Yoh 9

Yesu akuposya mundu jwangalola

1Yesu* piŵajendaga, ŵam'weni mundu juŵaliji jwangalola cipagwile. 2Ŵakulijiganya* ŵakwe ŵamwusisye kuti, “Mwalimu, ulemwa* waceni uwamtendesye jweleju kuti aŵe jwangalola cipagwile? Ana wamsyeneju kapena wa acinangolo ŵakwe?”

3Yesu ŵajanjile kuti, “Pangali kulumbikana kulikose pasikati pa ungalola wakwe ni ulemwa wakwe kapena ulemwa wa acinangolo ŵakwe. Jwalakweju ali jwangalola myiyi kuti ŵandu agalole macili ga Mlungu gali mkutenda masengo mwa jwalakwe. 4Pikuli ciŵela musi myiyi, tukwenela kupitilisya kutenda masengo ga jwele juŵandumile une, pakuŵapo cilo cikwisa ni pangali jutacipakombola kutenda masengo galigose. 5Pindili pa cilambo capasi, une ni jundili lilanguka lya ŵandu ŵa cilambo capasi.”#Mat 5:14; Yoh 8:12

6Ali aŵecete yeleyi, Yesu ŵasunile mata pasi ni ŵawunyile litope ni matago ni ŵapacile litopelyo m'meso ga mundujo. 7Kaneko ŵamsalile kuti, “Jawulani mkasukusule Mwitamanda lya Shilowamu.” (Gopolela kwa lyele linali ni kuti, “Kutumidwa.”) Myoyo mundu jula ŵajawile, kuja kusukusula, ni ŵawusile ali mkulola.

8Myoyo acanasi ŵakwe, ni ŵandu ŵiŵam'weni ali mkuŵenda yeleyi mkaniyitendekwe, ŵawusisye kuti, “Ana ngaŵa aju mundu juŵatamaga pasi ni kuŵendaga jula?”

9Ŵane ŵatite kuti, “Ni jujuju,” nambo ŵane ŵatite, “Iyayi nganaŵajo, agamba kulandana basi.”

Myoyo mundujo ŵajanjile msyene kuti, “Mundujo ni une.”

10Jemanjajo ŵamwusisye kuti, “Citendece cici kuti m'mwejo mpakomboleje kulola sambano?”

11Jwalakwe ŵajanjile, “Mundu jwakolanjidwa Yesu ŵawunyile litope, ni kulipaka m'meso mwangu, ni ŵasalile kuti njawule ku Shilowamu ngasukusule. Myoyo najawile, pinagambile kusukusulapo, natandite kulola.”

12Ŵandu ŵala ŵawusisye kuti, “Ali kwapi jwalakwejo?”

Jwalakwe ŵajanjile kuti, “Ngangumanyilila.”

Afalisi akumwusya mundu juŵatandite kulola jula

13Kaneko ŵamkanganicisye mundu juŵaliji jwangalola jula kuti alongane najo kwa acakulungwa ŵa Afalisi.* 14Lisiku liŵawunyile Yesu matope ni kumposya mundu jwangalola jula lyaliji lyakupumula Ayuda. 15Myoyo Afalisi nombe nawo ŵatandite kumwucisya mundu jula mpela muŵamwucisye ŵandu ŵane ŵala muŵapakombolele kulola mwakwe. Jwalakwe ŵasalile jemanja jila kuti, “Jwalakwejo ŵambacile matope pa yikope ya meso gangu, nasukuswile ni sambano ngupakombola kulola.”

16Ŵane ŵa Afalisiwo ŵatite kuti, “Jwele mundu juŵatesile yeleyi ngaŵa mkomboleka kuŵa jwakutyocela kwa Mlungu, pakuŵa ngakupikanila kuti asunje malamusi ga Lisiku lyakupumula.”*

Nambo ŵandu ŵane ŵaŵecete kuti, “Ana mpaka yikombolece camtuli kuti mundu jwali jwa ulemwa atende yakusimonjesya mpela yeleyi?” Ni paliji pana kugaŵikana pasikati pawo.

17Myoyo Afalisi ŵapitilisye kumwusya mundujo, “M'mwejo mkuti amposisye ungalola wenu nambi m'mwe mwasyene mkuti cici ya jwele mundujo?”

Mundu juŵaposile jula ŵajanjile kuti, “Jwele mundujo ali jwakulocesya.”*

18Ayuda nganasosa kose kukulupilila kuti mundu juŵaliji jwangalola kala sambano ŵatandite kulola pa jele ndaŵijo, mpaka ŵaŵilasile acinangolo ŵakwe. 19Jemanjajo ŵawusisye acinangolowo kuti, “Ana aju mcandaju mwanagwawo? Nambi uli akuti ŵapali ali jwangalola? Nambi yitite uli kuti sambano akulola?”

