Mase 13

Banaba ni Saulo ŵasagulidwe ni kutumidwa

1Mu mpingo* wa ku Antiokeya, mwapali ŵakulocesya ni aciŵalimu; Banaba, Simiyoni (jwakukolanjidwa Jwampiliwu), Lusiyasi jwa ku Kilene ni Manaene (Juŵaleledwe pampepe ni bwanamkubwa* Helodi),* kwisa soni Saulo.* 2Katema kiŵalambilaga Ambuje ni kulijima kulya.* Msimu Ŵaswela ŵatite kuti, “Mwasagule Banaba ni Saulo kuti akakamule masengo ganaŵilanjile kutenda.”

3Piŵamasile kulijima kulya ni kupopela, ŵasajice magasa ni ŵatumile.

Ya ku Saipulasi

4Banaba ni Saulo, ŵiŵatumidwe ni Msimu Ŵaswela ŵala, ŵapite ku Selusiya. Kutyocela kweleko ŵajesile mcombo ni ŵayice ku cilumba ca Saipulasi. 5Piŵayice ku musi wa Salamisi, ŵalalicile maloŵe ga Mlungu m'nyumba sya kupopelela sya Ayuda. Ŵaliji najo Yohane* Maliko,* jwakwakamucisya masengo.

6Ŵajesile pa cilumba cosope mpaka ŵajile kwika ku Pafosi. Kweleko ŵamsimene mundu jwine jwamatipwi, lina lyakwe Bala Yesu, Myuda juŵalitendaga jwakulocesya.* 7Jwelejo jwaliji mjakwe jwa bwanamkubwa jwa cilambo, lina lyakwe Seligiyo Paulo, mundu jwalunda. Jwalakwejo jwaŵilasile Banaba ni Saulo ligongo jwasacile kupikana maloŵe ga Mlungu. 8Nambo Elimasi, jwamatipwi (Elimasi ni kuti Jwamatipwi). Jwalakwe ŵajigalene nawo, kogopa kuti bwanamkubwa jula tacikulupilila. 9Nambo Saulo jwakolanjidwa soni Paulo, juŵagumbalidwe ni Msimu Ŵaswela ŵamlolecesye jwelejo, 10ni ŵatite, “M'mwe mwanace jwa Satana,* m'magongo jwa cilungamo cosope, jwamtima wa unami ni kalamuka mnope, soni ana timcileka cakaci kusokonesya matala gakulungama ga Ambuje? 11Sambano mlole, Ambuje tampe cilango. Timŵe ŵangalola nipo ngimliwona lyuŵa kwa ndaŵi.”

Papopo lyamyicilile lipundugulu ni cipi, ni ŵajesile kusosasosa ŵandu kuti ŵakamule pa mkono kuti amlongoleleje pakwenda. 12Bwanamkubwa jula piŵayiweni yiyatendekwe yila, ŵakulupilile. Pakuti ŵasimonjile nayo yele yiŵajiganyisye ya Ambuje.

Ya kwa Antiokeya mdela ja ku Pisidiya

13Paulo ni acimjakwe ŵajesile mcombo kutyocela ku Pafosi ni ŵayice ku Peliga m'boma ja Pamfiliya. Nambo Yohane Maliko ŵalesile acimjawowo ni kuwujila ku Yelusalemu. 14Kutyocela ku Peliga, jemanjajo ŵapelengenye ni kwika ku Antiokeya m'boma ja Pisidiya. Pa lisiku lyakupumula* lya Ayuda ŵajinjile m'nyumba jakupopelela Ayuda, ni ŵatemi pasi. 15Piŵamasile kuŵalanga buku ja Malamusi ni malemba ga ŵakulocesya, acakulungwa ŵa m'nyumba ja kupopelelajo ŵatumisye maloŵe gakuti, “Acalongo acimjetu, naga mkwete maloŵe gakwalimbisya ŵanduŵa mŵecete.” 16Pelepo Paulo ŵajimi ni ŵajimice mkono ŵakwe kwasalila ŵandu kuti atame jii, ni ŵatandite kuŵeceta, acitiji:

