Mat 6

Kupeleka ya canasa

1“Mlolecesye, mkatenda masengo genu gambone pameso pa ŵandu mwa melepe kuti amlole. Pakuti naga mkutenda yeleyo, ngasimpocela mbote kwa Atati ŵenu ŵakwinani.#Mat 23:5

2“Ni ligongo lyakwe pimkupeleka ya canasa, kasimtenda mwakulilosya, mpela mwakusatendelega ŵandu ŵa unami ŵala m'nyumba sya mapopelo* ni m'misewu ja m'misinda. Jemanjaji akusatendaga myoyo kuti ŵandu ŵalapeje. Nditu ngumsalicisya kuti jemanjajo apocele cile mbote jawo. 3Nambo m'mwe pimkupeleka ya canasa, mkono wenu wakumciji ukamanyilila yiwukutenda mkono wenu wakumlyo. 4Kuti ya canasa yenuyo yiŵe yakusisika. Nipo pelepo Atati ŵenu ŵakusalola yakusisika yosope, tacimpa mbote.

Ya kupopela

(Mak 11:25-26; Luk 11:2-4)

5“Soni pimkupopela, mkasimtendaga mpela ŵandu ŵa unami ŵala, pakuti jemanjajo akusanonyelwa kwima ni kupopelaga m'nyumba sya mapopelo ni m'malekano ga misewo ja m'misinda.#Luk 18:10-14 6Nambo m'mwe, pakupopela, mjinjile ku cipinda cenu, ni mwugale pa mlango, nipo mpopeleje kwa Atati ŵenu ŵali wakusisika. Sambano Atati ŵenu ŵakusalola yosope yakusisika, tacimpa mbote.

7“Pimkupopela, kasimgambaga kuwilisyawilisya mpela mwakusatendelaga ŵandu ŵakusa. Jemanjajo akusaganisyaga kuti naga akuculuya maloŵe iyoyo, ni kuti Mlungu tiŵapikane. 8Jemanja mkatendaga iyoyo, pakuti Atati ŵenu ŵakwinani, akusamanyilila cile yayikumsoŵa mkanimtande kwaŵenda. 9Pandaŵi jimkupopela mjileje myi:

‘Atati ŵetu ŵakwinani:

Lina lyawo licimbicikwe.

10Ucimwene wawo uyice;

kusosa kwawo kutendecekwe,

pacilambo capasi mpela kwinani.

11Atupe uwe lelo yakulya yetu ya lelo.

12Atukululucile uwe yakulemwa yetu,

mpela uweji soni mutukwakululucila ŵane ŵakutulemwecesya.

13Nipo akatujinjisya mkulingwa,

nambo atukulupusye kwa jwakusakalajo.’

14“Naga mkwakululucila ŵandu yakulemwa yawo, nombe Atati ŵenu ŵakwinani tacimkululucila jemanja soni.#Mak 11:25-26 15Nambo naga ngamkwakululucila ŵandu yakulemwa yawo, nombe nawo Atati ŵenu ngasamkululucila yakulemwa yenu.

Majiganyo gakwamba kulijima yakulya

16“Nipo pamkulijima yakulya, kasimlosyaga ngope ja canasa mpela mwakusatendela ŵandu ŵa unami ŵala. Jemanjajo akusasakasya ngope syawo melepe, kuti ŵandu ŵawone kuti akulijima yakulya. Nditu ngumsalicisya kuti, jemanjajo apocele cile mbote jawo. 17Nambo m'mwejo pamkulijima yakulya, msukusule cenene ngope jenu ni kupakala mawuta mu mtwe, 18kuti ŵandu akasamanyilila kuti mkulijima yakulya. Nambo Atati ŵenu ŵali ŵakusisika ni ŵitamanyilile. Nipo Atati ŵenu ŵakusalola yakusisikawo, tacimpa mbote.

