Tice 19

Paulo i Epeso

1Kakame Apolo oudo tie kede Korinti, Paulo oko wok ki tetu malo me piny nono, di eko tuno Epeso. En bin eko udo jo mogo kame lubo Kirisito tie kuno 2di eko penyo gi be, “Bin ikounu pong kede Tipo Kacil i kare kame iyeunu kede Kirisito?” Gin kiko dwoko ne be, “Li, doko cako wan lem likame pwodi owinyo be Tipo Kacil tie da.”

3Paulo di oko penyo gi be, “Bin kobatiso wu batisimu mene?”

Gin kiko dwoko be, “Batisimu kame Yokana opwonyo kop mere.”

4 # Matayo 3.11; Marako 1.4, 7-8; Luka 3.4, 16; Yokana 1.26-27 En eko waco ne gi be, “Batisimu kame Yokana opwonyo kop mere bin tie pi jo kame oswilaro ki dub gi; en oudo ewaco ne jo be kiyei ngat kame oudo oyaro bino ki cen ngee, ngat nono en Yesu.”

5Kakame kiwinyo kede kop noni, oko do batiso gi i nying Rwot Yesu. 6Kakame Paulo oketo kede cinge i wi gi, Tipo Kacil oko bino i kom gi, di kiko donyo yamo i leb kanyen kede kiko donyo murao. 7Gin dedede oudo kiromo jo tomon kiwie are.

8Pi dwete adek, Paulo oko bedo ot i sinagoga di eyamo abongo lworo, en oudo epiemo kede gi di ekwao cuny gi i kom kop kame mako Ajakanut ka Rubanga. 9Do mogo kikom gi oudo wi gi tek, doko di kiko dagi yei kop ka Paulo, di kiko donyo yamo kope areco i kom Yongayo ka Rwot i dier jo. Paulo oko yai kibut gi, di eko tero jo kame bin lubo Yesu eoto kede gi, di eko donyo piem kede jo ceng dedede i ot me pwony ka Taruno. 10Man oko meede timere pi mwakini are, oko mino jo dedede kame bedo Esia, Iyudayan karacel kede Jogurik, oko winyo kop ka Rwot.

Awobe ka Sikeba

11Rubanga oko tic kede cing Paulo me timo giaura adongodongo, 12omio oudo kotero kiton itambalan kede igoen mege ne jotuwo, di tuwo gi ko cango, doko tipo areco kame tie i kom gi da ko yai. 13Iyudayan mogo kame bin rimo arima di kiriamo jwogi oko gida donyo lwongo nying Rwot Yesu pi riamo tipo areco kikom jo di kiwaco be, “Aciki i nying Yesu kame Paulo pwonyo kop i kome.” 14Awobe kanyaare, idwe ka Sikeba kame oudo obedo Ngatel Josaseredoti me Iyudayan oudo tie gida timo kamanoni.

15Do tipo arac oko dwoko ne gi be, “Ango angeo Yesu, doko angeo Paulo da, do wun alu?”

16Di icuo kame bin tie kede tipo arac nono oko lepun di eko somo i kom gi kede gero atek, di teko mere oko bwono mergi, omio kiko wokun ki ot di kiko ringo nono abongo igoen kede aporeso i kom gi. 17Jo dedede kame bin bedo Epeso oko winyo kop noni, Iyudayan karacel kede Jogurik; lworo oko mako gin dedede, di jo oko tingo nying Rwot Yesu malo. 18Jo atot da kikom jo kame oudo oyei Kirisito oko bino di kituco tim gi kakaler. 19Di jo mogo kame oudo timo tangu me jwok, oko coko itabun gi dedede karacel, di kiko wango gi i nyim jo dedede; di do kiko maro wel sente me itabun kame kiwango oko romo ogap me siliba#19.19 ogap me siliba man oudo obedo sente kame romo culo ngatic me calo pi tic me ceng acel alutu. tutumia otkany. 20Mano oko mino kop ka Rubanga oko meede kede nyai, doko di etek adikinicel.

