Gen 43

Acalongo acimjakwe ŵa Yosefe akuwujila ku Iguputo ni Benjamini

1Mu cilambo ca Kenani sala jakusile mnope. 2Liŵasa lya Yakobo* pilyamasile kulya yakulya yiŵayice nayo kutyocela ku Iguputo yila, Yakobo ŵasalile ŵanace ŵawo ŵala kuti, “Mjawule soni, mkatusumile yakulya panandi.”

3Nambo Yuda ŵajanjile baba ŵawo ŵala kuti, “Paja mundu jula ŵatusalile cile kuti, ngaja kutukunda kuja kuwonecela pameso pakwe, naga ngatujawula ni mpwetuju. 4Naga akukunda kuti tumjigale mpwetuju, uwe tujawule kuja kwasumila yakulyayo. 5Nambo naga akukana, nowe ngatujawula, ligongo mundujo ŵatusalile cile kuti, ‘Ngasinamkunda jemanja kwika pameso pangu naga ngamkwika ni mlongo mjenujo akuno.’ ”

6Yakobo ni ŵatite, “Ligongo cici mwandandile une yisawusyo, pa kumsalila mundujo kuti mkwete mpwenu jwine?”

7Jemanjajo ni ŵajanjile kuti, “Mundujo ŵagambaga kutuwusya yetuwe ni ya liŵasa lyetu, ŵatite, ‘Ana baba ŵenu ali ciŵela umi? Ana mkwete mlongo mjenu jwine?’ Sambano uwe twaliji ŵakwenela kwanga yiwusyo yosopeyo. Ana tukamanyilile uli kuti jwalakwe tatusalile yakuti mlongo mjetujo, tujawule najo yalumo?” 8Nipo Yuda ŵasalile Yakobo baba ŵawo ŵala kuti, “Mumbe une mcandaju, kuti tunyakuce tujawuleje. Pakutenda myoyo wosopewe, kutandila ŵalakwe baba, uwe ni ŵanace ŵetu, ngasituwa ni sala. 9Une timbe jwakumlolela Benjamini. Naga une nganguwuja najo ali cijumi, ŵalakwe tanjimbe une magambo umi ŵangu wosope.” 10Tukaŵe ŵandu ŵangatenda yindu yacikokowu, sambano tukaliji tuli tupite kuja kusuma yakulya ni kuwujila soni kakwana kaŵili.

11Yakobo ni ŵatite kwa ŵanace ŵawo ŵala, “Naga yindu yili myoyo, yambone tendani. Pakwawula mjigale yisogosi yambone mnope ya mcilambo muno m'misaku mwenu, kuti mkampe mtuka mundujo. Mumjigalile soni mawuta gakupakala panandi, uci panandi, mawuta gakununjila gakulekanganalekangana, mule,* ni mtesa. 12Mjigale soni mbiya syejinji, kuti kwine mkawusye mbiya sisyasimanikwe m'misaku mwenu sila. Mwine mwakwe ŵasiwucisye mbiyasyo m'misaku mwa ngosi. 13Mumjigale soni mpwenuju, ni mnyakuce mjawule soni kwa mundujo. 14Mlungu Jwamaciligosope amtendele canasa pameso pa mundujo, kuti akamwucisye mlongo mjenu jwinejo nambo soni Benjamini kwa jemanja. Naga kuli kuwa kwa ŵanace ŵanguwo, awe nambi tindende uli.”

15Myoyo ŵanace ŵa pa ulongo ŵala, ŵajigele mituka jila, ni mbiya syejinji, ni ŵamjigele soni Benjamini. Ni ŵawutandite ulendo wakuja ku Iguputo. Piŵayice kweleko ŵajile kuwonecela pameso pa Yosefe. 16Yosefe piŵam'weni Benjamini, ŵamsalile jwamasengo jwakulolela yosope ya m'nyumba jakwe kuti, “Mwajigale ŵanduŵa ku nyumba jangu, ni mkawulaje nyama, ni kujiteleka cenene, ligongo ŵandu ŵeleŵa talye ni une musi uno.” 17Jwamasengo jula ŵatesile muŵamsalilile mula. Ni ŵapite nawo ŵandu ŵala ku nyumba ja Yosefe.