“Jemanja Aisalaeli ni wosope ŵamkogopa Mlungu, mpikane. 17Mlungu jwa mtundu wetu wa Aisalaeli, ŵasagwile acinangolo ŵetu, ni ŵatesile kuŵa mtundu wekulungwa ku cilambo ca cilendo ku Iguputo. Ŵakopwesye mcilambo mula ni mkono wakwe wamacili,#Eks 1:7; 12:51 18nipo ŵasamalile mwakupilila mcipululu yaka 40.#Num 14:34; Det 1:31 19Ŵajonasile mitundu msano ni jiŵili ja ŵandu ŵa cilambo ca Kenani, ni ŵacipelece cilamboco kwa Aisalaeli kuti ciŵe cawo kwa yaka 450.#Det 7:1; Yos 14:1

20“Panyuma pakwe ŵapele ŵakulamula mpaka ndaŵi ja jwakulocesya Samuele.#Ŵak 2:16; 1 Sam 3:20 21Kaneko ŵandu ŵaŵendile kuti ŵape mwenye, nipo Mlungu ŵapele Saulo, mwanace jwa Kishi, mundu jwa lukosyo lwa Benjamini kuti aŵe mwenye jwawo kwa yaka 40.#1 Sam 8:5; 10:21 22Panyuma pakwe Mlungu ŵamtyosisye Saulo, ni ŵamŵisile Daudi* kuti aŵe mwenye jwawo. Nipo Mlungu ŵatite ya jweleju kuti, ‘Namsimene Daudi, mwanace jwa Yese, jwele jwali jwa pa mtima pangu, jutacitenda yosope yingusaka.’#1 Sam 13:14; 16:12; Mas 89:20 23Mwa yisukulu ya Daudi Mlungu ŵapelece Yesu* kwa Aisalaeli kuti aŵe Mkulupusyo jwawo mpela yiŵatite pacilanga cakwe. 24Mkanayice Yesu, Yohane ŵalalicilaga Aisalaeli wosope kuti apitikuce mtima ni kubatisidwa.#Mak 1:4; Luk 3:3 25Yohane ali asigele panandi kumalisya masengo gakwe, ni ŵatite, ‘Ana jemanja akuganisya kuti une ndili nduni? Une nganimba jwele jumkumjembecelajo. Nambo akwisa jwine panyuma pangu jwakuti une nginguŵajilwa atamose kuwula sapato syakwe.’#Mat 3:11; Mak 1:7; Luk 3:16; Yoh 1:20, 27

26“Acalongo acimjangu Aisalaeli, yisukulu ya Abulahamu,* ni ŵane wosope ŵakogopa Mlungu, utenga wacikulupusyo atutumicisye uwe. 27Pakuti ŵandu ŵakutama mu Yelusalemu ni acakulungwa ŵawo, nganam'manyilila kose Yesujo, nipo soni nganapikanicisya maloŵe ga ŵakulocesya gigaliji mkuŵalanjidwa lisiku lyakupumula Ayuda lililyose. Nambope pakumjimba magambo Yesujo kuti awulajidwe, ŵatesile yele ŵakulocesya ŵaŵecete cilepe. 28Atamose nganamsimana kose ni ligongo lyakumwulajila, nambope ŵamŵendile Pilato* kuti Yesujo awulajidwe.#Mat 27:22-23; Mak 15:13-14; Luk 23:21-23; Yoh 19:15 29Piŵamasile kutenda yele yiyalembedwe ya jwele, ŵamtulwisye pa msalaba pala ni kumŵika mwilembe.#Mat 27:57-61; Mak 15:42-47; Luk 23:50-56; Yoh 19:38-42 30Nambo Mlungu ŵamjimwisye ku ŵawe, 31ni kwa masiku gejinji ŵawonecele kwa ŵandu ŵala, nipo ŵajesile nawo kutyocela ku Galileya kwawula ku Yelusalemu. Jemanjajo ni ŵakumtendela umboni kwa ŵandu sambano.#Mase 1:3 32Nipo uwe twajigalile Ngani Syambone* jemanja, syele Mlungu ŵatesile cilanga* ni acinangolo ŵetu, 33sambano yele yiŵatesile cilanga yila atutendele uwe, yisukulu yawo, pakumjimusya Yesu ku ŵawe. Mpela yiyilembedwe m'buku jaŵili ja Masalimo,#Mas 2:7

‘M'mwe ni mwanangu,

lelo jino ndili babagwenu.’ 34Pakuti ŵamjimwisye ku ŵawe,#Yes 55:3

kuti akasawolela mwilembe.

