Mala 1

1Awu ni utenga wele AMBUJE ŵampele Malaki kuti ŵasalile Aisalaeli.

Cinonyelo ca Mlungu pa Isalaeli

2AMBUJE akuŵeceta kuti, “Ngumnonyela jemanja ndaŵi syosope.”#Alo 9:13#Yes 34:5-17; 63:1-6; Yel 49:7-22; Esek 25:12-14; 35:1-15; Amo 1:11-12; Oba 1-14

Nambo jemanjajo akuwusya kuti, “Ana ŵalakwe alosisye cinonyelo cawo kwa uwe mwamtuli?”

AMBUJE akwanga kuti, “Esawu ni Yakobo* ŵaliji mundu ni mpwakwe, nambo nimnonyele Yakobo ni yisukulu yakwe, 3nipo nimŵenjile Esawu ni yisukulu yakwe. Cilambo cakwe ca matumbi nicitesile kuŵa cipululu, cilambo cinampele nicitesile kuŵa ca makule ga mwitinji.”

4Naga Aedomu ŵele ŵali yisukulu ya Esawu yijile kuti, “Misinda jetu jijonanjidwe ni amagongo ŵetu, nambo citujitaŵe soni,” nambo AMBUJE tacajanga kuti, “Ŵalece ataŵe soni — Une tinjijigwisya soni. Ŵandu tacijikolanga kuti, ‘Cilambo cicikulamulilidwa ni jwakusakala’ soni ‘Mtundu wele AMBUJE awutumbilile mpaka kalakala.’ ”

5Jemanja, Aisalaeli timciyiwona yeleyi ni meso genu, ni timcitiji kuti, “Ukulungwa wa AMBUJE ukusayicila atamose kusa kwa malile ga Aisalaeli.”

AMBUJE akwajamuka ŵakutaga mbopesi

6AMBUJE Ŵamaciligosope akuŵeceta kwa ŵakutaga mbopesi kuti, “Mwanace akusapeleka ucimbicimbi kwa babagwe, nipo jwamasengo akusamcimbicisya mbujegwe. Une ndili baba gwenu — ana ligongo cici ngamkunjimbicisya une? Mkusimunyosya une, nambo citamileco mkusawusya kuti, ‘Ana twanyosisye ŵalakwe mwamtuli?’ 7Akusanyosya pakupeleka cakulya cangajenela pa malo gangu gakupelecela mbopesi. Kaneko jemanja mkusawusyape kuti, ‘Ana uweji tulepele uli kwacimbicisya ŵalakwe?’ Cinimsalile — munyosisye pakuganisya malo gakupelecela mbopesi ga AMBUJE gali gangali mate. 8Pandaŵi jimkupeleka mbopesi ja cinyama cangalola kapena celemale kuti mpelece mbopesi kwa une, ana mkusaganisya kuti kweleku ngaŵa kulemwa? Naga akupeleka mbopesi ja yinyama yelemale kapena yakulwala, ana ngaŵa kulemwa kweleko? Mlinje kupeleka cinyama mpela celeco kwa bwanamkubwa! Ana jwalakwejo taŵe jwakusangalasidwa kapena kumsalalila mtima m'mwejo naga mli mumpele mtuka wamti myoyo?”#Det 15:21

9Sambano jemanja ŵakutaga mbopesi, mlinje kumŵenda Mlungu kuti atutendele canasa. Ni mituka jamti myiyi m'myala mwenu, ana mkuganisya kuti Mlungu mpaka atusalalile mtima? 10Myoyo AMBUJE Ŵamaciligosope akupitilisya kuŵeceta kuti, “Yikaliji cenene mnope kuti jumo jwa jemanja awugale matanga ga Nyumba jangu, kogopela kuti jine jwa jemanja akapamba moto wangali mate pa malo gangu gakupelecela mbopesi. Ngingusengwa ni jemanja; ngisimbocela yakupeleka yenu yimkwika nayo kwa une. 11Palipose ŵandu akusanjimbicisya une. Kulikose ŵandu akusatutumisya ubani* ni kupeleka mituka jambone mu lina lyangu. Wosope ŵeneŵa akunjimbicisya une. 12Nambo jemanja mkusimunyosya une pimkuŵeceta kuti malo gangu gakupelecela mbopesi gali gangali mate soni yakulya yakupeleka pelepo yili yangali mate. 13Jemanja mkusatiji kuti, ‘Ana kaje yeleyi kupesya ni kunyosyaga une.’ Mkusayika ni cinyama cawiyi kapena celemale kapena cakulwala kwa une mpela mbopesi syenu. Ana mkuganisya kuti Une mpaka mbocele yeleyo kutyocela kwa jemanja? 14Alwesece mundu jwa unami jwakupeleka mbopesi ja cinyama celemale kwa AMBUJE, kutendaga ali akwete cinyama cambone mwicinga mwakwe cele ciŵatesile cilanga* kuti tacimba Une! Pakuti une ndili mwenye jwamkulungwa, nipo ŵandu ŵa mitundu josope akunjogopa une.”

Currently Selected:

Mala 1: YAWO

Highlight

Copy