu na kede joapapi na, winyunu ber pido kame nan akelo i nyimu.” 2Kakame kiwinyo kede Paulo di tie yamo kede gi i leb Eburania, kiko do temuno ling kiber. Di Paulo oko waco be:

3 # Tice 5.34-39 “Ango Ngayudaya, konywala i Taruso, bomba kame tie Kilikia, di Gamaliel en kame oko pwonya i bomba noni me Yerusalem. Apwonyere iepone me daro Iswilia ka joakwari wa kiber, di aketo cunya i kom Rubanga bala kite kame wuda dedede itimunu kede i kare kanataman. 4#Tice 8.3; 26.9-11Ango atidilo jo kame bin lubo Yongayo noni, tuno kede neko gi da. Atweo cuo kede mon di arwako gi i otkol. 5Ngatel Josaseredoti kede kansulo me joadongo me piny twero jurao ango. Bin ango agamo baluwa kibut gin, kame kowandiko but imiegu kame tie Damasiko, di ango ako ot kuno pi mako jo kame lubo Yongayo noni, di ako tweno gi ako kelo gi Yerusalem me wek mi gi alola.

Paulo Otatamo Epone me Lokere mere but Yesu

(Tice 9.1-19; 26.12-18)

6“Kakame ango oudo atie ot kede di do anoko Damasiko, tetu esawa kanyape me iceng, asara moro atek kame owok ki malo oko ngoole cara. 7Ango ako poto piny di ako winyo dwan kame waco na be, ‘Saulo, Saulo, pinyo komio in itie tidilo ango?’ 8Ango ako dwoko ne be, ‘In ngai, Rwot?’ En eko waco na be, ‘Ango en Yesu me Nasaret kame in itie tidilo.’ 9Jo kame bin upere keda oneno asara nono, do likame kiko winyo dwan ngat kame oudo tie yamo keda. 10Ango di ako penye be, ‘Rwot, nan do atim nyo?’ Di Rwot oko dwoko na be, ‘Yai iko ot Damasiko di oko bino waco ni gi dedede kame koiko pi in timo.’ 11Kite kame oudo likame akaruno neno kede piny pi rieny me asara nono, jo kame bin upere keda nogo oko mako cinga di kiko pena kikela tuno Damasiko.

12“Icuo moro kame nyinge Anania, dano kame bin woro Rubanga, doko di elubo Iswilia wa oudo tie kuno. Iyudayan dedede kame bin bedo Damasiko oudo pwoye be eber. 13En eko bino buta eko cungo i ngeta di eko waco na be, ‘Omina Saulo, cak bobo neno piny.’ Esawa nono di wanga yabere, di ako nene. 14Anania oko waco na be, ‘Rubanga ka joakwari wa otieko yeri pi ngeno gikame en emito, pi neno Dano Kopoore kede pi winyo kop kame wok ki doge. 15Pien in ibino bedo ijura mere but jo dedede i kom gikame ineno kede kame iwinyo. 16Nan do itie daro nyo? Yai batiso in, di ilwongo nying Rwot me wek lwok dub ni.’

Ooro Paulo but Jo kalikame Iyudayan

17“I kare kame ango bin adwogo kede Yerusalem, ako neno gianyuta di oudo atie ilega i tempulo. 18Aneno Rwot di waco na be, ‘Susunyo yai tenge ki Yerusalem, pien jogi likame oyaro yei kop kame in itie yamo i koma.’ 19Ango ako dwoko ne be, ‘Rwot, gin ikom gi kingeo be ango bin abungo jo koyei in i sinagoga acelacel, doko di arwako gi i otkol. 20#Tice 7.58Doko i kare kame koonyo kede remo ka Sitepano, ngat kame oudo obedo mujura ni, ango da oudo atie cungo kanono di apwoyo tim gi nono, doko di adaro igoen me jo koneke.’ 21Di en eko waco na be, ‘Yai ioti, pien ango ayaro cwani kakabor but jo kalikame Iyudayan.’ ”

22Jo oudo obedo ciko yit gi winyo yamo ka Paulo tuno kede i kop me ajikini noni. Di do kiko donyo redo di kiwaco be, “Poore rweny kede epone me dano ni ki lobo kan! Pien likame poore ne kuo.” 23Kakame oudo gin kicelakino kede di kikwito igoen gi malo, doko di kidunyo apua, 24ngadwong me isirikalen oko ciko be ter Paulo i paco me isirikalen. En eko mino dwan be dae di kopepenyo en pi udo niang i kom gikomio jo oudo tie woo i kome kamano. 25Do kakame gin oudo kitieko twene kede auno, Paulo oko penyo ngadwong me isirikalen kame oudo tie cungo kuno be, “Iswil yei ne wu dano ngat kobedo Ngaroma i anywali mere, doko da di pwodi likame kongolo ne kop?”

26Kakame ngadwong me isirikalen owinyo kede kop noni, en eko ot but ngadwong kame lo isirikalen dedede di eko penye be, “Nyo kame in imito timo? Icuo ni obedo anywali me Roma.”

27Ngadwong kame lo isirikalen dedede oko bino but Paulo di oko penye be, “Waca ber, in ibedo anywali me Roma?”

28Paulo oko dwoko ne be, “Ebo.” Ngadwong kame lo isirikalen oko dwoko ne be, “Ango aculo sente alac pi bedo anywali me Roma.” Paulo oko waco ne be, “Do ango konywala iye anywala.”

29Cucuto jo kame bin tie mito pepenyo en oko sarakin oweke; kiton ngadwong kame lo isirikalen da oko doko lwor, pien oudo eniang be oudo etweo Paulo, dano kame obedo anywali me Roma.

Kotero Paulo i nyim Kansulo

30Oru mere, ngadwong kame lo isirikalen dedede oudo mito ngeno nyo kikokome komio Iyudayan opido Paulo. En eko gonyo Paulo di eko ciko jodongo me josaseredoti kede kansulo lung pi ariamakin. Di do en eko tero Paulo di eko keto i nyim gi.

Currently Selected:

Tice 22: BILK13

Highlight

Copy