Mlungu ŵatite, ‘Tinjapa upile wapajika

nipo usyesyene wele unalangene ni Daudi.’

35Ni ligongo lyakwe m'buku ja Masalimo jine akuti,#Mas 16:10

‘Mlungu ngisamlecelela jwamswela mtima

jwakwe kuti awole.’

36Paja Daudi ŵatesile cenene yele Mlungu yiŵasakaga pa masiku gakwe, ni ŵawile ni ŵasicidwe mwilembe pampepe ni acinangolo ŵakwe, nipo cilu cakwe cawosile. 37Nambo jwele Mlungu juŵamjimwisye ku ŵawe nganawola kose. 38Sambano acalongo acimjangu, m'manyilile kuti kupitila mwa Yesu, Ngani Syambone syakululucila ulemwa* silalicidwe kwa jemanja. 39Kupitila mwa jwelejo, jwalijose jwakukulupilila tacipata cikulupusyo cisyesyene cele cimkanacipata pagamba kuya Malamusi ga Mose.* 40Sambano mkalamuce kuti yitakumyicila yiŵaŵecete ŵakulocesya kuti,

41‘Mlole jemanja ŵakunyosya,#Hab 1:5

msimonje nipo mjonasice;

Pakuŵa yingutenda lelo,

yili yakuti jemanja ngasimjiticisya,

atamose jwine amsalile.’ ”

42Piŵakopokaga Paulo ni Banaba m'nyumba jakupopelela jila, ŵandu ŵala ŵaŵendile jemanjajo kuti tayice soni lisiku lyakupumula Ayuda line kuti tiŵasimbile ngani sisyosyo. 43Piŵamasile kupwilingana ŵandu ŵala, Ayuda ŵajinji, nipo ŵandu ŵane ŵa mitundu jine ŵiŵapitikucile ku dini ja Ciyuda ŵakuyisye Paulo ni Banaba. Ŵandumetumewo ŵaŵecete ni ŵandu ŵala, nipo ŵasalicisye kuti apitilisye kuya yele Mlungu ŵatendele jemanjajo mwa umbone mtima wakwe.

44Pa lisiku lyakupumula lya Ayuda linelyo, ŵandu wosope ŵa mu msindamo ŵasongene kuti apikane maloŵe ga Mlungu. 45Nambo Ayuda piŵaweni ŵandu ŵajinji, ŵatesile wiwu ni ŵatandite kusisya yele Paulo ŵaŵecetaga nipo ŵatendele cipongwe. 46Nambo Paulo ni Banaba ŵaŵecete mwakulimba mtima kuti, “Kwajenele nditu kuti tutande kulalicila maloŵe ga Mlungu kwa jemanja. Nambo pakuti mgakanile, nipo mlilosisye kuti ngamkwenela kupocela umi wangamala,* uwe citumlece jemanja nipo tujawule kwa ŵandu ŵa mitundu jine.* 47Pajatu Ambuje ŵatulamwile kuti,#Yes 42:6; 49:6

‘Namtesile jemanja kuŵa lilanguka lya ŵandu ŵa mitundu jine,

kuti cilambo cosope cipate cikulupusyo.’ ”

48Ŵandu ŵa mitundu jine ŵala piŵapikene yeleyi, ŵasangalele ni kutogolela maloŵe ga Ambuje. Nipo wosope ŵele Mlungu ŵasagwile kuti tapocele umi wangamala ŵakulupilile. 49Maloŵe ga Ambuje gajenele cilambo cosope. 50Nambo Ayuda ŵala ŵapite kwa acakongwe ŵa mitundu jine ŵala ŵiŵamlambilaga Mlungu, ni kwa acakulungwa ŵa mu msindamo. Ŵacisisye jemanjajo kuti amlagasyeje Paulo ni Banaba ni ŵatopwele kudela jawojo. 51Ŵandumetumewo ŵakung'undile luwundu lwa kusajo syawo kulosya kwanaŵila m'myala ni ŵajile ku Ikoniyamu.#Mat 10:14; Mak 6:11; Luk 9:5; 10:11 52Ŵakulijiganya* ŵa ku Antiokeya ŵasangalele mnope nipo ŵagumbalilwe ni Msimu Ŵaswela.

Currently Selected:

Mase 13: YAWO

Highlight

Copy