20Acinangolo ŵakwe ŵajanjile kuti, “Uwe tukumanyilila kuti jweleju mwanagwetu, ni tukumanyilila kuti ŵapagwile ali jwangalola. 21Nambo ngatukumanyilila muyitendecele kuti sambano akupakombola kulola, atamose kum'manyilila juŵamposisye ungalola wakwewo. Amwusye msyenejo pakuŵa jwamkulungwa, ni talijanjile msyene!” 22Acinangolo ŵakwe ŵaŵecete yeleyi ligongo ŵajogopaga acakulungwa ŵa Ayuda,* ŵiŵaliji ali akamulene kala kuti jwalijose jwakuŵeceta kwa mjakwe kuti ŵakulupilile kuti Yesu ŵaliji Klistu* akatyosisye ni kwalekasya kwawula ku m'Nyumba jakupopelela. 23Ni ligongo lyakwe acinangolo ŵakwe ŵagambile kuti, “Amwusye msyenejo pakuŵa jwamkulungwa!”

24Ayudawo ŵamŵilasile soni kaŵili mundu juŵapagwile ali jwangalola jula, ni ŵamsalile kuti, “Lumbilani pameso pa Mlungu kuti yitimŵecete tiyiŵe yakuwona! Uwe tukumanyilila kuti mundu juŵamposisye m'mwejo ali jwa ulemwa.”

25Mundu jula ŵajanjile kuti, “Ngangumanyilila kuti mundujo jwa ulemwa kapena iyayi, cindu cimope cingucimanyilila ni cakuti, naliji jwangalola, nipo sambano ngulola.”

26Jemanjajo ŵamwusisye kuti, “Ana jwalakwejo ŵatesile cici kwa m'mwejo? Ana ŵamposisye camtuli ungalola wenuwo?”

27Jwalakwe ŵajanjile kuti, “Une namsalile jemanja kalape nipo ngamkusosa kupikana. Ligongo cici mkusosa kupikana soni kaŵili? Mwinetu nombe jemanja mkusosa kuŵa ŵakulijiganya ŵakwe?”

28Jemanjajo ŵamlwesisye papopo acimsalilaga kuti, “M'mwejo ni ŵimli ŵakulijiganya ŵa jwele mundujo Yesu, nambo uwe tuli ŵakulijiganya ŵa Mose.* 29Tukusimicisya kuti Mlungu ŵaŵecete kwa Mose, nambo kwamba ya jwele mundujo Yesu, ngatukumanyilila atamose msinda uŵapagwile!”

30Mundu jula ŵajanjile kuti, “Nambotu yele ni yakusimonjesya! Jemanja ngakukumanyilila kwakutyocela mundujo, nambotu une ni ŵambosisye ungalola wangu! 31Uwe tukumanyilila kuti Mlungu ŵangapikanila ŵandu ŵakupopela ali ŵa ulemwa nambo akusiŵapikanila ŵandu ŵakupopela ni ŵakumpikanila jwalakwe ni kutenda yakusosa jwalakwejo. 32Citandilile kalakala pangali jwalijose juŵapikene mundu jwine ali mkumwugula m'meso mundu juŵapagwile ali jwangalola. 33Aju mundu juŵambosisye uneju ŵatyocele kwa Mlungu, yingaŵe kuti ngaŵa myoyo ngamkanapakombola kutenda kandu.”

34Jemanjajo ŵamjanjile kuti, “M'mwe mwapagwile ni kumlela mu ulemwa mpaka mpakombole camtuli kulinga kutujiganya uwe?” Nipo ŵamtyosisye ni kumlekasya kwawula ku nyumba jakupopelela.

Ungalola wa mu mtima

35Yesu piŵapikene yiyatendeceyo, ŵamlolesisye mundu jula ni ŵamsimene nipo ŵamwusisye kuti, “Ana m'mwejo mkukulupilila mwa Mwanace jwa Mundu?”*

36Mundu jula ŵajanjile kuti, “Bwana asalile une, jwelejo nduni, kuti une ngulupilile mwa jwalakwejo!”

37Yesu ŵamsalile kuti, “M'mwejo mum'weni jwalakwejo kala, nipo ni mnene junguŵeceta ni m'mwejo sambano jino.”

38Mundu jula ŵatindiŵele ni ŵamlambile Yesu nipo ŵatite, “Ngukulupilila Ambuje!”

39Yesu ŵatite kuti, “Une nayice ku cilambo capasi kuti ulemwa wa ŵandu uwonecele pakulanguka, kuti ŵali ŵangalola alole nipo ŵali ŵakulola aŵe ŵangalola.” 40Afalisi ŵiŵam'wandicile Yesu ŵampikene jwalakwe ali mkuŵeceta yeleyi nipo ŵamwusisye kuti, “Ana yakuwona wawo akugopolela kuti uwe soni tuli ŵangalola?”

41Yesu ŵajanjile kuti, “Yikaŵe kuti jemanja ali ŵangalola, ngamkinakola ulemwa kose, nambo pakuŵapo akulitenda kuti akupakombola kulola, yikwamba kugopolela kuti jemanja ali ciŵela mu ulemwa mwawo.”

Currently Selected:

Yoh 9: YAWO

Highlight

Copy