Yipanje ya kwinani

(Luk 12:33-34)

19“Mkasiliwunjicila yipanje pa cilambo capasi pano, payili yijosolo ni mkuwo wakonanga yipanje yenu, nipo soni ŵawiyi akusapacukulanya ni kwiŵa.#Yak 5:2-3 20Nambo mliwunjicile yipanje yenu kwinani, kwele yijosolo pane mkuwo ngasiyijonanga, soni ŵawiyi ngaŵa mkupasukulanya ni kwiŵa. 21Pakuti mtima wenu tiwuŵeje kuyili yipanje yenuko.

Meso ni lilanguka lya cilu

(Luk 11:34-36)

22“Meso gali mpela nyali jakumulicila cilu cenu. Naga meso genu gali cenene, cilu cenu cosope cikusaŵaga mwilanguka. 23Nambo naga meso genu nganigaŵa cenene, cilu cenu cosope cikusaŵaga mu cipi. Sambano naga lilanguka lili mwenumwe likuŵaga cipi, cipi cakweco cikusaŵaga cakogoya kwabasi.

Mlungu ni yipanje

(Luk 16:13; 12:22-31)

24“Mundu ngaŵa mkupakombola kwatumicila acambuje ŵaŵili, pakuti pane taciŵengana ni jumojo ni kumnonyela jwinejo. Pane tacilipeleka mnope kwa jumojo ni kumnyosyaga jwinejo. Ngaŵa mkupakombola kutumicila wosope ŵaŵili, Mlungu ni yipanje.

25“Ni ligongo lyakwe ngumsalila kuti mkasimdandawulaga ya umi wenu, kuti timlye cici, kapena tim'mwe cici, pane soni ya cilu cenu, kuti tim'wale cici. Ana umi wenu ngawukusapunda yakulya? Ana cilu ngacikupunda yakuwala? 26Mlole yijuni ya mwinani: yangapanda, yangagowola mbeju kapena kututa ni kuja kutaga mu ngokwe. Nambope Atati ŵenu ŵakwinani akusayipaga yakulya. Nambi jemanja, ana nganimŵa ŵakusosekwa mnope kuyipunda yijuniyo? 27Ana ŵani mwa jemanja ni nganisyo syakudandawula mpaka apakombole konjecesya atamose lisiku limpepe pa umi wakwe?

28“Nambi mkusadandawulilaga cici ni yakuwala? Mlole maluŵa gakwitinji mugakukulila. Gangakamula masengo kapena kulipanganyicisya nguwo. 29Nambotu ngumsalicisya kuti atamose Mwenye Solomoni jwene juŵaliji jwakusicila mnope, nganawalaga yakusalala kulandanicisya ni limo lya maluŵaga.#1 Ayi 10:4-7; 2 Mbi 9:3-6 30Mlungu ni jwakusagaweca camti myoyo manyasi gakwitinji, gele gakwamba kutama lelo pejino, malaŵi gano ni kuponyedwa pa moto, nambi kwa jemanja, ana mpaka alepele kum'weca? Ana ligongo cici cikulupi cenu cikunandipa?

31“Myoyo mkadandawulaga mciganisyaga kuti ‘Ana tindye, timwe kapena timbwale cici?’ 32Pakuti ŵandu ŵakusa ni ŵakusayisosa mnope yeleyi. Nambotu Atati ŵenu ŵakwinani akusamanyilila kuti mkuyisoŵa yindu yeleyi. 33M'malo mwa yeleyi mtande kusosasosa yindu yayili yakusosekwa mnope mu Ucimwene wa Mlungu,* ni tacimpa yine yosope yimkulajila. 34Ni ligongo lyakwe mkaŵaga ŵakusingalilwa ni kuganisya ya malaŵi. Ya malaŵi ni ya malaŵi. Lisiku lili lyose lyana yakusawusya yakwe yakwepe.

Currently Selected:

Mat 6: YAWO

Highlight

Copy