Mase 11

Petulo akuwusalila mpingo wa ku Yelusalemu ngani sisyatendekwe

1Ŵandumetume pamo ni acimjawo ŵele ŵiŵaliji ku Yudeya, ŵapikene kuti ŵandu ŵa mitundu jine* apocele maloŵe ga Mlungu. 2Sambano Petulo* piŵayice ku Yelusalemu, ŵandu ŵane ŵiŵanonyelaga ya kuwumbala* ŵatandite kumnyosya Petulo acitiji, 3“Wawo ŵajinjile m'nyumba sya ŵandu ŵangawumbala mpakana kulya nawo pamo.” 4Nambo Petulo ŵatandite kwasalila yosope muyaŵelele kutyocela pandanda pasyesyene acitiji:

5“Une napopelaga mu msinda wa Yopa, natesile mpela komoka, kaneko naciweni cindu cili mkutuluka camti mpela nguwo jajikulungwa jajitaŵe songa mcece kutyocela kwinani, ni jayice pinaliji unepo. 6Ndili mkucilolecesya celeco, nayiweni yinyama yakulanjidwa ni yamwitinji nipo soni yakwaŵa ni yijuni ya mwinani. 7Nipo napikene maloŵe gakuti, ‘Petulo, mjimuce mwulaje mlye.’ 8Nambo natite, ‘Iyayi Ambuje, une nganindyeje wamba cindu cangaswejesya kapena cangalumbana.’ 9Nambo maloŵe gakutyocela kwinani gala gatite soni kuti, ‘Yele Mlungu yayiswejesye, mkayitenda yangalumbana.’ 10Yeleyi yambonecele katatu, nipo yosopeyo yanyakulidwe kwawula kwinani. 11Ndaŵi jijojo ŵayice ŵandu ŵatatu ŵele ŵiŵatumile kwika ku nyumba kwele kunatamaga. Ŵanduwo ŵatyocele ku Kaisaleya. 12Msimu Ŵaswela ŵaliji ali asalile kuti njawule kweleko pangalolela kose mtundu wawo, nipo najawile nawo. Acimjangu msano ni jumo nombe nawo ŵambecesye une, nipo wosopewe twajinjile m'nyumba ja Koneliyo. 13Jwalakwe jwatusalile yijwatite pakuliwona lilayika lili lijimi m'nyumba mwakwe ni kumsalila kuti, ‘Mwatume ŵandu ku Yopa kuti akamŵilanje Simoni* Petulo. 14Tamsalile maloŵe gaticimkulupusya pamo ni wosope ŵa mwiŵasa mwenu.’ 15Pinatandite kuŵeceta, Msimu Ŵaswela ŵayicilile jemanjajo mpela yiŵatite pakutuyicilila uwe pandanda pala. 16Nipo nakumbucile maloŵe giŵaŵecete Ambuje gala kuti, ‘Yohane ŵabatisyaga ni mesi, nambo jemanja timcibatisidwa ni Msimu Ŵaswela.’#Mase 1:5 17Sambano naga Mlungu ŵapele mtuka jemanjajo wele wuŵatupele uwe pitwakulupilile Ambuje Yesu* Klistu,* nambi une ndili ŵani kuti mpakana kombola kumlekasya Mlungu?” 18Piŵapikene gele maloŵega, ŵalesile ya kumnyosya nipo ŵamlumbile Mlungu acitiji, “Eti soni Mlungu ŵapele ŵandu ŵa mitundu jine upile wakupitikuka mtima ni kupocela umi wangamala.”*

Mpingo wa ku Antiokeya

19Ŵandu ŵele ŵiŵapwilingene ŵala ligongo lya yisawusyo yiyabucile katema kele Sitefano kiŵawulajidwe, ŵapite kwika mpaka ku upande wa ku Fenisiya, ku cilumba ca Saipulasi, ni ku msinda wa Antiokeya. Ŵalalicilaga Ngani Syambone* kwa Ayudape.#Mase 8:1-4 20Nambo pasikati pawo papali ŵane ŵakutyocela ku Saipulasi ni ku msinda wa Kilene. Ŵapite kwika kwa Antiokeya nipo ŵalalicilaga Ngani Syambone sya Ambuje Yesu kwa ŵandu ŵa mitundu jine. 21Macili ga Ambuje galiji pa jemanjajo, nipo ŵandu ŵajinji ŵakulupilile ni ŵagalawucile kwa Ambuje.

22Ngani syapikanice ku mpingo* wa ku Yelusalemu nipo watumisye Banaba ku Antiokeyako. 23Piŵayice Banaba ni kulola mwele Mlungu ŵapelele upile, ŵasangalele ni ŵasalicisye wosopewo kuti asimicisye mtima kuŵa ŵakulupicika kwa Ambuje. 24Banabajo jwaliji mundu jwambone, jwakulongoleledwa ni Msimu Ŵaswela ni cikulupi. Myoyo ŵandu ŵajinji ŵalipelece kwa Ambuje.

25Nipo Banaba ŵapite ku Talisasi kukumsosa Saulo.* 26Piŵamsimene, ŵapite najo ku Antiokeya. Jemanjaji ŵatemi pamo ni mpingowo kwa caka cimo, ni ŵajiganyaga ŵandu ŵajinji. Nipo kwa Antiokeyako ni kwele ŵakulijiganya* ŵatandite kuŵilanjidwa kuti aklistu.

27Masiku gelego ŵayice ŵakulocesya ku Antiokeya kutyocela ku Yelusalemu. 28Jumo jwa jemanjajo lina lyakwe Agabu, ŵajimi kusala yindu ya pasogolo mwamacili ga Msimu Ŵaswela kuti, tikuciŵa kwana sala jakogoya mcilambo cosope. Nipo salajo jayice ndaŵi ja mwenye Klaudiyo.#Mase 21:10 29Ŵakulijiganya ŵala, ŵapangene kuti ŵatumicisye cikamucisyo acimjawo ŵakutama ku Yudeya, nipo jwalijose atumisye malingana ni kupata kwakwe. 30Yeleyi ŵayitesile, nipo ŵatumile Banaba ni Saulo kuja kupeleka kwa acakulungwa ŵa mpingo.*

Currently Selected:

Mase 11: YAWO

Highlight

Copy