18Nambo ŵandu ŵala ŵaliji mkutenda woga kwejinji pakuyiwona kuti ŵaliji mkwajigalila ku nyumba ja Yosefe ni ŵaliji mganisya kuti, “Atujigalile akuno ligongo lya mbiya siŵasiwucisye m'misaku sila ndaŵi jandanda jila. Jwalakwejo akusaka ayice ni ngondo ja cisupucisya kuti atukamule tuŵe acikapolo ŵakwe ni kutusumula soni acibulu ŵetu.” 19Mkanajinjile m'nyumba mula, ŵaŵecete ni jwamasengo jwakulolela nyumba jula. 20Ŵatite kuti, “Ambuje, ndaŵi jandanda jitwayice kukusuma yakulya jila, 21pakuwujila twayice pa cigono, pelepo pagopola misaku jetu jwalijose ŵasisimene mbiya syakwe sili mu msakumu. Mbiyasyo syaliji syosope syene musyaŵelele pandanda, ni tuyice nasyo soni. 22Tuyice soni ni mbiya sine syakuti tusumile yakulya. Ngatukum'manyilila juŵaŵisile mbiyasyo m'misaku jetu.”

23Mundu jula ŵajanjile kuti, “Mkasimdandawula, soni mkasimjogopa. Mlungu jwenu, Mlungu jwa baba ŵenu, mwine ni juŵaŵisile mbiya m'misaku jenu. Une napocele mbiya syenu.” Jwamasengo jula ni ŵamkopwesye Simiyoni kwika kuŵaliji jemanjajo.

24Mundu jula ali ajinjile nawo ŵandu ŵala m'nyumba mwa Yosefe, ŵapele mesi ni ŵacesile sajo syawo. Acibulu ŵawo soni ŵapele yakulya. 25Acakulugwe ŵa Yosefe ŵala ŵalinganyisye mtuka wula kuti ampe Yosefe musi, ligongo ŵaliji ali apikene kuti jemanjajo talye kweleko. 26Yosefe piŵayice, acalongo acimjakwe ŵala ŵapelece mituka jila kwa jwalakwe, ni ŵamtindiŵalile. 27Jwalakwe ni ŵakomasisye, ni ŵawusisye soni kuti, “Ana baba ŵenu ŵamwasalile kuti ali ŵacekulupe ali uli? Ana ali cijumi?”

28Ni ŵajanjile kuti, “Jwakutumicila jwenu, Yakobo baba ŵetu ali cijumi soni ali cenene.” Ni ŵatindiŵele wosope ŵene kupeleka ucimbicimbi.

29Yosefe piŵam'weni Benjamini mpwawo msyesyene jula ŵawusisye kuti, “Aju akwenela kuŵa mpwenu jwakumalicisya jumwasalilaga jula. Mlungu ampele upile mwanangu.” 30Piŵaŵecete yeleyo Yosefe ŵatyosile mwacitema ligongo mu mtima mwakwe mwagumbele canasa ligongo lya mpwakwe jula, ni ŵasigele panandi kulila. Myoyo ŵapite kucipinda kwakwe kuja kukulila. 31Piŵapukwite m'meso ŵakopwece kuwujila kuŵaliji acalongo acimjakwe ŵala. Ŵalimbile soni mtima, ni ŵalamwile kuti ayice nayo yakulya. 32Yosefe ŵalyaga pa tebulo jajika, acalongo acimjakwe ŵala ŵalyaga pa tebulo jine. Ŵandu ŵa ku Iguputo ŵiŵaliji nawo m'nyumba mula nombe nawo ŵalilaga pajika, ligongo jemanjajo yanyalayaga kulya pampepe ni Ahebeli. 33Acalongo acimjakwe ŵala ŵatemi pa tebulo jijaliji pasogolo Yosefe, nipo ŵatamice malingana ni misingu jawo jakupagwa, kutandila jwamkulungwa kumalicisya jwa mnondi. Acalongo acimjakwe ŵala piŵalolite yiŵatite pakwatamika, ŵasimonjile ni ŵagambaga kulolegana. 34Yakulya yiŵalyaga yatyocelaga piŵaliji Yosefe, nambo yakulya yiŵampaga Benjamini yaliji yejinji, yapundaga yawosopewo kasano. Myoyo ŵalile ni kumwa pamo ni Yosefe mpaka kwikuta, nipo ŵasangalele najo.

Currently Selected:

Gen 43: YAWO

Highlight

Copy