Atugatuga i Epeso

21Ingei gigi timere, Paulo oko moko tam mere pi ot beo ki Makedonia kede Akaya, di eko kato Yerusalem. En oudo ewaco be, “Ingei bedo kuno, miero anen be atuno Roma da.” 22Di do ingei en oro cuo mogo are kame oudo konye, Temeseo kede Erasito, pi ot Makedonia, en ber eko dong bedo Esia pi kare moro acecek.

23Tetu kare nono, arubaruba adwong oko bedo tie i kom kop kame mako Yongayo ka Rwot. 24Pien oudo icuo moro kame obedo ngatet mwola, kame nyinge Demeterio, oudo bin timo iroro me siliba ne rubanga adako kame nyinge Atemi. Doko tic mere nono oudo kelo sente atot ne jotet. 25En eko coko jo nogi dedede karacel kede jo icegun kame oudo timo gida tic acel nono, di eko waco ne gi be, “Jo na, wun ingeunu kiber be tic wa ni en kame wan oudunu kiye lim. 26Aso nan wuda iwinyunu, doko inenunu be Paulo noni otieko supo cuny jo di eko loko jo atot tenge di ewaco be rubangan kame kotimo kede cing likame obedo rubangan. En etimo man likame i Epeso kenekene, do ebuco tieko Esia lung. 27Aso, gikame rac en ine be, likame cat wa noni kenekene en kame nyinge bino dubere, do kiton tempulo me rubanga adwong adako kame nyinge Atemi da kony mere bino bedo li, doko da cengemogo kobino kwanye tenge ki deyo mere da, en kame koworo i Esia kede i piny lung.”

28Kakame kiwinyo kede kamano, cuny gi oko wang, di kiko cako woo di kiwaco be, “Atemi me Joepeso en kame dwong!” 29Man oko mino atotolun oko bedo i bomba lung, di kiko mako Gayo kede Arisitaku kame oudo obedo jo me Makedonia, kame bin upere kede Paulo, di kiko ware kede gi kionyaro karacel i ot me cokere me bomba. 30Paulo oudo mito donyo kakame ekodet tie iye, do jo kame bin lubo Kirisito oko dagi ne. 31Jodongo jowote mogo me adul me Esia da bin oko cwano ne kop, di kingangao en be kur ejal kome pi ot kacokere me bomba. 32Jo oko donyo woo; mogo woo pi gini, apat mege pi gica, pien oudo cokere do ototolun, doko jo atot kikom gi oudo kwia gikame omio gi kicokere karacel. 33Jo mogo i ekodet oko tamo be Alekesanda ngat kame bin Iyudayan opeo okelo i nyim gi en kame oudo won kop. Di Alekesanda oko tingo cinge malo di edidio gi be ber kilingi, pien oudo emito ber eda mino pido mere i nyim ekodet. 34Do kakame ekodet oniang kede be Alekesanda oudo obedo Ngayudaya, gin dedede kiko donyo lelemo kede dwan amalo pi isawan aromo bala are be, “Atemi me Joepeso en kame dwong!”

35Kakame kalani kame pugo bomba otieko mino kede jo oling, en eko waco ne gi be, “Joepeso jowota, ngai kikom wu kalikame ngeo be bomba me jo me Epeso en kame kogwoko iye tempulo ka Atemi, rubanga adwong, doko da di kogwoko iye kidi kame koworo, kame bin opoto ki malo? 36Bala kite kame inenunu kede be gigi likame ngatamoro karuno dagi, wuda poore do ilingunu, di ikounu weko timo jame kede mielkom. 37Nen nan wun ikelunu jogi kan, jo kalikame oyako gimoro ki tempulo wa, doko likame kicao rubanga wa da. 38Aso, ka Demeterio kede jotet mege en kame tie kede ingungur i kom ngatamoro, kapido tie, doko jopug da tie; wek gin kipidere. 39Do ka kop ace en kame wun itienu mono, mano wan obinunu tieko i cokere wa me nakanaka. 40Wan nan otienu i peko, pien koromo pido wa pi kelo logologo i ceng me tin, do di likame otienu kede tien kop moro kame oromo cungo iye pi kelo logologo noni.” 41Ingei yamo kope nogi, en eko do peruno jo.

Currently Selected:

Tice 19: BILK13

Highlight

Copy